Matthew 14

John jungthalamtey wa tatik

(Mark 6:14–29; Luke 9:7–9)

1Eshi neynap tho Galilee lungwang Herod aa Jesu tung aa raaq tatta. 2Piq aa ujaksom tey tang ma batta, “Piq asing wang John jung thalamtey wa hun angna, piq tha utik wang wey jey ta. Req piq ma patja jaksom ma itan tarong atha.”

3Chammatakoi Herod aa phang tho John tha thalo eq chuk náng sakta. Piq aa upho Philip himteynu Herodias tungkang o irimal somta. 4John Jung thalamtey wa aa Herod ma batta, “Herodias jamoq tharik sha nang ma khakla ang moq!” 5Herod aa piq tha tatik ma tathin ta. Etharin piq Jehudi mung miqtang ma ucho angta, chammatakoi ning aa John raa rangsamal ta tathin ta.

6Herod ukhi saal o Herodias miqnu sa tha winwa thim o ninta. Herod rapney sungrang ta. 7Etho piq aa miqnu ma rangtum kota, “Nga rangtum ang, nang aa chamli chu phu sha nga ukot eq phanáng.”

8Herodias they umiqnu sa ma irimal chuk ma batta, “John jung thalamtey wa kho ri ashey khung roq kophu.”

9Ira tat eq lungwang Herod tin rapney shita, etha otho piq aa thaji winwa tang jakho o rangtum shing tungkang o, miqnu they chu aa thimal kot ma piq aa raaqkhat kota. 10Req Herod aa chuk mong na John kho tha tathaduk chakta. 11Khung o shing eq John kho tha miqnu thima kochakta, etho piq aa unu ma kokatta. 12John jiphantey tang thu eq piq máng tha som chuwan eq bungta. Etho ning ka eq Jesu ma batta.

Hayat banga miqtang ma taphaksa aa

(Mark 6:30–44; Luke 9:10–17; John 6:1–14)

13Jesu aa John raaq tat atho piq iri haq raa shing chak eq, ashey waqwan náng qhung tong eq piq chanchan kishikshik haq náng qhing chuwang ta. Miqtang they ira tat atho, ning aa samhaq tha shing chak eq ning qhing eq Jesu relnáng kata. 14Jesu waqwan wang thalat ta tho, piq aa daqhan miqtang khita etho piq ning ma rapney tinshit khongta etho ning thaji takasa miqtang tha piq aa taqhal ta.

15Ethi rangja tho, ujiphantey tang thu eq Jesu ma batta, “Ira kishikshik haq etho rapney sey tham ti i. Miqtang ri takat u etho qhim náng ka eq phaksat ching cham ri ka aa.” 16Jesu aa batta, “Iri wang ukat angma ràa moq, nim aa ning ma phaksat chingko inn.”

17Ning aa batta, “Thanga hiqtang ching na banga banlo etho ani ngaqsa chen.”

18Jesu aa batta, “Iri tang ri iching náng som kat phin.” 19Piq aa miqtang thima naamrun kho o tong ma batta, etho piq aa banga banlo etho ani ngaqsa som eq, rangnáng siin eq Shkewa ma kechu ajong kot ta. Ethi jio, piq aa banlo tha pin eq ujiphantey tang ma kota etho ujiphantey tang ka eq miqtang thima kota. 20Thaji miqtang eq wok taphutla phaksat ta. Ethi jio, ujiphantey tang aa udak banlo pin tha asi ani qhong o thajota. 21Miqnu tang etho nijangmay tang sha dak chak eq eshina hayat banga miqwa tang angta.

Jesu jungkho o qhing aa

(Mark 6:45–52; John 6:15–21)

22Kalo, Jesu aa ujiphantey tang tha waqwan o tatong eq shitim hangko kang náng takatta etho piq aa miqtang tha himnáng takat ta. 23Miqtang takat jio, piq romtam ma ashey kannáng qhungta. Rangja ang atho, Jesu eshina piq chen chen angta. 24Ethi rangham tho waqwan tha shitim na jungmot they dakjong aa mot chey ta chammatakoi rapney ajong hal rangpong chey ta. 25Rangnap atom rangham jio, Jesu jungkho o qhing eq ujiphantey tang jamnáng thuta. 26Ning aa Jesu jungna qhing atha khi eq, rapney chota etho batta, “Ina jungban.” Etho ucho wang ring rakta.

27Kalo Jesu aa ning ma batta, “Nak cho inn! Ira nga! Tin thajong inn.”

28Etho Peter aa thawel batta, “Teyhungwa, nang ang ujo, nga ba relnáng kat ma batphu.”

29Jesu aa batta, “Kaphu.” Etho Peter waqwan wang thalat eq Jesu ching konáng jung kho o qhingta. 30Etharin ajong rangpong etho jungmot tha khi eq piq ucho angta, etho piq jung tho tat ngap tita. Etho piq ring ta, “Teyhungwa, ngari thalun phu.”

31Jesu ka eq Peter tha lo eq jung wang lat eq batta, “Bakam sha chamtan ma ney aa? Batin mong o nga cham ma nan tu?”

32Ningni ka eq waqwan na qhung atho, rangpong tha uthum sey angta. 33Waqwan o tongtey ujiphantey tang aa Jesu tha shumnuk eq batta. “Asing hun nang raa Shkewa Miqwasa!”

Gennesaret wang atak asa tha Jesu aa taqhal aa

(Mark 6:53–56)

34Ning shitim thalit eq Gennesaret mung náng thuta. 35Ethi haq wang miqtang they Jesu tha using eq ta etho arel wang mung tang thima tatat ta etho thaji takasa miqtang tha Jesu relnáng thok solkat ta. 36Ning aa Jesu ma anin eq batta, “Ba khat bal shi atak asa miqtang ma tatit ma kot u!” Etho utang eq Jesu khat bal tatit tey thaji tha qhalta.

Currently Selected:

Matthew 14: Mmmm

Highlight

Copy