Juan 20
20
Jesús ma dawiyaitaxakĩ awiana wididi
1Domingo wenamarikui pedabadu María Magdalena na Jesúspa awẽ kaya bakex kidi mera waitawu adu uĩ kai kadi. Dukuxu uĩya na bakexewa kidi wepua ma apekebea idi. 2Naskata María ichuta Simón Pedro yawi na Jesúspa duipaudi Juan na auxũ tapibis atu chadiwai kai ichudi. Maríane rateyana atu yuidi: “Nuku Diaiwũ awẽ kaya ma tsekakaxu wakirara waawu nu tapiaba”, atu wadi.
3Naskata Pedrowe na Jesúsuxũ tapibis Juan uĩ wukadi wudiwu na Jesús waitawu adu. 4Naa rawe ichudiwu. Na Jesúsuxũ tapibis wetsã kushi kakĩ Pedro xunuwaĩta reke dukudi na Jesúspa awẽ kaya waitawu adu. 5Naskata titipakekawãta kidi mera tela chaidipawu uĩdi. Kidi mera ikidiba. 6Simón Pedro chipu dukudi. Naskata kidi mera ikikaita uĩya tela chaidipawu badia idi. 7Naskatari uĩya na tela Jesúspa awẽ wemana wepuita nadu chaiba dikata bisku raka idi. 8Naskata na Jesúsuxũ tapibis Juan na reke kidi adu dukua dukuxu na bai kidi mera ikidi. Na uĩta ikũira wadi. 9Na raweta tapiyudiwuba na Diospa tsai kedea keskara. Jesús dawiyaitaxakĩ awiana widixiwi. 10Naskata auxũ tapibiswu atũ pexe adu dasudiwu.
Jesús María Magdalena aki dukudi
11María xawakawi netedi bakexewa kidi adu yura daa wabiswu chaibaduax María siaidi. Titipakekawã kidi mera daisdi. 12Naskata ángel rawe wichidi. Saweti uxu saweax tsauwawu idi Jesús waitawu adu. Jesúspa awẽ bapu rakaitakiri wetsa tsauwa idi. Awẽ tae rakaitakiri wetsa tsauwa idi. 13“Aweskai mi siaikime”, ángel raweta wadiwu. Naskawaiwawe atu kebadi: “Ewẽ Diaiwũ awẽ kaya wakira wuawu”, Maríane atu wadi.
14Naskata wesuakekawata Jesús wichidi. Uĩwikĩ unadiba. 15Jesúspa awĩwu ñukadi: “Aweskai mi siaikime. Mi tsua wedaime”, Jesúspa wadi. Naskawaitu Maríane shinadi naatu jardín kexebis raixu. Maríane ñukadi: “Diaiwũ ea yuiwe ewẽ Diaiwawe awẽ kaya mi wuamaiki. Wani mi waamaiki ea yuiwe ẽ wedatanu”, Maríane wadi.
16Naskaitu Jesúspa María yuidi: “María”, wadi. María dasuakekawã: “Raboni”, wadi. Raboni yuikakĩ judíowawe atũ tsaima: “Awara atu tapibabis”, watiruwu.
17Jesúspa yuidi: “Ea netewayabawe. Ewẽ Epa adu ẽ kayuaba. Euxũ tapibiswu ea yuixutawe: ‘Ewẽ Epa adu ẽ kai. Naa matu Epari. Naa ewẽ Dios. Matu Diosri’, atu yuitawe”, Jesúspa María wadi.
18Naskaidu María Magdalena atu yui kai kadi auxũ tapibiswu: “Me nuku Diaiwu uĩya”, atu wadi. Naatu yuiya keskara atu yuidi.
Auxũ tapibiswuki Jesús udi
19Naa yabeta domingo ikaidu Jesúsuxũ tapibiswu pexe wisti adu ichanawu idi. Weputi rekeweawu idi judíowuki besekadi. Naskaiwudu Jesús ikikaita nexpakaya nixu atu betakaxata yuidi: “Epa Dios batu sharawanu”, atu wadi. 20Naskata awẽ biwi adu bastaitawu atu uĩbata awẽ pishi adua atu uĩbadi. Naa uĩkadi auxũ tapibiswu Diaiwu Jesúski idibakuidiwu. 21Awiana Jesúspa atu yuidi: “Epa Dios batu sharawanu. Ewẽ Epa ea nichidi keskawakĩ ẽ batu nichi”, Jesúspa atu wadi. 22Naskata atu yuidi: “Espíritu Santo wikawe”, atu wata atu xuũ adi. 23Naskatari atu yuidi: “Watura wetsa atũ chaka ma suaxuadu Epa Dios naa yurã awẽ chaka ma suaxua iixiwi. Aka ma tsua atũ chaka ma suaxuaba Epa Diospa atũ chakari atu suaxutiruba”, Jesúspa atu wadi.
Jesúswe Tomás wichinadiwu
24Jesúsuxũ tapibiswuki Jesús atuki uwaidu adu Tomás idiba. Na Tomásri Jesúsuxũ tapibis idi. Naa adekakĩ gemelo wabiswu. 25Tomás dukuwaitu Jesús auxũ tapibis wetsawawe Tomás yuidiwu: “Nuku Diaiwu ma nu uĩya”, wadiwu. Naskawaiwudu Tomáspa atu kebadi: “Awẽ biwiki bastaitawu adu uĩxuba ẽ batu ikũira watiruba. Na bastaitawu adu ewẽ biwi miitaba awẽ pishi adu chachitawu aduri ewẽ biwi ẽ miitabariwi ẽ batu ikũira watiruba”, atu wadi.
26Ocho peda ma ikadu Jesúsuxũ tapibiswu awiana pexe wisti adu ichanawu idi. Naduriwi Tomás atuwe idi. Weputi ma wepuwiawu Jesús ikikaĩdi. Atu nexpakaya nixu atu betakaxadi: “Epa Dios batu sharawanu”, atu wadi. 27Naskata Jesúspa Tomás yuidi: “Mewẽ biwi dudu miipu. Naskata mewẽ mekema ewẽ pishi adu miiwe. Ana ikũrakaki atu wayabawe. Ea ikũira wawe”, wadi. 28Naskawaitu Tomáspa Jesús kebadi: “Mi ewẽ Diaiwu ita mi ewẽ Diosri”, wadi. 29Jesúspa Tomás yuidi: “Biwikui ea uĩxu mia ea ikũira wai. Ea uĩyabawikakĩ ea ikũira waawutii naawu shara itiruwu”, Jesúspa Tomás wadi.
Nu dikanu aweskakĩ Juanpa da libro kededimaiki
30Auxũ tapibiswawe uĩyaiwudu tsuã atiruba keskara Jesúspa apaudi. Ẽẽkai atii libroki ẽ kedeaba. 31Naskaweke da libroki ẽ kedea ma ikũira wanu Epa Diospa Jesús nichidi nuku Diaiwu inu. Naskatari ma ikũira wanu Diospa awẽ wake Jesús Mesías. Awẽ ade ma ikũira waax ma ipatiru.
Currently Selected:
Juan 20: mtsB
Highlight
Share
Copy
Want to have your highlights saved across all your devices? Sign up or sign in
