Matthieu 17

Otô aJésus ômakoga pesu andéô

(Bono na Marc 9:2–13, Luc 9:28–36)

1Vamoota pitsi môtôba, Jésus amakea na Pierre na Jacques na Jean muaneya aJacques, na gô ngongo amôkôdi ôdooda, anguene anayi. 2Otô aJésus ômakoga va miso maô. Gédimô sedi gémaba na ngeengeyi ga kômbé géôngôé ébono sangô. Maduani medi mamakoga moobébayi ga géeno. 3Vane aneengie atatô ahmeena oma abaé, Moïse na Elie ahmatsutsuga na ahmavovo na Jésus. 4Na Pierre dôta amavovo na Jésus mbe: Kumu, te buedi gadenganiô wa n’anyô éva. Tôsaéni yeba ditatô yagébandé. Ovo woo. Ovo aMoïse. Ovo aElie. 5Agébaka gôévovo, ôbôngé obébayi ômapika ahngô muetso. Gô gatse obôngé gômookanô ôgi ômavovo mbe: Odôô te muanami amôtôma amiso. Namônyôngéô na nzoo na gô môtéma. Oôkéôni angô. 6Vamookô aneengie ôgi ôvovo, amatsôpu na gomo na amagudama na gô tsina. 7Jésus amawesea na vandé ahngô na amabanda ahngô. Angô mbe: Timôgani. Nôneena gomo. 8Ahmabôkaméa ivô asiene muene môma. Ameena te amuene Jésus môtévo.

9Vamasutuméa ahngô gô môkôdie ône, Jésus amavovo n’aneengie mbe: Nômbiabeenda môma ta na môvo éne éeni anye. Nôngabeenda te vangakunduga me, Muana Amôma g’ôwa. 10Vane aneengie ahmeevôa Jésus mbe: ?Nayee anigôi amige miaNzambé ahvovo mbe mabégô mema n’egébuéaka, te Elie apanga étsigani? 11Jésus amaabéa angô mbe: Endé te gavovo anigôi amige mbe Elie te angapanga étsigani gôénikéa ékônza mabégo metso. 12Buéyé mbe nane, nanôbeenda mbe Elie amani étsiga ivô oma asimenya mbe, Oô te Elie, na amamôénda gamanyôngéô ahngô. Te mônongovo, me Muana Amôma nangatubédu n’oma maguga mavôni.

13Vane aneengie amookô mbe Jésus avovo gôébégô éaJean‐Baptiste.

Jésus amadôngéda muana amabaka na gédidi gébévani

(Bono na Marc 9:14–29, Luc 9:37–43)

14Jésus n’aneengie amatsiga vandé géômbége. Mômôgôô môvo amaviga gôésiba mabongo medi va mbene aJésus. 15Amamôgondo mbe: Ah Kumu. Eena muanami ngebe, andé n’ebeea éatsiiga. Kuka yetso vatsôpu angô na éangô, buéyé mbe andé va soto, abékaméa na gô soto, buéyé mbe andé va mbéyi, akuyaméa. 16Me namatsua angô na gôndé aneengie woo, ivô asibé na ngudi gôémôdôngéda. 17Jésus amavovo n’angô mbe: Ti anye asi pitsi yedi nôndé ti asi paga n’abévi. ?Nangoomba édigaa n’anye pitsi dikee? ?Nangoomba ésipéda anye éma ékee? Vigani na muanee. 18Jésus amakangéa gédidi gébévani gémabaka gôndé muanee, na sangô gémakusa. Tsina na tsina muanee amadônga.

19Aneengie amawesea na vandé Jésus andé v’amuene gôémôévôa mbe: ?Ebégô ndé ésiôngôé we ékuséda gédidige géne? 20Jésus amaabéa angô mbe: Paga yanyô dipoo. Nanônigôa ébégô édué éapie. Okô nôétsi mitémamie, pengo vi pesu, évundee ga môbie apivi, nôngayanza mabégô mavôni. Nôngatôma môkôdi mbe: Nôtôga éva, kea na vane. Na môkôdie ônganôtôga. Nôsangadagéô ébégô. [ 21Jésus mbe: Mônongo agédidi ône ôkusédu te gô ngudi yadisambô na gô gékinéô samôyakô gôévovo na Nzambé.]

Jésus amoomba ébeenda ôwedi na gékundugéô sedi

(Bono na Marc 9:30–32, Luc 9:43–45)

22Nyovo aneengi aJésus amabaka muetso vavo gô Galilée. Jésus ameevéda ahngô mbe: Me Muana Amôma nangakabô na gô mogo moma 23angayôha me. Nangawa, gô mbene apitsi dibaé, éne éamôtatô nangakunduga. Aneengie amaba na mitéma miditani vamookô angô Jésus avovo nane.

Depu eba aNzambé évanôkôni

24Jésus n’aneengi edi amabuéa gô Capernaüm. Môbongi adepu évanôkô gô eba aNzambé amawesea na vandé Pierre gôémôévôa mbe: ?Tambô môékédine wanyô asavanaka depune eba aNzambé‐a? 25Pierre amaabéa mbe: ?Gondé? Avanaka. Vameengéa Pierre na gô eba n’angô madeo asivovo, Jésus amapanga évovo mbe: ?Ewe Simon ôtasa nayee? Ane avana depu na gôndé atômi atsenge ?yandaa? ?Te kumu yatsenge anguene avanani‐a? ?Vo te agendee avanani? 26Pierre amaabéa mbe: Ane avanani te agendee. Jésus amanigôa mbe: Ii, ékegea te nane. Anguene kumu yatsenge asavanaka. 27Buéyé mbe nane, wa n’anyô tôsanyôngéô ébévéda adua. T’ebandô éwe Pierre kiaka na gô mubu, kuya éobo. Yuua nyamane éamapanga. Kukua yangô mônyee. Ongadenga dodeye diwanya n’otangôe adepune éasô n’oo. Okea na yangô ôkedivana depune.

Currently Selected:

Matthieu 17: TSV

Highlight

Copy