Luk 15

Ɛkan yɛ ɛkamɛnɛ yɛ iyile

1Vɛnʉl vɛ ɔgbaala ɔkpanɛvɛ nɛ vɛnʉl vedivi vɛ oyele ɛcɔcɔɔ ozwaŋa vaa ocici, ndalɛsɛ váŋgwa kɛ nɛ Zisɔs. 2Kpa vɛnʉl vɛ Falasi nɛ vɛnʉl vɛ otee obe ohee iyinena ala, “Ɔnʉmbʉsʉ wee agbaalā vɛnʉl vɛ oyele ɛcɔcɔɔ, ayaā ɔyɛ navo.”

3Asɔ Zisɔs atɛfa vo ɛkan yee: 4“Ɔnda wunu wʉ alɛ nɛ ɛ̈kamɛnɛ ati ataŋɛn, wʉ ikil yɛ ɛmɔɔ îyile, nɛ áka-sɛɛl iyɛ ɛsaŋ iyɔɔ kɛ owemi, nɛ áza-lii yɛ ɛmɔɔ yɔɔ kaka nɛ ásʉla ɛn ga? 5Ikil yɛ âsʉla ɛn, nɛ átɛŋɛ ɛn kɛ avand ana, 6nɛ ákul nɛnɛn kɛ ɔswaŋ nɛ ɛsɛghanavɛ. Ikil yɛ abi kini, nɛ áyɛla vaciam nɛ valindi ɔnavɛ, nɛ ákaŋɛ navo ala, ‘Va-zwaŋɛ nini mɛ, nɛ sɛ́sɛgha kici yɛ mɛ̂sʉla ɛkamɛnɛ ɛyamɛ yɛ iyile yɔɔ.’ 7Mɛvɔl anu mɛla, vɛsɛghanavɛ vɛ́lɛ kɛ ɔtalɛ-atʉlʉ cɛŋ kɛ ɔnʉl ɔmɔɔ wʉ asɛɛl ɛcɔcɔɔ ɛna, nɛ vífo vɛnʉl ati anyin nɛ likwoŋ nɛ ɔtaŋɛnonyin vɛ ɔlɛ ye gel-gel, vɛ ɔma-lɛ nɛ ɛcɔcɔɔ iyɛ vásɛɛl ga.

Ɛkan yɛ agbʉnd wʉ ayile

8“Akasɛ okeyi wʉ fɛna ɛnɛ ikil yɛ âlɛ nɛ vagbʉnd vɛ ɔtav iseghi likwoŋ ɛnɛ ayile ɔmɔɔ, nɛ áka-maŋgɛ ɔtʉlʉka, nɛ áwes itimbe imemi cuwee, nɛ álii kaka nɛ ásʉla ga? 9Ikil yɛ asʉla ɔn, nɛ áyɛla vaciam nɛ valindi ɔnavɛ, nɛ ákaŋɛ navo ala, ‘Va-zwaŋɛ nini mɛ, nɛ sɛ́sɛgha kici yɛ mɛ̂sʉla ɛŋgɔl ɛyamɛ yɛ îyile yɔɔ.’ 10Mɛvɔl anu mɛla, asɔ kpaa ɛnɛ vɔzɛnda-gbalgbal vásɛgha cɛŋ kɛ isi kɛɛ Ofilikpamɛ kici yɛ ɔnʉl ɔmɔɔ wʉ asɛɛl ɛcɔcɔɔ ɛna.”

Ɛkan yɛ wanɛ wʉ ayile

11Zisɔs aza kɛ isi kɛ ɛvɔlana vo ala, “Ɔnʉmbʉsʉ ɔmɔ âlɛ nɛ ɔvɔnʉ vanʉmbʉsʉ ɔfaalɛ. 12Saŋ wanɛ wʉtinde wɔɔ akaŋɛ nɛ ɛziavɛ ɔna ala, ‘Ɛziavɛ, na mɛ kaŋgɛghɛ ɔmanɛ kɛɛ kálɛ kici ɛyamɛ.’ Asɔ ɛziavɛ ɔna akie vo ɔwaŋgɛ wɔɔ.

13“Kayele sigh ga, wanɛ wʉtinde wɔɔ azwaŋ ɔwaŋgɛ ɔna omwem, amʉwa kɛ ɔswaŋ ɔmɔ ɛlɛmb. Acɔ ɔwaŋgɛ ɔna kini kɛ ihundu. 14Wʉ âcɔ kule ɔmanɛmanɛ, izonu yɛboona ɛnyɔl kɛ ɔswaŋ wɔɔ omwem, ama-kol masɛ ɔmanɛ kɛɛ áya ga. 15Asɔ ana ɔmɛnɛ ɔna ndalɛ ɔfa kɛ nɛ ɔnʉl wʉ fɛ ɔswaŋ wɔɔ. Ɔnʉl wɔɔ atɛma ɔn ala, ãza-wanda ɛ̈kʉlavɛ ɛna. 16Aliye ala, ɔn áyiv ɔgbʉl ɔna nɛ ɔyɛ wʉ ɛ̈kʉlavɛ ɛyaa, kpa ɔmɔnɛmɔ ana ɔn ɔmanɛ ga.

17“Wʉ itoghu ɛnaghɛ kîvuu, afii ɔmɛnɛ ɔna ala, ‘Vɛnʉl ome ɛnɛ oyele ɔtʉmʉ nɛ ɛziavɛ wamɛ, avɛ nɛ ɔyɛ cɛŋ, kpa ɛnɛ mɛkwoo zaa izonu fan. 18Mákiil za kɛ nɔnʉn, nɛ mɛ́kaŋɛ nɔnʉn mɛla, “Ɛziavɛ wamɛ, mɛ̂yel ɛcɔcɔɔ kɛ nɛ Ofilikpamɛ nɛ kɛ nawe. 19Mɛma-kɛma wʉ wáyɛla mɛ wʉla wanɛ wuwu ga. Mɛkɔl uno, tɛŋɛ mɛ ndalɛ ɔnʉl wuwu wʉ ɔtʉmʉ ɔmɔɔ.”’ 20Asɔ amʉwa ɛsɛla, ahee ɛzaana kɛ nɛ ɛziavɛ ɔna.

“Kpa wʉ âlɛ tɔ ɛlɛmb, ɛziavɛ ɔna âyen ye ɔn. Isonu ɛkɔl ɔn nɛ wanɛ ɔna, azowulu za kɛ nɛ wanɛ ɔna, agambɛs ɔn saŋ asɔmbʉlʉ ɔn fɛ ɔnanɛ.

21“Wanɛ ɔna akaŋɛ nɔnʉn ala, ‘Ɛziavɛ wamɛ, mɛ̂yel ɛcɔcɔɔ kɛ nɛ Ofilikpamɛ nɛ kɛ nawe. Mɛma-kɛma wʉ wáyɛla mɛ wʉla wanɛ wuwu ga.’

22“Kpa ɛziavɛ ɔna akaŋɛ nɛ vɛnʉl ɔnavɛ vɛ ɔtʉmʉ ala, ‘Va nini ŋgʉla-ŋgʉla nɛ akʉndʉ ayaboona, ayɛ asɛva afo, nɛ nɛ́va-wa ɔn. Wa nini ɔn isindi kɛ ɔnʉmʉ-avo nɛ akɔwʉ kɛ akasɛ ana. 23Va nini nɛ agund wʉ abo afo wɔɔ, nɛ nɛ́yɛva, ndalɛsɛ asu omwem sáya, nɛ sɛ́sɛgha ɔlʉŋgʉ. 24Kici yɛ akɛ kɛ ndalɛ wanɛ wamɛ wee alɛ-kwo ye, ɛnɛ akɛ-lil. Alɛ-yile, kpa ɔkɛ-sʉla ɔn.’ Asɔ ohee ɛsɛghana.

25“Wʉ ɔ̂lɛ kɛ ɛsɛghana, wanɛ ɔna wʉ isi alɛ kɛ ɔfɛnda, wʉ âbii vaa kɛ itimbe, aŋgwa ndalɛsɛ okime, ovine. 26Asɔ ayɛla ɔnʉl wʉ ɔtʉmʉ ɔmɔɔ, afii ɔn ala, ‘Ini ɔmanɛ kayele fan?’ 27Akaŋɛ nɔnʉn ala, ‘Wanɛŋgwan wuwu âkiil va, ɛnɛ ɛziavɛ wuwu ayɛva agund wʉboona wɔɔ, kici yɛ âkul va ɔyɛma, awʉ ɔtavɛ-tavɛ.’

28“Ɛsɛma ɛcɔ ɔn kaka; atɛna wʉ ányɔl kɛ itimbe. Asɔ, ɛziavɛ ɔna asime za kɔl uno nɔnʉn. 29Kpa akaŋɛ nɛ ɛziavɛ ɔna ala, ‘Yene, mɛ̂yel ɔtʉmʉ nawe anyʉmʉ ayee amemi ndalɛ ɔfa. Mɛ̂cel obe wuwu ɔmɔɔ ga. Kpa wʉ̂na man mɛ masɛ kɛlɛ ivu yɛkaka wʉla mɛ̃yɛva, nɛ mɛ́ya nɛ vaciam vambɛvɛ ga. 30Kpa wanɛ wuwu wee, wʉ âya ɔwaŋgɛ owuwu kɛ ihundu nɛ vɔcɔswaŋ, ikil yɛ âkiili, wʉyɛva ɔn agund wʉboona wɔɔ!’

31“Ɛziavɛ ɔna akaŋɛ nɔnʉn ala, ‘Wanɛ wamɛ, wawʉ namɛ ɔkambɛlɛ ɔmɔnɛmɔ, ɔmanɛmanɛ kɛɛ mɛlɛ nako kɛlɛ ikuŋgughu. 32Kâsɛva nɛ sɛsɛgha, kici yɛ wanɛŋgwan wuwu wee akɛ kɛ ndalɛ alɛ-kwo ye ɛnɛ akɛ-lil, alɛ-yile kpa ɔkɛ-sʉla ɔn.’”

Currently Selected:

Luk 15: Iceve-Maci

Highlight

Copy