Matthew 19

Jesu aa wapak kho raaq batta

(Mark 10:1–12)

1Ira bat jio, Jesu Galilee shing chak eq Jordan jungshi hangko kang Judea mung náng kata. 2Daqhan miqtang piq ching náng kata, etho piq aa ethi wang tak asa tang sha taqhal ta.

3Phorisi tang aa piq raa thaman ma nukta, ethi rangma ning thu eq pitta, “Hiqtang thong na, chamli raaq tungkang o, ashey miqwa eq uhimteynu jamoq wapak kho sha jin kho eq na i?”

4Jesu aa thawel batta, “Nim aa Asang likwit na taka aa tha phat min ang tin i? Phang huntey aa ashey miqwa etho ashey miqnu hunta. 5Etho Shkewa batta, ‘Iri tungkang o, miqwa eq unu ni uwa sha shing chak eq, uhimteynu jamoq kara tong na, etho ning ni sha ashey angna.’ 6Req eshi rangham wang ningni sha ani ang moq, ning ni ashey sey angna. Ethi rangma bara Shkewa tachap ta, esha miq eq phal chak ching ang moq.”

7Phorisi tang aa piq ma pitta, “Etha otho ashey miqwa uhimteynu shingchak ma tathin ajo, wapak likwit wit eq piq aa jin shing chak eq na ta Moses aa thong na cham ma batta?”

8Jesu aa batta, “Moses aa nim tintsey tungkang o, nim himteynu ma wapak jin kho eq aa ta batta. Etharin phang na irimal ang moq angta. 9Nga nim ma batphang, ashey miqwa uhimteynu aa sathuk jaksom moq ang eq adak raaq ma piq tha wapak kho eq, adak miqnu wey kap ajo, eshi miqwa shey sathuk somlo aa.”

10Ujiphantey tang aa Jesu ma batta, “Miqnu miqwa jaktung na irimal ang ajo, tharik hung aa tong sha aqhal.”

11Jesu aa batta, “Thaji miqtang eq iri raaq raa jin sam moq, etharin barima Shkewa iri raaq raa samtol kota, ning aa hun jin sam na. 12Chammatakoi, chamtey ukhi wang hun ning hanphung na hun akum ang tungkang o jin tharik moq! Chamtey miqtang aa ning hanphung sho adak miq eq tashit tungkang o, jin tharik moq! Etho chamtey tey eq Rangmungtan rangma tharik moq angma tal aa. Utang eq iri raaq raa jin som eq aa, som inn!”

Jesu aa nijang tang tha sunmaan aa

(Mark 10:13–16; Luke 18:15–17)

13Iri jio miqtang aa ning nijang sa tang kho o ujak shing eq romtam chuk rangma Jesu jamnáng solkat ta. Etharin ujiphantey tang tha ning ma khata. 14Jesu aa batta, “Iri nijang tang ri ijamnáng takat phin, ning ri ijamnáng kat ma nak táng inn, chammatakoi Rangmungtan sha ning mal rima.”

15Jesu aa ning kho o ujak tha shing eq ning tha tasunmaan ta, req ning tha ethi wang qhing chuwang ta.

Tanglom jaro wa

(Mark 10:17–31; Luke 18:18–30)

16Takshey tho, ashey miqwa eq Jesu jamnáng thu eq pitta, “Tatalteywa, pattuk rollung kap ma nga chamlang jaqhal somlo ang?”

17Jesu aa batta, “Nang aa ‘chamlang aqhal aa’ ta nga ma cham ma pit phu? Miq ashey dang hun jaqhal. Pattuk rollung náng thok ma nuk ajo raaqkhat tang sho ka u.”

18Piq aa pitta, “Bari raaqkhat raa?”

Jesu aa batta, “Nang aa nak tatik u, nang aa sathuk nak som u, ahut hut ching ang moq, alik miikkhi nak bat u. 19Ba nu ni ba wa rangka u etho ba himreltey ma nang mal tinmat u.”

20Jaro wa they thawel batta, “Nga iri thaji raaqkhat tang ro hun tat ang. Adak chamlang sey rap som ching?”

21Jesu aa piq ma batta, “Nang khakla angma ta ujo, ka u etho baching na chamtan aa shi sang u etho ngin shi tangshi tang ma ko u etho nang aa mungtan na likti nginsang kap nu. Ethi jio iji phan phu.”

22Jaro wa they ira tat atho, piq shuru ti eq qhing chuwang ta, chammatakoi piq sha rapney tanglom angta.

23Jesu aa ujiphantey tang ma batta, “Nga asing batphang! Tanglom miq ma Rangmungtan náng thu ma rapney ahal angna. 24Nga nim ma wey bat phang, ashey tanglom sha Shkewa Mungtan náng nop wang, ashey utt sha mitkat po na thalin sha achol.”

25Ujiphantey tang aa ira tat atho, ning tha rapney patja eq pitta, “Irimal ang ajo utang sha jin lunna?”

26Jesu aa ning ching náng siin eq batta, “Miqtang rangma ira jin ang moq, etharin Shkewa thaji jin somlo na.”

27Req Peter aa batta, “Í aa thaji shingchak eq baji phan ta phi. Í aa chamlang kap ni?”

28Jesu aa batta, “Nga asing bat phang, mingkang anal rangham tho, Miqna Sa lungwang ang eq phun amun tongching na tong ajo, nim asi ani i jiphantey tang sha asi ani tongching na tong eq, Israel asi ani phan sha khaphung nin. 29Etho utang eq tho, i rangma ning him sha tia uno nia upho tang sha tia unu nia uwa sha tia usa tang sha tia upik haq tang sha shing chak ajo, ning aa irináng eq juk shashey wang eq tho ahan kapna etho pattuk rollung kapna. 30Etharin jakho miqtang wang daqhan sha jina angna, etho ji na miqtang wang daqhan sha jakho na angna.

Currently Selected:

Matthew 19: Mmmm

Highlight

Copy