Acts 8

1Saul piq tatik thina rokrum angta.

Saul aa mondoli tey tang tha tahikham aa

Ethi saal tho Jerusalem mondoli rapney tahikham tsamnang angta. Apostle tang tha dak chak eq adak uhan miqtang Judea nia Samaria mung na phalta. 2Shkewa samtey wang chamtey tang aa Stephen máng tha bungta etho piq rangma tintashit ta.

3Etharin Saul aa mondoli sha tashit chey ta. Him him náng ka eq, miqwa nia miqnu uhantey tang tha hum eq chuk náng sakta.

Tungtang qhal tha Samaria na phanchan aa

4Uphaltey uhan miqtang aa tungtang aqhal tha ning barina angta eshina phanchan ta. 5Philip Samaria samhaq náng kat eq miqtang thima Khristo raaq phanchan ta. 6Miqtang aa Philip raaq tat eq etho piq patja jaksom tha khi eq, ning aa tin kot eq tat ta. 7Chammatakoi anaan tsija tang daqhan miqtang hanwang ring eq thalat ta, etho daqhan jak aja may thamot moq etho jakung miqtang qhalta. 8Eshi samhaq sho ajong sungrang angta.

9Ethina Simon ta miqwa ashey miq angta, barey mantan takhi eq Samaria phan miqtang tha rapney tapatja ta. Etho piq aa piq ni piq ma ajong miq ta batta. 10Miqlang nijang ang ajo tho, piq raaq sha tatta etho batta, “Iri miqwa raa ‘Ajong Tarong’ ta hal aa Shkewa tarong.” 11Piq aa saal daqhan wang ning tha piq mantan jaksom wang tapatja chey ta, eshirangma ning aa piq raaq tha tat ta. 12Etharin Philip aa Shkewa rangmungtan tungtang aqhal etho Jesu Khristo tung aa raaq phanchan ta tho han eq miqnu nia miqwa tang aa jung lam ta. 13Etha tho Simon piq ni piq atho uhan eq ta etho piq aa jung lam jio Philip ji salwet phanta etho piq patja etho ajong patja jaksom khi eq patja ta.

14Samaria tang aa Shkewa raaq thang ta, ta Jerusalem na tongtey apostle tang aa tat ta, eshirangma ning aa Peter nia John tha ning jamnáng takat ta. 15Ning ni eshináng thok jio, eshiwang uhantey miqtang aa Asang Tsija kap ma romtam chuta. 16Chammatakoi Asang Tsija thanga tho utang khom náng thuwey moq angta, ning aa Teyhungwa Jesu miing o hun jung lamta. 17Peter nia John aa ning o jak tha shing ta etho ning aa Asang Tsija kapta.

18Apostle tang aa jak shing ajo Asang Tsija kapta Simon aa khi eq Peter nia John ma ngin kot pha náng ta bat eq batta, 19“Nga ma tho iri tarong ri kot chak phu. Nga utang khom o jak shing náng ning aa Asang Tsija cham kap aa.”

20Etharin Peter aa thawel batta, “Ba ngin sha ba jamoq cham thint aa, chammatakoi nang aa Shkewa jakkot sha ngin eq jin ri náng ta tathin u i! 21Í jaksom na amaan tho baphal ahung, chammatakoi Shkewa jakhona ba tinthin sha khakla ang moq. 22Eshirangma nang aa iri aja tinthin wang tin kaley u etho ba tinthin sha tolchak ma Teyhungwa ching wang romtam chu u. 23Chammatakoi nang aa ba tin mong na jashit tinthin hol u etho nang ngarey wang qhak shing phu ta ukhi eq ang.”

24Simon aa Peter nia John ma thawel batta, “Nimni aa bat shin eshi raaq shi nga ma nak cham thu phata, Teyhungwa ching wang romtam chu kotshin phin.”

25Ning ni aa Teyhungwa raaq phanchan ta Jesu tung aa raaq miikkhi kot ta, ethi jio Jerusalem náng wey welta. Lam na ning aa Samaria qhim tang na tungtang qhal phanchan tatat eq kata.

Philip etho Ethiopia ajongwa

26Teyhungwa rangkamwa Philip ma batta, “Shat eq Jerusalem wang Gaza lam saalnop ko shináng ka u. (Thaneynap aa iri lam ro qhing moq).”

27Philip shat eq kata. Etho lam na Ethiopia naja kap chongta; piq tha Ethiopia lungwang nu ngin shingtey ajong miq angta. Iri miqwa raa shumnuk ma Jerusalem náng kata pha.

28Piq him náng wey wel ma mokgari na tong chey ta. Etho Isaiah rangsamal Asang likwit phat chey ta. 29Asang Tsija Philip ma batta, “Iri mokgari rel o qhing u.” 30Philip jol eq mokgari relnáng kata etho piq aa Asang likwit na Isaiah rangsamal raaq tang phat atha tatta. Piq aa ethi miqwa thima pitta, “Nang aa chamlang phat chey u raa jin sam eq u i?”

31Piq aa batta, “Chamtey nga ma lak eq bat moq ang ajo nga chamal eq samnáng?” Etho piq aa Philip ma mokgari náng qhung eq tong ma batta. 32Piq aa Asang likwit na phat atha irimal angta:

Chamal ashey kelwut dukma sol kat aa,

etho ashey kelwut sa urunhit tey relna shushu tong aa,

ethimal hun piq raaq shey tho raaq moq.

33Piq tha tharak rita, etho piq aa phung kap moq angta,

piq phi aa lí tang tung aa raaq utang eq tho jin bat moq,

chammatakoi iri mingkang wang urollung tha tun solta.

34Ethi najaq aa Philip ma pitta, “Nga ma batphu, rangsamal aa iri utang tung aa raaq batta? Piq ni piq raaq tia adak raaq bat aa?” 35Etho Philip aa iri Asang likwit wang taphang eq piq ma Jesu tungtang aqhal bat kot ta. 36Ning lam náng kachey atho, ning ni amaan jung rel náng thuta, ethi najaq aa batta, “Ira ro jung atha. Nang aa jung jin thalam pha mu i?”

37Philip aa batta, “Nang thaji tin wang kam u jo jung jin lam eq u.” Etho piq aa thawel batta, “Jesu Khristo Shkewa Miqwasa ta nga uhan eq ang.”#8:37 Chamtey Greek likdap tang na verse 37 ahung.

38Etho piq aa mokgari tha lam na langma raaqkhat kot ta. Etho piq aa Philip jamoq jungnáng kata etho Philip aa piq ma jung thalam kot ta. 39Baluk o ning jung wang thalat ta, Teyhungwa Tsija Philip tha tunsol chuwan ta, ethi najaq aa Philip tha wey khi moq sey angta, etharin piq rapney sungrang wang lam náng kata. 40Philip tha Azotus na thalat ta; piq Caesarea náng thula lam na thaji samhaq na tungtang qhal bat eq qhing ta.

Currently Selected:

Acts 8: Mmmm

Highlight

Copy