Luqaasi 19

Yesuusi isho Sakkiyoosi

1Yesuusi katama Iyyaarko karopa kule ka oppan tarpini,

2Eyyeyye teyantoolayta takka a nama Sakkiyoosi kidammo ka saara a orra qarata qaratnooti kodde ca. 3Isha Yesuusi a xaame akkima kodde akkeeta faani; ma xoori qoota kumma'i malla, lekuma a samayta qaran xaate'e isha akkeeta in ettaninne. 4Yesuusi qoota eeppa desa tarpino malla, Sakkiyoosi isha akkeeta'e samayta tura qatte ka keere ka qoyra takka a leya qaropa fayyade. 5Yesuusi ete porase oppa kayeeyye, moontandela tooyyade ka Sakkiyoosi kide, “Sakkiyoosi, awwe tikaayti nakaya ana faaniy, jarjarrtan qoyroose qara lekkado.” 6Sakkiyoosi ka jarjartan lekkade ka xasan tikaadipa Yesuusi teyyade. 7Orra sede akke piisa ka Yesuusi qara qoojqooje ka kide “namoose ha tika juppoolayta opa damta kulle.”

8Sakkiyoosi xoori iqa'ade ka Poqalla Yesuusi kide, “Poqallaay! tin teyanta an qapo piisa qaraayye, paka takkan teekolaya daasha. Oton sassapannen nama qara kuura qeede nefooyye, harka afuri'in oorsha.”

9Yesuusi ka kide, “namoose kuli sanynyeeta Aprihaamiiwwiiy, awwe dina tikooseti kodde. 10Inna anama isase patte fadeeta ka dinissae de'e.” #Maati 18:11

Pahanasene a orxaya kudani

Maati 25:14-30

11Ete orra sede dakkaysattaappa cooyye, Yesuusi ka pahana takkan ishootta leleew; wa malla lele nefo isha qoota katama Yursaalami kapa dehaade malla, a mankisteeta Waaqa ennow deeto qoota orra pahanaate malla. #Maati 25:14-30 12Semmalla Yesuusi ka kide, “Nama takka sanynyeeta nuqusa kodde nuqusuma akkatta ka tiitaawa'e piita seka oppa aane. 13Ka a in annin turan, orxayaadi oppa nama kudan hale ka matta matta mina ishootta miinaana kudan kudan#19:13 minaani: sede pirreeta dippa dippa kiinitto afaa kirikkitinni miinaana kudan kudani kiinii miinaani wa aishin ulsuma hiillaane ma kaajaa nefo koddini. miinaana taakka nama akuyyaata mina xaayyannaane mushaara leyaa sessa. daashe ka kide, ‘Hakan oorro kara ishin nakata.’ 14Orra piitaayshoti xoori qoota isha needdan malla, a isha' tawe kammaayye nama isha kamma erken ka kidene, “namoose akka ino qara nuqusa koddo, ino an henno!”

15“A kodditoma isha nuqusa kodde ka kale. Ka orxayaasene xaadi a ishootta kaaja daashe, kaajasene a ishootta daasheetin akka nakaten ka tookta a kela qeeden upnaatta'e, orxayaadi ollopa halacciise. 16Orxayta paayyota ka dehaade ka kide, ‘Poqallaay, tin miinaanase kudan a ana daasse kelaayye, miinaana pila kudan in tookta de'e.’ 17Poqallaadi ka ishi kide, ‘Atti a orxayta fayya, wa paxaara'e koote; wa shakkaatinni amanamteey, anti katama kudan qara'en hupna ukkumeeta ke daashe.’ 18Orxayta lammatta ka dehaadeew ka kide, ‘Poqallaay, tin miinaanase a ana daasse kelaayye, miinaana pila keni tookta de'e.’ 19Poqallaadi ka ishi kideewwe, ‘Atti katama ken qara'en ke kuli shuumeew.’

20“Orxayta pila ka dehaadew ka kide, ‘Poqallaay, tin are kaajaatti, japaroppa'en sukke. Ka eyye xaaye. 21Wan malla, asse kode nefo qoota atti hupnampayta koddite ka wa a xaayannini teyyannitto ka a iyyaalli ini ferannitto upnaade ka ke fuurey malla.’ 22Poqallaadi ka ishi kide, ‘Atti a orxayta a neeqa! Afoosen a haasawatteetinniiwwin ke qara farata! Akkiman karpampayta kodde ka wa an xaaynini teyyanno ka wa an aylaannin feranno, i''uptaay; 23ka kuli maana'e kaajaayyo paanketa an kara tookta teyo kara ana'e a xaaynin? Eten kaleeyye, helani pirrewwaayyo tookta ollinnin teyyanni heeneey.’ 24Se kammaayye poqallasene oori orra eyyeppa qa'anno'e kide ‘Miinaaniyyo kudan isha qara qeeda ka orxaytose miinaana kudan qapo' daasha.’ 25Ishootta ka ishi kidene ‘Poqallaay, isha akku miinaana kudani qapa.’ 26poqallasene ka ishootta oorshe ka kide, ‘In ishina kiini, a qapo qara'ew ishi daasamta; a in qapnin xoori sede a qapo nefo qara qeedama. #Maati 13:12; Maari 4:25; Luqa 8:18 27Ma xoori paarkaaladdosene xayyo, akkan ishootta qara nuqusumo in heenini arepa dehaysha ka fuuliyyo tura leysha.’” 28Yesuusi ete pahanoosene haasawade kammaayye, Yursaalamipa anta kammaaw caade ka tamaarewwaadi tura desa anni.

Yesuusi akkima ulfeena kuttan Yursaalamipa kale

Maati 21:1-11; Maari 11:1-11; Yoha 12:12-19

29Yesuusi ete katama Peete faake isho a Pittaaniya a irroota Taprasayti kapa ca kapa kayeeyye, tamaarewwaadi oppaayye nama lakki erke ka kide, 30“Paleese ishin tura kitto karopa aana ka, oto eyye kaytaneeyye, innayya harreeta, a nama takka nefo turan qara in kutiinini, a eyye hiddame'e akkitaney, fura ka ishin xooya. 31Oton nama ishin kaassanni ka kiini, ‘Maana malla' furrittaneeyye?’ Ishi oorsha ka kida, ‘Poqalla'e parpaaccisni.’”

32Isaasene erkame ka aanen ka, we piisa akka Yesuusi ishootta kide qara a kodde akken. 33Ete innayyasene a harreeta furraaneeyye, toolase a innayya harreeta ka ishootta kide, “Maana malla' furrittan?” 34Ishootta ka oorshen ka kidene, “Poqalla faani.” 35Ka innayyasene a harreeta Yesuusi kapopan de'en ka ohawwaasso innayyasene a harreeta qara afen; ka akka Yesuusi qara kuti'o koden. 36Yesuusi ete annooyye, orra ohawwaasso'e poroppan desa isha turan desa afni.

37Yesuusi ete katama Yursaalami kapa dehaadeeyye, irrootase Taprasaytitiiyyi opaxata lekkanni; sitiiyyi orrase Yesuusi kamma anno piisa, qoota koda orra qawwanno akke ka xasan immakaade malla, nessaaysho'e kuttishen ka Waaqa kalataysatta paayyen 38ka kidene, “Nuqusa maxxa Waaqan deeno, a eeppisame! Nakayta a moonta koddo, ulfeena a moonte, Waaqa koddo!” #mas 118:26

39Feresaatase samaytoppa kitto takka takka xoori, i Yesuusi kiite, “Kollissampayto, tamaarewwaatti jaw kiishe.”

40Yesuusi ka ishootta oorshe ka kide, “In ishina kiini ‘Kadi punu ishootta jaw kidaneeyye, dakadda ullupa.”

Yesuusi akka katama Yursaalami malla pooye

41Yesuusi ete katama Yursaalami kapa' dehaade ka akkeeyye, ishootta malla pooye. 42Ka kide, “Atti wa nakaytaayti parpaaccisna katin awwe nefo upnaatte maana in kinnin; amma xoori wossen ildaatti tura ijuutamen. 43Kuyyaata a oppaayye nyaapaayti de'o ka ke kapa muro ka ke kapa kawatta dawo ka qinda piisaayye desa ke qaatqaato de'a. #19:43 xatta nyaapa, oto oranna de'oyye, kawwatta paleeta a torpino qudupa piita tuulli. 44Ka ke isho hellaatti a ke kara ca piitan dakka ka pira, umma an qinnin mali daka takka nefo poraadi oppa ke in hatisho, sede nefo wa malla asse koddita qooota a eta a oppa Waaqa ke dinissa de'e a upnaannin malla.”

Yesuusi akka tika qulqulloota kelaayye orra urmala heranno daane

Maati 21:12-17; Maari 11:15-19; Yoha 2:13-22

45Yesuusi tika qulqulloota karopa kulle ka orra tika qulqulloota kelaayye urmala heranno alle daana paayye. 46Ka ishootta kide, “Itaafamte ka kiini, ‘Tikiyyo tika qinseeta'e koddita.’ Ishina xoori rahana a sarampayaati'i kooten.” #Issa 56:7; Er 7:11

47Yesuusi, kuyyaata piisa tika qulqulloota kela orra kollinni. Saarra qeesewwa ka kollissampaya a seera isho saarra samayta xoori, isha ikassa faani. #Luqa 21:37 48Ma xoori qoota karitta orra piisa Yesuusi dakkaysatta jaalanno malla, kola isha ikassa faana, we takkan nefo koda in ettaninne.

Currently Selected:

Luqaasi 19: MaQu

Highlight

Copy