Matiyu 17

Abu bè twafwe Yeso ju ángá

(Marku 9:2-13; Luka 9:28-36)

1Tsǝ chwen a ngǝ chashin, Yeso è kpu Bitru, Yakubo ngge Yohana, nwenjin Yakubo hon, twa e ge, bè tonvǝ́ a hwì echacha akan evǝa be e no a jujube. 2A zǝn, ju ye è twafwe bwa etenten chafya mo be. Fǝzǝn embǝgya mbwe è nggazǝ abu nò, mokàn mbwe è mbǝgezǝ etenten abu enggasansan mo nò. 3Kè akan, bè di Mosa ngge Eliya. Bè no jan fwa anga ngge Yeso.

4Bitru è jan Yeso jan, “Etsodwe, ge no esese a je e no ana. Ano o dgyan ara, ma tsa afku ta, akan ḿ mbo, akan ḿ mo Mosa ngge akan a no ḿ mo Eliya.”

5Tea atan a gè chà jan fwa anga, edwe etenten è bwipe be, bè fo aken gwa a je mo edwe hon jan, “Ena a Nwen m, m dgyan àywá, ngge m fo etkwa mbwe. Nye buton fo ye.”

6Atan a bè fo enò ángá, bè tsen etsentsen àywá nè kpo bwi a sǝnsen. 7Tea Yeso è bwa yi be bu a ju nè jan, “Nyi etkyen, nye e tsen nye etsentsen ra.” 8Atan a bè kpu fǝzǝn mo be etkyen ángá, bè di be nobǝ efki ra, è kpwà Yeso.

9Abu bè nyashwa a sen mo hwì hon ángá, Yeso è twa be echa jan, “Nye e jan e didi nye nobǝ akan mò a nye di na ra, kpwà tén atan a be ti Nwen Nobǝ nyi ara etkyen a dì ángá.”

10Kǝnggwa be etsonchi mbwe è ká ye eka jan, “Bwe engǝ be etumo mo edon jan ne, Eliya ne twabǝ a bwa sangǝ́ Kristi chà a bwa?”

11Yeso è janfwe be, “Eshwen, Eliya kwafya a bwa a ge, na bwe a se a gu be mò. 12Tea m jan nye anga, Eliya hon è bwa fwa ara, bè diyi be ye ra, nè bwe ye binbin mo be mò a tsuruku mo be è dgyan ángá. Ba anona, Nwen Nobǝ a ngǝ ekan a bu mo be.” 13Kǝnggwa be etsonchi è chà hwayi jan gé jan be fwa ángá a chu Yohana ya Batisǝma.

Yeso matswa nwen ndedon akan éè no ngge engǝ́ esera ángá

(Marku 9:14-29; Luka 9:37-43)

14Atan a bè shwangga ara a sen a zǝn be nobǝ ángá, nobǝ akan è bwa nggwa ekpanvǝ a sen chafya mo Yeso, 15nè jan, “Etsodwe, di ashi mo nwen m ndedon, ge no ngge modwa-ekpom, modwa hon tswa ye ekan anga àywá. Engga kè embo embo, ge ti ye twa anga a fǝ̀ ngge engga ya ehwyà a mbǝ. 16Ḿ ti ye bwa a zǝn be ya e ba o anga, tea be matswa ti be ye ra.”

17Yeso è twanga nè jan, “A nye be nobǝ ya e tsǝ́ be ekǝ̀n a chu Ehwya ra, be ya mofǝ̀ mo ekǝn ena, ken a ngga abu atan a engǝ, a m ti a no ngge nye? Ken a ngga abu atan engǝ, a m ti no a bon-ekǝ̀n anga ngge nye? Nye ti nwen ndedon hon bwa a zǝn m ana.” 18Yeso è tkyá engǝ́ esera hon etkya, engǝ́ esera hon è gwa a je a ju nwen hon, gè ben ematswam kè akan.

19Ekǝnggwa, be etsonchi è bwa a zǝn Yeso engǝ̀tonton nè ká ye eka jan, “Ano bwe a ge, jé nyonvǝ́ ti je engǝ́ esera hon ra?”

20Gè janfwe be, “Adia chaebi mo nye kǝn ye ra ángá. M jan nye ebi anga, ano nye no ngge chaebi e no nwofyan abu fwento musta, nya jan hwì ena, ‘Vǝkpú chu o ana, we ken a nokǝ̀n,’ ga nya a tén enyam. Mò nwone a nye bwe a ti nye ra ángá fwa ye ra.” [ 21Yishwa engǝ́ esera ena gwa ye a je anga kukwa enó ra, kpwà tén adi ebgo ngge vǝ etsem.]

Yeso è jan be adi e fà abu ga fǝ ángá

(Marku 9:30-32; Luka 9:43-45)

22Atan a binbin mo be etsonchi hon è fǝnno a zǝn akan a sǝnsen mo Galili ángá, Yeso è jan be jan, “Be tsǝ a du Nwen Nobǝ a bu mo be nobǝ. 23Ba gu ye, tsǝnò adi e ta ba ti ye a nyi etkyen a dì angǝ.” Kǝnggwa be etsonchi mbwe è bgen tsuruku àywá.

Abu Yeso è kpwa tse-eten mo Àtá mo Ehwya ángá

24Atan a Yeso ngge be etsonchi è bwangga a Kapanahum ángá, be ya è cha tse-eten mo Àtá mo Ehwya anga, è bwa a zǝn Bitru nè ká ye eka jan, “Etumo mo nye kpwa ye tse-eten mo Àtá mo Ehwya anga ra?”

25Bitru janfwe be, “Ee, ge kpwa anga.”

Atan a Bitru è kwashi ara a tswa akanmu hon ángá, Yeso è kwafya jan fwa ngge ge a ge jan, “Sima, mò a o ka anga a ano? A zǝn be ara a be chutì mo zǝnchaje ena, cha be tse-eten eno e ra tse a chu be mò anga? A zǝn mbǝgya a sǝnsen mo be nè, e no e ra a zǝn be ya echan?”

26Bitru è janfwe ye, “A zǝn be ya echan.”

Yeso è jan, “Enona, be mbǝgya a sǝnsen mo be kpwa be anga ra.” 27“Tea evǝa je e bwe e bgen je be tsuruku ra, shi a sǝn, twa kpesan mbo shi a tswa mo nó. Tì gwejo a o kwafya fu gwa a je ángá, fki kpevǝ mo nó. Wa ben fwentse azufa ekeke a be fǝ́ anga sheke a zǝn, nwone e kpwa a ti tse-eten hon ángá. Ti ken no be abu tse-eten ekpwam mo chu o ngge me.”

Currently Selected:

Matiyu 17: ICH

Highlight

Copy