Génesis 24

Isaacwe Rebeca

1Abraham ma adiwushtadu Epa Diospa awara sharawu inadi. 2Na aweta yudukĩ taewainiwuwada kedata yuidi: “Na nu weyabis keskai mewẽ biwi ewẽ kishi nunamari wawe. 3Diaiwu Diospa dai udiwata bai udiwadi nauxũ na mia axuikai ea yuikuiwe: ‘Ẽ bia axuikai’, ea wawe. Na mia yuiyai atawe. Da bai Canaán ẽ ikadua ewẽ wake Isaac awĩwu ẽ wibapaiba. 4Ewẽ kaiwuu meradua awĩwu wetsa ewẽ wake Isaac iwixutawe”, Abrahampa wadi.

5Naskaxu Abrahamweta yudubistu yuidi: “Awĩwu ewe uyabaitu ẽ aweskaikaime. Ẽ iyutirume mewẽ wakẽ wedaikanu awĩ”, wadi.

6Abrahampa kebadi: “Aweskakĩ ari ewẽ wake mi iyutiruba wadi. 7Ewẽ epã pexe aduxu Epa Dios dai mera ikatu ea yuidi dudu ẽ unu. Da bai ewẽ kaiwuu ichapanawã kaĩpakedakawu inanupukui. Naskatari mi kayuabadu awẽ ángel biki rewu nichi ewẽ wake awẽ awĩ mi ewexunu. 8Awĩwu bewe uyabaitu shinachakayabawe. Naskaweke ari ewẽ wake mia iyutiruba”, Abrahampa wadi.

9Abrahamweta yudubistu awẽ biwi Abrahampa kishi nunamari wadi. “Na mia ea yuiya ẽ akikai”, wadi.

10Naskata awẽ yudubistu na awẽ awara sharawu wita diez camellowuri nawuya kadi pexe ichapa Nahor bai Aram Naharayin adu. 11Ma ñatapakeaidu pexe ichapa Nahor adu dukudi. Awẽ camellowu atu tedebadi ede wibiswu aduxu. Naatiã wari awĩwuwawe bai meraduax ede tsekea wibiswuadu. 12Naskata yudubistu kiwĩdi: “Epa Dios ewẽ diaiwu Abraham mi awẽ Dios ẽ bia ñukai ea axusharawe ewẽ diaiwu Abraham mi sharawaa keskawakĩ eariwi naskawawe ẽri sharanu. 13Ẽ dudu awĩwuwawe ede witiruwuadu ẽ netei. 14Ea uĩbawe na daetawa ẽ ede ñukayaitu ea ayabanu: ‘Mewẽ bapu kiti keskara wutubata ea ede inawe’. Ẽ waitu ea kebanu: ‘Ayawe’, ea wata, ‘Mewẽ camellowuri ẽ ede inanu’, ea wanu. Naskaxu ẽ tapinu na awĩwu mi Isaac kayawaxua. Naskaxu ẽ tapinu ewẽ diaiwu mi sharawabis”, yudubistu wadi.

15Kiwĩkĩ adaitiabadu Rebeca dukudi. Awẽ bapu kiti keskara iaxu wedi. Rebeca Betuel wake idi. Milcá Nahor atũ wawa idi. Nahor Abrahampa awẽ udiwetsa idi.

16Rebeca awĩwu sharakui. Dukuwedewe ibisba idi. Awẽ bapu kiti keskaraki ede wuspiwata kaidu 17Abrahamweta yudubistu Rebeca adu kushi kata ñukadi: “Ede ichapabashta ea inawe mewẽ bapu kiti keskaradua”, wadi.

18Naskata: “Ayawe ewẽ diaiwũ”, wata awẽ bapu kiti keskara tsubaxu Rebecapa ayabadi. 19Ma ayadu Rebecapa yuidi: “Ẽ mewẽ camellowu ede wixunu camellowawe ayanuwu na apaiyai keskawanuwu”, wadi.

20Kushikui badedi awẽ bapu kiti keskara na camellowawe ayatiruwu adu. Ana ichuxu ede wita witadi camellowu ayabaxikĩ. 21Naskake na Abrahamweta yudubistu uĩdi peesixuba tapipaikĩ Diospa axuamaiki awĩwu wichixukĩ Isaacna.

22Ma camellowawe ayawuadu Abrahamweta yudubistu anillo wita oropa awẽ anillo Rebeca inata awẽ rechukuki netabadi. Naskatari bedexebeti rawe inadi. Naskata ana Rebeca ñukadi: 23“Ea yuiwe tsua mewẽ epamaiki. Ewe rawebiswuwe mewẽ pexe adu nu uxatirume”, Abrahamweta yudubistu wadi.

24Rebecapa kebadi: “Betuelpa ẽ awẽ wake Milcáweta Nahor awẽ wake Betuel. 25Nuku pexe adu axaka nadu ma uxatiru. Nadu piti ichapa camellowuna”, wadi.

26Naskaxu na yudubistu baikiri wepepakekawãdi. Epa Dioski idibadi. 27Dios kiwĩkĩ iskawadi: “Aichu Diaiwu Dios mi wasĩ sharakui. Mi Abrahampa awẽ Dios mi ea uĩbada ẽ bia ikũira watiru. Mi atu sharawaaxiwi. Abrahampa awẽ kaiwuu atũ pexe adu ẽ dukua”, kiwĩdi.

28Na dikata Rebeca ichudi awẽ pexe adu awa yuikai na dika. 29Labánpa chiku Rebeca idi. Naa ichudi Abrahamweta yudubis wichikai camellowawe ayabiswu adua. 30Labánpa uĩkĩ awẽ oro bedexebeti netaxu weaitu na dukuwene yuiya atu yuiyaitu dikai naskake ichudi dukuwede wedai kai. Wichidi awẽ camellowu adua ede bai kidi mera chaibadua.

31Labánpa yuidi: “Diri uwe. Nuku Dios ikũira wabistu aweskai ma xawakawi netepaime. Ewẽ pexe ma ẽ itipiniwaa camellowunari ma itipiniwaa”, Labánpa wadi.

32Abrahampa yudubistu pexe mera ikikaĩdi. Nadu Labánpa camellowawe peweawu wutubadi atu pibaxikĩ. Atu ede waxudi awẽ uibatiwawe atũ tae chukanuwu. 33Ma piti inawudu yudubistu atu yuidi: “Ẽ piyuiba batu yuixuba na ẽ yuipaiyai”.

Labánpa kebadi: “Duku yuiwe awamaiki nu bia dikanu”, idi.

34“Ẽ Abrahamweta yudubis. 35Epa Dios ewẽ diaiwu awarawu inadi ovejawu vacawu camellowu asnowuri. Nakatari oro inata platari uibati dukuwede uibati awĩwuri inadi. 36Sara ñushawushtaxu wake wisti adi. Naa wake awẽ awarawu naatiiwi inaita. 37Ewẽ diaiwũ ea yuiya: ‘Ea yuikuiwe. Ewẽ wake Canaán adua awĩwu ẽ wibapaiba’, ewẽ diaiwũ ea waita Canaán adua awĩwu awẽ wake wibakaspakĩ. 38‘Askataba ewẽ epã bai adua awĩwu wetsa ewẽ wake wedaxutawe’, ewẽ diaiwũ ea waita”, Abrahamweta yudubistu Labán wadi.

39“Naskaxu ewẽ diaiwu Abraham ẽ yuita: ‘Ewẽ awĩwu ukaspaidu ẽ aweskaikaime’, ẽ waita. 40Ewẽ diaiwawe ea kebaita: ‘Ẽ Dios dikakuibis. Ewẽ Epa Diospa awẽ ángel biki nichi bia axusharanu aweskataba mi kasharatanu. Ewẽ epã awẽ yurawu meradua ewẽ wake awĩ mi ewexunu. 41Ipaixuba ewẽ kaiwuwawe awĩwu bia inayabaiwawe naa ẽ bia yuiya keskara tsekeyabaitu naa shinabakiwe’ ”, yudubistu wadi.

42Naskata: “Datiã bai meraduax ede cheteadu dukua naduxu ewẽ diaiwu Abrahampa awẽ Dios ẽ kiwĩa: ‘Ea uĩbawe ẽ kakuikanu. 43Datiã ẽ dudu ede cheteadu xubaya ede wiiyuwaitu ẽ ñukaitu awẽ bapu kiti keskaradua ede ea inanu. 44Naa awĩwawe ea kebanu: “Ede ayawe. Mewẽ camellowuri ẽ inanu”, na awĩwu mi kañawaa ewẽ diaiwũ awẽ wake awĩ inu’, ẽ waa”.

45“Ẽ kiwĩkĩ adaitiabadu Rebeca ua. Awẽ bapu kiti keskara iaxu wea. Awẽ bapu kiti ene wuspiwaa: ‘Ede ea ayabawe’, ẽ waa. 46Naskata bapu kiti keskara ene wuspiwata ea: ‘Ayawe. Mewẽ camellowuri ẽ atu inanu’. Ma ea ayabadu”, yudubistu wadi.

47“Naskata: ‘Mi tsua wakeme’, ẽ waitu ea keba. ‘Betuelpa awẽ wake ẽ. Betuel Milcáweta Nahor atũ wake’, ea waa. Naskata anillo awẽ rechuku xui adu ẽ netabada. Naskatari bedexebeti rawe orona ẽ ina. 48Ẽ ratukunu bai chachita wepepakekawada ewẽ diaiwũ awẽ Dios aki idibakĩ waĩ kayakawikui ea eweke. Ewẽ diaiwawe awẽ udiwetsa awẽ wake ẽ wedaxuiyua. 49Ea yuikawe. Ewẽ diaiwũ awẽ shina ma axutirume. Ma axutirubaraka. Na ẽ tapipaiyai ea yuikawe ẽri tapinu”, Abrahamwe yudubistu Labán wadi.

50Labánweta Betuelpa kebadiwu: “Diaiwu Diospa awara sharawatiru. Nu bewe askawatanatiruba. 51Da Rebeca mewẽ diaiwawe wake iyuxutawe awe wiananu. Naskara Epa Dios awẽ shina”, wadiwu.

52Naa dikai Abrahamwe yudubistu Diospa uĩyaidu baikiri wepepakekawãdi. 53Naskata awara sharawu oro plata inata sawetiri Rebeca inadi. Awẽ uchi inata awẽ awariwi atu inadi. 54Ma naskadu Abrahamwe yudubistu awe rawebiswu pikata ayakata nadu uxadiwu.

Ma uxashita ma pedadu Abrahamwe yudubistu atu yuidi: “Ewẽ diaiwawe pexe adu ẽ wunukawe”, atu wadi.

55Rebeca awẽ uchiweta awã kebadiwu: “Da awĩwu kayutiruba. Ma diez peda ikadu bewe katiru”, awẽ uchiweta awã wadiwu.

56Naa yudubistu kebadi: “Ea askawayamakawe. Diaiwu Dios ma ea axushara. Ewẽ diaiwũ awẽ pexe adu ẽ dasupai”. 57Kedaxu nu ñukadu awe ikimaiki Rebeca idiwu: 58“Da dukuwedewe mi kapaime”, wadiwu.

Rebecapa atu kebadi: “Da dukuwedewe ẽ kapai”, Rebeca idi.

59Naskata nawawe nichidiwu atu udiwetsa Rebeca. Naskadu Abrahampa uibatiwe awe raweawu wuwaiwudu Rebeca awẽ uibati awĩwuri awe wudiwu. 60Rebeca kayuabadu awẽ kaiwuwawe shinayana tsai sharapa awẽ kaiwuwawe yuidiwu:

“Mewẽ kaiwuunuax ichapanawã kaĩpakedakawu.

Nawuwawe atu rare akata uibati wapadakawu”, wadiwu.

61Naskata Rebeca itipinidi. Awẽ yuduxubiswuwawe camellowu mamakaya wadiwu. Abrahamwe yudubiswe awe rawebiswu Rebecawe wudiwu.

62Tsua ikabadu Isaac ipaudi bai adu awẽ ade Négueb. Naskata ñatapake bai meraduax ede tsekeaidu dukudi awẽ ade Na Epa Dios Ipadakatu Naatiiwi Uĩ wapaudiwu. 63Ñatapake uĩ kaxu camellowu akiri weaiwawe Isaacpa wichidi. 64Naskata Rebecapa Isaac uĩta awẽ camello netewata mamakayaduax wutupakekawãdi. 65Rebecapa Abrahamweta yudubis ñukadi: “Da dukuwede tsuame dukuki dukuiyui”, Rebecapa wadi. Abrahamwe yudubistu yuidi: “Isaac ewẽ diaiwu”, wadi. Abrahamwe yudubistu waitu dikai Rebeca awẽ wemana wepudi.

66Abrahamweta yudubistu Isaac yuidi na akitawu. 67Naskata Isaacpa Rebeca awẽ yuina wichi tapas mera iyudi. Naduax wianadiwu. Naa yuina wichi tapas Sarana idi. Isaacpa Rebeca duikuidi. Naskax Rebecapa Isaac awa daita shinabakibadi.

Currently Selected:

Génesis 24: mtsB

Highlight

Copy