Matthew 25

Asi jahansa tang raaqshiton

1 “Eshi rangham tho, Rangmungtan sha irimal angna. Asi miqnu nalpang som eq thariktey wa jam tho tachong ma thalat ta. 2Ning thiwang nu banga tha athom angta etho nu banga tha thung atha angta. 3Athom nu banga they nalpang tha usom eq ta, etharin tel sha som moq angta. 4Thung atha nu banga they nalpang jam tho utung sho tel sha rap sak som eq ta. 5Thariktey wa thuk ma utham sey ang atho, ning thaji náng ti eq lak jib angta.”

6 “Rangpal kam tho ning aa ringrak kap tat ta, ‘Siin inn, thariktey wa sha sey kachey pha, piq jam tho tachong ma ka i.’ 7Jahansa tang thaji tha shat eq miq mama nalpang tha tasang ta. 8Etho athom nu banga they thung atha nu tang thima batta, ‘Nim tel ni wang amaan dan í ma tho kophin, chammatakoi í nalpang tha umit sey ang chey aa’. 9Etharin thung atha nu banga they thawel batta, ‘Jin ko pha mi, ira í ma etho nim ma li moq angna. Nim aa usang tey relnáng ka eq nim rangma ri ka inn.’ 10Ning rik katma qhing chuwang atho, thariktey wa tha thuta etho bara eshina ban kacha angta, ning tha thariktey wa jam tho rungsat náng wangta etho kalung tha sakchak ta.”

11 “Ethi ji tho adak tang tha thu eq batta, ‘Tatalteywa, tatalteywa, í ma kalung lak ko phu.’ 12Thariktey wa they thawel batta, ‘Nga nim ma asing batphang, nga nim sam pha mong.’”

13 “Ethirangma ban kacha ang inn, chammatakoi nang aa ethi saal etho ethi rangham sha tha baluk otho sam mu.”

Atom sanga raaqshiton

(Luke 19:11–27)

14 “Eshi rangham tho, Rangmungtan sha irimal. Miqwa ashey adak mung náng kawey moq jakho, usanga tang hal eq ulik angin tha koshing ta. 15Piq aa ashey thima hayat banga, ashey thima hayat ni etho jiwang thima hayat shey nginsa kot shing ta. Wa tom thima chamtan jin som aa eshimal hun esha kot shing ta. Etho piq adak mung náng qhing chuwang ta. 16Hayat banga nginti kaptey, piq takot kang eq hayat banga wey thajoq ta. 17Ethimal hayat ni kaptey wa they, tho hayat ni wey thajoq ta. 18Etharin hayat shey kaptey wa they ka eq haq bing tha khit ta, etho utangteywa kota ngin tha bung shing ta.”

19 “Daklot jio, ning tangteywa tha thu eq ngin they chamlang som tin ta pitta. 20Hayat banga nginti kaptey wa they, hayat banga nginti thajoq ta tha kochak eq batta, ‘Tangteywa, nang aa ngama hayat banga koshing taphu. Siin u, nga hayat bangnga wey thajoq táng.’ 21Utangteywa they piq ma batta, ‘Jaqhal ni uhan eq ching sanga, nang aa jaqhal som tu! Nang raa amaan dan wang uhan ching rol, nga nang raa daqhan tang wang siin tan ma shing phanáng. Ba tangteywa sungrang jam sho rap sungrang u.’ 22Etho hayat ni nginti kaptey they batta, ‘Tangteywa, nang aa nga ma hayat ni koshing taphu. Siin u, nga hayat ni wey thajoq táng.’ 23Utangteywa they piq ma batta, ‘Jaqhal ni uhan eq ching sanga, nang aa jaqhal som tu! Nang amaan dan wang uhan eq ching rol, nga nang raa daqhan tangwang siin ma shing phanang. Ba tangteywa sungrang jam sho rap sungrang u.’ 24Hayat shey nginti kaptey wa tha thu eq batta, ‘Tangteywa, nang tinchey miq ta nga usam eq taphang. Nang aa bari na khey mu shiwang qhan u, etho bari na won mu shiwang thajot tun u. 25Ethirangma nga ucho ang táng etho ka eq nang aa kota phu ngin tha haq bung khit eq bung shing táng. Siin u, bara barang esha hun.’ 26Utangteywa they piq thima thawel batta, ‘Jashit ni ajung sanga, nga bari na khey mong eshiwang qhan ang etho bari na nga won mong eshiwang thajot tun ang ta nang aa usam eq tu. 27Nang aa i ngin tha takot kang adak tang ma kochak tu jo, nga thu eq i ngin tang tha uthip jamoq thajot tun wang táng.’ 28Ethirangma, ngin ni piq jak wang chu chak u etho bari jakna na ahan, piq ma kochak u. 29Chammatakoi, utang jakna atha piq ma wey rap kot eq na etho piq jakna daqhan sey angna. Etharin utang jakna ahung, bara atha esha tho thawel chuk eq na. 30Etho iri jashit sanga ri irel wang anak náng sakchak u; eshina qhap ngey eq paa tachik kak na.”

Kaphung rangney

31 “Miqna Sa piq phun amun jamoq etho rangkamwa tang thaji jam tho kapha jo, piq lungwang tongching shina sey tong na. 32Etho thaji phan ajat tang tha piq relsho thajoq na, etho chammal kelwut rimtey tang aa kelwut ni kel tang sha phal aa, ethimal piq atho miqtang thaji sha phal ni ma phal na. 33Piq aa kelwut tang tha ujak qhak kotho, etho kel tang tha ujak qhit kotho shingna. 34Esho Lungwang eq jakqhak kowang tang thima batna, ‘Nim thaji Iwa sunmaan kaptey tang, wangphin. Nim mingkang haq hun tok wang nga nim ma shing táng, nim mung shináng wang inn. 35Chammatakoi, nga chamlal na ang táng tho, nim aa nga ma phaksat kota phin; nga junglal ti táng tho nim aa nga ma jung thaling taphin; nga adak mungtey ang táng tho, nim aa nim him sho tatong taphin. 36Nga khat ahung ang táng tho, nim aa ngama kho khat tasam taphin; nga taksa ang táng tho, nim aa nga thok siin taphin; nga chukna ang táng tho, nim i jamoq thok tachong taphin.’ 37Miq asing tang they thawel batna, ‘Teyhungwa, í aa baluk o nang chamlal ti u tha kap khi eq phaksat taphaksat taphi, junglal ti u tha kap khi eq jung thaling taphi? 38Í aa nang baluk o adak mungtey ta kap khi eq í him sho tatong taphi, baluk o hansang kap khi eq khat tasam taphi? 39Í aa nang baluk o takasa ang tu etho chukna kap khi eq ba jamnang thok tachong taphi?’ 40Esho Lungwang wa they thawel batna, ‘Nga nim ma asing batphang, nim aa ijiphantey tang wang thaji pheynáng eq aming jam tho som tin, esha nim aa ngama somlo kota phin.’”

41 “Etho piq aa aqhit kowang tang thima batna, ‘Manthun tang, i relwang thun moq wal náng ka inn, bara Thangwa nia urangkamwa tangma banhun shingta. 42Chammatakoi, nga chamlal na ang táng tho, nim aa ngama phaksat kopha min ang tin; nga junglal ti táng tho, nim aa jung thaling phamin ang tin. 43Nga adak mungtey ang táng tho, nim aa nim him o tatong phamin ang tin; nga hansang ang táng tho, nim aa khat tasam phamin ang tin; nga takasa ang táng etho chukna ang táng tho, nim ijamoq thok tachong phamin ang tin.’ 44Etho ning aa thawel batna, ‘Teyhungwa, í aa nang baluk o chamlal, junglal, adak mungtey, hansang, chukna khita phi etho nang nong pha mi ang ti?’ 45Piq aa thawel batna, ‘Nga nim ma asing batphang, nim aa ijiphantey tang wang thaji phey náng eq aming jam tho bara som min ang tin, esha nim aa i rangma somlo min ang tin.’ 46Ning aa pattuk tsamnang sha kap na, etharin miq asing tang pattuk rollong shináng nopna.”

Currently Selected:

Matthew 25: Mmmm

Highlight

Copy