Mak 11
11
Sọ́ḅá Ḅara Pa Jerusalem Bie Sọọ
(Mat 21.1-11; Luk 19.28-40; Jọn 12.12-19)
1Nnị ḅo Jerusalem na kikia sáá, sị ḅo Bẹtịfegi na Bẹtani láa Olivu Tụ́ndụ ma ọgọnọ, Jizọs ori mmẹẹ́ ọḅụduaapụ fịrịmam. 2Nnị ḅẹarị ḅẹ́, <<Ọmịnị tórúku ju fịnị káláama ma muu, ọmịnị anị ngaa láa gbẹ́rẹ́kiri ọ gbẹ́rẹ́ kálá ásụ tụ́wọ árịbẹm n kpọwarị nyẹ, jẹ́ éné tumḅọ na tándigha nyẹ. Anị fiima sị anị pa mịnga ḅoo. 3Kị́nị́ pịghị i gbíla gbíla ḅẹẹ, i tegó ọkọ mịẹarị, dugho n pịrị ḅẹ́ Kị́nị́nyánáḅọ ma anị bim, ọ pịghị mị gbẹ́rẹ́kiri anị fịrịma ḅoobẹm.>>
4Nnị warị muu asọogbo ásụ tụ́wọ árị n kpọwarị nyẹ ḅụ́pọ́ ḅụ. Nnị anị fiimaarị sáá, 5anị ngaa sẹ́fịnị jẹ́apụ o gbilam, <<Ọ tẹ́ mịẹarị, ásụ tụ́wọ ma fiimaarị?>>
6Nnị pagharam Jizọs dugho n pịrịị ḅara ma, túminị́ kpo ma warị n wáriso. 7Nnị ásụ tụ́wọ ma akuoo Jizọs pịrịm warị nna ḅụ gbẹ́ẹ̄ bịtẹ pa nama ma ọgọnọ isé, Jizọs warị anị ọ́gọ́nọ kpọrọfịnị, 8Tọghaapụ nna bịtẹ pa asọogbo ma ḅụ isém, jẹ́apụ warị sị ḅara pẹ́lẹ́ duakiri ḅụ sị pa asọogbo ma ḅụ isé. 9Tórúku fịnị túminị́ na pịghị ọḅụju n duaarịapụ warị saghị ilúghú,
<<Hozana!>>
<<Boma fịnị Kị́nị́nyánáḅọ ẹ́rẹ́ ma ḅụ ḅoarị ḅo pịrị.>>
10<<Tamuno ḅoarị wámịna daa Deviti ásẹ́mẹ́kiri ma karịibima!>>
<<Hozana sóghólóḅa angaá!>>
11Jizọs Jerusalem sọm, warị Tamunoopuwarị ma sọọ muu, warị nyẹ gonyẹ́ gonyẹ́ dighi ikelekele. Kụ́ma sáá muu ma ḅara ma ọ pághá so Bẹtani múm ori na ori oyi mmẹapụ findi ọḅụduaapụ.
Jizọs Fịgị Sị Ma Gbom
(Mat 21.18,19)
12Énéḅa, nnị Bẹtani ḅụ saghị ḅoarị sáá ḅuru Jizọs tárịm. 13Ḅọlọanga ḅụ ọ fịgị sị ma arịm, ányị́nyá sịbị bii nyẹ, o warị muu ḅẹ́ ọ fịgị sịmgbọ́lụ árịbeotuo anị ọgọnọ, kụ́ma o ḅo anị láa sáá, ányị́nyá ányị́nyá ngéré anịị ori árịnyẹ tegó fịgị sịmgbọlụ sa na laagha. 14Jizọs fịgị sị ma ḅẹm, <<Gbẹ́rẹ́ḅọ sọ mịnị jẹ́ pa ị sịbị fịgị fịbịghaa!>> Ori ọḅụduaapụ ori ẹ́gẹ́rẹ́ ma naam.
Jizọs Tamunoopuwarị Ma Sọm
(Mat 21.12-17; Luk 19.45-48; Jọn 2.13-22)
15Jizọs ḅo Jerusalem láa sáá, o Tamuno warị ma sọọ múm warị anị bie túḅo kọọarịapụ mamgba deesi, igbii dimaarịapụ ma ịkasị ọ saghị iḅomam, na elesia dẹrịarịapụ ma ịkasị saghị iḅomam, 16ọ pịghị minibịgha gbẹ́rẹ́ḅọ sọ bẹnyẹ bẹnyẹ dighi ḅọ́rọ́ Tamunoopuwarị ma nụ́ngọ. 17Ọ warị anịsáa, túminị́ ma die, bẹ, <<Nnị gịẹ kórómam Tọ́ndiri ma bie, Tamuno dugho ngaa ḅẹ́,
<< <I warị ma tuminikiri gbọrụ tẹ́ghẹ̄ warị
anịị n pa anị sịị bẹnyẹ.>
Kụ́ma ọmịnị anị pa furuapụ ḅoghuḅoghu angaá mịẹmam!>>
18Igwagwaalaapụ ma na ólóghó nyẹ́dieapụ ma, mịma naam, n warị saghị asọ dọghụ nnị Jizọs ḅá bẹ ḅara. Nnị ọ dighi ḅáláfam tegó túminị́ kpo ma anị n tọ́rụ bulubulumaarị ori dienyẹ ma.
19Éné ḅo ḅupiri sáá, Jizọs na ori ọḅụduaapụ opu ama ma warisom.
Dawọḅo Bẹnyẹ Fịgị Sị Ma Ḅụ
(Mat 21.20-22)
20Dede dédé, anị ḅụ éné ḅa, nnị asọogbo ma ḅụ ḅọ́rọ́arị sáá, nnị fịgị sị ma arịm. Anị fịịmam akị mú anị kune láa. 21Pita pághányẹ pa biekórómam, warị Jizọs ḅẹ́, <<Dighi, Nyẹ́dieḅọ, ị gbóoó fịgị sị ma fịịmam!>>
22Jizọs n pagharam, <<Ọ Tamuno ḅụ minini nyánáa. 23A tụ́manyẹ ma dugho ọ pịrịm, mịị tụ́ndụ ma ḅẹ́ bẹḅọ gonyẹ́ gonyẹ́ ḅẹ́ ịḅụ si akị mú tọ́rụ́ ogbo koro, n ḅo tẹ́mẹ́ mmẹẹ́ mmẹẹ́ mịẹgha kụ́ma mininim ḅẹ́ n ḅo dughonyẹ mịẹbẹm, anị pịghị ọkọfịnị n ḅo pịrịbẹm. 24Mịma gosi, a dugho ọ pịrịm, ọ tẹ́ghẹ̄ sị nyẹ́ biiarị sáá, minini ḅẹ́ ọ nyanaḅomam, ọ pịghị o binyẹ gonyẹ́ gonyẹ́ nyánábẹm. 25Ị sẹ́fịnị sị tẹ́ghẹ́arị sáá, tumḅọ pa ị mịẹ siiamịẹnyẹ gonyẹ́ gonyẹ́ sii wáriso n ḅọ pịrị, ị́yẹ́ sobie Daḅọ so ị́yẹ́ sii wáriso i pịrịbẹ ḅara.>>#11.25 Jẹa olom diri go yọ ini fa sue (26) suam: Ị ḅọ́rọ́ siiḅụḅarasi jẹ́apụ pịrịgha pịrịgha, ị Daa sobie fịnịḅọ sọ ị́yẹ́ mịẹsiinyẹ ḅụ ḅárási ị pịrịbịgha.
Nnị Jizọs Kụ́rọ Saghị ḅo Ngaa Gbilam
(Mat 21.23-27; Luk 20.1-8)
27Nnị pịghị sima Jerusalem ḅụ árụ́ sọmam, Jizọs Tamunoopuwarị ma bie nwángịarị sáá, igwagwaalaapụ na ólóghó nyẹ́dieapụ na sẹ́nịapụ ma ọ damaḅom. 28Warị o gbíla, <<I tẹ́ kụ́rọ nyána sị ị mịẹarịnyẹ ma mịẹ? Tụọ anị kụ́rọ ma pa ị pịrịị?>>
29Jizọs nnị pagharam, <<A kálá gbẹ́rẹ́ gbíla nyẹ pa ọ gbilabẹm, ọmịnị i págháraa págháraa, a dugho ọ pịrịbẹm a nyáná kụ́rọ sị a mịẹarịnyẹ ma mịẹ. 30O dugho i pịrị, Jọn ọ pa mingi saraarị kụ́rọ ma anị tẹ́ angaá saghị ḅo? Anị Tamuno ḅara saghị ḅo anịgha túminị́ ḅara?>>
31Nnị warị saghị nụná nna ogboku bie, <<Wa tẹ́ dugho bẹ? Wa pagharaa pagharaa ḅẹ́ <Anị Tamuno ḅara saghịḅom,> ọ ḅẹbẹm bẹ, <O tegó Jọn mininigha?> 32Wa ḅọ́rọ́ ḅẹ́ ḅẹ́ túminị́ ḅara,>> (nnị túminị́ ma dighi ḅáláfaarị, tegó kị́nị́mamgba mininim ḅẹ́ Jọn ori anịị ikiakoroḅọ).
33Anịgoo n Jizọs pagharam ḅẹ́, <<Wa nimigha.>>
Jizọs warị n ḅẹ́, <<Irịsọ a dugho ọ pịrịbịgha a ḅọ́rọ́ pa mị fịrị ma nwángịarị kụ́rọ.>>
Currently Selected:
Mak 11: IBY
Highlight
Share
Copy

Want to have your highlights saved across all your devices? Sign up or sign in
©2024 Luke Initiative for Scripture Translation