Luk 21

Mɛna wʉ oke-kuse

1Ndalɛsɛ Zisɔs âlɛ kɛ ogbendi wʉ Ɛcaa iyɛ Ofilikpamɛ, ayene sɛ vɛnʉl vɛ aŋgɔlʉvʉ ɔ̂waa mɛna ovo. 2Ayen kpaa oke-kuse wʉ ɛcianɛ sɛ âwaa vɔkʉbʉ ɔfaalɛ. 3Zisɔs akaŋɛ ala, “Mɛvɔlā anu kacɛb mɛla, oke-kuse wee âna âfo vɛnʉl vedivi vee omwem. 4Vɛnʉl vee omwem ɔ̂kafɛ kɛlɛ kɛ ɛwaŋgɛ ivo iyɛ ɔlɛ nɛnɛnɛ cɛŋ, ɛnɛ ɔna mɛna ovo, kpa oke-kuse wee nɛ ɛcian ɛna, âna ɔmanɛmanɛ kɛɛ alɛ nako.”

Zisɔs âvɔl sɛ vácɔ Ɛcaa

5Vɛnʉl vɛ oyeghe nɔnʉn vedivi ɔ̂lɛ ɛtɔwana ndalɛsɛ ɔmalɛ Ɛcaa nɛ agonu ayasɛvana, nɛ mɛna wʉsɛɛ kpaa wʉ vɛnʉl ɔlɛ-na saŋ oliŋgi Ɛcaa. Kpa Zisɔs akaŋɛ navo ala, 6“Ɔkalaka awʉ kɛ ɛvaana wʉ vɛnalɛvɛ yɛ nɛyene fan yee vimem vɛ́cɔ, wʉ masɛ igonu ɛmɔ ɛ́lɛ kɛ olindi ago ga.”

Zisɔs âvɔl sɛ mɛza-yʉl áva

7Saŋ ofii ɔn ala, “Ɔkʉnʉl, ɔkalaka wʉ fɛna ɛnɛ vɛnalɛvɛ yee víyel? Akɛvɛ ayɛ fɛna ɛnɛ áte ala kâbi wʉ vɛnalɛvɛ yee víyel?”

8Akaŋɛ navo ala, “Kɔl nini ɛmɛnɛ iyunu cuwee ndalɛsɛ ɔmɔ ácu anu ga, kici yɛ vɛnʉl váva cɛŋ kɛ ite ɛyamɛ, nɛ ɔ́kaŋɛ ala, vo kɛlɛ Klais, nɛ ala, ɔkalaka wɔɔ ɔ̂kpʉmbɛlɛ. x-Nalʉŋwa vo ga. 9Ikil yɛ nɛŋgwa ala vɛtavɛ nɛ atʉwʉlʉ ânyɔl, ɛyʉlʉ x-aciaa anu ga. Vɛnalɛvɛ yee vɛ́mbaa nɛ víyel keŋ, kpa nɛ mɛkule áva ɛpʉmb ga.”

10Ape ala, “Ɔtalɛ ɔ́nɔŋg nɛ ɔtalɛ wudi, nɛ vɛmɛfʉwa ɔ́za ɛtavɛ nɛ valindi. 11Nɛ ɔtalɛ ósuwe kɛ aziŋgil-aziŋgil, nɛ ɔ́cɔ vɛnalɛvɛ cɛŋ. Izonu yɛboona ɛ́nyɔl, nɛ vawaŋgɛ vacɔcɔ ɔ́kalɛ vɛnʉl. Vɛnalɛvɛ yee imem víyel kɛ ici-ici. Vɛnalɛvɛ yɛciaanavɛ ɛyʉlʉ nɛ akɛvɛ ayaboona kpaa ásime kɛ ago.

12“Kpa vɛnʉl vámbaa nɛ ɔ́kɔl anu, nɛ ɔ́na anu ɛcian cɛŋ. Vátimbe za nɛ anu kɛ aca ayɛ vɛ Zu, nɛ ótune anu, nɛ ɔ́wa anu kpaa kɛ ɛya, nɛ nɛ́coolu ɛpa kɛ isi kɛɛ vɛmɛfʉwa nɛ vɛgɔvɔnɔ kici ɛyamɛ. 13Kpa kiyee kána anu ɛyana ndalɛsɛ návɔl vo kɛ ito kaŋgɛghɛ. 14Kpa yeli nini ɛsɛma iyunu aŋgiee anu ala, x-nazaa ɔmɛnɛ owunu ɛyʉl kɛ ɔmanɛ kɛɛ nákaŋɛ kɛ ife ɛnayɔɔ ga. 15Ɛmɛ ɛŋga, mána anu ɔhʉmbʉ wʉboona, nɛ nɛ́cil ndalɛsɛ nátɔw navo. Nɛ vɛnʉl vɛ ɔcɔn anu vɔɔ, ɔmɔ ábɛ nɛ ɔ́kpɛla nɛ anu akasɛ nɛ ɔ́tɛna ɔmanɛ kɛɛ nɛtɔw ga. 16Masɛ vɛnʉl vunuvu ɛtʉtʉ vácɛ anu: vɛziavɛ nɛ vɛŋgwan, ɔvɔnɛŋgwanɛ, ɛcʉmbʉlʉ nɛ vaciam kpaa, váyel nɛ ɔ́yɛva anu vedivi. 17Vɛnʉl omwem vácɔn anu kici ɛyamɛ, 18kpa nɛ ɔmɔ ábɛ nɛ óyel ɔmanɛ nɛ ɛyɛma iyunu kpem-kpem ga.#21:18 Kɛ ɛyamɛ yɛ Gilik, ɔlʉndʉlʉ wee ɔkaŋɛ ala, “kpa masɛ onyu wunu ɔmɔɔ áyile kɛ ito ga.” 19Coolu nini ŋgɛghɛghɛ ndalɛ atisi ayamɛ, nɛ nɛ́kol ɛyɛma.”

Zisɔs avɔl sɛ vácɔ Zelusalem

20Zisɔs aza isi kɛ ɛvɔlana vo ala, “Ife yɛ nɛyen vɛnʉl vɛ ɛta ɔ̂gambɛlɛ Zelusalem, nɛ nɛ́cil anu ala ɛyaŋgɛghɛ kɛɛ vácɔ ɔn kîbi. 21Kɛ ɔkambɛlɛ ɔnawɔɔ, ɔmɔnɛmɔ wʉ alɛ kɛ ɛyaŋ iyɛ Zudiya, nɛ ãzowulu yʉmʉ za-yeli kɛ ɔgʉ. Nɛ vɛ ɔlɛ kɛ Zelusalem atɛŋ, õsime mʉwa. Vɛ ɔlɛ kɛ ɔswaŋ, ɔmɔ x-ama-nyɔla kini ga. 22Ɔkambɛlɛ ɔnawɔɔ ɔ́lɛ kɛ ɛyaŋgɛghɛ kɛɛ Ofilikpamɛ ɔ́na vɛnʉl ɛcian, ndalɛsɛ ɔmanɛmanɛ kɛɛ ɔsaŋgɛ kɛ oŋgwe ɔna kálɛ cɛb. 23Ɛcian yɛboona ɛ́lɛ kɛ nɛ okevi vɛ ɔlɛ nɛ afo nɛ vɛ ɔnyamba ɔvɔnʉ kɛ ɔkambɛlɛ ɔnawɔɔ! Atʉwʉlʉ álɛ kɛ ɔtalɛ wɔɔ nɛ ádaal, kici yɛ Ofilikpamɛ ɔ́lɛ nɛ ifele kɛ ito kɛɛ vɛnʉl vɛ fɛ ɔtalɛ ɔnawɔɔ. 24Vatanda váyɛva vedivi kɛ ɛsɔmʉ. Váŋgiee tɛma vedivi ndalɛ vɛnʉl vɛ ɛyaa kɛ ɛswaŋ imemi fan ɔtalɛ wee. Nɛ vatanda vɔɔ ónzighe cɔ ɔswaŋɛ ɔwasɛ Zelusalem, kaka nɛ ɛyaŋgɛghɛ kɛɛ Ofilikpamɛ ɔna vo kɛ́va-wo.

Mɛva wʉ Wanɛ wʉ Ɔnʉlʉ

25“Akɛvɛ ayaciaana ɛyʉlʉ ásime kɛ ɛyaŋgɛ nɛ kɛ ovolu nɛ kɛ akune. Kan ɛyaŋ, ɛyʉlʉ ɛ́cia vɛnʉl kaka, nɛ ɔ́yaaŋɛ ikil yɛ ɔŋgwa ndalɛsɛ ilife îlumwe nɛ sɛ ɛ̂mgbʉwa. 26Ɛyʉlʉ ɛ́cia vɛnʉl kaka, nɛ vedivi óhumwe kɛ vɛnalɛvɛ yɛ vɛ́va kan ɔtalɛ, kici yɛ ɔtavɛ vɛ kɛ ago vásuwe. 27Saŋ nɛ vɛnʉl omwem óyen ndalɛsɛ Wanɛ wʉ Ɔnʉlʉ avaa kɛ iku nɛ ɔtavɛ nɛ ɔyamanavɛ vaboonavɛ. 28Ɔkambɛlɛ wʉ vɛnalɛvɛ yee vimem víhee iyelena, nɛ nɛ́mʉwa ɛsɛla, nɛ́kond avo kɛ ago nɛ ɔtavɛsɛma, kici yɛ ɔkambɛlɛ wʉ Ofilikpamɛ ɔ́wal anu awʉ kpʉmbɛlaŋ.”

Ɛkan yɛ ɛtɛghɛ kɛɛ agɛmba

29Atɛfa vo ɛkan yee, “Tɛŋɛ nini agɛmba nɛ ɛtɛvɛ yedivi imem. 30Ɔkambɛlɛ wʉ vɛ̂waa ɛkaŋɛ iyɛfeŋi, nɛ anu ɛŋga nɛ́cil anu ala ɔswaanavɛ ôbi. 31Kɛ asɔ kpaa ɛnɛ ɔkambɛlɛ wʉ nɛ̂yen vɛnalɛvɛ yee víyele, nɛ nɛ́cil anu ala Ɔtʉlʉ vɛ Ofilikpamɛ avɛ kpʉmbɛlaŋ.

32“Mɛvɔlā anu kacɛb mɛla, vɛnʉl vɛ ɛyaŋgɛghɛ kiyee, ɔmɔ ákwo omwem sɛnɛ vɛnalɛvɛ yee víyel ga. 33Ago nɛ ɛyaŋɛ vákule, kpa amʉ ayamɛ ábɛ nɛ áwo ɛyaŋ ga.

Lɛ nini cuwee

34“Kɔl nini ayʉmʉ, ga nɛ asɛma ayunu áyiv nɛ vɛnalɛvɛ yɛ fan ɔtalɛ wee: ndalɛ ɛŋwaana mɛsɔlʉmʉ nɛ wʉgba ɛzɔw, ndalɛ izendena atuŋunu, nɛ ndalɛ itesena aza-ɛyʉl ayɛ fan ɔtalɛ. Ga nɛ ife yɔɔ íkol anu icuu ndalɛ ɔgʉla, 35kici yɛ ife yɔɔ ɛ́va kɛ nɛ ɔmɔnɛmɔ wʉ alɛ fan ɔtalɛ wee. 36Lɛ nini cuwee, vele nini ndalɛsɛ nákol ɔtavɛ vɛ náfo vɛnalɛvɛ imem yɛ vɛ́va. Vele nini kpaa ndalɛsɛ nácoolu kɛ isi kɛɛ ɛmɛ Wanɛ wʉ Ɔnʉlʉ.”

37Zisɔs alɛza-tee kɛ Ɛca ife ɛmɔnɛmɔ, nɛ kɛ ayeŋi nɛ ákiil za ca kɛ ɛkɔŋgʉ iyɛ Oliv. 38Asɔ vɛnʉl omwem ɔza-zwaŋa kɛ Ɛca odulu ɔmɔnɛmɔ, ndalɛsɛ váŋgwa ɔn.

Currently Selected:

Luk 21: Iceve-Maci

Highlight

Copy