Mʉkpanganɨa 43
43
Bɛnjamɛ ɔsɔ anɔ Misili ɨhɔ nɔ ɓamanye
1Inani akɔ ɨkʉmbʉ yɔ Kanana, ayende a꞉ɓio ɓɔ ɔbelueni tɨta beluo. 2Ɨyɛ ndʉ ɓa꞉pipo nɨdya nganɔ ngɨa ɓɛ꞉ka nayɔ anɔ Misili ɓɔ gba, ga ɨsɛ eɓo naɓɔ ɓɔ: «Tɔeni ɓata nesu ahatɨa mwana wɔ idyo, kʉ aki nɛ꞉ka pɔngɔ-ɛɛ.» 3Ga Yuda nayɔ ɓɔ: «Gue ngɨananɨ, a꞉goniso pɔngɔ nesu asigio ɓɔ, a꞊ngɔbayamʉ ɓata nesu anɨna inani, tɔsenimʉ ta ɨhɔ nɔ, atɨ mupipekio ngʉweso. 4Isu, tabi nɔwɛ akaya idyo, ta ambɔ wɔbayɔ ɓɔ, tɨsa ɨhɔ nɔ atɨ Benjamɛ. 5Yakamɛngana, wɔbayenimʉ, isu, ta꞊ngɔbimʉ kʉɓanɨ, dɔ, gue ngɨananɨ, a꞉tɨɓɨa pɔngɔ ta aɓʉmba ɓɔ, a꞊ngɔbayamʉ ɓata nesu anɨna inani, tɔsenimʉ ta ɨhɔ nɔ atɨ mupipekio ngʉweso.» 6Kʉdɔ, Ɨsalaɛlɛ a꞉ɓio naɓɔ ɓɔ: «A yaka yɔ ɨmanɨ ná꞉kɨa pɔngɔ yaka yɔ ɨbaba ɓanɨ, abandanɨa gue ngɨananɨ ɓɔ, ná ɓata kʉ nɔ atɨ mwana ɔ anʉ eno ngakɔmɔ?» 7Ga ɨɓɔ nayɔ ɓɔ: «Ta ɨyɔ gue ngɨananɨ akɛ, a꞉tiɓokwokiso pɔngɔ yaka tinetine akʉʉ nɔtonokio, nɔ itindindi ngɨyeso. Ga ɨyɔ ɓɔ: ‹Atɔ eno a ndɨ-sɨ ta kʉɔ? Ná ndɨ kʉ nɔ atɨ mwana ɔ anʉ eno ngakɔmɔ?› Isu ta꞉mutosio pɔngɔ yaka ngɨyɛnɛnɨ, sɔkɔmʉ isu nɔ nɨmbɨa ɓɔ a꞉tisigio ɓɔ, tɨka nɔ atɨ mupipekio ngʉweso!»
8Ga Yuda nɔ ɨsɛ Ɨsalaɛlɛ ɓɔ: «Aba! Anasɨa ɨmɨ, anɨsa nɔ mwana, ambɔ isu nenu, ɨhɔ nɔ ɓana ɓeso, tɨ꞊hɛya tɨa kʉ ananɨ, dɔ, tatɨdʉkamʉ nɔ taa. 9Ɨmɨ akɛ, nɔɓɨnyanɨɔ yaka ngɨangɔ. Wa꞊naɓokuo suo yaka ngɨangɔ ta ɨmɨ. Ndʉ na꞊ngɔnatɔɨya nayɔ, nɔ, nɔ꞊natosio suo ɨyɔ, ni꞊ɓio sinani tɨta mombi ata ɓɨɓɨ apɛɨ asɔɔ. 10Kanganɨa-sɨ ʉwɛ ɓɔ, tɔ꞉gbalɨenimʉ ndʉ aka tagbalɨa pɔngɔ-ɔɔ aka, ambɔ tɔ꞉pʉngɔ tɛtɨa tɨa machaa kapɨnɨ.»
11Tɨa kʉɓanɨ, ga Ɨsalaɛlɛ naɓɔ ɓɔ: «Ndʉ ya gɔ ɓanɨ, kɨeni ɓɔ: Mʉsɨeni gue ngɨananɨ, nɔ ɓayaka ɓɔta manjanja ngʉɓa iyani andɛsɔ. Mʉmayakɨeni ɨɓɔ inani amati ɔ ɓasakɨ ngʉɓeno: mwana ɔ adʉdʉ, mwana ɔ ɓɛʉ, mwana ɔ malasɨ, ɓʉtɔɓɛ, mɨkanɨ nɔ ɓana ɓɔ lipumo ɓɔta ɓʉmʉ ɓʉmʉ ngaɓɔmɔ. Ɨyɛnɛnɨ, ya꞊ɓio kiɓio ngɨangɔ. 12Sɨkeni ɓagyɛgyɛ ngʉɓa ɓa꞉nitosio pɔngɔ, nɔ, nɔ́꞊sa kʉ naɓɔ. Nɔ, nɔsɨka ɓɔmɔ machaa kapɨnɨ, ʉɓa nakyɛndaka naɓɔ. Ya ndɨ mombi ɔngɔ a꞉ɓʉsaa pɔngɔ bʉsaa. 13Sɨkeni mwana ɔ anʉ eno, nɔ, nɔ́꞊sa ɓata ta inani atɨ gue ngɨananɨ. 14Asɔɓɨɨ ngɨa Angu Nɔgbɛ, ɨ꞊salɨa ɓɔ gue ngɨanɨ, ɨ꞊nɨnɨa ɓaka ta ikoko, nɔ, ɔ꞊ninjo ɓaka kyɛnda ta nɔ atɨ Bɛnjamɛ, nɔ manye! Gʉtʉ-sɨ yɔɓieni nɔjangeni ɓana ɓɔsɛmɨ, nɨbʉjanga-sɨ tɨa inani.»
Yɛjɛfʉ ɛsɨɔ ɓamanye idyo
15Kʉdɔ, ɓana ɓangɔ ɓa꞉gwakyoko ɓayaka, nɔ, ɓɔ꞉tɔsɨka, kʉ nɔ ɓagyɛgyɛ ngʉɓɔnanɨ ɓa꞉ɓʉmatakɨa. Ga ɨɓɔ nɔ atɨ Bɛnjamɛ anɔ Misili ga kala. Kʉdɔ, ɓɔ꞉ɓɔya, nɔ, ɓe꞉joo apɛɨ ɔ Yɛjɛfʉ ga ɓʉʉ. 16Ɨyɛ ndʉ Yɛjɛfʉ a꞉ɓɨna, ɨhɔ tɨa nɔ atɨ Bɛnjamɛ ɓanɨ, ɔ꞉sigio mombi ɔ tɛa ngɨa a꞉tɨkanga ɨkáá ngɨangɔ ɓɔ: «Ɓuɓoiso inani andamɨ andei. Maa ɓanama nɔ wɔɓɨsɨa, dɔ, nɔ musoti, ta꞊dyakaka ɨhɔ nɔ ɓague ngʉɓa.» 17Ngbanga ta ndʉ aka Yɛjɛfʉ a꞉sugo-ɔɔ, gue ngɨananɨ, ɔ꞉ɓuɓoiso inani andɔngɔ ta ɓanɨ. 18Ngbinga ngɨa ɓa꞉ɓio-ɔɔ anɨsa naɓɔ anapɨa atɨ Yɛjɛfʉ, ʉɓá wɔ꞉ɓʉkwa! Ga ɨɓɔ ɓɔ: «Ya ndʉ yaka yɔ ɓagyɛgyɛ ngʉɓa ɓa꞉titosio pɔngɔ, amati ɔ ɓasakɨ ngʉɓeso, akɔ kyɛnda ngɨyɔ pɛɨ, ɨyɛnɛnɨ ɓa-ɔɔ anɨsa nesu. Ɓɔ꞊manɔ anɨkwa lɨkɔndɔ akʉʉ eso, nɔ, ɓɔ꞊tɨkyananaka. Ɨhɔ nɔ ɓapunda ngʉɓeso, ɓa꞊tɨfa ndʉ ɓabaya ɓeɓo.» 19Tɨa ananɨ anɔ umongu wɔ ɨkáá ngɨyɔ Yɛjɛfʉ, ɓɔ꞉mɨsɨnganɨa gue ngɨa a꞉tɨkanga ɨkáá ngɨyɔ Yɛjɛfʉ, dɔ, ɓɨyakanaka naɓɔ. 20Ga ɨɓɔ nayɔ ɓɔ: «kikiliki, makweso, isu, tɛ꞉ka pɔngɔ-sɨ akaya idyo aka kʉ ɨkanɨ. 21Ngbinga ngɨa ta꞉ɓio-ɔɔ atɔwa, tɔ꞉ɓɔnɔkɔ ɓasakɨ akɔ ɨda ngɨyɛ ta꞉kwala-ɔɔ. Kʉdɔ, mombi nɔ mombi ɛ꞉na ɓagyɛgyɛ ngʉɓangɔ ɓaɓomu, ta ananɨ akɔ moni kɔ sakɨ ngɨangɔ. Ɓagyɛgyɛ ɓɔngɔ ʉɓa tɨa kʉ tɛ꞉kɔ naɓɔ akɔtoso-a. 22Nɔ, tɛ꞉kɔ ɓata kʉ nɔ ɓagyɛgyɛ nga ɓɔmɔ, ʉɓa ta꞊kaya naɓɔ idyo. Isu, tangɔmʉ anɨmbɨa ɓɔ, anɨ akɛ a꞉tɨmaya pɔngɔ ɓagyɛgyɛ ngʉɓɔnanɨ, amati ɔ ɓasakɨ ngʉɓeso.»
23Ga gue ngɨananɨ naɓɔ ɓɔ: «Yangɔmʉ nɔ yaka, nátɨkwenimʉ ʉɓá. Ta Asɔɓɨɨ ngɨyeno, Asɔɓɨɨ ngɨa atɔ eno a꞉mʉbaya, akɛ, a꞉ninjo pɔngɔ awɔngɔ ngɨananɨ, amati ɔ ɓasakɨ ngʉɓeno. Ɨmɨ, na꞉sɨka pɔngɔ ɓagyɛgyɛ ngʉɓeno ta sɨkanɨ.» Kʉdɔ, ɔ꞉tɔɓuchwɛisio manye eɓo Simoni.
24Gue ngɨananɨ, ɔ꞉ɓuɓoiso atɨ Yɛjɛfʉ ga buu. Ɔ꞉ɓinjo mipo kɔ mɨtɨndɨ nɔ ɓɔ꞉jaɓana. Ɔ꞉tenjo ɓapunda ngʉɓeɓo kʉ nɔ idyo. 25Dɔ ndɨ ɓa꞉ɓio ɓɔ, ɓɔ꞉keni ʉkanɨ ɓɔ, ɓa꞉dyakaka ananɨ ɨhɔ nɔ atɨ Yɛjɛfʉ, ɓɔ꞉tambanaka ɓapɛpɛ ngʉɓa ɓa꞉ɓio ɓɔ ɓɔmɨkɨeni naɓɔ, pɛɨ ngɨa ɛka-ɔɔ nɔ musoti ngʉwɔnanɨ. 26Angbinga ngɨa Yɛjɛfʉ a꞉ɓɔya-ɔɔ andɔngɔ andei, ɨɓɔ, ɓɔ꞉minjo apɛpɛ ngɨa ɓa꞉mɨkɨa nayɔ, ga ja. Nɔ, ɓɔgbʉkʉmakɨa ga gbʉkʉ gbʉkʉ, aɓɔya ta aɨsɨ, ananɨ apɛɨ angɔ. 27Ɨyɔ, Yɛjɛfʉ ɔ꞉ɓʉɓokwoko masaʉ, ga ɨyɔ naɓɔ ɓɔ: «Mʉkʉʉ wɔ atɔ eno ngɨa ná꞉nachwɛa pɔngɔ uduɓa wangɔ, a dɔtanɨ? Andɨ꞊sɨ ta kʉɔ?» 28Ɨɓɔ, ɓɔ꞉mʉtosio bɔ: «Iii ngama, aba ngɨakeso, ɨyɔ baya asɔɔ, a ta iɗo. A-sɨ mʉkʉʉ wɔngɔ kʉ ananɨ.» Kʉdɔ, ɓɔ꞉gbʉkʉmakɨa aɓɔya mesu aɨsɨ. 29Ɨyɛ, Yɛjɛfʉ a꞉tɨna ɓajwa, ɔ꞉tɛna tɨa manye Bɛnjamɛ, ngɨa ɓa꞉chwɛa ɨɓɔ nayɔ ɓʉa mʉngana ɓɔ kpɛ. Ga ɨyɔ ɓɔ: «Mwana ɔ anʉ eno ngɨa mupipekio, ɨya, ná꞉nachwɨa pɔngɔ uduɓa wangɔ ndɨ ɨyakɛ?» Ga ɨyɔ ɓata kʉ ɓɔ: «Asɔɓɨɨ ɨnakɨa iɗo, mwana asɛmɨ.» 30Yɛjɛfʉ ɛ꞉piso ta ndʉ ananɨ, dɔ, ɨyɔ anɨna manye Bɛnjamɛ, ndɨa ya꞉mɨka ta tinene. Ɔ꞉chwɛa gagaa ga puu, ɔ꞉sa andɨa ambɛnɨ nga kɔmɔ ga. 31Ɨyɛ ndʉ a꞉jaɓana mesu, ɔ꞉chwɛa dɔ tɨa, nɔ, ɔ꞉fana mʉtɨma, ga ɨyɔ ɓɔ: «Nápiokeni idyo.»
32Ɓɔ꞉mʉnapiokio ɨyɔ Yɛjɛfʉ, ɨyangɔ ta di. Ɓɔ꞉tɔnapiokio ɓamanye kʉ di. Nɔ ɓata, ɓɔ꞉napiokio ɓombi ɓɔ Misili ngʉɓa ɓa꞉ɓio adyakaka naɓɔ kʉ di. Dɔ, ya꞉ɓio ndʉ ɔpɛ akɔ Ɓamisili, adyakaka ɨhɔ nɔ Ɓaɛbɛlɛnɨa. 33Kʉdɔ, ɓamanye ɓɔ Yɛjɛfʉ ɓa꞉woloko ananɨ apɛɨ angɔ, ɓɔ꞉nabananakieni ta aka ɓa꞉nɔtonokio-ɔɔ, anɨngwa akɔ tapio, akɔɓɔya akɔ mupipekio weɓo. Ɓɔ꞉wolo akanganaka mesu, nɔ, yɔɓʉmbangɨa ta mbangɨa. 34Ɓa꞉ɓisɨka idyo akɔ gbɔ́gbɔ ngɨyɔ Yɛjɛfʉ, ɓɔ꞉sa naɓɔ anapiokio. Idyo ngɨyɛ ɓe꞉njo Bɛnjamɛ, ya꞉ɓio ɨja machaa ɓɔkʉ, anagaaka ɨyɔ ɓangɛ ta ɓaɓomu. Ɓɔ꞉mwakanaka ɨhɔ, nɔ, ɓɔ꞉damʉa.
Currently Selected:
Mʉkpanganɨa 43: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
