John 13

Jesu aa ujiphantey tang jaa khol aa

1Ulit kut aa kan jakho, mingkang raa shingchak eq Iwa jamnáng uwang angma rangham tha uthok sey angta ta Jesu aa usam eq ta. Mingkang ro umiqtang ma piq aa salwet tinma ta, etho piq aa ning ma uthun nángduk tinma ta.

2Rangja phaksat kam tho thangwa aa Simon Iscariot miqwasa Judas Iscariot tinmong tho Jesu tha thalot ma tinthin kota.

3Jesu aa usam eq ta, “Iwa thaji sha i jak náng kochak taphang, etho nga Shkewa relwang katapha etho Shkewa relnáng wang chey ang.” 4Req Phaksat kam tho shat eq rangkho samkhong tha chokchak ta, etho khatnup losa tha som eq ukhing tha khak ta. 5Chik tho jung tashey eq jiphantey tang jaa tha khol chey ta etho qhing wang khatnup losa they jaa tha rot kota.

6Simon Peter relnáng sey thu atho, Peter aa piq ma batta, “Teyhungwa, nang aa ijaa khol ma ta u i?”

7Jesu aa thawel batta, “Bara nga som ang sha nang aa thanga sam mu angnu, etharin chomrey jio samnu.”

8Peter aa piq ma batta, “Nang aa ijaa baluk otho khol ching ang moq.” Jesu aa thawel batta, “Nga bajaa raa khol mong ang jo nang aa i jak wang chamtho phal kap mu angnu.”

9Simon Peter aa thawel batta, “Teyhungwa, ijaa chen ang moq, ijak nia ikho ri tho kholko phu!”

10Jesu aa piq ma batta, “Utang takhol chol sey, piq rangma ujaa hun khol ching, adak khol ching ràa moq sey. Chammatakoi piq thaji asang. Etho nim thaji asang, etharin ashey asang, ang moq.”

11Chammatakoi Jesu aa piq thalottey wa tha usam eq ta, ethirangma piq aa batta, “Nim jaktung wang thaji raa asang ang min.”

12Piq aa ning jaa khol jitho ukhat tha sam eq wey tong eq ning ma batta, “Nga nim jamoq chamlang som táng shi nim aa usam eq inn i? 13Nim aa nga Teyhungwa nia Tatalteywa ta hal phin, etho khakla raaq inn chammatakoi nga ira hun. 14Nga nim Teyhungwa nia Tatalteywa ang eq nim jaa khol kotaphang. Eshimal ang ajo nim atho ashey eq ashey ma jaa khol kotching. 15Chammatakoi nga nim ma takhi kot eq taphang, irimal ang ajo chamal nga nim jamoq somta phang, nim atho ethimal hun som inn. 16Nga nim ma asing sing batphang, qhawa sha tangtey pheynáng eq ajong ang moq, etho thoksil tattey tha takattey pheynáng eq ajong ang moq. 17Nim aa iri raaq tang raa usam eq inn, etho eshimal somlo inn jo Shkewa nim ma sunmaan kot pha nin.”

18 “Nga nim thaji tung aa raaq batchey phamong, nga taltáng miqtang tha usam eq ang. Etharin Asang likwit na chamta thawit aa sha asing ang ching, ‘I banlo phaktey sha iralwa ma khong ta.’ 19Nga eshi tang sha angwey moq jakho nim ma bat kot eq taphang, irimal ang ajo eshi tang sha thupha jo nga raa piq tha hun ta nga ri kam phanin. 20Nga nim ma asing sing batphang, utang eq nga takatteywa tha thawan aa, piq aa nga sha tho thawan eq na, etho utang eq nga sha thawan aa, piq aa nga takatteywa sha thawan aa.”

Jesu aa uthalot tha bat aa

(Matthew 26:20–25; Mark 14:17–21; Luke 22:21–23)

21Iri raaq tang raa bat jio, Jesu tin rapney shit eq lan bat kota, “Nga nim ma asing sing batphang, nim wang ashey eq nga raa thalot phang nin.”

22Ujiphantey tang aa utang ma bat aa ta ashey eq ashey ching konáng siin ta. 23Ujiphantey wang Jesu aa tinmat shingta wa tha Jesu kang na tong chey ta. 24Simon Peter aa piq ching konáng qhik eq shu shu eq piq ma batta, “Pit u, piq aa utang ma bat aa.”

25Piq aa Jesu kang thina bon eq pitta, “Teyhungwa, piq shi utang aa?”

26Jesu aa thawel batta, “Nga banlo pin raa bangti chi o tim eq konáng, piq tha hun angna.” Etho piq aa banlo pin tha tim eq Simon Iscariot miqwasa Judas ma kota. 27Banlo pin tha som jio Thangwa piq hanphung sho nopta. Jesu aa piq ma batta, “Nang aa chamlang somlo ma ta u, kalo somlo u.” 28Etharin Jesu aa piq ma chamlang raaq batta tha phaksat na tongtey tang utang eq tho jin sam moq angta. 29Judas jakna ngin khak angta, ethirangma chamtey ujiphantey tang they tathin ta, ning ma Ulit kut aa kan rangma chamlang rik ma, tia tangshit tangma chamli lang kot ma Jesu aa piq ma batchey aa ta tathin ta.

30Judas aa banlo pin tha som eq kalo ran náng thalat kata. Esha rangpal angta.

Anal raaqkhat

31Piq ran náng thalat ka atho Jesu aa batta, “Thanga Miqna Sa phun amun angta sey etho Shkewa phun amun sha tho piq tungkang o takhi ta. 32Etho Shkewa phun amun sha piq wang takhi aa ta ang ajo, Shkewa atho Miqwasa phun amun sha uching kowang takhina, etho kalo somlo na.”

33 “I susa tang, nga chomrey rangma nim relna tong náng. Ethi ji tho nim aa nga bi pha nin; etho nga chamal Jehudi tang ma bat táng, eshimal nim ma tho ubat eq taphang, ‘Nga bari náng kachey ang, eshináng nim jin ka phamin.’ 34Nga nim ma anal raaqkhat kotchey phang, ashey eq ashey ma tinmat shing inn. Nga chamal nim ma tinma taphang, ethimal hun nim tho ashey eq ashey ma tinmat inn. 35Ashey ashey ma tinmat shing inn jo eshey hun thaji eq sampha nin, nim sha ijiphantey tang.”

Peter aa Jesu sha sammong ta bat na ta Jesu aa bat aa

(Matthew 26:31–35; Mark 14:27–31; Luke 22:31–34)

36Simon Peter aa piq ma batta, “Teyhungwa, nang bari náng ka u?” Jesu aa thawel batta, “Nga bari náng ka ang, eshináng nang thanga ijio jin ka phamu, etharin chomrey jio ijináng kaphanu.”

37Peter aa piq ma batta, “Teyhungwa, thanga nga ba jio chamlang ma jin kapha mong? Nga ba rangma i rollung tho kotma kacha ang.”

38Jesu aa thawel batta, “Nang irangma utik mey angnu i? Nga nang ma asing sing batphang, wo wal wey moq jakho nang aa nga raa sammong ta juktom batnu.”

Currently Selected:

John 13: Mmmm

Highlight

Copy