Mak 6

Welalem Nasaret nina yiŋ Yesus usya inaŋa

(Mat 13:53-58; Luk 4:16-30)

1Yesus afu iŋgu sowsu ley yeni kemŋinda, muluŋan yiŋ isi. 2Arya Yuda ragu yaŋ nali tiŋ iŋgura Yesus le Yuda ragu fom yeyiŋ inda welalem sawanaŋ sayiy. Gu welalem guway yiŋ kuka iŋgu iŋawsu waraŋraŋ buly sip tusu, nigu giyaŋa, <<Lem ini muŋa gakta sip ey? Tusu muŋa utinda eti ini giray sip? Iŋ gorogoro tusu ulal kemŋiŋ kemŋiŋ Takela ragu mukinda bitiŋ futtuwti?>> giyaŋa. 3Tusu giyaŋa, <<Niŋ lem ini iŋawtaŋ, lem ya bituwti iŋgu, tusu iŋ Maria urmiŋ, onni yiŋ go Yems, Yosep, Yudas tusu Saimon. Tusu useŋ yiŋ go niŋ isi nimda etaŋ.>> Iŋguniŋ yiŋ, iŋ nina buwaya mayiktotriy.

4Iŋgura Yesus daririy, <<Profet iŋ ya atŋinda naŋonda go biŋay geyiŋ tusu iŋ toluwta. Gu iŋ yeni kemŋinda tusu tarwan yiŋ lapyanda tusu asilani yiŋ sip lapyanda go iŋ biŋay melaŋ tusu aboŋ iŋaw kiyaŋa melaŋ.>> 5Iŋguniŋ iŋ ya gura nina welalem deŋyanda ulal kemŋiŋ kemŋiŋ Takela ragu mukinda bitiŋiniŋ yuŋ. Gu iŋ miyay welalem diyap diyap niŋgi atni utyanda kerawsu yakerayiŋ wasiŋ yaŋa. 6Gu iŋ buway murweŋ totriy welalem gon yiŋ iŋ nina buwaya payiŋ tiyaŋ melaŋ iŋguniŋ.

Yesus muluŋan 12 urata sayiy

(Mat 10:5-15; Luk 9:1-6)

Arya Yesus ya ya baliwu lowsu, Takela ragu kuka wasiŋ welalem sawanaŋ sayuw waluw kiy. 7Arya iŋ muluŋa 12 ap yiŋ epŋiŋ niŋgi, iŋgura muki sayiy Ur buly welalem utyanda sabiryaŋ guniŋ. Arya lem yera yera siwyusu suliyiŋ liyaŋa.

8-9Igura nigu dariyiy, <<Di si, aŋyay tusu gamudeyiŋ owsu lepiraŋ go. Gu di tekuŋ niŋgi towsu sendel go kerapiraŋ go tapyow babelay diya epiraŋ go. 10Tusu di le ya diyara futtip go, ya diyap naŋonda lowsu, gura niŋgi kiki le nal tiŋ ya iŋgu sowsu lepiraŋ. 11Tusu di le ya diyara lena niŋgi sebidiyaŋya melaŋ tusu aboŋda iŋaŋya melaŋ tip go, di ya iŋgu sow lepiraŋ. Di nal le le nina go, dagor araŋdanda yaselusu yasow lepiraŋ ya diyara. Iŋgura welalem yiŋ iŋap niŋ agosgos geyiŋ iŋguniŋ nigidiyata gip,>> giy.

12Arya Yesus dariyiŋ yuŋ tiŋ, emita muluŋa nim yiŋ le nigu welalem kuka sayi delaw sayuw liyaŋa, <<Buwada foyna,>> 13tusu yiŋ Ur buly guway welalem sabir yinusu, gureŋa ow miyay welalem semayiŋ niŋgi wasiŋ mitaŋa.

Erot Yon welalem wayuti iŋgu urŋiŋ emariy

14Yesus biŋay beŋgoy sip tiy ya atŋinda naŋonda. Iŋgura Kiŋ Erot iŋariy, welalem dip yiŋ nigu giyaŋa, Yesus nina, <<Yon welalem wayyuw kiy, go emariy patuw iŋgu atebaw waraŋriy, iŋgura iŋ muki geyiŋ ulal kemŋiŋ kemŋiŋ Takela ragu mukinda bituwti,>> giyaŋa.

15Dip go yiŋ, <<Ini Elaisa,>> giyaŋa. Arya dip go, <<Profet,>>#6:15 Profet, Wawa profet egay go nigu. giyaŋa.

16Erot iŋgu iŋawsu nigu giy, <<Yon buŋ kunaŋ niŋgi emariy iŋgu atebaw waraŋriy,>> giy.

17-18Patuw sip, Yon iŋ nigu Erot daririy, <<Ga Erodias eta welaga tiy iŋgu kabol buly tiraya. Iŋgu onga Pilip weliŋ imara.>> Iŋguniŋ, Erot iŋ sip lem soŋni yiŋ suliyiŋ le Yon towsu, owle oyara keraŋ kiy.>> 19Eerodias iŋ buway mayktotriy Yon urŋiŋ emaŋ guniŋ. Gu iŋ atŋinda yuŋ. 20Erot iŋ iŋawti Yon iŋ lem pendeŋyeyiŋ tusu aririyay Takela deyiŋinda. Iŋguniŋ iŋ patak sip ulaw kiy. Arya Erot iŋ nal atŋinda Yon aboŋ iŋaw kiy go, iŋ buway buway tuw kiy, gu iŋ Yon aboŋ iŋiŋa nina go buway wasiŋ kiy.

21Indanis Erodias iŋ keta ulaw kiy Yon urur nina. Arya nal diya Erot aŋyay beŋgoy kerariy nal mami bosriy Iŋgu onaŋyaŋ guniŋ. Iŋguniŋ iŋ Gabman dagu taboŋ taboŋ tusu paŋer lem dagu taboŋ taboŋ tusu Galili ragu taboŋ taboŋ apyiŋ epyaŋa aŋyay iŋgura. 22Arya aŋyay tukiŋ Erodias feliŋ epe wak ibaw kiy. Iŋgura Erot tusu lem atŋinda wela miy iŋgu neŋusu payttot yaŋa. Iŋgura taboŋ iŋgu nigu wela miy gu daririy, <<Ga gira nina miŋnip go na sagukuna,>> giy. 23Erot iŋ kuka payiŋ tewriy wela miy iŋgu isi, <<Na payiŋ sip gigatem, ga gira gip go na sagukuna, ga ya atŋinda nawi noŋnanda eta iŋgu lapda sip wakoru sanita gip go na sagukuna,>> giy.

24Arya wela miy iŋgu le mamni miŋriy, <<Na gira nina sip darukuna?>> Iŋgura maminda daririy, <<Le darita, Yon welalem way yuwti iŋgu taboŋ iniŋ,>> giy.

25Igura wela miy iŋgu awru sip ley taboŋ beŋgoy siŋinda, iŋgura nigu daririy, <<Ga mat niŋgi Yon welalem wayuti Takela waayinda ingu taboŋ kunawsu ow otda kerawsu ow epe sanita,>> giy.

26Iŋgura taboŋ beŋgoy kuka iŋgu iŋawsu, buway murweŋ totriy, wela miy iŋgu aboŋ ketyaŋ melaŋ. Giran iŋ wela iŋgu isi kuka payiŋ tewriy iŋguniŋ tusu lem epe iŋ isi aŋyay iŋdagura kiyaŋa yiŋ deŋyanda kuka iŋgu tiy. Iŋguniŋ iŋ wela miy iŋgu aboŋ ketyaŋ melaŋ. 27Arya awru sip ita lem diyap dariŋ ley, Yon taboŋ ow epyaŋ guniŋ. Iŋgura ita lem iŋgu oyara lowsu, Yon buŋ kunaŋ tukyiŋ, 28iŋgura taboŋ ow otda kerawsu ow le wela miy iŋgu inaŋ niŋgi iŋ ow le mamni inariy. 29Emita muluŋa Yon dagu, Yon biŋay iŋawsu, epe ukŋiŋ ow le simaŋ yeyiŋ lemda bityaŋa emema lem yakerayiyi nina gura keraŋa.

Yesus 5,000 lem peken yiy

(Mat 14:13-21; Luk 9:10-17; Yon 6:1-13)

30Yesus muluŋan yiŋ mukyi sayusu suliyiŋ liyaŋa iŋgu, atebaw mulutuw epe iŋ siŋinda abusu, urata goro goro bityaŋa iŋgu tusu, welalem goro goro sawanaŋ sayyaŋa iŋgu day inaŋa. 31Arya welalem guway sip low epu kiyaŋa, iŋgura Yesus muluŋan yiŋ isi nal yuŋ aŋyaytiti ragu, iŋguniŋ Yesus muluŋan yiŋ dariyiy, <<Epna niŋ sip niŋgi le afu lem kiyaŋya melaŋ gura le yaŋtu yaŋ en,>> giy.

32Arya yiŋ sip niŋgi liyaŋa waga buŋ afu welalem yuŋ gura. 33Gu welalem guway sip yiŋ gura kusu neŋyukiŋ liyaŋa. Iŋgura yiŋ iŋayaŋa yiŋ le afu gakta sarik tip iŋgu. Iŋguniŋ welalem ya atŋinda naŋonda nina yiŋda nis biraw le gura kiyaŋa. 34Arya Yesus muluŋan yiŋ isi le sarik tusu welalem guway sip neŋyusu bubulya tiy. Giran yiŋ alat apmonu ewya melaŋ gok. Iŋguniŋ, iŋ sawanaŋ soŋ soŋ sayiy.

35Arya gamniŋ tiŋ ata kusyugusu tuwkiŋ, muluŋa nim yiŋ epe Yesus siŋinda epusu daryaŋa, <<Afu inimda go lem diya kuw kiyaŋ ya melaŋ. 36Iŋguniŋ ga welalem ini suliyita ya ya le aŋyay soŋya yebana,>> giy.

37Go Yesus nigu ketriy, <<Dinsip aŋyay sayina.>> Go daryaŋa, <<Ga goro goro iŋageta, niŋ le aŋyay 200 dinarius#6:37 dinarius Denari diyap iŋgu urata lem dagu gamudeyiŋ kebay nal diyap dagu, iŋgu wela apmonu ragu aŋyay yebyeba. Gamudeyiŋ iŋgu beŋgoy sip. da yebawsu epe sayin kina nip yaŋ?>> giy.

38Arya iŋ miŋyiy, <<Di bret gorotiŋ eti? Le neŋna kinara.>> Iŋgura epe daryaŋa, <<Bret go 5, arya daboŋa go yeratiŋ niŋgi.>> 39Iŋgura, Yesus muluŋa nimi yiŋ dariyiy, <<Welalem dariyiŋ mutmut wasiŋ buŋta abu abu yaŋtina.>> 40Iŋgura welalem dip yiŋ 100 abu yaŋtiyaŋa, arya dip go 50. 41Arya, Yesus bret 5 tusu daboŋa yeratiŋ iŋgu imayusu uy neŋiŋ saba buŋta leŋ, Takela biŋawsu beku muluŋan yiŋ sayiy, welalem sayaŋ guniŋ. Gugu sip daboŋa yeratiŋ iŋgu ow sayiy welalem patak siwtu sayaŋ guniŋ. 42Iŋgura welalem atŋinda aŋyay iŋgu niyaŋa go yiŋ atŋinda sip tiyaŋa. 43Iŋgura, Yesus dagu muluŋa aŋyay baliya iŋgu wiluwsu abyaŋa go sola 12 ewŋiŋ eŋeŋ dagu. 44Lem gon yiŋ aŋyay niyaŋa iŋgu weywey yiŋ dagu go, faif tawsen.

Yesus way buŋta palaŋutiy

(Mat 14:22-33; Yon 6:16-21)

45Arya iŋgu usinda, Yesus muluŋan yiŋ balbal sayiy, yiŋ waga desausu patiyaŋ guniŋ way baliya Betsayda ya beŋ inda. Arya iŋ gayitnimi niŋgi kusu welalem guway iŋgu yakerayiŋ liyaŋ guniŋ. 46Arya iŋ suliyiŋ leŋ niŋgi, iŋgura tegeyiŋ buŋta pananaw tugu ley.

47Arya sulap iŋgura go, waga way lapda sip tiy. Iŋgura Yesus go gaytnimi daŋta kiy. 48Arya yaŋ waraŋriy iŋgura yiŋ utu leŋiniŋ yuŋ, muluŋa nim yiŋ foytiti nina uratay goyi sip tiyaŋa. Iŋgura Yesus gura kusu muluŋan yiŋ neŋ yiy. Arya atarugusu tuwkiŋ, Yesus way buŋ palaŋu tuw siŋyanda le keliyugusu tiy. 49Arya muluŋa nim yiŋ neŋusu, yiŋanaŋ Ur buly gusu, reri goyi sip tusu aŋaŋ yaŋa. 50Iŋgura Yesusda dariyiy, <<Di buwada ibamit. Nawi Yesus. Di reri tipiraŋ go,>> giy. 51Iŋgura le waga desaw buŋta leŋ niŋgi, iŋgura yaŋ emariy. Arya muluŋa min yiŋ iŋgu neŋusu waraŋraŋ buly sip tiyaŋa. 52Giran yiŋ buwaya aromromay sip iŋgura Yesus aŋyay sayiy iŋgu egay iŋaŋ ya melaŋ, yuŋ.

53Arya Yesus muluŋan yiŋ isi way kestu baliya liyaŋa, le ya beŋ Genesaret gura sarik tiyaŋa. Iŋgura waga sukŋiŋ buŋta ley. 54Arya yiŋ Waga sow sarik tuw leŋ, sisiyay yuŋ, welalem Yesus neŋusu iŋgura iŋaŋa iŋon Yesus niŋgi giyaŋa. 55Iŋgura yiŋ biraw liyaŋa ya atŋinda naŋonda welalem day sayiyaŋa Yesus epriy iŋgu nina. Iŋgura, yiŋ miyay welalem guway beŋbeŋ buŋta yakerayusu, ikyu liyaŋa Yesus siŋinda. 56Arya Yesus iŋ ya beŋ beŋ, bulubuly tusu afu atŋinda naŋonda ley go, lem dip yiŋ miyay welalem yuwayu epe ababu afuyinda yakerayiŋ kiyaŋa. Iŋgura Yesus epŋiŋ niŋgi nigu mukay inaw daryaŋa, <<Ga wasiŋ gita kinara welalem miyayi geyiŋ ini tapyow gamiy siri niŋgi towsu wasiŋna.>> Iŋgura miyay welalem guway tapyow nim towsu wasiŋ yaŋa.

Currently Selected:

Mak 6: Madi

Highlight

Copy