Mataafa Uumata 8
8
Akka pishasene a pateetta ku'en
1Waaqa ka Noohe isho pinaana isha olli markapa kara ca piisa dikade ka xayxayta pishasene piita qara pire qara' qeede; pishasene ka oori kellaawa paayyen. 2Paadadda xati piita kela ca isho maskootewwa a moonta piisa ka dufamen. Roopa kuli ka roopeeta qaatishe. 3Pisha ka piita qara kuyyaata kuyyaatan kellaawni. Kuyyaata dippa ka kunda ken kammaayye, pisha ka fayya' kellaawen. 4Markapase ka leya tappatta oppaayye kuyyaata kudanka tappattati irrowwa Araaraati qara' kute'e. 5Pisha ka haka leya kundattati kellaawaan aanen. Leyase oppa kuyyaata paayyotati kuuta irrowwa ka akkaatta paayye.
6Kuyyaata kunda afuri kammaayye, Noohe maskooteta a markapa'e pane. 7Ka qurrupayta erke. Qurrupaytase ka haka pisha piita qara kuunaane'e, piita qara pora tittiitaawni. 8Sekkammaayye Noohe akka pisha piita qara kellaawen upnaatta'e, elela erkeew. 9Qoota pisha piita qara piren malla, Elelase pora oppa' kuti'o dape ka Noohe kapopa tiitaawe. Noohe ka harkaadi maskoteeta karadesa derayshe ka eleelase' teyyade. 10Ikka kuyyaata tappa pire ka a lammattati eleelase erkeew. 11Eleelase ka afaappa' haashsha a ekerta' qapade ka kalakala markapoppopa tiittawe. Noohe ka akka pisha piita qara kellaawen upnaade. 12Ikka kuyyaata tappa pireew ka amma nefo eleelase erkeew. Eleelase umma Noohe kapopa in tiitaawne.
13A para Noohe dippa lehi ka takka kayeeyye, paroseti leya a paayyota oppa kuyyaata paayyotati pishasene piita qara iku'en. Noohe ka oori dufana markapa' pane ka piita akka kokte akke. 14Leya a lammatta oppa kuyyaata kunda lakki tappatati, piita fayya'e kokte.
15Waaqa ka Noohe' kide, 16“Iskatteetaayti isho hellaatti ka haantowwa hellaatti ollin markapa kara alle' sooka. 17Ka akka piita qara' horan ka lekaadane'e, wa ke olli markapa kara ca piisa, pinaana ka horeeta ka xampira ka wa piita qarandesa lellehna piisa ollin markapa kara sooka.” 18Sekkammaayye, Noohe ka iskatteetaadi isho hellaadi ka haantowwa hellaadi ollin markapa kara sooken. 19Pinaana ka horeeta ka xampira ka wa piita qara lellehna piisa ka sanynyeeta sanynyeetan markapa kara sooken.
Noohe akka Waaqa' kalisoota kalshe
20Noohe pora qara' kalisoota Yaahiwwe' kalsho kode. Ka pinaana ka xampira damamma piisa oppaayye takka takka qeede ka kalisoota a kupnaaneti Waaqa' kalshe. (picture of altar) 21Aluma a kalisootaseti ka Yaahiwwe xasayshen, Yaahiwwe ka isi karanxata dikade ka kide, “Nama kadi punu a shakki paayyeew dikatta neeqa qapaayye, amma desa dapa nama' malla piita an jiijo. Umma akka amma' mina'e, lammatta uumata piisa an pashsho.
22Haka piita kittooti'i
ayla ka fera, foola ka damayta
pona ka soroora, kuyyaata ka halkeeta, in dapadan.”
Currently Selected:
Mataafa Uumata 8: MaQu
Highlight
Share
Copy
Want to have your highlights saved across all your devices? Sign up or sign in
