Lukah 22

Ɗa kapalang tou Yahudi ɗakahanging kahamatiya hi Yehu awiɗ

(Mat. 26:1-5; Mrk. 14:1-2; Yoh. 11:45-53)

1Na Laɗɗu Paskah napaparami tou Yahudi namaranik,#22.1 Ta Hurat Lii Dei (Keluaran 12:24-27; Ulangan 16:1-8), narami Paskah woluya kanamu wainya na laɗɗu apahelaya natou Ihrael walingu ta pingi papa atanguɗa ta tana Mehir. Ta rahi ya, natou Harani winanya na Paskah, ʄiayaka na laɗɗu rahi morik ɓalina hi Yehu waling ta mati ana pahelaya na tourara waling ta kuahana maeti. 2kaɗang ɗa kapalang imam#22.2 Imam ʄiayak natou nama ta paɗuana hi Alla ʄaka na tourara. ʄaka ɗa gurr agama tou Yahudi ɗamangeꞌatuja ɗa tou ɗangu ʄiayak hiɗa manyera kaɓuninya larangina kahamatiya hi Yehu awiɗ.

Hi Yudah napakoꞌunya hi Yehu

(Mat. 26:14-16; Mrk. 14:10-11)

3Manga hi paɗibangu natama ʄaka nakuahaya hi Yudah nahawiɗa ʄellangu Ihkariot, ɗunna hatou waling ta ana pahakoala-Na hi Yehu. 4Jiayaka hi Yudah nahalaku lipa pearaɗengaja panewi ɗa kapalang imam, ʄaka ɗa kapalang ɗama jawaya na ɓei Umma Pingi Pahabayang tou Yahudi, nalarana gikineina ana woaya hi Yehu lahi ɗuɗa. 5Duku egi atiha aɗa ranguya ʄaka ɗameara oꞌanya kawoanya riti hi Yudah, awiɗa. 6Hi Yudah na oꞌanya ʄaka namanyeranya kaloaga kaku woaya hi Yehu lahi ɗuɗa, abi napeaga tou, awina.

Hadia pa angu ta Laɗɗu Paskah tou Yahudi

(Mat. 26:17-25; Mrk. 14:12-21; Yoh. 13:21-30)

7Tomaɗanyaka na Laɗɗu Paparami Kababa dapataung Bibit Roti tou Yahudi, ta rahi nou ɗaɗoruyah heingu na beabu ka angu ta laɗɗu Paskah, awiɗa. 8Manga hi Yehu napaleawaha hi Petruh ʄaka hi Yohanih, winaja, “Halakuya lipa hadia pa angu Paskah tutu tagu bolluda.”

9“Bayanya Ama na padoungu napawukum pingi pahadiama?” Wiɗa aɗa patutur.

10Nagapiya hi Yehu, “Halakukaɗingu, peala ami tomakaka ta koata nou, einya hatou moani nama idi aruwei nama eingu weina. Mi keriya ta umma pingi hataman. 11Mengaka nou wiminya na mori umma: Hi Ama Gurru napanewi, wina, ‘Bayakanyaka na padoungu taguɗa ɗa ana pahakoala-Gu ʄaka Nyouwa kama angu pa angu Paskah?’ 12Na mori umma nou, enga patekanagiminya na korungu nama luar nama einya ta bara deaha. Na korungu nou einguk manaingun, noumika ami hadia pa angu Paskah.”

13Halakuɗanyaka hi Petruh ʄaka hi Yohanih aɗa tomaka houlau, ngaladukana napatuꞌang mearangu napatiki-Na hi Yehu. Manga houhaka, hiɗa hadia pa angu Paskah.

Hamangu matua ta meja ɓiaha-madina hi Yehu

(Mat. 26:26-30; Mrk. 14:22-26; 1Kor. 11:23-25)

14Ana tomaka na rahi angu pa angu Paskah, hi Yehu nangoɗu ana angu-inu oali ɗengaja ɗama toum habulu maduaha ɗa ana papaleawa-Na. 15Manga hi Yehu winaja, “Nyouwa kubuha oatang ak angu-inu ɗengagim pa angu Paskah nei, adaɗi Kumawillaǃ 16Kaɗang hiwigugimː Nyouwa daku hilu amajah hei, lapak na ihina na hamangu matua ta meja ɓiaha-madi apahunganya ta rahina hi Alla ana papareahakak ʄaʄi Raja ta pinu-tana.”

17Manga hi Yehu naɗekiya na kaꞌa wei anggur, hina habayang ana pamalanguya hi Alla, ʄaka hi winaja ɗama touma habulu maduaha ɗa ana papaleawa-Na, “Mudekiya nei, kam bariya ta oalimu; 18kaɗang hiwigugimː walingu ya daku hilu inu manguha wei anggur, lapak hi Alla ana papareahakak ʄaʄi Raja ta pinu-tana.”

19Manga nadekiya na kababa, hina habayang ana pamalanguya hi Alla, ʄaka hina hiwi-hiwituya manga hina woaja ɗama touma habulu maduaha ɗa ana papaleawa-Na, winaja, “Ya ʄiayaka na ihi-Gu nahawoagugim, kapiku kolliminya namanumara. Mi pahalaku pangalanyah, kam namu wai-Ga.” 20Tonouʄellana ana menga pa angu, nawoaya na kaꞌa nama eingu wei anggur lahi ɗuɗa ʄaka wina, “Na wei anggur nei ʄiayaka napapatura-Na hi Alla nama ɓuangu, napapamaduwaing na wei raa-Gu nama boangu tagumi.”#22.20 Hanaɗuga adaɗi aminya hi Yehu ta pinu-tana ya, hi Alla langa wolunaka patura-paʄaʄing ta tou Ihrael, napapamaduwaingu raa maɗaga pamanuatung napapeirahung lahi ɗuɗa (Keluaran 24ː7-8). Keriya napaturangun hi Alla, ʄiayak hina woluya napatura-paʄaʄing nama ɓuang ta tourara, napapamaduwaing nama boangu na raana hi Yehu ta rahi matina ta ai harika.

21Mi pa atikinguǃ Natou nama pakoꞌung lahi Nyouwa einya ana ngoɗu, angu-inu ɗenga-Ga ta meja ya. 22Na Ana Tourara na maeti memaha mearana napalanga ɓotahuna hi Alla; ʄiaɗinguka na mawillaha natou nama pakoꞌu-Nyaǃ”

23Jiayak ɗapatuturu wikiɗ gearaya waling ta joangaɗa nama woluya nama toungu.

Na pakangilanguɗa agearaya nama reihi ɓakul ta joangaɗa

24Ta rahi nou, ʄaʄinanyaka napakangilanguɗa ɗa ana pahakoala-Na hi Yehu, witina agearaya nama reihi ɓakul ta joangaɗa. 25Winaja hi Moiri, “Ɗa raja dama peanya hi Alla ɗapareaha tou waingu wajal, ʄaka ɗa tou ɗama hamanuya na kuaha ɗapamawillaha ɗa touɗa, manga hiɗa peaka wikiɗa ‘Mahamawung touha’. 26Jiaɗinguka nyiami abi tounouɗim. Tonoumih, natou nama ɓakul ta joangami na ʄaʄiha mearangu tou mareihi merrah, ʄaka ɗa kapalang ta joangami ɗa ʄaʄiha mearangu tou matagu payeamang oali. 27Gearaya nama reihi ɓakul: natou nama ngoɗu ana angu, a da natou nama payeamang pa angu? Natou nama ngoɗu ana angu, ʄiahinguyaka. Jiaɗinguka ei-Ga ta joangami toungu tou mapayeamang.

28Ta dalu ngaladukan namawilla-Gu, nyiamiɗika nama marai pangala-Ga. 29Nou ʄiayak Nyouwa enga kuwoagim kuaha kaem pareaha, toungu na Ama-Gu nama langa woa-Ga kuaha ak pareaha. 30Tonounaka nyiami enga pa-akagimi ʄaka mi egi ati ami angu-inu ɗenga-Ga ta dalu pareaha-Gu ʄaʄi Raja. Baaru nyiami ʄella mi ngoɗu ta padoungu ngoɗu raja, kaem pareahaha ɗama habulu ɗubbaɗa ɗa kaɓihu Ihrael.”

Hi Yehu napeaka memayaka baaru hi Petruh nakaheɗi-Ya

(Mat. 26:31-35; Mrk. 14:27-31; Yoh. 13:36-38)

31Namengaka nou, hi Yehu wina lahi Himon Petruh, “Himon, Himon, muranguǃ Hi paɗibang woanyaka kaloaga ana paheawagimi waling lahi Nyouwa; mearan na pari napahika waling ta kapeana, hina hikaya nama kalung waling dama kalung. 32Jiaɗinguka Nyouwa kuhabayaguka ou, Himon, ka abi naloaʄa na manningumu. Jaka amu ɓalikaka lahi Nyouwa, ou nama pakullihuha ɗa ana papaleawa-Gu hawanguk.”

33Nagapiya hi Petruh, “Moiri, nyouwa kuhadia tama ta gallu ʄaka maeti oali ɗengagu Ou!”

34Hi Yehu wina, “Manningu Petruh, adaɗi ɗa takuku ɗa manu laɗɗu ya, ou mupadillu wudanguka amu kaheɗi damu peama-Ga Nyouwa.”

Beaka riti, kareara patauwaingu ʄaka pahoari

35Mengaka nou, hi Yehu napanewi lahi ɗuɗa, “Ta kawunga paleawagugim Aku heirugimi idi beaka, kareara patauwaingu a da tarawihi, ei ʄellakanguha pajakami?”

“Daꞌahǃ” Wiɗa aɗa pagaping.

36Wina hi Yehu, “Jiaɗinguka ya, gearaya nama eingu beaka ritin a da kareara patauwaingun, na idihah; ʄaka gearaya dama eingu pahoarin nadaganyah na koapi ɓakulun kana hii wainya pahoari. 37Kaɗang hiwigugimi, einya nama hangi matan ta Hurat Ɓakul nama wina, ‘Ɗuɗa ɗayapuya Ɗunna mearang tou irrak,’#Yesaya 53:12 napatiki ya langa patomananyaka na nabi. Kaɗang gananya nama matuling ta Hurat Ɓakul witi-Gu na ʄaʄiha.”

38Ɗa ana pahakoala-Na hi Yehu wiɗa, “Moiri, eija ɗua banguɗa ɗapahoari.”

Napagapija hi Yehu, “Rekanaka, abi hilu panewiɗinya.”

Hi Yehu nahabayangu ta paledi Haitun

(Mat. 26:36-46; Mrk. 14:32-42)

39Manga hi Yehu naɗujakunya na koata, ʄaka toungu napalanga dammana nahalaku ta paledi Haitun. Ɗa ana pahakoala-Na ɗahalaku ʄella aɗa marai-Nya. 40Aɗa tomaka ta padongu nou, napanewi lahi ɗuɗa, “Mi habayang, abi mi kanaꞌu ta doku-jala ana kaka kamika.”

41Manga hina halaku marou hakuɗuk waling lahi ɗuɗa, akatutukayaka tillum bulu dapan marouna. Manga hina karaɗa ana habayang, wina, 42“Ama, anamoaɗapaking pamarouganya walingu lahi Nyouwa namawilla nahapaɗa-Gu. Jiaɗinguka abi kerimaganya nahawukugu, kaʄiapayah nahawukum namaʄaʄi Ama.” 43Hatou na malaikat aminya lahi Yehu ʄaka napakullihu-Ya. 44Hi Yehu taba hadukananyaka na ati-Na, ʄiayaka hina taba kahuɗa ana habayang. Na kaparituna mearangu raaya ana kapetik ta tana.

45Ana mengaka pahabayang, hi Yehu ɓalinanyaka ta ana pahakoala-Na. Natomaja ɗuɗa tanga juɗaɗ kaɗang ali joiliɗa ʄaka aɗa haduka. 46Winaja hi Yehu, “Gahi juɗakaminya? Kiɗiya kaem habayang, ka abi mi kanaꞌu ta doku-jala ana kaka kamika.”

Hi Yehu a apaya

(Mat. 26:47-56; Mrk. 14:43-50; Yoh. 18:3-11)

47Atanga panewina hi Yehu, amijaka ɗa tou ɗangu, ɗuɗa naɓeija hi Yudah. Hi Yudah nou hatou waling ta ana pahakoalananya hi Yehu, hina halaku lahi Yehu ana ngiɗihu-Ya. 48Jiaɗinguk hi Yehu winanya, “Yudah, ou muharakanya na Ana Tourara waingu pangiɗih?”

49Ɗa ana pahakoalan hawanguk hi Yehu ɗama eija hou ɗa itaya gananya nama enga ʄaʄina, ɗuɗa wiɗa, “Moiri, nyiama kama geꞌaja waing pahoariǃ” 50Manga hatou nama waling lahi ɗuɗa hina katupunanya na kahilu lawanana na atana imam ɓakul.

51Jiaɗinguka hi Yehu napanewi, “Matanyayǃ” Manga hina ɗeɗananya nawua kahiluna natou nou ʄaka napapijaluya.

52Manga hi Yehu napanewija ɗa kapalang imam, ɗa ɓei tou Yahudi, ʄaka ɗa kapalang ɗama ʄawaya na ɓei Umma Pingi Pahabayangu tou Yahudi, ɗama amija ka apaya hi Yehu awiɗa, winaja, “Tou irrakuya wimi-Ga, lapak na amigimi himi waingu pahoari ʄaka palu todu ka apa wainya awimi-Ga? 53Wehang-wehang eikaɗi-Ga ta paɗuami ak peaka-panungagimi ta ɓei Umma Pingi Pahabayangu tou Yahudi, nyiami dami apama-Wa. Jiaɗinguka ya rahinanyaka nakaloagami, ʄaka na rahin hi paɗibang ana pahalakuya nahawukuna.”

Hi Petruh nakaheɗiya hi Yehu

(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)

54Ɗuɗa ɗa apaya hi Yehu ʄaka ɗa idiya ta ummana imam ɓakul. Hi Petruh nakeri wali marounya. 55Ta paɗua taloara ɗa tou ɗapa erikuka api ʄaka hi Petruh hina halaku ana ngoɗu ɗengaja aɗa korunya na api nou. 56Einya hatou na ata mawinni nama itaya hi Petruh ana ngoɗu ta lihi api nou. Manga napatetinya hi Petruh, hiwinanya, “Natou nei marai ʄellananya hi Yehu.”

57Jiaɗinguka hi Petruh wina, “Daꞌahǃ Daku peamanya Ɗunna!”

58Daɗi namadeimah, einya natou heaka na itaya hi Petruh manga hi wina, “Ou ʄella hatou waling lahi ɗuɗa!”

Jiaɗinguka hi Petruh napagapinya, “Daꞌah, da oali magu-Nya!”

59Akatutukayaka hangi jam nama pahigilung, aminya hatou nama panewi hawading, “Tututekang natou nei marai ʄuaɗa hi Yehu, kaɗang ɗunna tou Galilea ʄellaya.”

60Jiaɗinguk hi Petruh napagapinya, “Daꞌah, nyouwa daku peꞌamanya agananya napatikimuga.”

Ta rahi nouʄella, atanga panewina hi Petruh, takukunanyaka na manu. 61Hi Moiri Yehu nagilak ana ealuya hi Petruh. Manga hi Petruh namunanyak hi Moiri alanga winanya, “Adaɗi natakuku na manu ta laɗɗu ya, langa padillu wudangmuka ou awimu damu pea-Ga Nyouwa.” 62Louhungnanyaka hi Petruh waling noulau ʄaka hina hou madadaɗih.

Hi Yehu ɗagiɗakwainya ʄaka ɗapaluya

(Mat. 26:67-68; Mrk. 14:65)

63Ɗa tou ɗama tanga ʄawaya hi Yehu, ɗagiɗakwainya ʄaka ɗapaluya. 64Ɗa toaɗiɗanya na mata-Na ʄaka hiɗa patutur lahi Yehu, “Kam tikiyah, gearaya nama palu-Wu?” 65Ɗa ɗaʄellanguh ɗahilu ɗama irrak ɗapatikiɗanya hi Yehu aɗa pamakii-Ya.

Hi Yehu ta haga ɗa kapalang ɓei tou Yahudi ɗama ɓotah palakara

(Mat. 26:59-66; Mrk. 14:55-64; Yoh. 18:19-24)

66Wehang babaaruka, ɗa kapalang ɓei tou Yahudi, ʄiahakaː ɗa kapalang imam, ɗa gurr agama tou Yahudi ʄaka ɗa ɓei tou Yahudi ɗapakehang kama ɓotahuya na palakara awiɗa. Manga ɗa hordadu Roma ɗa iɗiya hi Yehu ta hagaɗa ɗa kapalang ɗama ɓotah palakara hou.#22.66 Na Hurat Ɓakul ta hilu ʄawa nawaingu hilu Mahkamah Agama. Nei ʄiaya nakaɓuangu nama ɓotahu palakara reihi ʄaga ta tou Yahudi, ɗama tou pitumbulu touha ɗa tou pangarang ʄaka nakapalaɗa Imam Ɓakul. 67Wiɗanya, “Peakagamanya lahi nyiama, ʄiawuka ou nei Raja nama Pamanumara?’’

Nagapiya hi Yehu, “Awigukagimika, Nyouwa ʄiaɗiwaka Raja nama Pamanumara, nyiami dami waima-Ga. 68Jaka ak tutur haɓali kagimika witin na Raja nama Pamanumara, dami enga pagapimanya. 69Jiaɗinguka waling ya, na Ana Tourara enga ngoɗuna ta karaha lawana-Na hi Alla Nama Reihi Kuaha.”

70Wiɗa bollu, “Atounoukanaka, Ou nei ana Alla-Wu?”

Nagapiya hi Yehu, “Nyiami wiki nama tikiya, ya Nyouwa Ana Alla-Wa.”

71Manga hiwiɗa, “Iata da hilu waimanguha saksi, kaɗang iata langa rangudanyaka waling ta aꞌa wiki-Na.”

Currently Selected:

Lukah 22: wnk

Highlight

Copy