Luka 22
22
Yuda ɔkwaisio agaba Yeso
(Mat 26:2-5; Mlk 14:1-2,10-11)
1Ʉmbɔ wɔ chwɛa aɓubaya ʉwa, ɓa꞉tɨdya-ɔɔ mɨkatɨ ngɨyɛ yangɔmʉ nɔ ɓʉtɨ ɓɔta ɓufuise, wa꞉ɓio tɨa tinene. 2Ɓangama ɓɔ ɓakumukumu ɨhɔ nɔ ɓapananakɨa ɓɔ mapanʉ, ɓɔ꞉pʉnga ahata ɓɔ ɓa꞉wa Yeso nɔ ɨngbaa nga ya ino tanɨ. Yakamɛngana, ɓa꞉ɓio akumo mesu kɔ ɓombi.
3Ambenigɔ ɓɔ pe, Sɨtanɨ ɔ꞉kumonio amati ɔ Yuda ngɨa ɓa꞉ɓimisoko kʉ ɓɔ Ɨsɨkalɨɔta tɨa kumonioni. Ɨyɔ, a꞉ɓio kʉ mʉngana wɔ ɓatitima tɛkɛɓɛ nɔ ɓapɨnɨ. 4Yuda ɔ꞉sa ayakanaka nɔ ɓangama ɓɔ ɓakumukumu, nɔ, ɓangama ɓɔ ɓombi ngʉɓa ɓa꞉tɨpɛmakɨa ɨkáá yɔ Asɔɓɨɨ. A꞉ɓio akɔhata ɓɔ a꞊ɓʉgabɨa Yeso tanɨ. 5Kʉdɔ, ɓɔ꞉kwa ɨgyagya, nɔ, ɓɔ꞉kɔnɔ naɓɔ ɓɔ ɓaminjo ɓagyɛgyɛ. 6Ɨyɔ Yuda, ɔ꞉baya tɨa kʉ báya, nɔ, ɔ꞉pʉnga ahata ɨngbaa ngɨyɛ a꞊ɓʉgabɨa nayɔ Yeso, sɔkɔmʉ aka ambaja ɔ ɓombi ɛmbɨa-ɔɔ.
Yeso ɔdyiso Ʉmbɔ wɔ chwɛa aɓubaya
(Mat 26:17-29; Mlk 14:12-25)
7Ɓisi ɓɔ ʉmbɔ ngʉwɔ mɨkatɨ, ngɨyɛ yangɔmʉ nɔ ɓʉtɨ ɓɔta ɓufuise, ɓa꞉ɓio tɨa ɓɔndanɛ. Ɓisi ngʉɓɔnanɨ, ya꞉ɓitanɨa jɛnɛ nɨwa lingbou lɔ ɓakɔndɔlɔ, akɔ Ʉmbɔ wɔ chwɛa aɓubaya. 8Kʉdɔ, Yeso a꞉tʉma atɨ Pɛtɛlɔ, nɔ Yɔanɨ, ga ɨyɔ naɓɔ ɓɔ: «Seni nesu atambanakɨa idyo, yɔ Ʉmbɔ wɔ chwɛa aɓubaya.» 9Kʉdɔ, ɓɔ꞉muɓokuo ɓɔ: «Wakʉnda ɓɔ tɨtambanaka gbanɨ?» 10Ga Yeso naɓɔ ɓɔ: «Ndʉ nákumonio inani amati ɔ gʉlʉ, nábijono nɔ atɨ gue mʉngana ɔtʉmbeni ʉpata wɔ mipo. Mʉkpateni ɨyɔ! Aki abikumonio-ɛɛ, 11sigieni makwɔ ɨkáá ngɨyɛnɛnɨ ɓɔ: ‹Mʉpananakɨa a nɔwɛ anɨta ɓɔ: Ɨda ngɨyɛ, a꞊dya-ɔɔ idyo, yɔ Ʉmbɔ wɔ chwɛa aɓubaya, ɨhɔ nɔ ɓakpata ngʉɓangɔ, ya gbanɨ?› 12Ɨyɔ, abinɨpana mbɛnɨ ata mʉja amati ɔ ɨkáá mɛngana yɛta ikongo ɓɔ, mʉtambanakɛ muɗo nɔ yaka iɓomu tɨta ɨndanakɛ. Nábitambanakɨa ɨda yɔ ʉmbɔ inani.» 13Ɓa꞉sa ta ɓanɨ, nɔ, ɓɔ꞉gbʉka yaka iɓomu ta ndʉ aka Yeso a꞉ɓusigio-ɔɔ, kʉdɔ, ɓɔ꞉pʉnga ɨɓɔ tɨta tambanakɨa Ʉmbɔ wɔ chwɛa aɓubaya.
Gbɔgbɔ ɔ Makwɔɓɨɨ
(Mat 26:26-30; Mlk 14:22-26; 1Klt 11:23-25)
14Ɨyɛ ndʉ angbinga a꞉ndana, Yeso ɔ꞉wolo adyakaka ɨhɔ, nɔ ɓatitima ngʉɓangɔ. 15Ga ɨyɔ naɓɔ ɓɔ: «Na꞉ɓio pɔngɔ nɔ mʉsasa nɔgbɛ, akɔnɨdya idyo yɔ Ʉmbɔ wɔ chwɛa aɓubaya, ɨhɔ nenu, apɛɨ ngɨa, na꞊dya-ɔɔ ikoko. 16Dɔ, nanenu asigio ɓɔ, na꞊ngɔʉdya sina ɓata, akɔɓɔya ta aka ɨsɨ yɔngɔ, yabikyananakɨa sina-ɔɔ, amati ɔ Ɓʉngama ngʉɓɔ Asɔɓɨɨ.»
17Mbise ɔngɔ, ɔ꞉sɨka ʉpata, nɔ ɔ꞉tosio Asɔɓɨɨ ʉbɨba, nɔ ɔ꞉sugo ɓɔ: «Sɨkeni ʉpata ngʉwa, nɔ nɔ́pakana ati eno. 18Dɔ, nanenu asigio ɓɔ, anɨngwa ɨtakɨtakɨ ngɨyɛ, na꞊ngɔmwa sina ɓata ʉkyɛpʉ ngʉa, akɔɓɔya ta aka, Ɓʉngama ngʉɓɔ Asɔɓɨɨ ɓɛ꞊ka sina-ɔɔ.»
19Ɔ꞉tɔsɨka tɨa mʉkatɨ, nɔ ambise ɔ tosio Asɔɓɨɨ ʉbɨba, ɔ꞉ʉɓundo, nɔ ɔ꞉ɓinjo akɔsugo ɓɔ: «Ɨyɛ, ya ndʉtʉ ngɨyɛsɛmɨ, ɨyɛ, yakɔninjonio akʉʉ eno. Kɨɛni ɓanɨ, nɛmɨ akɔtunguo.» 20Ngbanga kʉɓanɨ, mbise ɔ dyakaka, ɔ꞉tɔsɨka tɨa ʉpata, nɔ, ɔ꞉ɓinjo ga ɨyɔ naɓɔ ɓɔ: «Ʉkyɛpʉ ngʉa, wa menike ngʉkɔsɛmɨ ʉka, kanjɨlaka akʉʉ eno. Menike ngʉkɔnanɨ, ka Agɔmɛ ngɨyɛ ɨtakɨtakɨ, ɨya Asɔɓɨɨ akɨa ati angɔ nɔ ɓombi.
21Yakamɛngana, ɨmbɨeni ɓɔ, mombi ngɨa anɛmɨ akɔgaba, akɔdyakaka ta ɨhɔ nɛmɨ aka. 22Ɨmɨ, Mwana ngɨyɔ Mombi, nɔmanɔ aniwo, ngbanga ta ndʉ aka, Asɔɓɨɨ a꞉napɨa-ɔɔ. Yakamɛngana, ikoko pɛpɛ dɔ nɔ mombi ngɨa anɛmɨ agaba!»
23Kʉdɔ, ɓɔ꞉pʉnga ɓokuonoko ati eɓo ɓɔ: «Anɨ ɨyakɛ, akɨa ɨkananja yɔ yaka ndʉ ɨyɛnɛnɨ, ati ɔ eso?»
Anɨ akɛ a mombi ata mʉja?
(Mat 20:25-28; Mlk 10:42-45)
24Mbise ɔngɔ, ɓatitima ɓɔ꞉pʉnga mangoi ati eɓo, ahata nɨmbɨa ɓɔ, anɨ akɛ, a mombi ata mʉja ati eɓo. 25Ga Yeso naɓɔ ɓɔ: «Ɓangama ɓɔ mababa kɔ ɓombi, ɓakʉnda apananiso ɓʉngama ngʉɓeɓo, ya ngbanga kʉndʉ ɓangama ngʉɓa kanga lɨkʉmbʉ ɓakʉnda ɓɔ, ɓombi ɓiɓio naɓɔ anisoko ɓɔ: ‹Ɓombi ɓɔta iɗo.› 26Yakamɛngana, akɔ inu, yatiɓiomʉ ɓanɨ. Ati eno, mombi ngɨa a mʉja, ɨkɨaniso ndʉ mwana ata bele. Nɔ, mombi ngɨa a ngama ati eno, ɨsɨkaniso ndʉ, mombi ngɨa a nenu akɔkyananakɨa. 27Ati ɔ mombi ngɨa adyakaka, nɔ mombi ngɨa a nayɔ akɔnapiokio idyo, anɨ akɛ a mombi ata mʉja? Ɨmbɨeni iɗo ɓɔ, ɨmɨ, na ati eno ndʉ mombi ngɨa anenu akɔkyananakɨa.
28Amati ɔ ikanio di di di ngɨyɛsɛmɨ, ta inu akɛ, ná ɓombi ngʉɓa ná꞉baya pɔngɔ aɓio ɨhɔ nɛmɨ. 29Ngbanga kʉndʉ Aba a꞉nenjo ɨmɨ Ɓʉngama, ɨmɨ, naninjo inu kʉɓanɨ. 30Iɗo ambɔ inu, dyakakeni, nɔ, mwakanakeni sina tɨa kʉ ɨda mɛngana nemɨ, amati ɔ Ɓʉngama ngʉɓɔsɛmɨ. Nɔ, ná꞊wolo sina akʉʉ ɔ kiti ɔ Ɓʉngama, akɔkio mʉkɔmbʉ wɔ ɓanja tɛkɛɓɛ nɔ ɓapɨnɨ, ngʉɓɔ Ɓaɨsalaɛlɛ.»
Pɛtɛlɔ ɔmanɔ atata Yeso
(Mat 26:33-35; Mlk 14:29-31; Yɔa 13:37-38)
31Mbise ɔngɔ, ga Yeso ɓɔ: «Simoni, Simoni, kanga! Asɔɓɨɨ ɔ꞉sɨɔ Sɨtanɨ ɨngbaa nenu akɔkanio ɓaɓomu, ngbanga ndʉ ɨyɛ ɓapɔpa-ɔɔ mʉpʉnga. 32Yakamɛngana, ɨmɨ, na꞉nɛtɨa pɛ Asɔɓɨɨ, ɓɔ báya ngɨyɛsɔɔ akʉʉ asɛmɨ, yatɨdɔɓanakamʉ. Nɔ ʉwɛ, ndʉ wa꞊ɓio ɓɔ wɔnatɔɨyeni ɨmɨ, injo ɓanduku ɓɔsɔɔ angu.» 33Ga Pɛtɛlɔ nayɔ ɓɔ: «Makwɔɓɨɨ, na mʉndanɛ akumonio ɨhɔ nɔ ʉwɛ aɨkáá yɔ boloko, gʉtʉ ta akɔɓɔya akɔ ingwo.» 34Kʉdɔ, Yeso ɔ꞉mutosio ɓɔ: «Pɛtɛlɔ, nanɔwɛ asigio ɓɔ, ɓʉɓʉnʉ, pɛɨ ngɨa kɔɓɔ anatɨɔ, wɔ꞊natata machaa kaatʉ ɓɔ, wangɔmʉ nɛmɨ anɨmbɨa.»
Pɛmanakɨa akɔ ɓʉkaɓʉkaɨ
35Yeso ɔ꞉tɔɓuɓokuo tɨa ɓɔ: «Angbinga ngɨa na꞉nɨtʉma pɔngɔ-ɔɔ aɓɨakɨa Ɨsaʉ yɛta Iɗo, sɔkɔmʉ pɔ nɔ muki ngʉwa ɓamayaka-ɛɛ ɓagyɛgyɛ, pɔ itumo, pɔ lɨkpakʉ, ná꞉janga ndɨ ɨkyɛmʉ janganɨ?»
Ɓɔ꞉mutosio ɓɔ: «Ta꞉jangamʉ ɨkyɛmʉ pɔ.»
36Ga Yeso ɓata naɓɔ kʉ ɓɔ: «Yakamɛngana, ɨtakɨtakɨ ngɨyɛ, ndʉ mombi aɓio nɔ muki wɔ ɓagyɛgyɛ, ɨʉsɨka tɨa sɨkanɨ, mombi ngɨa anɔ itumo, ɔɨsɨka tɨa kʉ sɨkanɨ. Nɔ ɓata, mombi ngɨa angɔmʉ nɔ mapi, ɨgabiso ɨpʉkʉ ngɨangɔ yɔ ɨkʉʉ, ɔkayana mapi. 37Mabii kɔ Asɔɓɨɨ ka꞉ngaka akʉʉ ɔ asɛmɨ ɓɔ: ‹Ɓa꞉mupooko jɛnɛ amati ɔ mudinda wɔ ɓombi ɓɔta ɓɨɓɨ.›#popoko Isa 53:12 Nanenu anʉngɨa ɓɔ, yɔsisekio ɓɔ yaka ngɨyɛnɛnɨ, yɨkyananakɨa akʉʉ asɛmɨ ta ɓanɨ. Yaɓanɨ, akɔ ɨmɨ, angbinga a tɨa anʉndana.»
38Ga ɓakpata nɔ Yeso ɓɔ: «Makwɔɓɨɨ, ɨna mapi ɓepini ngɨyɛ.»
Kʉdɔ a꞉ɓio naɓɔ ɓɔ: «Yɨpa.»
Yeso anɨta akʉʉ ɔ ɨkpangba
(Mat 26:36-46; Mlk 14:32-42)
39Kʉndʉ ya꞉ɓio gbali angɔ, Yeso a꞉chwɛa aɓei ɔ gʉlʉ, nɔ, ɔ꞉sa akʉʉ ɨkpangba yɔ Mijeituni. Ga ɓakpata ngʉɓangɔ, ambise angɔ ɓɔ sioo. 40Ndʉ ɓa꞉ɓɔya inani, ga Yeso naɓɔ ɓɔ: «Ɨteni, dɔ, nátɨkwamʉ amati ɔ ikanio.»
41Mbise ɔngɔ, ɛ꞉sɨngana ɓata nɔ pɛɨ, ɓʉta ɓɔngɔ tinetine ndʉ ɓigiso ikopi nɔ ɨkɔndɔ. Ɔ꞉gbʉkʉmɨa nɔ mau, nɔ, ɔ꞉pʉnga nɨta, 42akɔsugo ɓɔ: «Aba, wɔkʉndeni, anangusio ɓaka ʉpata wɔ ɓʉkaɓʉkaɨ ngʉwa apɛɨ asɛmɨ-a. Yakamɛngana, yatiɓiomʉ ndʉ ɓʉkʉnda ɓɔsɛmɨ, yakamɛngana, ngbanga ta ndʉ ɓʉkʉnda ɓɔsɔɔ.» [ 43Kʉdɔ, malaika anɨngwa akʉʉ ɔ ɓisi, ɔ꞉mʉchwɛanɨa nayɔ aninjo angu. 44Ndʉ ikoko yɛta ɨja ya꞉muɓoto Yeso, ɛ꞉ta tɨa nɔ angu nɔgbɛ. Nɔ ʉhʉ ngʉwa wa꞉ɓio nayɔ akɔchwɛa, wɛ꞉ka tɨa ngbanga ndʉ lɨgbɨtatɨa lɔ menike ngɨlɛ, lakɔɓwanaka akɔ ɛsɨ.]
45Ambise ɔ nɨta ngɨyɛnɛnɨ, Yeso ɔ꞉ngwa ɨkʉʉ, ɔ꞉tɔa akɔgbʉka ɓakpata ngʉɓangɔ. Yakamɛngana, ɔ꞉ɓʉgbʉka ɓɔkwaeni tɔɔ akʉʉ ɔ ikoko ngɨyɛ ɓa꞉ɓio amati ɔngɔ. 46Ga ɨyɔ naɓɔ ɓɔ: «Nákɔkwaa tɔɔ ɓanɨ, dɔtanɨ? Ʉngweni ɨkʉʉ nɔ ɨteni, dɔ, nátɨkwamʉ amati ɔ ikanio!»
Ɓɔmanɔ anɨfa Yeso
(Mat 26:47-56; Mlk 14:43-50; Yɔa 18:3-11)
47Angbinga ngɨa Yeso a꞉ɓio-ɔɔ-sɨ ta ayaka, ndʉ aka, ga ambaja ɔ ɓombi ɓɔ tutee. Ɓangapɛɨ ta Yuda, ngɨa a꞉ɓio kʉ mʉngana wɔ ɓatitima. Ɔ꞉mɨsɨnganɨa Yeso, nɔ ɔ꞉mʉmwa ɨngʉngʉ nayɔ akɔɓokuo. 48Ga Yeso nayɔ ɓɔ: «Ha Yuda, wɔnagabɔ ndɨ ɨmɨ, Mwana ngɨyɔ Mombi, ta ɨngbaa nɛmɨ akɔnɨmwa ɨngʉngʉ?»
49Ndʉ ɓakpata ɓapemiso yaka ngɨyɛ ya꞉ɓio naɓɔ akɔgbʉka, kʉdɔ, ɓɔ꞉muɓokuo Yeso ɓɔ: «Makwɔɓɨɨ, takwanana ndɨ maana nɔ mapi ngɨyeso?» 50Mombi mʉngana ati eɓo, ɔ꞉buso baya ɔ kumukumu ngɨa ata mʉja nɔ mapi, nɔ, ɔ꞉mʉtɨna uchwei ngʉwɔ ɨkɔndɔ yɔ gue ɔngɔ, ga chwaa.
51Yakamɛngana, Yeso ɔ꞉ɓusigio ɓɔ: «Sɨeni! Yɨpa!» Ɔ꞉poto uchwei ngʉwɔ baya ngɨananɨ, nɔ, ɔ꞉muheiso.
52Mbise ɔngɔ, ga Yeso nɔ ɓangama ɓɔ ɓakumukumu ɨhɔ nɔ ɓangama ɓɔ ɓombi ngʉɓa ɓa꞉ɓipɛmakɨa ɨkáá yɔ Asɔɓɨɨ, nɔ, ɓatataɓasie ngʉɓa ɓɛ꞉ka nayɔ akɔnɨfa ɓɔ: «Ya tanɨ, ɨyɛ nɔ́꞉nɨkɨɔ nɔ mapi yɔ ɗite nɔ mangbe, ‹ndʉ niɓio pɛngɛ mombi ɔ ndiɓo ɓanɨ?› 53Sɨ masi maɓomu, ta꞉ɓio pɔngɔ ta ɨhɔ nenu amati ɔ ɨkáá yɔ Asɔɓɨɨ, sɔkɔmʉ mombi pɔ mʉngana, ɔ꞉kanio nɛmɨ anɨfa. Yakamɛngana, ɨtakɨtakɨ ngɨyɛ, ya tɨa angbinga ngɨyeno, nɔ, angbinga ngɨyɔ, ngama ɔ naɓutu akɔkɨa tɛa.»
Pɛtɛlɔ ɔmanɔ atata Yeso
(Mat 26:69-75; Mlk 14:66-72; Yɔa 18:16-18-27)
54Mbise ɔngɔ, ɓɔ꞉kwa lɨkɔndɔ akɔ Yeso, ɓɔ꞉sa nayɔ, nɔ, ɓɔ꞉mukumoniso aɨkáá yɔ kumukumu ngɨa ata mʉja ga ngbuu. Pɛtɛlɔ a꞉ɓio naɓɔ akpataka ta ambise, ɗu ɓɔ kɛlɛ. 55Ndʉ ɓa꞉gbʉnda dyaa ati ɔ ibamu, Pɛtɛlɔ ɛ꞉ka ɨyɔ awolo tɨa kʉ ati ɔ ɓombi ngʉɓa ɓa꞉ɓio akɔtɛya dyaa. 56Mwana ata moi mʉngana, mombi ɔ tɛa ɔngɔ, ɔ꞉mɨna Pɛtɛlɔ ɓawele anɔ ambamba ɔ dyaa, ɔ꞉mʉkanga ɓɔ gbɔɔ, ga ɨyɔ ɓɔ: «Gʉtʉ ta gue ngɨa, a꞉ɓio pɔngɔ ta ɨhɔ nɔ atɨ Yeso.»
57Yakamɛngana, Pɛtɛlɔ ɔ꞉tata mesu ta ɓɔ ngbakalʉ, akɔsugo ɓɔ: «Ʉwɛ, gwa ata moi ngɨa, nangɔmʉ ɨmɨ nayɔ anɨmbɨa.»
58Bele ndʉ aka, mombi ngakɔmɔ ɔ꞉tɔmɨna ɓata kʉ ɨnanɨ, ga ɨyɔ nayɔ ɓɔ: «Gʉtʉ ta ʉwɛ, wa kʉ mʉngana weɓo!»
Yakamɛngana, Pɛtɛlɔ ɔ꞉mutosio ɓɔ: «A gwa, nangɔmʉ ɨmɨ, mʉngana weɓo.»
59Ambise ɔ angbinga ndʉ saa mʉngana, mombi ngakɔmɔ ɓata, ɔ꞉tɔkpakpa ta akɔsugo ɓɔ: «Ta ingono, mombi ngɨa a꞉ɓio pɔngɔ ta ɨhɔ nɔ atɨ Yeso, dɔ, a kʉ Mʉgalilaya.» 60Ga Pɛtɛlɔ nayɔ ɓɔ: «A gwa, nangɔmʉ ɨmɨ anɨmbɨa yaka ngɨyɛ wakʉnda asugo.» Pɛtɛlɔ angɔpipenimʉ anʉngaka yaka ngɨyɛnɛnɨ, gue ɔ kɔɓɔ ɔ꞉natɨa. 61Makwɔɓɨɨ ɔ꞉natana, nɔ, ɔ꞉mʉkanga Pɛtɛlɔ ta ngbingbii akɔ mesu ɓɔ ngbee. Kʉdɔ, Pɛtɛlɔ ɔ꞉tunguo yaka ngɨyɛ Makwɔɓɨɨ a꞉musigio ɓɔ: «Ɓʉɓʉnʉ, pɛɨ ngɨa gue ɔ kɔɓɔ anatɨa-ɔɔ, wa꞉natata machaa kaatʉ ɓɔ wangɔmʉ nɛmɨ anɨmbɨa.» 62Kʉdɔ, ga ɨyɔ aɓei ɓɔ puu, nɔ, ɔ꞉pʉnga ndɨa nɔ ikoko ɓɔ hikihiki.
Ɓombi ɓɔnononoko Yeso
(Mat 26:67-68; Yɔa 18:22-23)
63Ɓombi ngʉɓa ɓa꞉ɓio aɓeyoko Yeso, ɓɔ꞉pʉnga nayɔ nononoko nɔ ɓɛnda. 64Ɓɔ꞉mʉsanga mesu nɔ ɨpʉkʉ, nɔ, ɓɔ꞉muɓokuo ɓɔ: «Chwa! Anɨ akɛ ɔnaɓɛndɔ?» 65Nɔ, ɓɔ꞉muko nɔ lɨsɛa ɓɔ sɛkɛ sɛkɛ.
Yeso a tɨa apɛɨ ɔ Ubua ngʉwɔ Ɨkʉʉ Nɔgbɛ
(Mat 26:63-66; Mlk 14:61-63; Yɔa 18:19-21)
66Ndʉ ɓisi ɓɔ꞉ya, ɓɔ꞉sa nɔ Yeso apɛɨ ɔ Ubua ngʉwɔ Ɨkʉʉ Nɔgbɛ, aki ɓagʉgʉ ɓɔ Ɓayuda, nɔ ɓakumukumu ɨhɔ nɔ ɓapananakɨa ɓɔ mapanʉ, ɓa꞉jonokio-ɛɛ. 67Ga ɨɓɔ nayɔ ɓɔ: «Atɨɓɨa-sɨ, Ʉwɛ wa ndɨ ta Klisito?»
Yeso ɔ꞉ɓutosio ɓɔ: «Gʉtʉ ta nɔnisigieni yaka, ná꞊ngɔbayamʉ kʉɓanɨ. 68Nɔ gʉtʉ ta ɓɔ, noniɓokueni yaka, ná꞊ngɔnatosiomʉ pɔ kʉɓanɨ. 69Yakamɛngana, anɨngwa ɨtakɨtakɨ ngɨyɛ, ɨmɨ, Mwana ngɨyɔ Mombi, nɔmanɔ awolo akɔ ɨkɔndɔ yɔ guɔngɔ, ɨyɔ Asɔɓɨɨ, ngɨyɔ angu.»
70Ɨɓɔ ɓaɓomu, ɓɔ꞉vɔmʉa akɔsugo ɓɔ: «Ambɔ wa ndɨ gɔ mwana ɔ Asɔɓɨɨ?»
Ga ɨyɔ naɓɔ ɓɔ: «Inu, nɔ́sugo sugoni ɓɔ, ɨmɨ, na mwana ngɨangɔ.»
71Kʉdɔ, ga ɓombi ngʉɓɔnanɨ, ɓata ɓɔ: «Tahata dɔ ɓata ɓadɛmʉ nga ɓeno tanɨ? Sɨ isu ingainga, tɔ꞉kɔ ta nɔ machwei keso, yaka ngɨyɛ ɔ꞉ngakɔ.»
Currently Selected:
Luka 22: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
