Matthieu 13

Tsava éamômuaki amibie

(Bono na Marc 4:1–9, Luc 8:4–8)

1Nyoone Jésus amakusa gô eba, amakea gôédigaa gô kôbangô amubu gôéékéda. 2Vamayeka oma ga mabunza gô kôbangô aJésus, amapeka gô mbôngô na amadigaa. Géômbége setso gémabaa va tsényé. 3Ameekéda ahngô pingô yamabégô gô tsava. Jésus amavovo mbe:

Mômuaki amakea gôémuaka mibie. 4Vamamuakangô mibiemie, mivo mimaaga gô nzéa na nyoeye dimaviga gôéminzomeda. 5Mivo mimaaga gô tungu éamataé. Gôsidenge mibiemie toto éyekani mimayavôga ékanda. 6Ivô vamatsiga ômandee, mibeendimie mimasinégéa. Gôsitibéké totone, ngangiye gébé na meba, mibeendimie mimawa. 7Mivo mibie mimaaga gô tungu yakavanga. Kavangaye dimoongôga na dimapika mibeendimie na miangô misibôté. 8Mivo mibie mimaago gô toto éamôsôba. Gévo géétété gémabôta kama na kama. Gévo te nzima môtôba. Gévo te nzima ditatô. 9Vamamana Jésus égunya tsava nedué, angô mbe: One andé na matô, ka te ookôkô‐ma.

?Gôébégô ndé Jésus amagunya tsava?

(Bono na Marc 4:10–12, Luc 8:9–10)

10Annengie aJésus amawesea na vandé angô gôémôévôa mbe: ?Nayee ôékéda omeaa na tsava ditévô? 11Jésus amaabéa angô mbe: Mabégo masanigôgéô muetso mokumu aNzambé mameetsô te anye. Ivô adua asiitsô mangô. 12Menyani mbe ône andé na sôma angoomba ékôndégu, na asangabutadô sôma. Géé ône asaba na sôma angawatô buéyé na vipesuvie vindéké n’edi. 13T’ebandô me nagunya tsavaye. Oma abono géene. Ahbeendu ivô ahsookô na ahsanigôgéô. 14Vane éne émasupua Esaïe, môpandôédi amatasa maNzambé éenanô te gôndé ahngô. Esaïe amavovo mbe:

Nzambé amavovo mbe: Anye nôénda mbe: tôôkiô, ivô nôsanigôgéô.

Anye noénda mbe: Tôeni, ivô nôsamanéa.

15Gôébégô mitéma miomee adua mindé na diyunga na misabangôa.

Ahngô akukéga matôme mao,

Na eema misome maô.

Kabaga misome meena.

Na kabaga matôme mookô.

Na kabaga mitéma miaô misinga,

na kabaga ahngô akoa matasame maô gôéviga na gôndé me gôédôngédu.

16Ti gô gényônga géndé n’anye gôébégô miso manyô mandé na yeeni na matô manyô mandé na yôkia. 17Me nanôbeenda na gô pie mbe ayekani apandôédi ambeego amatasa maNzambé, n’avo oma amatsimamani aNzambé, amanyôngéô éena éne éenanye deo noo. Ivô ahngô asiene. Amanyôngéô éôkô mane mookô anye deo noo, ivô ahngô asiôkô.

Jésus amatimbôanéda tsava éamibie

(Bono na Marc 4:13–20, Luc 8:11–15)

18Oôkôni gatimbôanéda me tsavane éamibie. 19Ane ookô veekédu mabégô mokumu aNzambé, na ahngô asanigôgéô mangô agono na totone éagô kôbangô anzéa émaaga mibie. Satan aviga gôéwata gô mitéma miaô mane mookiô ahngô. 20Avo agono na totone éamataé émaaga mibiemie. Oôkô Mabégô MaNzambé na asinga mangô na gényônga gévôni. 21Ivô ahgono na géétété gésaba na ngangi. Ahngô asaba na môvinéné. Vaviga maguga na vabuéa gékuanô gô Mabégô MaNzambé, ahngô ahsasipa. 22Avo te ane ahgono na tungune éndé kavanga. Ahngô ane te ane ookô Mabégô MaNzambé. Ivô matasa maô metso te mikebanganô miava tsina. N’ahngô ahbômédu n’onzôô okiti. Te mabégô mema mayôha Mabégô MaNzambé na makoa mangô maka na sawa na meendô mbe mabégô mabobo. 23Avo ahgono na totone éamôsôba. Te ahngô amookô Mabégô NaNzambé na anigôgéô mangô, makuséda ésima éamisôba. Môvo môma te môkama, môvo nzima môtôba, na môvo te nzima ditatô.

Tsava éetutu ébévani

24Jésus amagunya ahngô épo tsava mbe: Nagoneda ôkumu aNzambé na môma amamuaka mibie miamisôba gô tsagedi. 25Môvingine amômôgôô nône amaviga na pitsi, muetso andé gô vio. Na amamuaka mibie miedi mibévani tungu épo na mine miamisôba. Amabusuga. 26Vamakanda mibiemie, mine miamisôba mimabandôa épandôga na mine mibévani dôta mimeenanô. 27Ayanzie atsagane amakea na gôndé kumu atsaga gôémôévôa mbe: ?Kumu atsaga, éwe ôsigaabé mibiemie miamisôba‐a? ?Etutu ébévani éviga gôni? 28Kumu atsagane amaabéa ahngô mbe: Te môvingine wami ameenda nane. Ayanzie amamôévôa mbe: ?Onyôngéô mbe tôyuua étutue ébévani‐a? 29Mômôgôô nône amadékéda ahngô mbe: Aé, nômbiayuua. Na amavovo na ayanzie mbe: Okô anye nôyuui étutu ébévani mbe nôngayuua te na éne éamisôba. 30Tsikani éangô ékanda vavo ngu na ndéône éngoodo mbôtône. Nyoone nangatôma ayanzie mbe: Pangani ésevoa mabunzame mabévani. Katani mangô ékata na gunyani éangô gô soto. Vane nôengéda éne éamisôba gô ebee ôvumbuku éangô.

Tsava éagéétété gévôni

(Bono na Marc 4:30–32, Luc 13:18–19)

31Jésus amoomba égunya épo tsava mbe: Okumu aNzambé ôgono na môbie ôéndô mbe moutarde ômamuaka môma gô tsagedi. 32Môbie ône ôôtéa ôgeôge na mibiemie mietso, ivô vakandangô ôôtéa évunda n’evo éétété. Na nyoeye diviga disaa mebu maô gô mitabé miedi.

Tsava éamibie miaahndéda mipemba

(Bono na Luc 13:20–21)

33Jésus amoomba égunya épo tsava. Angô mbe: Okumu aNzambé ôgono na mibie miaahndéda mipemba miéndô mbe levure. Môgeto agésa mibiemie mine gô gébémbége setso safarine gôékônza mbômbé éamipemba. Mbômbéne nyetso éaahnda te na mibiemie mine.

Jésus ameekéda oma gô tsava

(Bono na Marc 4:33–34)

34Jésus ameekéda oma gô tsava. Gébé na tsava asiikédé. 35Vameenda Jésus nane, éne émavovo môpandôédi amatasa maNzambé émeenanô. Môpandôédi amavovo mbe:

Nangabandôa éékéda ahngô te na tsava.

Nangapandôéda oma mabégô masinigôgéô angô bandôa v’ebandô vamakanô tsina n’oba.

Jésus amatimbôanéda tsava éetutu ébévani

36Jésus amapanganéda géômbége na ameengéa na gô eba. Aneengi edi amaviga na gôndé angô na ahmavovo mbe: Timbôanédéa we tsavane égunyi éwe éetutue ébévani ékandi gô tsaga. 37Jésus amaabéa ahngô mbe: One agaaba mibie miamisôba te me, Muana Amôma. 38Tsagane te tsina nedué. Mibiemie miamisôba te ane agobeda Nzambé. Te asi ôkumu edi. Etutu émakandani ébévani te ane agobeda yabédé. 39Môvingine agaaba mibiemie mibévani te yabédé. Mbôtône émoodoni éngasevou te v’ekôdéô atsengene. Asevôi ambôtône, te asi g’ôba avigédu na Nzambé na gô tsina. 40Mônongovo gamasevou mabunza mabévani gôémagunya gô soto, te mônongovo gangaba v’ekôdéô éatsengene. 41Me, Muana Amôma nangavigéda ayanzi ami, asi g’ôba gôésevoa ane akubéda akaô gôéénda mane mabévani, na abévie muetso, amôtôa ahngô va gatse ane andé g’ôkumue wami. 42Ane abévani angasevouni angagunyu na gô gétungu sasoto. Gône angadéa miéngé na gô pievia yaô angagéa ngeko. 43Ivô agobedi aNzambé, angaba n’obébayi ga kômbéne g’ôkumu aTétaô. One andé na matô, ka te ookôkô‐ma.

Tsava éokiti ôvôni ômasuéguni

44Jésus amavovo mbe: Okumu aNzambé ôgono na ôkiti ôvôni ômasuégu gô tsaga. Mômôgôô amatsutsua ôkitie ône na amoomba éôsuéga. Gô gényônga sedi amakea akesômbéda éetso éndé n’edi gôédiia dode gôésômba tsaga nene.

Tsava éamôsanga osunu ôvôni

45Okumu aNzambé ôgono dôta na môyôkô abuta ésômba misanga miosunuôvôni. 46Vangeenangô môsangee osunu ôvôno angasômbéda éetso éndé n’edi gôédiia dode gôésômba môsangee ône.

Tsava éambusa émagunya oma

47Jésus amavovo mbe: Okumu aNzambé ôgono na mbusa égunya oma gô mubu. Gô yangô gôpikô nyama yaminongo mietso. 48Vamayôa mbusane, agunyie amamiduta na gô tsényé. Na ahmadigaa gô tsényé ahmakuya gô ésambi dine yamisôba. Dine disaakôni ahmadigunya. 49Engaba te mônongovo v’ekôdéô éatsenge. Asi g’ôba ahngavigédu na Nzambé gôétatôa ane abévani n’ane ahndé n’etsimama. 50Ane abévani ahnagunyu gô gétungu sasoto gévôni. Wangô oma ahngadéa. Na gô pievia yaô ahngagéa ngeko.

Okiti ambeego n’okiti amanza

51Jésus ameevôa aneengie edi mbe: ?Anye nôôkiô muetso mavovi me‐a? Ahngô amamôaabéa mbe: Ii, tôôkiô. 52Vane Jésus amavovo mbe: Anigôi amige miaNzambé akoga gôékea n’ami gô nzéa éokumu aNzambé, agono na mômane akuséda gô gégaa sedi ôkiti amanza na ôkitie ambeego.

Asi Nazareth amatsuma Jésus paga

(Bono na Marc 6:1–6, Luc 4:16–30)

53Vamana Jésus égunya tsavaye amanôtôga gône. 54Amakea na gô môsenge ômoongôgangô. Ameekéda gô eba agéwanyéô ômaba wangô. Ane amadenganôni amookô angô eekéda, amatsapéô. Ahmavovo mbe: ?O mônongo éodo éviga gôni? ?Ngudiye ditsigéda mabégôme manyônganéôni masoongôa môma énigôa, diviga gôni? 55?Odôô kaka muana amôyanzine atimbema? ?Yeedi, kaka Marie‐a? ?Ka te mônône aJacques, na Joseph, na Simon na Jude? 56?Kadi yedi, kaka ane andé na wa n’anyô mbôkepo‐a? ?Ngudi diyanzangô, diviga gôni? 57Matasa maô mamawéa Jésus ngusu, na oma ahmamôtsuma paga. T’ebandô Jésus amavovo n’ahngô mbe: Môpandôédi amatasa maNzambe agobedu tsengene nyetso, géé gô mbôkedi asagobedu. Béyé n’asi mbumu edi asagobeda angô. 58Gône Jésus amadôngéda avo abeeyi. Asiôngôé étubéda ngudi yedi gôéyanza mayanza mavôni mamisôba, gôébégo asi mbôkedi ahmatsuma ngudi yedi paga.

Currently Selected:

Matthieu 13: TSV

Highlight

Copy