Acts 4

Peter nia John Jehudi rongh jakho na

1Peter nia John aa miqtang ma bat cheyta tho, tingwa tang, rangnuk him ajong ubantey etho Saddusi tang thuta. 2Ning rapney khata chammatakoi ani apostle aa miqtang ma Jesu ti eq weyjey na ta tatal chey ta etho eshimal hun utiktey tang weyjey na ta phanchan chey ta. 3Ning aa ningni tha lo eq saal dak o chukna shingta chammatakoi rangja sey angta. 4Etharin iri raaq raa tattey ching wang daqhan miqtang eq hanta; etho hayat banga miq uhantey tang jamoq rum ta.

5Saal dak o Jehudi solwa tang, miqlang tang etho thong tataltey tang Jerusalem na thajoq ta. 6Etho ajong tingwa tang solwa Annas, Caiaphas, John, Alexander etho ajong tingwa tang solwa himtey tang tho ning jamna angta. 7Ning aa Peter nia John tha ning jakho o thalang eq pitta, “Nimni aa iri jaksom ri chamlang tarong wang etho utang miing wang somlo shin tin?”

8Asang Tsija wang shey eq Peter aa batta, “Miqtang solwa tang etho miqlang tang, 9thanay aa iri jakung wa jaqhal jaksom tung aa raaq etho iri jakung wa chamal eq qhalta ta í ni ma pit ajo, 10nim thaji aa usam eq ching etho Israel thaji tang aa tho usam hun eq ching, iri wa raa nim jakho na qhal eq lang ta jo, Nazareth wang Jesu Khristo miing o lang ta. Nim aa piq tha bólq na tatik tin etho Shkewa piq utik wang wey thajey ta, 11Asang likwit na ira Jesu tung aa raaq thawit aa,

‘Him huntey tang aa bari long rima jashit ta shingta,

eshi long sha thaji ma akhek angta.’”

12“Ulun sha utungkang o hun kap ching; chammatakoi hiqtang lun ma mungtan khung wang miqtang wang adak miing kot moq angta.”

13Baluk o ning aa Peter nia John haang aa chan tha khita, ning aa lik ali phattey ang moq ta sam eq ning patja angta; etho ning aa iri ni raa Jesu jamoq qhingta ta samta. 14Etharin ning chamtho jin raaq moq chammatakoi ning aa khita eshi miqwa tha qhal eq Peter nia John jamna langta. 15Req ning aa Juhudi rongh wang hang náng thalat ma raaqkhat kot eq, ning ni ning jaktung thina wanta. 16Ning aa pitta, “Iri miqtang jamoq chamal eq somlo ni? Ning aa somlo ta patja jaksom Jerusalem thaji miqtang aa usam eq aa etho í jin lik mi. 17Etharin iri raaq raa miq dak tang ma tatat moq angma, Jesu miing o miq dak jamoq wan moq angma ningni aa bat ching.”

18Ning aa Peter nia John tha himmong náng halta etho Jesu miing o chamtho bat moq angma etho tatal moq angma raaqkhat kot eq batta. 19Peter nia John aa pitta, “Nim aa chamlang ta tathin inn, Shkewa jakho na chamlang raa qhal na - nim raaq tat phani tia Shkewa raaq tat ni? 20Í ni aa miik wang chamli khiti etho naq eq chamli tatti esha bat hunga shu shu jin tongmi.” 21Ning aa ning ni ma wey tacho eq qhap chakta, etharin eshi miqwa ni ma jin tsamnang mi ta usam eq ta, chammatakoi chamlang angta tungkang o thaji miqtang aa Shkewa tha tasapsey ta. 22Chammatakoi eshi uqhal angta wa tha pang rokbali wang ahan angta.

Uhantey tang aa romtam chu aa

23Peter nia John tha achak ang jio kalo hun, ning ni wel eq unokwa tang jamnáng kata etho ajong tingwa tang etho miqlang tang aa bat aa tha bat kota. 24Ira tat eq ning thaji kashey o tong eq Shkewa ma romtam chuta: “Nang mungtan, mingkang etho jungshi tangteywa nia huntey! 25Nang aa Asang Tsija tungkang o ba sanga í tey aa wa David nung o battu,

Gentile phan, chamma tin takha inn?

Chamma miqtang aa aja jaksom ma tathin aa?

26Teyhungwa nia piq Messiah tha miiksuk eq

mingkang lungwang tang tha lang ta,

etho jaktáng o shingtey tang kashey o thajoq ta!

27Chammatakoi asing wang asang ba sanga Jesu bara nang aa Messiah ta shing tu piq sha miiksuk eq Herod nia Pontius Pilate aa Gentile phan nia Israel miqtang jamoq iri samhaq ro thajoq ta. 28Ba tarong nia tinthin wang nang aa chamli somlo ma tathin tu, ning aa ira somlo ma thajoq ta. 29Etho Teyhungwa, thanga ning aa tacho pan aa ri siin u; etho ba sanga tang aa rapney han eq ba phanchan bat ma kot u. 30Ba jak thalo eq taqhal u; etho ba sanga Jesu miing, patja nia umal jaksom takhi u.”

31Ning aa romtam thun chuta tho, ning bari haqna tong aa ethi haq tha mota. Etho ning thaji Asang Tsija eq sheyta etho ning cho hunga Shkewa raaq tha bat kot ta.

Uhantey tang aa ning tangwang tha phal aa

32Uhantey tang waan jaktungna, ning thung nia tinthin ashey angta. Ning ching na chamli tangwang angta esha ning aa iràng ta raaq moq angta, etharin ning aa ira ning thaji ràng ta tathin ta. 33Ahan tarong wang apostle tang aa Teyhungwa Jesu ti eq chamal weyjey ta ethi miikkhi tha kot ta, etho ning thaji ma rapney sunmaan kota. 34Ning wang utang tho tangshit ahung angta. Chammatakoi utang ma pik aa haq tia him angta, esha sang eq ngin tha, 35apostle tang ma kot ta; etho ning aa utang ma ràa shima ngin phal kot ta.

36Cyprus mung na Joseph ta miing aa ashey Levi phan angta, apostle tang aa piq sha Barnabas ta halta, Barnabas ta “Tin thajongtey.” 37Piq ma ashey pik angta, bara piq aa sang ta etho uthang sha som eq apostle tang ma kot ta.

Currently Selected:

Acts 4: Mmmm

Highlight

Copy