Yɔanɨ 9
9
Yeso ɔheiso mombi ɔ mamɔmɔ
1Tɨa ndʉ Yeso a꞉ɓio achana anɔ ɨngbaa, ɔ꞉tɛna mombi ɔ mamɔmɔ mʉngana anɨngwa ta anɔtanɨa. 2Kʉdɔ, ɓakpata ngʉɓangɔ, ɓaɓio nayɔ ɓɔ: «Mʉpananakɨa, atɨɓɨa-sɨ yaka ngɨyɛ: mombi ngɨa anɔtanɨa-sɨ nɔ mamɔmɔ, dɔtanɨ? Ga pɔ ɓɔ ɨsɛ nɔ inye ɓa꞉kɨa ɓʉɓɨɓɨ, ga pɔ ɓɔ ɨyɔ makwɔngɔ.»
3Yeso ɔ꞉tosio ɓɔ: «Yangɔmʉ asugo ɓɔ mombi ngɨa a꞉kɨa ɓʉɓɨɓɨ, gʉtʉ pɔ ɨsɛ nɔ inye, yaka ngɨyɛnɛnɨ ya꞉kyananakɨa ta ɓanɨ, dɔ, tɛa ngɨyɔ Asɔɓɨɨ yɨnɨanɨa sina akɔ uɓei ngʉangɔ. 4Yɔkwananɔ isu, akɔkyananakɨa tɛa yɔ mombi ngɨa a꞉natʉma ɨmɨ, ɓisi ɓɔɓieni-sɨ ta ɓʉyɛ. Ɓisi ɓɔta ɓiye ɓanɨka, ʉɓa, mombi pɔ mʉngana angɔkɨamʉ ɓata ɨkyɛmʉ. 5Ngbinga muɓomu ngɨa na-sɨ-ɔɔ ta adɔdɔ aka, ɨmɨ, na ʉwanga wɔ dɔdɔ.»
6Ndʉ a꞉pipo asugo yaka ngɨyɛnɛnɨ, ɔ꞉toko maɗaʉ aɨsɨ, nɔ, ɔ꞉kupuo nɔ ɨtaka. Ɔ꞉sɨka ɨtaka yɔngɔ, ɔ꞉mʉɗɛaka nayɔ mombi ɔ mamɔmɔ amesu. 7Kʉdɔ, ga ɨyɔ nayɔ ɓɔ: «Sa ajaɓana mesu akɔ ipuu ngɨyɔ Sɨlɔamʉ.»#9:7 Pɔ ɓɔ ɨkɔ mɛngana anɔ Yelusalɛma ɨyɛ Ɓayuda ɓaɓitʉka mipo kɔngɔ angbinga mambɔ ndʉ isisenio yɔ ʉɓʉnga ngʉwɔ nɨka ngɨyɛ Masia «Ɨsɨ yɔngɔ ɓɔ titima.» Ɔ꞉sa ajaɓana ta ɓanɨ, ɔ꞉tɔwa inani ɨyɔ anɨna tɨta iɗo.
8Ɓamabana ɓangɔ, nɔ ɓombi ngʉɓa ɓa꞉ɓimɨmbɨa jɛnɛ pɛɨ ndʉ mombi ɔ chochonoko, ɓɔ꞉pʉnga asugo ɓɔ: «Sɔkɔ ndɨ gue ngɨa aɓikɨa pɔngɔ masi maɓomu, ta ɓawele achochonoko aka, ɨyakɛ?» 9Ɓombi nganangana ɓɔ꞉ɓakana ga ya ta ɨyɔ, ɓɔmɔ ɓɔ꞉tatɨa ga yangɔmʉ ɨyɔ, ga ya mombi ngɨa ɓakpatana nayɔ. Ɨyɔ, makwɔngɔ ɔ꞉ɓɨnyana, ga ya ta ɨmɨ ingainga.
10Kʉdɔ, ɓɔ꞉muɓokuo tɨa ɓɔ: «Mesu ngʉkɔsɔɔ kɔ꞉gananɨɔ dɔ-sɨ tanɨ?» 11Ɔ꞉tosio ɓɔ: «Mombi mʉngana ino ɓɔ Yeso, ɔ꞉puo ɨtaka, ɔ꞉naɗɛa amesu, kʉdɔ, ɔ꞉nasigio ɓɔ: ‹Sa ajaɓana mesu aɨkɔ yɔ Sɨlɔamʉ.› Kʉdɔ, nɔ꞉sɔ ajaɓana ta ɓanɨ, nɔ꞉pʉnga anɨna tɨta iɗo.»
12Ga ɨɓɔ ɓata nayɔ ɓɔ: «Mombi ngɨananɨ adɔ-sɨ tɨa gbanɨ?» Ɔ꞉ɓutosio ɓɔ: «Nangɔmʉ anɨmbɨa.»
Ɓafalisayɔ ɓakpengbiso mombi ngɨa ɓamuheiso mesu
13Ɓɛ꞉ka nɔ mombi ngɨa a꞉ɓio nɔ mamɔmɔ apɛɨ ɔ Ɓafalisayɔ. 14Ɨnadɔ, Yeso a꞉ɗɛa mombi ɔ mamɔmɔ nɔ ɨtaka, nayɔ agana mesu, akɔ ɓisi ɓɔ nuhomuo, ngʉɓɔ Ɓayuda. 15Kʉdɔ, tɨa Ɓafalisayɔ ingainga ɓɔ꞉pʉnga nayɔ akpengbiso, ɓɔ mesu kɔmʉgananɨɔ tanɨ. Ɔ꞉ɓutosio ɓɔ: «Ɔ꞉naɗɛɔ pɛngɛ ta nɔ ɨtaka amesu, nɔ꞉sa ajaɓana, kʉdɔ, nɔ꞉pʉnga tɨa nɨna.»
16Ga nganangana ɔ Ɓafalisayɔ ɓɔ: «Gue ngɨa angɔmʉ mombi ɔ Asɔɓɨɨ, dɔ, angɔmʉ akyananakɨa mapanʉ kɔ ɓisi ɓɔ nuhomuo.» Yakamɛngana, ɓɔmɔ ɓɔ꞉tosio ɓɔ: «Mombi ngɨa anɔ ɓʉɓɨɓɨ eneni akɨa ɨkananja yɔ ɓakɔkɔ ɓɔta ɓambangɛ ngʉɓa tanɨ?» Kʉdɔ, nagbonyonoko yɔkwa ati eɓo.
17Ga ɨɓɔ ɓata nayɔ ɓɔ: «Ha gue, atɨɓɨa-sɨ, dɔ ʉwɛ akɛ, ɓɔ꞉naganɔ tii mesu. Amati ɔ itungwio ngɨyɛsɔɔ, ʉwɛ wanɨna ɓɔ ɨyɔ a anɨ?» Ɔ꞉ɓutosio ɓɔ: «Akɔ ɨmɨ, a ta ɨgbɛ yɔ Asɔɓɨɨ.» 18Ɓayuda ɓa꞉bayamʉ ɓɔ mombi ngɨananɨ a꞉ɓio nɔ mamɔmɔ, nɔ, ɔ꞉hɛɔ kaɓu ngɨangɔ tɨa hɛanɨ. Ɓɔ꞉tɔpipio anisoko tɨa atɨ ɨsɛ nɔ inye.
19Ga ɨɓɔ naɓɔ ɓɔ: «Nɛgbama ngɨa a ndɨ ta mwana eno ingono, ɨya nánɨmbanaka ɓɔ a꞉nɔtanɨa nɔ mamɔmɔ? Yɔkwɔ dɔ tɨa tanɨ ɓɔ, ɨtakɨtakɨ ngɨyɛ a tɨa anɨna?»
20Ɨsɛ nɔ inye ɓɔ꞉tosio ɓɔ: «Mwana, a ta mwana eso ingono, nɔ, a꞉nɔtanɨa ɨyɔ ta nɔ mamɔmɔ. 21Tɨa yaka nga yɛ꞉kɔ pɛngɛ ɓɔ ɨpʉnga nɨna, isu, tangɔmʉ anɨmbɨa pɔ nɨmbɨa. Gʉtʉ pɔ ɓɔ, anɨ akɛ ɔ꞉mʉganɔ mesu, tangɔmʉ anɨmbɨa kʉɓanɨ. Ambɔ nɔ́muɓokiso-sɨ ta ɨyɔ makwɔngɔ, dɔ, a tɨa kʉ iti yɔ gue, apemiso yaka ngɨangɔ ta iɗo.» 22Atɨ ɨsɛ nɔ inye ɓa꞉sugo ɓanɨ, dɔ, ɓa꞉ɓio akumo ɓangama ɓɔ Ɓayuda. Dɔ, ɨɓɔ ɓangama ngʉɓɔnanɨ, ɓa꞉ɓio tɨa ɓɔ꞉kieni kioni, ɓɔ mombi muɓomu ngɨa abaya Yeso ndʉ Masia, ɓamuchweiso ɨkáá yɔ nɨta ngɨyeɓo ta chweiso. 23Ya akʉʉ ɔ yaka ngɨyɛnɛnɨ, ɨyɛ atɨ ɨsɛ nɔ inye, ɓa꞉tosio-ɔɔ ɓɔ: «A tɨa kʉ iti yɔ gue, muɓokiseni pɨ ta ɨyɔ.»
24Kʉdɔ, Ɓafalisayɔ ɓɔ꞉tɛsoko ɓata ta mombi ɔ mamɔmɔ, ga ɨɓɔ nayɔ ɓɔ: «Kumo Asɔɓɨɨ, nɔ, wɔngaka ingono. Isu, tanɨmbɨa ɓɔ mombi ngɨa a mombi ɔ ɓʉɓɨɓɨ.»
25Ɔ꞉ɓutosio ɓɔ: «Yɔɓieni ɓɔ a mombi ɔ ɓʉɓɨɓɨ, ɨmɨ, nangɔmʉ anɨmbɨa yaka pɔ mɛnga. Nanɨmbɨa ta yaka mɛngana ɓɔ, na꞉ɓio pɛ nɔ mamɔmɔ, ɨtakɨtakɨ ngɨyɛ, na tɨa anɨna.»
26Ɓɔ꞉muɓokuo ɓata ɓɔ: «Ɔ꞉nakɨɔ dɔ-sɨ tanɨ? Nɔ, ɔ꞉naganɔ mesu tanɨ?»
27Ga ɨyɔ ɓɔ: «Kʉndʉ aka nɔ꞉fa-ɔɔ nenu asigio, nángɔmʉ anʉka. Na-sɨ akʉnda ɓɔ nitoyo ta toyo, dɔtanɨ? Adiga náhata ɓɔ nánatana aɓio kʉ ɓakpata ɓangɔ.»
28Ananɨ, ɓɔ꞉pʉnga nayɔ tɨta sɛaka, ga ɨɓɔ ɓɔ: «Ta ʉwɛ akɛ, wa mʉkpata wangɔ. Isu, ta ɓakpata ɓɔ Musa. 29Isu tanɨmbɨa ɓɔ, Asɔɓɨɨ ayakanaka jɛnɛ nɔ Musa. Yakamɛngana, tangɔmʉ isu anɨmbɨa ɓɔ mombi ngɨa ɛkɔ-sɨ ɨyɔ gbanɨ.» 30Mombi ngɨananɨ ɔ꞉ɓutosio ɓɔ: «Ɨkananja yɔ yaka ngɨyɛ yakyɔnakyaka ɨmɨ ɨyɛnɛnɨ. Inu, nángɔmʉ anɨmbɨa ɓɔ ɛ꞉ka gbanɨ, yakamɛngana, ɨyɔ akɛ, ɔnaganɔ ɨmɨ mesu. 31Mombi muɓomu anɨmbɨa ɓɔ, Asɔɓɨɨ angɔkamʉ nɨta ngɨyɛ ɓombi ɓɔta ɓɨɓɨ. Yakamɛngana, Asɔɓɨɨ akyɔka ɨyɔ ta nɨta ngɨyɛ mombi ngɨa amukumo, nɔ ɨya akyananakɨa ɓʉkʉnda ngʉɓangɔ. 32Tangɔkamʉ sina isu ɓɔ, mombi ɔ꞉heiso mesu kɔ mombi ngɨa a꞉nɔtanɨa ta nɔ mamɔmɔ. 33Yɔɓieni pɛngɛ ɓɔ mombi ngɨa ɛ꞉kamʉ atɨ Asɔɓɨɨ, ambɔ ɔkɨɔmʉ ɨkyɛmʉ kʉɓanɨ.»
34Ga ɨɓɔ nayɔ ɓɔ: «Ɨnɛɛ! Ʉwɛ ngɨa, wɔ꞉kɨɔ ɓʉkʉʉ amati ɔ ɓʉɓɨɓɨ anɨngwa ta akɔnɔtanɨa! Ʉwɛ, watɨpanɨa isu yaka nga yeno tanɨ?» Kʉdɔ, ɓɔ꞉muchweiso aɓei.
Mombi ɔ mamɔmɔ ɔbayɔ Yeso
35Ɨyɛ ndʉ Yeso ɔ꞉ka ɓɔ Ɓafalisayɔ ɓɔ꞉mʉchweiso aɓei, kʉdɔ, ɔ꞉sa nayɔ agbʉka, nɔ ɔ꞉muɓokuo ɓɔ: «Wɔbayɔ ndɨ Mwana ngɨyɔ Mombi bayanɨ?»
36Ɔ꞉tosio ɓɔ: «Makwɔɓɨɨ! Mwana ngɨyɔ mombi adɔ-sɨ ɨyɔ anɨ? Anaɓɨa iɗo, ambɔ nɨmʉbaya.»
37Ga Yeso nayɔ ɓɔ: «Ʉwɛ, wanayɔ anɨna tɨta nɔ mesu. Ɨyɔ ingainga ɨyakɛ, náyakanaka nayɔ.»
38Ɔ꞉tosio Yeso ɓɔ: «Ii Makwɔɓɨɨ, nɔbayɔ bayanɨ!» Nɔ, ɔ꞉gbʉkʉmɨa nɔ mau ananɨ apɛɨ angɔ.
39Kʉdɔ, Yeso ɔ꞉tɔsugo tɨa ɓɔ: «Ɨmɨ nɛ꞉ka aka asɨ ɔ dɔdɔ aka, akɔkio mʉkɔmbʉ. Iɗo ambɔ, mombi ɔ mamɔmɔ muɓomu ɨpʉnga anɨna, nɔ, mombi ngɨa anɨna, ɨnatana mombi ɔ mamɔmɔ.»
40Ɨyɛ ndʉ Ɓafalisayɔ ngʉɓa ɓa꞉ɓio ananɨ anɔ ambamba angɔ, ɓɔ꞉ka yaka ngɨyɛnɛnɨ, ga ɨɓɔ nayɔ ɓɔ: «Ya ndɨ asugo ɓɔ, isu ta ndɨ tɨa kʉ ɓombi ɓɔ mamɔmɔ?»
41Yeso ɔ꞉ɓutosio ɓɔ: «Yɔɓieni pɛngɛ ɓɔ ná ɓombi ɓɔ mamɔmɔ ingono, ambɔ nángɔmʉ nɔ ɓʉɓɨɓɨ. Yakamɛngana, dɔ, nákwakanaka ɓakai ɓɔ nánɨna, kʉɓanɨ, ɓʉɓɨɓɨ ngʉɓeno ɓa ta akɔ ɨda yɔngɔ.»
Currently Selected:
Yɔanɨ 9: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
