Luke 18
18
Noti nu nia khaphung kottey raaqshiton
1Jesu aa ujiphantey tang thima salwet romtam chuk ching etho baluk o tho tinjung náng moq angma tatal ma ashey raaqshiton bat kota. 2“Chamtey samhaq na ashey khaphung kottey angta bara Shkewa ma cho moq angta etho miqtang tho rangka moq angta. 3Etho eshi samhaq sho hun ashey noti nu angta barey eshi khaphung kottey ching náng piq jin thuta, khaphung kot ma piq aa nong chuta, ‘I ralwa jamoq khakla khaphung kophu’. 4Daklot jio khaphung kotteywa aa chamtho som moq angta, etharin uthun ma piq ni piq thima batta, ‘Nga Shkewa ma tho cho mong etho miqtang ma tho rangka mong, 5irimal ang ajo tho iri noti nu rey salwet tsamnang thu eq nga raa paklak phang, iri rangma khakla eq khaphung konáng, etha ang moq ang ajo piq thu chey ro ang phana etho nga raa thanáng tik phanáng!’”
6Etho Teyhungwa batta, “Iri miqshi khaphung kotteywa rey chamta batta sha usam eq ma tathin inn. 7Etho, Shkewa piq miqtang ma barey paltang saltang piq ma hal eq qhapngetey ma khakla phung moq angna i? Piq aa unong eq ma karel angna i? 8Nga nim ma batphang, piq aa nim rangma kalo khakla khaphung phanin. Etharin Miqna Sa kat rangham o mingkang na kam thupha na i?”
Phorisi nia phunta qhoktey raaqshiton
9Etho Jesu aa miqtang ma barey piq ni piq ma chen jaqhal tathin eq adak miqtang ma jashit ta tathin aa eshi miqtang ma iri raaqshiton raa batta. 10“Wani rangnuk him náng romtam chuk ma kata: ashey Phorisi miq angta etho ashey sha phunta qhoktey miq angta. 11Phorisi wa tha lang eq piq ni piq ma raaq eq romtam chuta, ‘Shkewa, nga nang ma kechu ajong kophang, chammatakoi nga miq dak mal ang mong, nga ahut ang mong, jashit jaksomtey ang mong etho sathuk jaksomtey ang mong; nga nang ma kechu ajong kophang chammatakoi nga iri phunta khoktey mal tho ang mong. 12Nga saal sanat o saalni sha wokcham tong ang, etho nga chamtan kaplap ang shiwang nang ma rangpal kophang.’ 13Etharin, eshi phunta qhekteywa tha alo na lang eq, mungtan chingko náng tun siin hung aa, utik tho tiip eq batta, ‘Shkewa, nga ngarey miq, nga ma tinshit phu!’” 14Jesu aa batta, “Nga nim ma batphang, iri phunta qhekteywa Shkewa jakho na miq qhal ang eq qhing chuwang ta, etho Phorisi miq tha irimal ang moq angta, chammatakoi barey piq ni piq ma ajong ta tathin aa sha tinin ma angna, etho barey piq ni piq ma tinin ta tathin aa sha ajong ma angna.”
Jesu aa nijang sa tang ma sunman aa
(Matthew 19:13–15; Mark 10:13–16)
15Chamtey miqtang aa usa nijang jang tha Jesu relnáng ning kho o Jesu jak tha shing ma thok solta. Ujiphantey tang aa iri tang raa khi eq ning thima khata. 16Etharin Jesu aa nijang sa tang tha piq relnáng hal eq batta, “Nijang sa tang ri ijamnáng takat phin etho ning ri nak táng inn, chammatakoi Shkewa mungtan raa irimal miqtang rangma hun. 17Nga nim ma asing batphang, nijang mal Shkewa Mungtan sha thang min ang inn jo utang tho eshináng jinwang moq angna.”
Tanglom miqwa
(Matthew 19:16–30; Mark 10:17–31)
18Jehudi solwa ashey Jesu ma pitta, “Jaqhal raaq tataltey wa, nga pattuk rollung kap ma chamlang somlo ching aa?”
19Jesu aa piq ma pitta, “Nang aa jaqhal ta chamlang ma hal phu? Shkewa hun aqhal, adak utang tho ahung. 20Nang aa raaqkhat usam eq u, ‘Sathuk som ching ang moq; miq tatik ching ang moq; hut hut ching ang moq; miq ma jobat ching ang moq; ba nu nia wa rangka ching.’”
21Eshiwa aa batta, “Nga nijang wang duk iri tang thaji thong raa tat eq qhang phang.”
22Jesu iri raaq raa tat eq piq thima batta, “Thanga tho nang aa ashey jaksom ching atha tong wey aa. Baching na chamlang tang thaji shi sang ka eq ngin tang ni tangshi tangma phal ko u, etho nang aa mungtan na lik angin kapnu; etho iji phanphu.” 23Etharin eshi miq aa iri raaq raa tat eq, piq tin rapney shita, chammatakoi piq rapney tanglom hal angta.
24Jesu eshi wa tin na rapney shi aa ta khi eq piq ma batta, “Tanglom miqtang ma Shkewa Mungtan náng nop ma rapney hal aa. 25Ashey utt sha mitkan po o nop eq jinwang náng eq ashey tanglom miq Shkewa Mungtan náng nop rapney halna.”
26Esha tat eq miqtang aa piq thima pitta “Irimal ang ajo, utang jin lunna?”
27Jesu aa thewel batta, “Miqna ma jin ang moq sha Shkewa jin somlo eq aa.”
28Ethi jio Peter aa batta, “Siin u! Í aa ba jiji phan ma thaji shingchak ti.”
29Jesu aa ning thima batta, “Nga nim ma asing batphang, barey Shkewa Mungtan rangma uhim tia uhimteynu tia upho no tang tia unu ni wa tia usa tang sha shingchak ajo, 30ning aa i rollung ro, juk daqhan kapna etho uthok rangham tho pattuk rollung tho ukap eq na.”
Jesu aa taktom piq tik raaq bat aa
(Matthew 20:17–19; Mark 10:32–34)
31Jesu aa wa asi wani ujiphantey tang hang náng solkat ka eq ning ma batta, “Tat inn! Hiqtang Jerusalem náng ka ijo rangsamal tang aa Miqna Sa tung aa raaq wit ta tha thaji asing angna. 32Piq sha Gentile tang jaknáng ko chakna, etho ning aa piq sha junnam na, tharak rina, etho piq sha tikthuk na. 33Piq watna etho tatik eq chakna, etharin saal tom jio piq wey jey angna.”
34Etharin ujiphantey tang aa iri tang raa sam moq angta; iri raaq tang raa ning wang tapu shingta, etho Jesu aa chamta battan aa tha ning aa sam moq angta.
Jesu aa miikduk dantuntey tang tha taqhal aa
(Matthew 20:29–34; Mark 10:46–52)
35Jesu Jericho relnáng sey thu atho, miikduk miqwa lamna dantun eq tong ta. 36Piq aa eshiwang miqtang rong tharaa qhing atha tat eq, pitta, “Chamlang ang aa?”
37Ning aa piq ma batta, “Nazareth Jesu iriwang ka chey aa.”
38Piq ring qhap eq batta, “Jesu! David sa! Tinshit phu!”
39Jakhona qhingtey miqtang aa piq ma mol ta etho shu shu eq tong ma batta. Etharin piq jujong aa wey ringta. “David miqwasa! Tinshit angphu!”
40Req Jesu aa tánglang eq miikdukwa tha piq relnáng solkat ma raaqkhat kota. Baluk o piq tha urelna sey ang atho, Jesu aa piq ma pitta, 41“Nga ba rangma chamlang jin eq phanáng?”
Piq aa batta, “Tangteywa, nga wey khi eq ma nuk ang.”
42Jesu aa piq ma batta, “Etha o wey khi u! Ba kam wang eq nang qhaltu.”
43Rikla piq aa wey khita, etho Shkewa ma kechu ajong ko eq piq aa Jesu ji phanta. Eshiwang miqtang thaji they ira khi eq, Shkewa tha tasapsey ta.
Currently Selected:
Luke 18: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
