Génesis 21

Isaac kaĩdi

1Na Diospa Sara yuidi keskadi. 2Naskaxu Saraweta Abrahampa adiwukaxu wake adiwu. Na Epa Diospa yuidi keskadi. Werunawake adiwu. 3Abrahamweta Sara atũ wake adekĩ Isaac wadiwu. 4Ma ocho peda ikadu awẽ wake awẽ wushki wichi xatedi na Diospa yuidi keskawadi. 5Ma Abraham cien wari aki ikadu Isaac kaĩdi.

6Sarapa shinadi: “Ea Diospa witsabada. Naatiiwixu tapikadax ewe witsaxikadi ẽ wake ake. 7Tsuã shinapaudiba Abraham wake ẽ axunupukui. Naskaweke ma ẽ wake axua adiwuwiake”, Sara idi.

Abrahampa awẽ pexe aduxu Agarya awẽ wake Ismael atu putadi

8Ma Isaac yusiyaitu uĩkĩ awa xuba xatebadu naskata Abrahampa fiesta wadi. 9Sarapa uĩdi Agar Egipto bai adua idi awẽ wake Abrahamweta aka awẽ ade Ismael Isaacki kaxepaiyaitu. 10Naskata Sarapa Abraham yui kai kadi: “Na uibati awẽ wakewe katanu. Aweskakĩ ewẽ wake Isaac awẽ awara awe paxkanatiruba”, Sarapa Abraham wadi.

11Abrahampa askara duidiba. Sarapa askawaitu dikakĩ Ismael awẽ Wakemaiki 12Naskata Epa Diospa Abraham yuidi: “Shinachakayabawe mewẽ wakeuxũ naskatari Agaruxũ. Na Sarapa bia yuiyai keskawe. Isaac uduax awẽ kaiwuunuax ichapanawã kaĩpakedakawu ichapa inupukukadi. 13Ismael uduax awẽ kaiwuunuaxri ichapanawã kaĩpakedakawu ichapa inupukukadi. Ẽ atu axupakedaka mewẽ wakẽmaiki”, Epa Diospa wadi.

14Peda wetsa wenamari Abrahampa piti inata ede inadi. Naa pewexu wudiwu. Agar nawuya kadi tsua ikabadu awẽ ade Beerseba adu. Kawiakĩ tapidiba.

15Ma ede keyuadu iwi kawashara chuu nama awẽ wake nichiwaĩdi. 16Naskata uri tsaũi kai awa kadi. Awẽ wake daitu uĩpaidiba. Dabakaspadi. Uri awa tsauwadu awẽ wake Ismael siaidi.

17Epa Dios dai arixu dikadi Ismael siaikaitu. Naskata Epa Dios awẽ ángelpa kedadi: “Agar mi aweskaime. Beseyabawe. Mewẽ wake siaikaitu Diospa ma dika. 18Widinakawata mewẽ wake metsuwe. Awẽ kaiwuunuax ichapanawã kaĩpakedakawu ẽ ichapa axunupukui”, ángelpa wadi.

19Naskata Epa Dios Agar ede inadi. Bai meradua tsekea. Naskata aki ede wibis wuspiwata awẽ wake ede ayabadi.

20Naa wake Epa Diospa axuwaidu yusita tsua ikabadu ipaudi. Naskata piãkĩ tapikuiya idi. 21Tsua ikabadu awẽ ade Parán adu ipaudi chipu Egipto adu ika awĩwu awã wibadi.

Abraham Abimélecweta shinadiwu

22Abimélecweta soldado atũ diaiwu Ficol Abraham uĩ wukadi wudiwu. Abimélecpa yuidi: “Epa Dios bia axuwaitu ma ẽ uĩya. 23Epa Diosuxũ datiã ea yuikuiwe ewẽ wakewuya ewẽ kaiwuu uduax ichapanawã kaĩpakedakawu duku mia chakawaiba ẽ bia apaudi keskawakĩ. Naskatari dudua yurawu atu mi naskawapadaka dudu ikawu”, Abimélecpa Abraham wadi.

24“Na mia yuiyai ẽ naskawaidaka”, Abrahampa wadi.

25Abrahampa Abimélec askawadi awẽ uibatiwawe bai pukixu ede wichia wiãyabeawuadu. 26Abimélecpa kebadi: “Ẽ tapibisba na mia yuiyai. Raba ẽ dikai. Ẽ tapiaba. Tsua askaitame”, wadi.

27Naskata Abrahampa Abimélec oveja wakewu inata vacawuri inadi. Naa pedata naa raweta shinadiwu. 28Naskata Abrahampa awẽ yuina kede meradua siete ovejawu paxkadi. 29Naskake Abimélecpa Abraham yuidi: “Aweskakĩ siete oveja wakewu awĩwu mi paxkame”, wadi.

30Naskawaitu Abrahampa kebadi: “Naa siete oveja awĩwu ẽ bia inai mi tapinu ẽ bai pewexu ede ẽ wichidi”, Abrahampa Abimélec wadi.

31Naskake nadu awẽ ade Beerseba#21.31 Nadu adekĩ Yuikui, wadi. idi. Naduxu na raweta shinadiwu.

32Ma shinakuikata Beerseba aduax Abimélecwe Ficol dasudiwu filisteowawe atũ bai adu. 33Beerseba aduxu Abrahampa iwi awẽ ade tamarisco wadadi. Naskata naduxu Epa Diospa ipadaka kiwĩdi. 34Wari ichapa filisteowawe atũ bai adu Abraham ipaudi.

Currently Selected:

Génesis 21: mtsB

Highlight

Copy