YouVersion Logo
Search Icon

Acts 16

16
Timothy Paul nia Silas jamoq ka aa
1Paul Derbe nia Lystra náng thuta. Eshina ashey jiphantey umiing tha Timothy angta. Unu tha tho uhantey Jehudi miqnu angta, etharin uwa tha Greek phan angta. 2Timothy ma Lystra etho Iconium wang uhantey tang aa jaqhal ta raaq ta. 3Paul aa Timothy ujamoq solma nukta, eshirangma piq tha uhankhup tha taqhan ta. Chammatakoi eshi haq na tongtey Jehudi tang aa Timothy wa tha Greek phan ta raaq eq samta. 4Ning samhaq tang náng ka eq, Jerusalem na tongtey apostle tang etho miqlang tang wanta thong tha ning ma batta etho utat eq ma batta. 5Req mondoli tang tha kam na taching ta etho ning tha salwet chalo ta.
Paul aa Troas na máng khi aa
6Ning Phrygia etho Galatia mung náng kata chammatakoi Asang Tsija wang ning ma Asia mung na raaq bat ma táng ta. 7Baluk o ning Mysia náng jatri náng thu atho ning Bithynia mung náng katma tathin ta, etharin Jesu Tsija aa takat moq angta. 8Eshirangma ning Mysia wang ang eq Troas náng kata. 9Eshi pal tho ashey Macedonia miqlang eq tin thanin eq bat aa tha Paul aa máng na khita, “Macedonia náng kaphin etho i rok nong phin!” 10Paul aa iri máng raa khi eq, í macedonia náng katching ta kacha ta; chammatakoi eshina tongtey miqtang ma tungtang qhal phanchan ma Shkewa í hal taphi ta í aa sam ti.
Philippi na Lydia tin kaley
11Troas wang í waqwan o tong eq achal eq Samothrace náng thuti etho inap mal tho í Neapolis náng thuti. 12Eshiwang í Philippi samhaq náng thuti. Ira Macedonia mung wang ajong samhaq etho Rome miqtang jaktáng na angta; í eshina saal tom ni tongti. 13Sabbath saal o í samhaq paal kalung phey jungkang kona, Jehudi tang romtam chuk katang angna ta tathin eq í thalat ti; í tong eq eshina thajoq aa miqnu tang raaq wanti. 14Í raaq tattey wang chamtey ashey miqnu umiing Lydia, piq Thyatira samhaq wang thok tey qhatsim sangtey angta. Miqnu tha Shkewa shumnuk tey angta, etho Paul aa chamta bat aa tha tatma Teyhungwa piq tin mong lak kot ta. 15Piq nia uhimtey tang aa junglam jio, piq aa í uhimnáng halta etho tinthanin eq batta, “Nim aa nga raa Teyhungwa hantey ta tathin inn jo i himnáng wang eq tong wangphin.” Piq aa í ma numney eq batta.
Paul nia Silas chukna
16Saalshey ang tho í romtam haq náng kachey ti tho piq hanna anaan tsija tong eq inapja rollung raaq battey ashey qha miqnu í aa kap chongti. Piq aa miqtang ma inapja rollung raaq sha bat eq utangteywa ma ngin rapney kaplap kot ta. 17Piq aa Paul nia í jiphan ta etho ring eq batta, “Iri miqtang raa ajong Shkewa sanga tang! Ning aa nim ma thalun raaq battey tang.” 18Irimal piq aa daklot wang sey somlo chey ta, ethirangma Paul tin rapney khata etho ngik lang eq anaan tsija shima batta, “Jesu Khristo miing o uhanphung wang thalat ma nga raaqkhat kot phang!” Etho eshi rangham o hun anaan tsija tha uhanphung wang thalat chuwang ta. 19Iri miqnu tangtey tang they ning aa ngin kapching ahung sey ta bat eq, ning aa Paul nia Silas tha lo eq tangwang shangching na authority miqtang relnáng hum katta. 20Ning aa Rome authority miqtang jakho náng ning ni tha sol kat eq batta, “Iri ni raa Jehudi miq, ning ni hiqtang samhaq o rapney tungnung tathok pha.” 21Ningni aa hiqtang thong miiksuk thong aa ley sha tatal kot aa; í Rome miqtang etho í aa ning thong tat ching ang moq etho somlot ching ang moq. 22Miqtang thajoq eq, Paul nia Silas tha watta. Rome authority miqtang aa Paul nia Silas khat tha ching eq wat ma raaqkhat kot ta.
23Rapney wat jio ningni tha chuk náng sakta etho chuk bantey ma jaqhal qhak eq shing ma batta. 24Iri raaqhak raa tat eq chuk bantey wa they ning ni tha umong chukna etho ningni jaa tha bang jaktung na aching eq khak eq shing ta.
25Paal thungkam rangham tho, Paul nia Silas aa Shkewa ma romtam chu eq Shkewa sungsey seychey ta etho adak chukna tongtey tang atho utat eq ta. 26Photla eshina jajong hal aa haqkung shin eq chuk mong kalung tang tha umot angta. Kalo hun thaji kalung tang tha thalak ta, etho chukna tongtey tang thaji janru eq khak ta tha thalak wangta. 27Chuk bantey eq baluk o shat eq siin atho thaji kalung tang tha alak angta, chukna tongtey miqtang thaji tha jol chuwangta sey ta piq aa tathin ta; ethirangma piq ni piq tha jantong eq taqhan ma angta. 28Etharin Paul ring eq batta, “Nang ni nang tathin ma nak somlo u! Í thaji irina!”
29Chuk bantey aa wal tachu eq umong thináng wangta etho rapney moq eq Paul nia Silas ja thináng shong tong eq bon kata. 30Ethi jio ning ni tha ran náng solkat ta etho pitta, “Tatalteywa wani, ulun kap ma nga chamlang som ang?”
31Ning ni aa batta, “Teyhungwa Jesu Khristo o han u etho nang nia bahimtey tang ulun ang nin.” 32Etho ning ni aa chuk bantey etho thaji uhimtey tang ma Teyhungwa raaq batta. 33Eshi rangpal tho hun ning ni tha sol kat eq piq aa ning ni wat mal tha qhol kot ta; takshey lam o hun piq nia thaji uhimtey tang aa junglam ta. 34Ethi jio piq aa Paul nia Silas tha uhimnáng sol kat eq phaksat taphak sa ta. Piq nia uhimtey tang tha rapney sungrang ta chammatakoi ning aa thanga Shkewa tha uhan sey ta.
35Rangnap mal tho Rome authority miqtang aa chuk bantey jamnáng ralkoltey tang ma iri raaqkhat raa kot eq takat ta, “Ning ni ri qhap chak inn.”
36Eshirangma chuk bantey wa they Paul ma batta, “Rome authority miqtang aa nang nia Silas qhap ma raaqkhat batta. Thanga nim ni nungmay eq sey ka shin.”
37Etharin Paul aa ralkoltey tang thima batta, “Í ni Rome miq ang eq tho íni ma cham jashit ahung ang eq tho, nim aa miqtang jakho o wat taphin etho íni chuk náng sakta phin. Thanga ning aa íni shu shu eq takat ma chamma tathin aa? Eshimal ang ching ang moq! Ning hun thu eq íni cham lat phi.”
38Ralkoltey tang ka eq Rome authority tang ma iri raaq raa batta, etho ning aa baluk o Paul nia Silas raa tho Rome miq ta samta tho ning ucho angta. 39Ning ka eq ning ni ching wang tolchak chuta; ning tha chuk wang lat eq ning iri samhaq wang chuwang ma tinthanin eq batta. 40Paul nia Silas chuk wang thalat eq Lydia himnáng kata. Eshina uhantey tang tachong ta etho ning tin thajong raaq wan eq kata.

Currently Selected:

Acts 16: Mmmm

Highlight

Share

Copy

None

Want to have your highlights saved across all your devices? Sign up or sign in