Génesis 16

Agarwe awẽ wake Ismael

1Abramweta Sarai wake atiruwuba ipaudiwu. Naskawia Sarai uibatiya idi bai Egipto adua awẽ ade Agar. 2Naskata Saraipa awẽ wede Abram yuidi: “Epa Dios ea wakeya wababisba. Naskake ewẽ uibati Agar awe iwe. Ipaixuba na uduax nu wakeyatiruki”, wadi. Na Saraipa yuiya Abrampa dikadi. 3Naskata Saraipa awẽ uibati Agar Egipto bai adua wede inadi awe inu. Nadu diez wari Abram ma Canaán adu ika idi.

4Abram Agarwe idi. Agar wake ma dadexu Sarai duikaspakĩ taewata uĩkaspadi. 5Naskake Saraipa Abram yuidi: “Miuxũ Agarpa ea duikaspai. Iwikui ẽ bia inayabea. Datiã ma wakeya iki bitsisipapai. Tsua uduax nu askamaiki Epa Dios duku yuinu”, Saraipa Abram wadi.

6Abrampa kebadi: “Mewẽ uibati dudu. Na mi apaiyai keskawawe”. Naskaxu Saraipa chakawakĩ taewaitu Agar naduax chaikui kadi tsua ikabari.

7Naskaweke Epa Dios awẽ ángelpa Agar wichidi tsua ikabadua. Nadu pozo keskara idi pexe ichapa wai kaa Sur adu. 8Wichixu yukadi: “Agar Sarai awẽ uibati. Wakiax mi uime. Waki mi kaime”, wadi. Agarpa kebadi: “Ewẽ diaiwu xawu awẽ ade Sarai aduax ẽ ichui”, wadi.

9Naskake Epa Dios awẽ ángelpa yuidi: “Mewẽ diaiwu xawuki awiana dasuwe na bia yuiyai keskaxikĩ”. 10Awiana Epa Diospa awẽ ángelpa yuidi: “Mewẽ kaiwuunuax ichapanawã kaĩpakedakawu. Tsuã tanawatiruba ipadaka”.

11Dios awẽ ángelpa yuidi:

“Mi wake dadea werunawake.

Awẽ ade Ismael#16.11 Diospa Agar dikadi. mi waaxiwi.

Epa Dios ma bia dika mi ubiskuiyaitu.

12Ismael yuina dii mera ika keskara inupukui.

Naatiiwuwe setenapakedaka. Nawuriwi setenapakedakawu nawe.

Awẽ udiwetsawuwiake atuwe setenapakedaka”, Dios awẽ ángelpa wadi.

13Ma Dios Agarwe tsaikadu Agarpa adedi Dios naatiiwi mi uĩ. “Ma ẽ Dios uĩya ẽ daaba”, Agar idi. 14Datiã pozo awẽ ade Na Epa Dios ipadakatu naatiiwi uĩ. Datiãriwi naa pozo nadu Cadés yawi Béred nexpakaya.

15Naskax Agar awẽ wake kaĩdi. Na Abrampa awẽ wake idi. Naskake Abrampa adedi Ismael, wadi. 16Na wake kaĩditiã Abram ochenta y seis wariya idi.

Currently Selected:

Génesis 16: mtsB

Highlight

Copy