Luqaasi 23

Yesuusi akkima Pilatoosi turopa qeedame

Maati 27:1-2, 11-14; Maari 15:1-5; Yoha 18:28-38

1Orrase eyyepa ollopa xoore piisa ka xa'e ka Yesuusi qeede ka Pilatoosi turopa dehayshe. 2Ka isha xasasa paayyen ka kiini, “namoose a orrinno saanta qara maqinnon qara kayne, ‘Ka akka Qeesaari opani kipira in daannini dawrini’ Ka issi kiini, ‘Anti Kiristoosi an nuqusa.’”

3Pilatoosi ka Yesuusi kaassade ka kide, “Hela atti a nuqusa orra Yihuta'e?”

Yesuusi ka ishi oorshe ka kide, “Akka kiiti qara.”

4Sitiiyyi Pilatoosi, saarrasene a qeesewwa isho samaytaseti kide, “Anti namoose qara dapa takka nefo an akkine.”

5Ishootta xoori a kuttati isha xasasen ka kidene, “Namoose are co Kelilaayye paayye ka haka areti, piita Yihuta pisa oppa kollinni ka orra horayta xa'inni.”

Yesuusi akka Herodisi turopa dehaade

6Pilatoosi ete lela Kelila kiino dakayeeyye, ikaassade ka kide, “Hela isha nama piita Kelila'e?” 7Ka ete, akkima Yesuusi piita a Herodiisi mukinnooyye de'e, upnaadeeyye, Herodiisipa kapopa isha erke. Herodisi sitiiyyi Yursaalami kara ca. 8Heroodiisi ete Yesuusi akkeeyye, akata xasoode; maana malla qoota Yesuusi desa dakayni ka a lekatin isha akka xajeelliiy. Ka oto Yesuusi wa orra qawwanna koonooyye akkeeta kippanni. 9Semmalla Herodisi kaassuma lekaya Yesuusi kaassade. Yesuusi xoori we takkan nefo ishi in oorinne. 10Saarra a qeesewwa isho kollissampaya a seera eyye qa'aden ka a kuttati ishaaw xasasni. 11Herodisi ka xelaadi a oranna olliiyyiiw Yesuusi puyade ka qara seese ka ohaata paxaara quda uwwishe ka Pilatoosi qaropaaw isha oorshe ka erke. 12Awwse kuyyaasitiiyyi, Herodisi isho Pilatoosi ka olli dinen. Xatta turan olli paarkaalaay.

Yesuusi qara akkima toota faratamti

Maati 27:15-26; Maari 15:6-15; Yoha 18:39-40; 19:1-16

13Sekkammaayye Pilatoosi, saarra a qeesewwa ka a samayta isho samaytase piisa ollopa hale ka ishootta kide, 14“‘Orra horayta xa'inni’ Kiiten ka namoose ana qaropan deeten. Tin anti ka fuulaayshin tura isha qore; umma kisseeta, a ishina qara dehannittanenne, dapa takka nefo namoose qara an teyne. 15Herodisi nefoow, qoota dapa takka nefo qara in teynin malla, anopaaw isha oorshe ka erke, namoose dapa a minan to'o takka nefo in koone; 16Semmalla in karafa ka isha fura.” 17Pilatoosi para paroppa'e, xaysonessuma a qarantarrpeeta oppaayye, nama hidame takka samayta furri.

18Samayta piisa ka nessa takkan ullupe ka kiidee, “namoose alle tawshe ka Parpaani ino' fure.” 19Parpaani nama katamaappa tiyya xaashe ka nama ishshe ka minan hidame.

20Pilatoosi Yesuusi fureeta fade ka, a lammattati samayta haasawade. 21Samaytase xoori iullupe ka kide, “Alle fannise! alle fannise!”

22Pilatoosi ka a sessattati ishootta kideewwe Maana'e, “Xawwa namoose maananne a kata asse dape? Anti wa a minan to'a takkan nefo qara an teyne, semmalla in karafa ka isha fura.”

23Ishootta xoori nessaaysho'e kuttushen ka ullupen ka kidene, “Fannise! fannise!” Nessa samayta isho a saarra qeesewwa ka ollin koope. 24Pilatoosi ka oori wa kaassadene akka ishootta koddane'e ishootta' farate. 25Ka parpaanese, tiyya xa'issa, ka nama ikassa minan hidame, kaassumaasso qara ishootta' fure; ka akka wa heenane Yesuusi qara kodane'e harkaaysho oppa daashe.

yesuusi akkima fannisame

Maati 27:32-44; Maari 15:21-32; Yoha 19:17-27

26Ikka oori Yesuusi qeeden ka ete ishin annaaneeyye, Simooni Qerenitta, a kantadaayye kallo ka katamaapa kullino akken ka isha qapen ka qara masqalase a Yesuusi xayshen ka Yesuusi kamma isha qattishen.

27Orra lekayta ka Yesuusi kamma anni. Ishootta oppaayye iskatta a kessoppa tottoomanno ka Yesuusi malla pooyno ka ca. 28Yesuusi xoori iskattoose opa desa tiitaawe ka ishootta kide, “Ishina iskatta Yursaalamitiiyyi, ana malla in pooyan ma hellaassin isho isi malla pooya. 29kuyyawwa a oppaayye kidane, ‘Iskatta a hinni in kinnin ka karitta inna xaayni in ka amadda a in luukinnini oo xaaysho sanaya’ de'a. 30Sitiiyyi orra irrowwa'e ‘Ino qara pi'a!’ ka ‘Kunkunnawwa'e, ino deka!’ #Hoose 10:8; kele 6:16 Kida paayya. 31Ka kuli, oto sede piisa qoyra qoyya qara kodammittooyye, qoyra koke qara'e, desa atta kodamaaw?”

32Ka asseew nama a wanjala kode lakki lessaata Yesuusi quda' qeedeneew ka ishin aanen. 33Ka ete porase Qaraaniyo taaki. Pukurkura matta nama kidammo kayeneeyye, eyye Yesuusi fannisen. Ka namase wanjala kode lakki, qinda akkitta ka a pittittatin Yesuusi kapa' fannisen. 34Sekkamma Yesuusi ka kide, “Aappo, wa koonaane in upaneey, ishootta diishe.” Xelase a oranna ka mehaddaadi a kalsanna olli qootte ka qara qoyritta katade. #mas 22:18 35Samayta ka qa'ade ka tooyni; saarra a Yihuta ka isha qara seesni ka kiini, “Orra pila idinsheey, oton keeton isha Kiristoosi, intoonno a isi dinshooy.” #mas 22:7

36Xelase a oranna ka asseew isha qara seese. Ka isha kapopa dehaade ka haddaya isha' qape. #mas 69:21 37Ka asseew ishi kiini, “Atti oton a nuqusa Yihutaatiiyyi, intoonno isi dinsheey.”

38Ka taafetase kiinitto, “Ini nuqusa a Yihuta” Yesuusi qara xata masqala qara rakken.

Nama dapa kode lakki a Yesuusi olli fannisame

Maati 27:38-44; Maari 15:27-32

39Nama dapa kode lakki Yesuusi olli fannisame oppaayye, takka Yesuusi onni ka kiini, “Atti a Kiristoosinni, inntonno isi dinshe ka ino kuli dinsheey.”

40Ataaka xoori isha fukke ka kide, “Atti firrteeta a xaadi pahatoow ke qara kayeey, Waaqa, a fuurto? 41Ino ishin dapayta an koone minannen qitaateta a ino parpaaccisnitto akkanne. namoose xoori we takkan nefon in dapne.” 42Ka kamma desa Yesuusi kide, “Poqallaay, oto mankisteetaaytin deenittooyye matte ana oorsado.”

43Yesuusi ka ishi kide, “Dukaatannen ke kiini, awwe seeyye ana olliiyyi Kenneeti kinnaatta.”

Yesuusi akkima to'e

Maati 27:45-56; Maari 15:33-41; Yoha 19:28-30

44Tin a sede kodditeeyye, kuyyaate saateta lehi mina'e kitta, sitiiyyi paayyatteeyye, haka saateta sakaliti'i, piita piisa ka tukkantaawte. 45Piirtota itukkantaawte, kaaranta tika qulqulloota ka otantan xata kaamade ka lakki qite. #sooka 26:31-33 46Yesuusi ka nessadi kuttishe ka kide, “Aappo, tin harkaaytippa'en napseetiiyyo diinni” Ka ete asse kide kamma nessa diishe. #mas 31:5

47Motolaqitta a eyye co ete wa kodde akkeeyye, ikide “Namoose dukaatannen hanqeelitta” Ka Waaqa ulfeesse.

48Orra wessen tooyeeta eyyepa ollopa de'e piisa, ete wa kodde akkeeyye, nyarrahatanne kessa oppa isi tottoome ka tikkaasso opa kale. 49Orra fayya Yesuusi upo isho iskatta Kelilaayye paayye ka isha kamma anno, piisa lake desa qaade ka wessen tooyni. #Luqa 8:2-3

Yesuusi akkima hawlame

Maati 27:57-61; Maari 15:42-47; Yoha 19:38-42

50Nama takka Yoosefi kidammo Armaatiyasi katamasene a Yihuta kara kala. Isha nefo nama paxaara ka hanqeellitta; ka orra firtishoonkota Yihuta oppa takka. 51a koddito ma sullaata isho mura a orra a Yihuta oppa in qapo; isha nama mankisteeta Waaqa kippeetan asanno. 52Ka Pilatoosi kapopa aane; ka akka pukka Yesuusi ishi daasho kaassade. 53Ka pukkase lekkishe ka ohaata qahanaayteeta a xaynaata qora talpa oppa dawamte quda' mare; Ka hawla a shila karandela qoten, turan a nama takka nefo kara in hawlammin kara isha hawle. 54Kuyyaase nefo, kuyyaata a oppaayye orra sampata Yihuta tura harmisanno; Sampata ka paayyatta dehaanno.

55Iskattase Kelilaayye Yesuusi kamma de'e, Yoosefi kamma'e aanen ka hawlase tooyen ka akkima pukkase nefo hawlame akken. 56Ka tikkaasso opa kalen ka pukkaseti'i qimaameta isho shittoota alaawnitto harmishen ka akka seera qara'e, sampatase a Yihutaatiiyyi nessaden ka nakayen. #sooka 20:10; ooreta 5:14

Currently Selected:

Luqaasi 23: MaQu

Highlight

Copy