लूका 19

ईशु ते जक्‍कई

1ईशु यरीहो मां हुती कर जाये पलता ला। 2ते ओठे जक्‍कई नांवा चे हेक बन्दे हुते, जको चुंगी गेहणे आला चा सरदार हुता ते धनवान हुता। 3ओ ईशु नु ङेखणे चाहवे ला कि ओ किसा छै। पर भीड़ी चे वजह ङेख ना सग़ेला, कांकि ओ मंधरा हुता। 4बल्ति ओ ईशु नु ङेखणे वास्ते आग़ु द्रोड़ती कर हेक गूलर चे पेड़ा उपर चढ़ती गेला, कांकि ईशु ओही मार्ग़ कनु जाणे आला हुता। 5जब ईशु ओही जग़हा पुज़ला, ते उपर नजर मारती ओनु केहले, “हे जक्‍कई, जल्दी तले उतरती आ, कांकि आज़ मनु दुधे घरा मां रेहणे जरुरी छै।”

6ओ तुरन्त उतरती कर खुशी लारे ईशु नु आपणे घरे गेहती गेला। 7ईं ङेखती कर सारी बन्दी कुड़कुड़ाती कर किहुं लाग़ली, “ईशु तां हेक पापी बन्दे चा मेहमान बणती कर आला।”

8जक्‍कई ने प्रभु नु भिले रेहती कर केहले, “हे प्रभु, ङेख, मैं आपणी आधी जायजात कंगाला नु ङिये पला, ते अगर काये कोच्छ वी अन्याय करती कर गेहले तां ओनु मैं चार गुणा पुठा फेरती ङिही।” 9बल्ति ईशु ने ओनु केहले, “आज़ ऐ घरा मां उद्धार आला, ऐवास्ते कि हा वी अब्राहम चा हेक पूत छै। 10#मत्ती 18:11कांकि मैं इन्साना चा पूत गार हुला आला नु सोधु, ते वांचा उद्धार करु आला।”

ङस मोहरा ची मिसाल

(मत्ती 25:14–30)

11जब वे ये बाता सुणी पलते, तां ईशु ने हेक मिसाल केहली, ऐवास्ते कि ओ यरुशलेम चे गोढु हुता, ते वे समझते कि नरीकारा चा राज़ हमा प्रकट हुवणे आला छै। 12तां ईशु ने केहले, “हेक बङे धनवान इन्सान दूर देशा मां चाह्‍ले गेले, ताकि राजपद गेहती कर पुठे आती जाओ। 13ओणे आपणे दासा महु ङसां नु हकारती कर वानु ङस मोहरा ङिलीया ते वानु केहले, ‘माये पुठे आणे तक लेन-देन करजा।’

14“पर ओचे शहरा चे रेहणे आले ओकनु बैर राखते, ते ओचे भांसु दूता चे जरिये केहती भिज़वाले, ‘अम्ही ना चाहु कि हा अम्चे उपर राज़ करो।’ 15जिसे बेले राजपद गेहती पुठा आला, तां इसड़े हुले कि ओणे आपणे दासा नु जानु रोकड़ ङिलती हुती, आपणे गोढु हकरवाले ताकि पता लाग़ो कि वाणे लेन-देन लारे का-का कमाले। 16बल्ति पेहले ने आती ते केहले, ‘हे स्वामी, दुधीया मोहरा लारे ङस नेरीया मोहरा कमालीया।’ 17ओणे ओनु केहले, ‘धन्‍न छी, हे उत्तम दास! तु ब़ोहत ही थोड़े मां भरोसेमन्द निकड़ला हमा ङसां शहरा उपर अधिकार राख।’ 18ङुजे ने आती केहले, ‘हे स्वामी, दुधी मोहरा लारे पाँच नेरीया मोहरा कमालीया।’ 19ओणे ओनु केहले, ‘तु वी पाँच शहरा उपर हाकिम हुती जा।’

20“तीजे ने आतीकर केहले, ‘हे स्वामी, ङेख दुधी मौहर हा छै, जानु मैं रुमाला ब़ांहती मेहली हुती। 21कांकि मैं दुधे कनु ङरता, ऐवास्ते कि तु कठोर इन्सान छी, जको ते कोनी मेहली ओनु तु चती गिही, जको ते कोनी राहले ओनु तु बाढती गिही।’

22“ओणे ओनु केहले, ‘हे दुष्ट दास, मैं दुधे ही मुँहा कनु तनु दोषी ठहरावे पला। तु मनु जाणता कि मैं कठोर इन्सान छै, जको मैं कोनी मेहले ओनु चती गिहे, ते जको मैं कोनी राहले ओनु बाढे। 23तां तु माये रुपये शाहुकारा चे गोढु कां कोनी मेहले जती कि मैं आती कर ब्याजा समेत गेहती गिहा?’

24“ते जको लौक गोढु भिलते ले, ओणे वानु केहले, ‘वा मौहर ओकनु गेहती गिहा, ते जाये कनु ङस मोहरा छी ओनु ङिया जती।’ 25वाणे ओनु केहले, ‘हे स्वामी, ओचे कनु ङस मोहरा तां छी।’ 26#मत्ती 13:12; मरकु 4:25; लूक 8:18 ‘मैं तम्हानु किहे पला कि जाये कनु छै, ओनु ङिले जई, ते जाये कनु कोनी, ओचे कनु ऊं वी जको ओचे कनु छै गेहती गेले जई। 27#मत्ती 25:14–30पर माये वा बैरीया नु जको ना चाहते कि मैं वांचे उपर राज़ करे, वानु इठे आणती कर माये सामणे मारती नाखा।’ ”

राजे चे समान ईशु यरुशलेम मां आला

(मत्ती 21:1–11; मरकुस 11:1–11; यूहन्‍ना 12:12–19)

28ये बाता केहती कर ईशु चैला चे आग़ु-आग़ु यरुशलेम सनु चढ़ता जाये पलता। 29जिसे बेले ओ जैतून नांवा चे पहाड़ा उपर बैतफगे ते बैतनिय्याह चे लारे पुज़ला, तां ओणे आपणे चैला महु ङुंहु नु ईं केहती कर भेज़ले, 30“सामणे चे गांवा मां जावा, ते ओचे मां पुज़ते ही हेक गाहड़ी चे ब़च्‍चे जाये उपर कङी कुई सवार कोनी हुले, ब़झले आले तम्हानु मिली, ओनु खोलती कर गेहती आवा। 31ते अगर कुई तम्हा कनु पूछे, ‘कां खोला पले,’ तां केहजा, ‘प्रभु नु ऐची जरुरत छै।’ ”

32जको भेज़ले गेले हुते, वाणे जती कर जिसड़े ओणे वानु केहले हुते, उसड़े ही लाभले, 33जिसे बेले वे गाहड़ो चे ब़च्‍चे नु खोली पलते, तां वांचे मालका ने वाकनु पूछले, “ऐ ब़च्‍चे नु कां खोला पले?”

34वाणे केहले, “प्रभु नु ऐची जरुरत छै।” 35वे ब़च्‍चे नु ओचे गोढु आणती कर, ते आपणी ओढ़णी ओचे उपर नाखती कर ते ईशु नु ओचे उपर ब़िसाणती ङिले। 36जब ओ जाये पलता, तां लौक आपणी ओढ़णी मार्ग़ा मां बिछाते जई पलते।

37गोढु आते हुले जिसे बेले ईशु जैतून पहाड़ा ची ढलानी उपर पुज़ला, तां चैला ची सारी कलीसिया वां सब सामर्थ चे कामा ची वजह जको वाणे ङेखले हुते, खौश हुती कर बङे शब्दा लारे नरीकारा ची स्तुति करु लाग़ले,

38“धन्‍न छै ओ राजा, जको प्रभु चे नांवा लारे आवे पला!

स्वर्ग़ा मां शान्ति ते आसमान मण्डल मां महिमा हो!”

39बल्ति भीड़ी महु कोच्छ फरीसी ओनु किहुं लाग़ले, “हे गुरु, आपणे चैला नु धमका।”

40ओणे उत्तर ङिला, “मैं तम्हानु किहे पला, अगर ये चोप रिहे, तां पत्थर चीकु लाग़ती जाये।”

ईशु यरुशलेम ते इस्राएल देश चे लौका वास्ते रोला

41जिसे बेले ईशु यरुशलेम शहरा चे गोढु आला ते ओनु ङेखती कर रोऊं पड़ती गेला। 42ते केहले, “का ही भले हुवीया कि तु, हव्वे, तु ही, ऐ ङिओ मां शान्ति चा बाता जाणती गिहा, पर हमा वे दुधीया आंखीया कनु लुकती गेलीया। 43कांकि वे ङिहें दुधे उपर आवे, कि दुधे बैरी मोर्चा ब़ांथी कर तनु घेरती गिहे, ते चारो-तरफ तनु दब़ावे। 44ते तनु ते दुधे ब़ाला नु जको दुधे मां छी, माटी मां मिलावे, ते दुधे मां पत्थरा उपर पत्थर वी नी छोड़े, कांकि तु ओ मौके नु जिसे बेले तम्चे उपर कृपा दृष्टि करली कोनी पिछाणले।”

मन्दरा ची सफाई

(मत्ती 21:12–17; मरकुस 11:15–19; यूहन्‍ना 2:13–22)

45बल्ति ओ मन्दरा मां जती कर बेचणे आला नु ब़ाहर काढ़ु लाग़ला, 46ते वानु केहले, “लिखले आले छै, ‘माये घर प्राथना चे घर हुवी,’ पर तम्ही ओनु ङाकुवा ची घौर बणाती नाखली।”

47 # लूक 21:37 ईशु हर ङिओ मन्दरा मां उपदेश करता, ते प्रधान याजक ते शास्त्री ते लौका चे बङके ओनु खत्तम करने चा मौका सोधी पलते।

48पर कुई तरीका नी सोध सग़ले, कि ईं किवें करु, कांकि सारे लौक ओचीया बाता नु बङे शोंका लारे सुणते।

Currently Selected:

लूका 19: ODR

Highlight

Copy