Mak 9
9
1O warị nnị ḅẹẹ, <<A dugho ọ pịrịm jẹapụ mịịnga imii fịịbịghaapụ akị muu nnị Tamuno Ásẹ́mẹ́kiri ma árị anị kụ́rọ pa ḅo bẹ sa láa.>>
Oju Dima
(Mat 17.1-13; Luk 9.28-36)
2Suene a dii ḅo ḅọ́rọ́ sáá, Jizọs Pita na Jems na pịghị Jọn sịakịm, warị nnị pa sóghóló tụ́ndụ ọ́gọ́nọ tándịm, nnị ngéré fịnịngaa. Nnị pa ọ dighiarị sáá anị Jizọs dimakoro nyẹ. 3Ọrẹ bịtẹ warị saghị pị́na sanị sanịarị, mị tuminikiri tumḅọ sịghịrị sị ọkọ pa pị́na bẹnyẹ ofori. 4Anịsáa ori tẹ́rẹ́ ọḅụduaapụ ma warị Elaija na Mosis arịị nnị Jizọs na ẹ́gẹ́rẹ́arị. 5Pita warị Jizọs ḅẹẹ, <<Nyẹ́dieḅọ anị ibibẹm ḅẹẹ wa mịngáá fịnị! Wa bịtẹ pa tẹ́rẹ́ a warị bie pie, gbẹ́rẹ́nyẹ ịnyee, gbẹ́rẹ́nyẹ Mosis nyẹ, gbẹ́rẹ́nyẹ pighi Elaija nyẹ.>> 6Ori na isi ngaapụ ma na opu ḅáláfa nna oju bie sọm, sị ọ mịnị nimigha o dugho bẹnyẹ.
7Oḅuto kóró nnị gbẹm, pụghọ warị oḅuto ma ḅụ saghị kóró ḅẹẹ, <<Mịị a ḅẹlẹma ibi Tụ́wọ ọmịnị o pughuu!>> 8Anị gbẹ́rẹ́kirikiri n tọ́rụ́ ikelema dighim, kụ́ma n gbẹ́rẹ́ḅọ sọ arịgha, Jizọs ngéré anịị nnị na anị ngaa fịnịḅọ.
9Nnị tụ́ndụ ma ọgọnọ kóróḅo sáá, Jizọs warị ólóghó sua n pịrị ḅẹẹ, <<Nnị dugho gbẹ́rẹ́ḅọ sọ pịrịma nnị árịnyẹ, akị mú Tumḅọ yii Tụ́wọ fịị ḅụ saghị sáá láa.>>
10Nnị ori ólóghó bịpị warịm kụ́ma nnị ogboku bie nnị saghị anị gbolomanyẹ dughom ḅẹ́, <<Mịị fịị ḅụ saghị ma anị tẹ́ dughoarị?>> 11Nnị warị Jizọs gbíla ḅẹẹ, <<Ólóghó nyẹ́dieapụ ma n dugho ḅẹ́ Elaija parị ḅoo ma?>>
12Jizọs pagharam ḅẹẹ, <<Karakárányẹ, Elaija tarị ḅoarị sị ọ nyẹ gonyẹ́ gonyẹ́ tẹ́lẹ́ma warị. Anịsáa, Tọ́ntọ́ diri ma anị tẹ́ go dugho ḅẹ́, Tumḅọ yii Tụ́wọ ma opuma tọ́rụ́siarịbẹm ḅẹ́ n pịghị o sịghịbẹm? 13A dugho ọ pịrịarị ḅẹ́ anị fịnị ḅara fịnị ḅara Elaija tarị ḅomam, túminị́ pịghị n dọghụ ḅara pa ọ mịẹmam, Tọ́ntọ́ diri ma o gbolomanyẹ dugho ḅara.>>
Jizọs Sitẹ́mẹ́ Ḅụ Fịnị Tụwọ Gwọm
(Mat 17.14-21; Luk 9.37-43)
14Nnị ḅo ori ọḅụduaapụ kọọapụ ma na gboloma sáá, n ḅoo tọgha túminị́ arịm nnị gbiri ikélékeleapụ na ólóghó nyẹ́dieapụ ma ḅụ jẹ́apụ nnị na ḅẹ́rẹ́fángálámáarị. 15Túminị́ ma ḅo Jizọs árị sáá anị opuma nna tọ́rụ dam n warị mangị o dama mú si sịbịpị pa o sịị. 16Jizọs ori ọḅụduaapụ gbilam, <<Ọmịnị nnị na tẹ́ ḅẹ́rẹ́fángálámáarị?>>
17Gbẹ́rẹ́ tumḅọ túminị́ ogbo ma bie ọ pagharam ḅẹ́, <<Nyẹ́dieḅọ, a i tụ́wọ akuoo pa ị dámáḅom sitẹ́mẹ́ ọ ḅụ imii gosi ọ pịghị ine ẹ́gẹ́rẹ́gha. 18Sitẹ́mẹ́ ma okusáa okusáa anị ọ pa kiri gbigbim ọ́ kọ́kọ́ warị saghị ọ bịpị dari, ọ pịghị saghị aka túrú, ori oju gbọrụ warị ḅo kụ́rọ gịgị. A ị́yẹ́ ọḅụduaapụ ḅẹm ḅẹẹ, nnị sitẹ́mẹ́ ma deesi, kụ́ma nnị inegha.>>
19Jizọs n ḅẹm, <<Dighi ọ minini nyánágha ḅara! A ọmịnị na fịnị muu tẹ́ sáá láa bẹ? Tụ́wọ ma akuoo i pịrịị!>> 20Nnị tụ́wọ ma akuoo Jizọs pịrịm.
Sitẹ́mẹ́ ma Jizọs árị gbẹ́rẹ́kirikiri, anị nụ́nụ́obi pa tụ́wọ ma gbim, ọ warị bịghịkoro kiri warị saghị ọ pa kiri mgbepẹlẹ ọ́kọ́kọ ọ bịpị dárịarị. 21Jizọs tụ́wọ ma daa gbilam ḅẹẹ, <<Anị ḅọlọ tẹ́ sáá láama, ọ saghị mị ḅara fịnị sáá?>>
Daḅọ ma pagharam, <<Saghị ori ịrụ sáá éné éné.>> 22<<Tọgha sáá sitẹ́mẹ́ ma asọ dọghụmam anị ọ ḅáa, anị o suma mú fịnịbie sua na pịghị o suma muu mingi bie sua. Tọ́rụ́kụrụkụ́rụ́ nyána wa pịrị sị ḅárásua wa pịrịị, ḅọ́rọ́ ị ine bẹ!>>
23Jizọs, innh ḅẹm, Ḅọ́rọ́ ịrị ḅụgbọrụ ine bẹ! <<Nyẹ gonyẹ́ gonyẹ́ ine kiriakịbẹm minini nyánáḅọ ḅụ.>>
24Tụ́wọ ma daa anị gbẹ́rẹ́kiri ilúghum, <<A minini nyánam, kụ́ma dụḅagha, ḅárásua i pịrị sị ị́yẹ́ minini dụḅa.>>
25Jizọs árị ḅo sáá ḅẹ́ kubiri ogbo ma nnị na kikiamam, ori igani sitẹ́mẹ́ ma pịrịm ḅẹ́, <<Biri inighi na oḅu tẹ́mẹ́, a kụrọ́ ma dugho i pịrịarị tụ́wọ ma ḅụ págháḅo sị mịnị jẹ́ pa ọ ḅụ sọma!>>
26Sitẹ́mẹ́ ma ilúghum warị tụ́wọ ma gbi pa sii nụ́nụ́obi ḅụ sua, warị ọ ḅụ págháḅo. Tụ́wọ ma fịị dua kịkam, kị́nị́mamgba warị dugho ḅẹ́, <<Ọ fịịmam!>> 27Kụ́ma Jizọs tụ́wọ ma saghị akịm ḅara ḅụ, sị ḅárásua ọ pịrị sị ọ sẹ, o warị saghị sẹ.
28Jizọs wárị sọọ fama sáá, ori ọḅụduaapụ warị ọ sị, sị ḅọghu ḅara ḅụ gbíla, ḅẹ́ <<Tegó wamịnị ine sitẹ́mẹ́ ma deesighaa?>>
29Jizọs pagharam ḅẹẹ, <<Tẹ́ghẹ̄ ngéré anịị mịị ngaa nyẹ ma deesi bẹnyẹ, jẹ́nyẹ ofori.>>
Jizọs Sima Ori Fịị Gbolomanyẹ Dughom
(Mat 17.22,23; Luk 9.43-45)
30Jizọs na ori ọḅụduaapụ Galili sẹ́ ma párángáa ḅọ́rọ́m. Jizọs dọghụgha gbẹ́rẹ́ḅọ sọ nimi ọ fịnịngaa. 31Tegó ọ nyẹ pa ori ọḅụduaapụ diearị: <<Tumḅọ yii Tụ́wọ ma nnị ọ saghị pa ọ ḅáa bẹapụ ḅárabie suabẹm. Anị mḅẹ́sọ, tẹ́rẹ́ a dii ḅọ́rọ́ sáá, ọ fịị ḅụ saghịbẹm.>>
32Mị dienyẹ ma anị dughoarị nyẹ nnị akanyaḅogha, n pịghị ḅáláfaarị nyẹ pa ọ gbíla.
Tụọ Dụḅaḅáa
(Mat 18.1-5; Luk 9.46-48)
33Nnị ḅoo Kapanọm láa sáá, sị wárị sọọ, Jizọs ori ọḅụduaapụ gbilam ḅẹẹ, <<Ọ tẹ́ ḅẹ́rẹ́fángálámáarị asọogbo ma ḅụ?>>
34Kụ́ma nnị ine ọ pagharagha, tegó asọogbo n ḅẹ́rẹ́fángálámáarị nna bie tụọọ dụḅaḅáa 35Jizọs kpọrọfịnịm warị, oyi mmẹapụ findi ma sịị, warị n ḅẹẹ, <<Ọmịna bie bịpịsụ dọghụḅọ fịnịfịnị, n ḅo amịna ḅụ pa kị́nị́mamgba ọḅụju wárii n pịghị kị́nị́mamgba ómóniḅọ sọọ.>> 36Ọ warị gbẹ́rẹ́ kálátụwọ akuoo pa nna toruku kórómaa. Ori ọ ḅara pa tụ́wọ ma fangala ikélémam warị n ḅẹẹ, 37<<Ị́yẹ́ ẹ́rẹ́ ḅụ mịnaawọ ma ḅụ gbẹ́rẹ́ḅọ daákịḅọ gonyẹ́ gonyẹ́, i daákịm; pighi i daákịḅọ gonyẹ́ gonyẹ́ irị ngéré daákịgha kụ́ma ị fịrịma ḅọ ma daákịm.>>
Wa Dughosimaghaḅọ Wamịnị Na Imii
(Luk 9.49,50)
38Jọn ọ ḅẹm, <<Nyẹ́dieḅọ wa gbẹ́rẹ́ owitụ́wọ arịm, ị́yẹ́ ẹ́rẹ́ ḅụ sitẹ́mẹ́ desiariḅọ, wamịnị okikim ḅẹ́ ọmịnị mịẹma, tegó ori wámịna ḅụ gbẹrẹḅọgha.>>
39<<Jizọs dugho n pịrịm, asọ dọ́ghụ́ma sị okiki,>> tegó ị́yẹ́ ẹ́rẹ́ ḅụ ḅụ́gbérépuma fịrịnwangịḅọ kálá sáá tụ́wọ ḅọ́rọ́ gbẹ́rẹ́kiri ine ịḅụ siinyẹ dughobịgha. 40Tegó wá dughosimaghaḅọ wamịnị na imii. 41A karakárányẹ ma dugho ọ pịrịm, ḅẹ́ gbẹ́rẹ́ mingi ọmọ́ngọ sua ọ pịrị ḅo ḅẹ́ ọmịnị i nyẹẹ ẹrẹ́sị amịna gbẹ́nyẹ n ḅọ gbarịbịgha.
Túlúma Pa Siinyẹ Bie Sọọ
(Mat 18.6-9; Luk 17.1,2)
42<<Ḅọ́rọ́ bẹḅọ bẹḅọ mị káláapụ ma mịẹbẹm sị n mịnị ịḅụ minini nyánáma, anị ibiḅaabẹm n ḅọ́rọ́ nyẹ́ gbẹ́ẹ̄ opu dapịrị pa n ḅọ kọ́ngọ kpọ sị n ḅọ pa tọ́rụ́bie gbii. 43Anịma gosi ḅọ́rọ́ ị ḅara mịẹbẹ sị ị siinyẹ mịẹ anị pẹ́lẹ́si anị ibiḅaabẹm ḅẹẹ ị gbẹ́rẹ́ ḅara pa duma ma sọọ, tụ́ma i mmẹẹ́ a ḅara nyáná sị ẹ́kpẹ́duaama ma sọ muu, bibigha kọ́rịfịnị ma bie sọọ. 44Anị ngaa ma ḅụ nna kiriododo fịịfịịgha fịnị ma sọ bibịẹgha. 45Ḅọ́rọ́ i ḅụọ i mịẹbẹ sị i siinyẹ mịẹ, ḅụọ ma pẹ́lẹ́si! Anị ibiḅaabẹm ḅẹẹ ị gbẹ́rẹ́ ḅara pa duma ma bie sọọ tụ́ma i mmẹẹ́ a ḅụọ nyáná sị nnị ị pa ẹ́kpẹ́duaama ḅụ gbi sua. 46Nna kiriododo ma fịịfịịgha ngaa, fịnị ma sọ bibịẹgha ngaa. 47Ḅọ́rọ́ i tọ́rụ́ mịẹbẹ sị ị siinyẹ mịẹ anị sọghụ si, anị ibiḅaabẹm ḅẹ́ ị gbẹ́rẹ́ tọ́rụ́ nyáná sị Tamuno Ásẹ́mẹ́kiri ma sọm, tụ́ma mmẹẹ́ a tọ́rụ́ nyáná sị nnị ị pa ẹ́kpẹ́duaama yọ ma ḅụ gbi sua. 48Anị ngaa
<< <Nnị pẹ́arị kiriododo ma fịịfịịgha,
n dọ́ghụ́maarị fịnị ma sọ bibịẹgha!>
49<<Fịnị anịị ọ́rụ́ḅọ ọ́rụ́ḅọ dọ́ghụ́ma fiafiama bẹnyẹ, nnị fụ́ pa igwa ma siri fiafiamaarị ḅara.
50<<Fụ́ ibim, kụ́ma ḅọ́rọ́ fụ́ anị ḅẹ́lẹ̄ ḅuumamam, ị tọ́rọ pa anị ḅẹ́lẹ̄ náa bẹ?
<<Nangwọapụ fụ́ ma nyána, si jụghọ jụghọ na diin ḅụ fịnị.>>
Currently Selected:
Mak 9: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation
