Luke 11

Jesu aa romtam tatal aa

(Matthew 6:9–13; 7:7–11)

1Saalshey ang atho Jesu ashey haqna tong eq romtam chuta. Piq romtam sey thun atho ujiphantey tang wang ashey aa piq ma batta, “Teyhungwa, John ujiphantey tangma tatal ta thimal nang atho í ma romtam chamal chuk ching thi tatalphu.”

2Jesu aa ning thima batta, “Nim aa romtam tok o iri raaq inn:

Iwa:

Ba miing asang ta cham rangka aa,

Ba mungtan ri cham ka pha.

3 Í ma salwet phaksat usal saal o kochey ro eq phu.

4 Etho í ngarey ri tolchak phu,

chammatakoi barey í ma thaja somtey tang, í aa tho ning ma tolchak i.

Etho í shi tari náng nak tathok phu!”

5Etho Jesu aa ujiphantey tang thima batta, “Raaq ni raaq, nim jaktung wang ashey rangpal o unokwa jamnáng ka eq batna, ‘Nokwa tinshit eq nga ma banlo wang lotom eq kophu. 6Chammatakoi ihimnáng inokwa ashey thutapha etho piq ma taphaksat ma ijakna chamtho ahung.’ 7Etho nokwa aa batna, ‘Nga thanga nak paklak phu; chammatakoi thanga nga kalung shak eq nijang may jamna ujib ang chey ang. Thanga shat eq nga nang ma chamtho rukko phamong ang phanáng.’ 8Nga nang ma batphang, piq nokwa shat eq komoq ang ajo tho, rakri hunga chu chey ajo piq aa chamlang chuta sha thaji ukap eq na. 9Iri rangma nga nim ma batphang: uchuk eq inn etho nim ma kot eq phanin; ubi eq inn etho nim aa kap eq nin; udok eq inn etho kalung ulaak eq kopha nin. 10Chammatakoi utang eq chu na ethitey thima kot na, utang eq bina ethitey they kapna, etho utang eq udok ethitey thima lak kot eq na. 11Nim wang irimal wa utang ang aa barey usa eq ngaq chu ajo pu sha ukot eq na i? 12Etha ang moq ang ajo piq aa wochi chu ajo nang aa qhíngqhong ukot eq nu i? 13Nim jashit ang inn jo tho, chamal eq jaqhal sha nim sa rangma aqhal sha kot ma nim aa usam eq inn, irimal ang ajo mungtan na tongtey nim Wa uchuk tey tang ma chamtan daqhan Asang Tsija kot na!”

Jesu nia Beelzebul

(Matthew 12:22–30; Mark 3:20–27)

14Jesu aa raaq may raaq moq angta ashey thangwa phanta, etho eshi thang tha sey chuwang atho eshiwa tha may raaq sey angta. Esho miq rong tathung ta tang tha rapney rong patja ta. 15Etharin chamteytey miqtang aa batta, “Thangwa tang lungwang Beelzebul aa piq ma thangwa tang phan ma tarong kot aa.”

16Chamteytey miqtang aa Jesu tha tari rang thima piq ching wang rangkang wang ashey patja jaksom takhi u ta batta. 17Etharin Jesu aa ning tin na ning aa chamta tathin aa tha usam eq ta, ethi rangma ning ma batta, “Bari mung raa taphal ang aa, eshi mung sha taqhat janta ang ajo eshi mung sha alo tong moq angna etho ashey himkha na miq sha thamol hit eq tong aa ta ang ajo ning sha arum na alo jin tong moq angna. 18Thangwa mung sha thamol hit ang ajo chamal kashey jin tong na? Nga nim ma irimal pit phang, chammatakoi Beelzebul tarong wang nga thangwa tang sha phan ang ta nim aa bat inn. 19Nga irimal ang eq ning sha phan ang ta ang ajo nim jiphantey tang aa ning shi chamal eq phan na? Nim jashit jaksom tang sha nim jiphantey tang aa hun takhi na. 20Etharin nga Shkewa tarong wang hun thangwa tang phanáng ta ang ajo, Shkewa mungtan tha nim jaktung na uthok sey angta ta ira tasam ma ko aa.

21 “Ashey tarong miq eq ukhom ajan sha ujak na shing eq uhim sha ban ajo, utang wang tang sha aqhal angna. 22Etharin piq náng eq tho tarong miq eq piq sha khim eq jin ajo, him tangteywa khom ajan sha tungmang eq tong ta sha hut som chuwan na etho som chuwan eq ta tang sha phal na.

23 “Bara ijam jamna ang moq ang ajo, piq sha i miiksuk tey ang aa etho bara ijamoq thajotey moq ang ajo piq sha uwontey.”

Anan tsija tha wey thok wel aa

(Matthew 12:43–45)

24 “Anaan tsija sha miq ashey hanphung wang thalat eq ka ajo, piq aa utong chey angma haqkhuk bitey aa. Piq aa kap moq ang eq, piq aa tathin aa, ‘Nga bari wang thalat tang eshi him náng wey wel náng.’ 25Piq uhimnáng sey wel atho, piq aa uhim tha asang etho tachum rangchol khita. 26Etho piq tha eshiwang thalat eq piq wang tho tachan sanat anaan tsija piq jamoq wey thok solna, etho ning tha thu eq esho thok tong ta. Thaji sey ang atho, bari haan na anaan tsija nopta eshi miq dangjang tha jakho wang tho rapney sey jashit angta.”

Asing sunmaan

27Jesu ethi raaq tang tha bat atho, miq rong taphong aa thiwang nushey ang aa they piq ma jajong aa batta, “Nang sha chang eq pung tachip taphu nu sha rapney sunmaan.”

28Etho Jesu aa batta, “Etharin barey Shkewa tung aa raaq tat eq tong aa eshima ináng eq tho ahan sunmaan.”

Patja jaksom ma bat aa

(Matthew 12:38–42)

29Jesu rel tho miq daqhan sey taphong atho piq aa batta, “Thaneynap wang miqtang raa qhal moq chen! Ning aa miq patja ching jaksom chu thang aa. Etharin ning ma Jonah patja ching jaksom shingchak eq adak chamtho kap moq angna 30Jonah rangsamal sha Nineveh miqtang ma umal angta, req Miqna Sa sha thaneynap miqtang ma umal cham ang aa. 31Khaphung saal o Sheba lungwang nu sha tunlang na etho thaneynap miqtang jashit jaksom sha batna, chammatakoi piq alo mung wang Solomon lungwang tung aa raaq tang tha tat thima thuta; etho nga nang ma batphang irina Solomon pheynáng eq tho ajong atha. 32Khaphung saal o Nineveh miqtang tunlang eq nim raa aja somtey tang ta raaq na, chammatakoi Jonah raaq tat eq ning aa ngarey somlot tha shing chak eq tin kaley ta! Etho nga nim ma batphang, Jonaq wang eq tho ashey ajong miq irina!”

Hanphung lit

(Matthew 5:15; 6:22,23)

33 “Utang eq tho nalpang sha thalit eq apu na ang eq etha ang moq ang ajo khowan eq hop shing moq angna; etha otho piq aa nalpang shingching thaji pheywang eq aluk na shing na, irimal ang ajo himmong náng noptey tang miq ma alang cham takhi aa ta. 34Nim hanphung nalpang sha nim miik, nim miik sha aqhal ang ajo nim hanphung thaji sha alang, etharin nim miik qhal moq ta ang ajo, nim hanphung thaji sha anak na angna. 35Ethi rangma nim hanmong wallit anak na nakcham shing ma uphan na asam atol tong inn. 36Nim thaji han na amaan tho anak hung aa thaji alang na angta ta ang ajo nim thaji haan sha nalpang mal alang angna.”

Jesu Phorisi tang etho thong tataltey tangma jashit ta raaq aa

(Matthew 23:1–36; Mark 12:38–40)

37Jesu aa raaq sey thun bat atho, ashey Phorisi aa piq jamoq tilsat ma halta, req piq kata etho til satma tong ta. 38Jesu aa til satwey moq jakho jak qhol hunga sat atha khi eq Phorisi wa tha pattik angta. 39Etho Teyhungwa aa piq thima batta, “Nim Phorisi tang, nim aa khung aa kok rangkho wang jaqhal eq qhol inn etharin nim tinmong na kaplap tinthin nia anaan wang shey aa. 40Miqthom tang! Shkewa, bara rangkho hunta, umong sha hun moq angta i? 41Etharin nim khung nia kokna chamlang ang aa shi tangshit tangma ko inn, etho thaji sha nim rangma sangna.

42 “Phorisi tang, nim rangma chamtan tsamnang aa! Nim aa pongsu paru tingo aa shiwang rangphal thaji ko inn etharin nim aa Shkewa jaqhal khaphung nia tinmat sha shingchak inn. Rangphal sha ukot hun eq ching, etharin eshi jamoq adak tangwang lakching ang moq.

43 “Phorisi tang, nim rangma chamtan tsamnang aa! Nim aa Synagogue na jaqhal tongching kap ma etho tangwang sangching tang na rangka phi ta tathin inn. 44Nim rangma chamtan tsamnang aa! Nim raa máng bung ching tapu shing aa thimal bari khona miqtang sam moq wang qhing aa.”

45Ashey thong tatalteywa batta, “Tatalteywa, nang aa iri raaq raa bat ujo nang aa í raa tho tharakri phu.”

46Jesu aa batta, “Thong tataltey tang, nim rangma chamtan tsamnang aa! Nim aa miq haan kho o tangwang litqhal ang aa tha tunko inn etho nim aa jaksirol eq tho noktun ko min. 47Nim rangma chamtan tsamnang aa! Nim aa rangsamal tang màngbung ching hunkot inn; eshi rangsamal tang sha nim tey aa wa tang aa tatik chakta. 48Req nim tey aa wa tang aa chamlang somta tha nim ni nim aa hun, ethi tang tha asing ta shing inn; ning aa rangsamal tang tha tatik ta etho nim aa ning ma máng bungching hun kot inn. 49Iri rangma Shkewa thunglam ta batta, ‘Nga rangsamal tang etho thoksil tattey tang ning ma takat náng; etho ning aa chamteytey tang tha tatik chakna etho chamteytey tang tha tahitham eq na.’ 50Iri rangma mingkang phang qhong wang, barey rangsamal tang tatik ta iritang thaji wang tsamnang sha thaneynap wang miqtang aa kapna. 51Abel tatik ta thiwang tha som eq Zechariah nángduk, bara rongthung nia Asang haq jaktung na tatik chakta, iritang thaji wang tsamnang sha thaneynap wang miqtang aa kapna. Ang ang aa, nga batphang, thaneynap miqtang rey ning tatik ta tsamnang sha ukap eq na.

52 “Nim Thong tataltey tang, nim ma chamtan tsamnang aa! Thung aa tal him lakching chabi tha nim aa shing inn; nim ni nim tho umong náng wang min etho barey uwang ma tat tathin aa tang tha tho thawan min ang inn!”

53Jesu tha eshiwang sey chuwang atho, Phorisi tang nia thong tataltey tang aa piq ma raaq wang daqhan miiksuk ta etho raaq phang pit pita. 54Etho ning aa piq tha jashit raaq wang lot ma bita.

Currently Selected:

Luke 11: Mmmm

Highlight

Copy