Lukah 16

Lii-pangearang nama tagu kerang riti dama luruh ʄiaɗinguka napeang

1Hi Yehu loluknanyaka na lii-pangearang hawanguk ta ana pahakoalan-Na, wina, “Einya natou poati, nama eingu matagu keranaja ɗahapoatina. Natou poati nou narangu hilu, nama tagu keranaja ɗahapoatin napaduka walawainaja. 2Jiayaka hina kamaikanya nama tagu keranaja ɗahapoatin, hiwinanya, ‘Einya nei naparangugu larana ou. Nou atouna, mutuli bollugaja nahakeramu ta ɗalu keramugaja ɗahapoatigu. Mumatanguya abu hilu keraɗigaja ɗahapoatigu.’ 3Jiayaka nama tagu keranaja ɗahapoatin hina pangaɗang, ‘Nyouwa ganakanyaka nahawolugu nou atounaka? Na moirigu temanguya pakerangu winaga. Kukataaka tana, daku kullih mangu. Kukarei, kumakii. 4Nyouwa kupeanyak gananya nahawolugu a palouhukagaka ak tagu keranaja ɗahapoatin. Nounam, kumanyera paɗangu oaligu kapiaku kaaɗaga baaru ak engang ta ummaɗa!’ 5Manga natou nou, nakamaika bolluja ngaladukaɗa ɗa tou ɗama pa utang ta morina. Ta makawunga, winanya, ‘Pirraɗa ɗa utangumu ta moirigu?’ 6Nagapiya, ‘Hangahu pajalu weiminya zaitun.’#16.6 Na weiminya zaitun mawaling ta wua zaitun, ɗama ɗangu aɗa tubu ta loada Timur Tengah. Weiminya zaitun pa tauya ta pa angu ʄaka pa wolu waingu moruya. Nama tagu kerang hapoati nou napanewi lahi ɗunna, ‘Nei nahurat utangum. Ngoɗu ʄaka mugeaha tulih: limam bulu pajalu.’ 7Mengaka nou, napanewi ta tou napatou maɗuawaih, ‘Ou anguwua, pirraɗ ɗa utangumu?’ Napagaping natou nou, ‘Haribu kaneawu gandum.’ Nama tagu kerang hapoati napanewi lahi ɗunna, ‘Nei nahurat utangumu. Tulih: walu ngahu kaneawu.’

8Na moirina ana peanyaka na tanoguna nama tagu kerang hapoati dama luruh, hiwinanya, ‘Na pea ʄellang’. Manga hi Yehu napalaranya ta ana pahakoala-Na, “Natou na morikuna nama ʄiapayah napangaɗananya na pinu-tana, reihi peananya ana manyeranya larangina na pata pinu-tana, waling ta tou nama morik ta mawahang.”

9Hi Yehu napanewi ʄellapah, wina, “Mirangu! Waija ɗahapoati pinu-tana ya, kaem kolling oalim, ɗahapoati pinu-tana ya a daɗa hilu pahiikanguka, nyiami enga kaami ta padoungu nama malodung. 10Natou nama piaku amanninya ta palakara merrah, napiaku ʄella amanninya ta palakara ɓakul. Jiaɗinguka natou dama piaku amanninya ta palakara merrah, dana piaku ʄellamangu amanninya ta palakara ɓakul. 11Jiayaka, talara poati pinu-tana ak nyiami ada manni kagimika, gikineikanak hi Moiri ana mannigimi ami uruhuha ɗahapoati dama duka waling ta hurga? 12Ɗa ngawu tou hawanguk ak nyiami da piakumang amannigimi, gikineikanak nyiami apamannigimija napa langa tagumi.

13Da eimang hatou tekka ata nama kerang ta touma ɗuah moirin ta rahi nama hameara; kaɗang ɗunna enga reihi namunanya nama hatouna waling ta hawanguk, a da na reihi manudu ta hatou waling ta hawanguk. Touʄellan nyiami. Nyiami ami morik ʄiapay nakehamija ɗahapoati ta pinu-tana ya, enga dami piakumang pakera tetekkang taguna hi Moiri.”

Gearaya nama paɗening ta hagana hi Alla

(Mat. 11:12-13, 5:31-32; Mrk.10:11-12)

14Ɗa tou waling ta kaɓuangu Parihi ɗarangu bolluya napatikina hi Yehu. Manga hiɗa maliku-Nya, kaɗang ɗabuhang riti. 15Jiaɗinguka hi Yehu winaja, “Nyiami tou nama papaɗening wikin ta haga tou hawanguk, ʄiadinguka hi Alla napeagunya na ihi atim. Gananya napapaʄagan na tourara, napapadakuya hi Alla.

16Na lii-pareaha-Na hi Alla napatulina hi Muha ʄaka huratuɗa ɗa nabi ɗama eija ta Hurat Ɓakul, wai pangalaja lapakung ta rahina hi Yohanih Pembaptih. Walinounak na Lii Kalung witina hi Alla ana papareahakak ʄaʄi Raja apatoma pangalanya. Jaka ɗa tou ɗangu ɗaparuhung wikiɗ kama keriya na Lii Kalung kapiku pareahana hi Alla ta ɗalu morikuma, awiɗa. 17Jiaɗinguka reihi halealaya na awang ʄaka na tana aɗa maroba, walingu nama hangina napatulih na lii-pareaha-Na hi Alla ana maroba.

18Geara nama paheawa ɗenganya na arweina manga hina ɗeki mawinni heaka, natou nou majurakuya. Jaka natou nama kahangi ɗengang mawinni napapaheawa ɗengang, majurak ʄellaya.”

Lii-pangearang natou poati ʄaka hi Laharuh

19Hi Yehu nawaingu lii-pangerang hawanguk, wina, “Einya hatou nama poati, ɗa koapina mabuatu hiiha, ʄaka na morikuna wehangu-wehang naɗeɗi. 20Ta haga umma tou poati nou, einya natou milla nama ngarang Laharuh napabinung katobu. Wehangu-wehang ɗa oalin ɗa lipa tauya ta padoungu nou. 21Na kabu atingu pa angu kamumu mamanaꞌu waling ta meja tou poati nou. Jaka amiʄellaja ɗa ahu aɗa ʄallinaja na katobuna.

22Manga natou milla nou matinanyaka ʄaka ɗa malaikat hiɗa idiya ta padoungu nama ɓanning ta karahana hi Abraham ta hurga. Natou poati nou maeti ʄellananyaka ʄaka hitanunya. 23Ta api dabaɗa natou poati namawilla oata. Jaka ta rahi nouʄella napateti maroung, na itaya hi Abraham ta padoungu maɓaning ʄaka hi Laharuh einya ta karahan. 24Natou poati nakawulang, “Ama Abraham! Millakiga ati. Paleawakiya hi Laharuh kana pilukiya na karaga limmana ta wei, manga ka amikinya ana pabahaganya na lemmagu. Nyouwa ku itanguka mawillagu ta api!’

25Jiaɗinguka hi Abraham nagapiya, ‘Munamuya anagu: ta morikumu ou mukoli bollunyaka nama kalung, ʄiaɗiyaka hi Laharuh nakollinya dama ɗinyak. Ya egi atinanyaka, ʄaka ou mumawilla. 26Higilnaka, waling lahi ou ʄaka nyiama einya nakealang nahawolu nama ɓakul, abi napiaku natou waling ya a atunya nei habali, ʄaka natou nei habali abi napiaku a aminya ya!’ 27Wina natou poati nou, ‘Ama, nyouwa ku pa ohagu paleawaganya hi Laharuh ta umma amagu. 28Eijah ɗama touma limmaha ɗa angwuagu. Paleawaya hi Laharuh kana panamuja, abi ɗatoma pamanaꞌu ta padoungu mawilla ya.

29Hi Abraham napagaping, ‘Ɗuɗa einguka lii-pareahana hi Alla napatulihun hi Muha ʄaka huratuɗa ɗa nabi! Matakaja kaɗa keripah ɗapatulih ta hurat hou!’ 30Jiaɗinguka natou poati nou napagaping, ‘Darekaman, ama Abraham. A eikanguka tou mamaet nama morik ɓali ʄaka aminya lahi ɗuɗa, enga ʄiaya hiɗa haria waling ta doku-jalaɗa.’ 31Winaka hi Abraham, ‘A daɗa ihilikanyaka na lii-pareaha napatulihun hi Muha ʄaka huratuɗa ɗa nabi, daɗa wai ʄellamanya, langka ei ʄellang tou maet nama morik ɓali.’ ”

Currently Selected:

Lukah 16: wnk

Highlight

Copy