Mataafa Uumata 35

Yayqoopi Waaqa' saksatta'e Petelipa aane

1Waaqa iYayqoopi' kide, “Xa'e ka Petelipa aane! Ka eeyye' kallaado. Ka eeyye'e ana Waaqase a innassin Eesaawi tura qahateeyye ke akkaade'e, pora a qara' kalisoota kalisso' kode.” #uuma 2:11-17

2Yayqoopi ka oori toolaadi ka orra isha olli co piisa' kide, “Killowwa issi oppa alle' pashsha ka issi jaqqa ka mehadda a jureeta in qapnini kalsada. 3Ka xa'a ka Petelipa fayyanna. Eeyye'en Waaqase ana dakaye ka rakkootoppa ana qaarqaare ka pora an opa aane pisa oppa ana olli caade'e, pora an qara' kalisoota kalsho kodaay.” 4Ishootta ka oori killowwa a qapane piisa Yayqoopi' daashen. ka modohawwa a nappaapa qapane piisa sookshen ka ishi' daashen. Isha ka piisa qeede ka piita Sekemiti qoyra hilteeta kela' hawle.

5Qoota Waaqa katamadda ishootta kapandesa ca qara' fuura kate malla, Yayqoopi ka hellaadi, ete kotannaaneeyye, nama ishootta kamma daana' nyere takka nefo in co. 6Sekkammaayye, Yayqoopi isho orra isha olli co ka piita Kene'aaniti katama Loosa isasene ammaayye Peteli kidamma' kayen. 7Yayqoopi a innaasso tura qahanooyye, qoota Waaqa eeyye oppa isha tura akkaade malla iporoseti' kide, “Eli peeteli” #35:7 Eli peeti'eli afa Iprutinni, ‘Poqalla Peeti'eli’ kideeta. Ka pora a qara' kalisoota kalsho kode. 8Ampattoota a xatta Ripiqa aayya opa Yayqoopi ampatte, Tipoora ka eeyye' toote. Ikka Peteli kamma xata qoyra hilteeta kela' hawlen. Poroose ka “Alon paakuti” #35:8 alon paakuti kideeta alon paakuti kidame kidamekidame.

9Waaqa ka ete Yayqoopi piita Mosoppotaamiyaati tiitaaweeyye, a lammattati isha tura akkaadeew ka ishi' sake. 10Ka kide, “Maxxaayti Yayqoopi ma amma desa oori Isira'eeli kidama.” Ka “Isira'eeli” kide ka maxxa ishi' kode. #uuma 32:28 11Ka ishi' kideewwe, “Ana Waaqa a we piisa ettaninno ke' kiini, tumma dale, sanynyeetaayti ka lekaatto; samayta leka ka keppa dalado. Nuqussa ka sanynyeetayti oppa de'en. 12Piisse an Aprihaami isho Hisaaqi' sake, kulin ke' daasha ikka ke kammaayye a sanynyeetaayti' koddita.” #uuma 17:4-8 13Waaqa ete Yayqoopi olli haasawatta dikishe kammaayye, moontopa fayyade. 14Yayqoopi ka porase a oppa Waaqa olli haasawade matte oorsata'e oppa' daka dishe. Ka taadeta wayneeta isho sayteeta qaran xata tuqe. 15Ka poroseti' kide, “Peteli.” #uuma 28:18-19

Toota Raaheeli

16Sekkammaayye, Yayqoopi isho tolaadi peeteliiyyi anta' xa'en. Ete Efraata kapa' dehaadeneeyye, Raaheeli ka xaayan qapamte, yetatta xaaya ka isheetta qara' koope. 17Ete yetattase a xaaya isheetta qara' koopnooyye, xaaysattoota ka isheetta' kiite, “Inna diirta'e a lammattati' xaayniiy, in fuuran.” 18Ma isheetta' qoota toota' qannite malla, ete toonittooyye maxxa innooseneti' koote ka kiite, “Peni'ooni.” #35:18 Peni'oni Yayqoopi' xoori ikide, “Piniyaami.” #35:18 Piniyaami afaa Iprutinni, ‘harkiyyo a akkitta’ kideeta

19Sekkammaayye Raaheeli eennow toote. Ka pora katamasene a Efraata isasene ammaayye Peteli kidamma opa anno kapa' hawlamte. 20Yayqoopi ka hawlaadi qara'e, daka dishe. Ikka haka ammati hawla Raaheeli qara ca. 21Isira'eeli ka aane ka poqa Eteri mina desa tukkana daapade ka oppa' kallaatta paayye. 22A Isira'eeli eeyye kalooyye, Roopeeli lammitteeta a aappaayshoti Paala qaropa kale. Isira'eeli ka wa kodde piisa dakaye. #uuma 49:4

Hellaa Yayqoopi

otoo a 1ta 2:1-2

Yayqoopi hellaa diira kudanka lakki qapa.

23Hellaa Liyyappa' xaayade, a paayyota Roopeeli, kamma'ew Simooni ka Lewi ka Yihuta ka Yisaakoori isho Saaplooni.

24Hellaa Raaheeli oppa xaayade, Yoosefi isho Piiniyaami.

25Hellaa Paala, orxayteetase a Raaheeli oppa xaayade, Taani isho Niftaalemi.

26Hellaa a Silfa, orxayteetase a Liyya oppa xaayade, Kaati isho Aseeri.

Helloosen a Yayqoopi a diira piisa, a isha piita Mosoppotaamiyaati kalooyye daladen.

Toota Hisaaqi

27Yayqoopi ka piitase a Aprihaami isho Hisaaqi oppa kalaytuma' kallaaden, Keprooni kapa kitto ka Mamre kidammitto opa aappaaysho kapoopa aane. #uuma 13:18 28Hisaaqi para dippa ka kunda sette kallaade. 29Ka ete akata qime kammaayye to'e. Hellaadi Eesaawi isho Yayqoopi ka isha hawladen.

Currently Selected:

Mataafa Uumata 35: MaQu

Highlight

Copy