Génesis 18
18
Epa Diospa Abraham uĩ kai kadi
1Epa Dios Abrahamki dukudi iwi awẽ ade Mamré adu awẽ yuina wichi tapas mera kaĩti adu tsauwadu mananawari wari paeyaidu. 2Texuinakawa tres dukuwede atu wichidi. Atu wichita kushikui atuki kata baikiri wepepakekawãdi. 3Naskata Abrampa yuidi: “Ewẽ diaiwũ da mewẽ uibati mi axutirumaiki ẽ bia kexunawai. Ea winuwuayamakawe. 4Ẽ atu yuinu ede wenuwu matu tae ma chukanu. Iwi dia namaxu tedeyukawe. 5Ẽ batu piti wixunu ma xukenayabanu naya wutaxikakĩ. Da matu uibati ikadu ma kawadiki”, Abrahampa atu wadi. Naskata: “Aichu duku askawaxuwe”, tres dukuwene Abraham wadiwu.
6Yuina wichi tapas adu Sara ikadu Abraham kushikui kata Sara yuidi: “Kushikui veinte kilos harina awetiira wita pan wawe”, Sara wadi.
7Abraham kushikui ichuta vacapa wake xuakuiya wita awẽ uibati inadi kushikui pichanu. 8Vaca xuba awẽ ede leche vacapa wake dabi atu inadi. Iwi namaxu piyaiwudu Abraham nadu atuwe idi. 9Ma pikĩ adaitikata Abraham ñukadiwu: “Waki mewẽ awĩ Sarame”, wadiwu. Abraham atu kebadi: “Udu yuina wichi tapas adu”, Abraham atu wadi.
10Dukuwede wetsã Abraham yuidi: “Ma wari wisti ikadu ẽ bia uĩyuxiwi mewẽ awĩ Sarapa ma wake akadu”, dukuwene wadi. Yuina wichi tapas kaĩti aduxu atu kachiuxuri Sarapa dikadi. 11Abraham adiwu idi: Sara ma ñushawua. Sara ana ibitiru idiba. 12Na dikai Sara witsa tedetiruba idi: “Naskara shara. Naskaweke Sara ewẽ wede adiwu ẽri ñushawu”, ikax Sarapa shinadi. 13Diospa Abraham yuidi: “Aweskai Sara witsaime. Ikũira waibame: ‘Ẽ ñushawu ẽ wake atiruba’, ikime. 14Na tsuã atiruba Epa Diospa atirubame. Wari wetsã ẽ uwaidu Sara ma wake akadu ẽ uuxiwi”, wadi.
15Naa dikai Sara besedi. Naskata wumapaidi: “Ẽ witsaba”, idi. Naskayaitu Diospa kebadi: “Ma ẽ tapia mi witsa”, Diospa Sara wadi.
Abrampa shinachakakĩ Diaiwu Dios ñukadi Sodoma adu ikawu
16Naskata tres dukuwede widiniwuwakata Sodoma ari wudiwu. Abraham atuwe kadi atubaki netei kai. 17Naskata Epa Diospa shinadi: “Abraham ẽ yuinu na ẽ akai naaturi tapinu. 18Abraham uduax awẽ kaiwuunuax ichapanawã kaĩpakedakawu bitsisipa ipadakawu. Naskatari na baitiixu ikawu nauxũ ẽ atu sharawanupukui. 19Ẽ Abraham kañawadi awẽ wakewu awẽ kaiwuunuax ichapanawã kaĩpakedakawawe ea ikũira wakata kayakawikui shinapakedakawu. Ẽ Abraham yuidi keskaiwawe ẽ atu axutiru”, naskaxu Epa Diospa anupukui na yuiyai.
20Epa Diospa Abraham yuidi: “Sodoma ikawu Gomorra ikawuri yura chakakuiwu ana askara ẽ tedetiruba. 21Naskaxu ẽ wutuxu ẽ atu uĩkai chakakuiwumaiki ea na yuitawu. Ikũmaiki tapixikĩ kaxu ẽ uĩkai”, wadi.
22Dukuwede rawe Sodoma wuwaiwudu Abraham Dioswe netedi. 23Aki chaiba kata Abrahampa Dios ñukadi: “Yura sharawuya reteta yura chakawuya mi atu reteime. 24Ipaixuba cincuenta yura sharawu Sodoma ikawu nawuya yura chakawu mi atu adaitime. 25Yura sharawu reteta yura chakawuya atu retea a sharaba. Atuwe chakabiswu keskara itiru. Da bai adua yurawawe mi atũ Dios bitsisipakui”, Abrahampa Epa Dios wadi.
26Naskata Diospa kebadi: “Cincuenta yura sharawu Sodoma ikawu atu wichixu atuuxũ yura chakawu ẽ adaititiruba”, Diospa Abraham kebadi.
27Abrahampa awiana Epa Dios yuidi: “Ẽ awayabawixu mi Diospa bitsisipa besetaba ẽ bia yui. 28Ipaixuba cincuenta yura sharawu wichiyabawixu cuarenta y cinco yura sharawu wichixu mi atu adaitime”, Abrahampa wadi. Diospa kebadi: “Cuarenta y cinco yura sharawu ẽ wichixu ẽ atu adaitiba”, wadi.
29“Ipaixuba cuarenta yura sharawu itiru”, Abrahampa wariawadi.
“Cuarenta yura sharake ẽ atu adaitiba”, Epa Diospa Abraham wadi.
30Awiana Abrahampa ñukadi: “Ẽ bia ñukariwaitu mi iki sidakĩ. Ipaixuba treinta yura sharawu mi wichiwixu mi atu adaitime”, wadi.
Diospa Abraham kebadi: “Treinta yura sharawu wichixu ẽ atu adaitiba”.
31Abrahampa awiana ñukadi: “Ewẽ Dios besetaba ẽ bia ñukai. Veinte yura sharawu mi wichixu mi atu aweskawaime”, Abrahampa wadi.
“Veinte yura shara wichiwixu Ẽ atu adaitiba”, Epa Diospa wadi.
32Awiana Abrahampa yuidi: “Ana bia wekaxtiwaxikiba ẽ bia ñukai. Ipaixuba diez yura sharawu wichixu mi aweskawaibame”, Abrahampa wadi.
Epa Diospa kebadi: “Diez yura sharawu wichixu ẽ atu adaitiba”, wadi.
33Abrahamwe tsaita Dios kadi. Abrahamri awẽ pexe tapas adu dasudi.
Currently Selected:
Génesis 18: mtsB
Highlight
Share
Copy
Want to have your highlights saved across all your devices? Sign up or sign in
