1 Tantara 22
22
1Ka hoy i Davida hoe: «Eto no tranon’ny TOMPO Andriamanitra ary eto no alitara fanoloran’ny Israelita sorona dorana manontolo.»
Omanin’i Davida ny fanorenana ny tempoly
2Nasain’i Davida novorina ny olona hafa firenena#22.2 Ny tondroin’ny mpanoratra amin’ny hoe olona hafa firenena eto dia ireo taranaky ny olona nonina tao Palestinina talohan’ny fahatongavan’ny Israelita hiorim-ponenana ao (jereo ny FTS amin’ny voambolana hoe AMÔRITA). nonina teo amin’ny tanin’i Israely, ka nanendreny tambato hipai-bato hanaovana ny tranon’Andriamanitra. 3Novononin’i Davida koa ireto zavatra ireto: vy betsaka hanaovana fantsika ho an’ny lelavaravarana sy hanaovana faraingo; halimo betsaka tsy hita lanja; 4ary hazo sedera tsy hita isa, fa nitondran’ny Tsidônianina sy ny Tirianina#22.4 Ny Tsidônianina sy ny Tirianina (mponina tao amin’ny faritr’i Tsidôna sy i Tiro) dia havanana tamin’ny asa hazo, dia ny hazo avy tany amin’ny tendrombohitra Libano (jereo 1 Mp 5.20 sy nta). hazo sedera betsaka i Davida. 5Fa hoy izy anakampony: «I Salômôna zanako mbola kely sady tanora fanahy, ary ny tempoly haorina ho an’ny TOMPO dia tsy maintsy ho lehibe tokoa mba hielezan’ny lazany sy ny voninahiny any amin’ny tany rehetra; koa hovononiko rahateo ny zavatra hoenti-manao azy#22.5 hoenti-manao azy: dkt hafa hoenti-manampy an’i Salômôna. .» Dia nahavonona betsaka tokoa i Davida fahavelony.
Hafaran’i Davida i Salômôna mba hanorina ny Tempoly
6Ary niantso an’i Salômôna zanany i Davida ka nandidy azy hanorina tempoly ho an’ny TOMPO Andriamanitr’i Israely 7sady niteny taminy hoe:
–Anaka efa mby tato am-poko ny hanorina trano ho an’ny TOMPO Andriamanitro; 8saingy niantefa tamiko ny tenin’ny TOMPO hoe: «Be ny ra efa nalatsakao tamin’ireo ady lehibe efa nataonao ka tsy ianao no hanorina trano ho Ahy, satria be ny ra efa nalatsakao tamin’ny tany teo imasoko. 9Fa indro hisy zazalahy haterakao, izay ho olona tia fandriampahalemana sady homeko fandriampahalemana eo anoloan’ny fahavalo rehetra manodidina azy. Ny anarany manko hatao hoe Salômôna –izany hoe ‹tia fiadanana› –ary homeko fiadanana sy fandriampahalemana i Israely amin’ny andro hanjakany. 10I Salômôna no hanorina trano ho Ahy: izy ho zanako, Izaho ho rainy, ary hohamafisiko mandrakizay ny sezafiandrianan’ny fanjakany eo amin’i Israely#22.10 And 7-10: jereo 17.1-7; 2 Sam 7.1-16.. 11Koa ankehitriny, anaka, hiaraka aminao anie ny TOMPO ka hanambina anao hanorina trano ho Azy TOMPO Andriamanitrao, araka izay efa voalazany ny aminao. 12Homen’ny TOMPO saina mahiratra sy mahay anie ianao rehefa hatsangany hifehy an’i Israely, mba hitandremanao ny lalànan’ny TOMPO Andriamanitrao. 13Eny, raha tandremanao hotanterahina ny lalàna amam-pitsipika izay nandidian’ny TOMPO an’i Mosesy ho an’ny Israelita, dia hambinina tokoa ianao. Mahereza sy matanjaha, fa aza matahotra na mivadi-po#22.13 Ampit Jos 1.6-9.. 14He! nanao ezaka mafy aho ka nahavonona ho an’ny tranon’ny TOMPO ireto fitaovana ireto: volamena milanja telo tapitrisa kilao mahery, volafotsy milanja telopolo tapitrisa kilao mahery, halimo sy vy betsaka tsy hita lanja; ary nahavonona hazo sy vato koa aho. Dia hampianao kosa ireo. 15Mpiasa maro no eto aminao: dia tambato sy mpanao sokitra hazo ary olona mahay ny asa isan-karazany. 16Tsy hita isa ny volamena sy ny volafotsy ary ny halimo sy ny vy; koa arosoy ny asa, ary hiaraka aminao anie ny TOMPO!
17Avy eo i Davida nandidy ny lehibe rehetra tamin’i Israely hanampy an’i Salômôna zanany lahy hoe:
18–Tsy miaraka aminareo ve ny TOMPO Andriamanitra? Nomeny fandriampahalemana eo amin’ny manodidina rehetra ianareo, nony natolony ho ambany fifehezako ny mponina taloha tamin’ity tany efa resy teo anoloan’ny TOMPO sy teo anoloan’ny vahoakany ity. 19Koa ankehitriny, aoka ny fo amam-panahinareo hifantoka hitady ny TOMPO Andriamanitrareo! Irosoy ny asa, aoreno ilay Toeramasin’ny TOMPO Andriamanitra; ary dia ao amin’ny tempoly haorina ho voninahitry ny TOMPO no hampidiranareo ilay Vatamasina mirakitra ny fanekempihavanan’ny TOMPO sy hampidiranareo ny fanaka voatokana hanompoana an’Andriamanitra.
Currently Selected:
1 Tantara 22: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
