УблапӀэ 3

Ящэнэрэ шъхьэр

Тхьэм цӀыфхэр Ӏэдэн чъыгхатэм къызэрэдифыгъэхэр

1Зиусхьанэу Тхьэм къыгъэшӀыгъэ шъоф хьакӀэ къокӀэ пстэуми блэр анахь тхьагъэпцӀыгъ. Ар бзылъфыгъэм еупчӀыгъ: «Мы чъыгхатэм дэт чъыгмэ къапыкӀэрэ гори Тхьэм шъушхын шъуфимытэу зэришӀыгъэр шъыпкъа?»

2«Чъыгмэ апыт пхъэшъхьэ мышъхьэхэр тшхы хъущт, – ыӀуагъ бзылъфыгъэм. – 3Ау Тхьэм ыӀуагъ: „Чъыгэу Ӏэдэн чъыгхэтэ гузэгум итым пытхэр шъумышхы ыкӀи шъуанэмыс, сыда пӀомэ шъулӀэщт“».

4«Хьау, шъулӀэщтэп, – ыӀуагъ блэм. – 5Ау Тхьэм ешӀэ ахэр зышъушхырэ мафэм шъунэхэр къэплъэнхэшъ, шъори шӀумрэ емрэ зышӀэрэ Тхьэм фэдэ шъузэрэхъущтыр».

6Бзылъфыгъэм ылъэгъугъ чъыгым пытхэр пшхынкӀэ зэрэдэгъухэр, уяплъынкӀи гохьых, шӀэныгъэ бгъотынымкӀи цыхьэшӀэгъух. Арыти, къыпыкӀагъэмэ ащыщ къыпичи, ышхыгъ. ИлӀи рити, ащи ышхыгъ. 7Ахэмэ анэхэр къэплъагъэх, зэрэпцӀанэхэр къагурыӀуи, шхынцумпэ чъыгым ытхьапэмэ хъураеу абгы къыращэкӀын ахашӀыкӀыгъ. 8Мафэм ичъыӀэтэгъум чъыгхатэм хэтэу Зиусхьанэу Тхьэр къызэрэкӀорэр зэхахыгъ. ЛӀыми ишъузи Зиусхьанэу Тхьэм къымылъэгъунхэу чъыгмэ захагъэбылъхьагъ.

9Ау Зиусхьанэу Тхьэр цӀыфым къеджагъ: «Тыдэ ущыӀа?»

10Адрэм къыӀуагъ: «Уилъэмакъэ чъыгхатэм зыщызэхэсэхым, сызэрэпцӀанэм пае сыкъэщыни, зызгъэбылъыгъ». 11«Хэта о упцӀанэу къыозыӀуагъэр? – къэупчӀагъ Зиусхьанэу Тхьэр. – Ущышхэн уфимытэу зыфэсӀогъэ чъыгым пытым щыщ пшхыгъэмэ шӀэ?»

12ЦӀыфым джэуап къытыгъ: «Бзылъфыгъэу О къысэптыгъэм а чъыгым къыпичи къыситыгъэти, сэ сшхыгъэ». 13«Сыда ар аущтэу зыкӀэпшӀагъэр?» – Зиусхьанэу Тхьэр бзылъфыгъэм еупчӀыгъ. Бзылъфыгъэм ыӀуагъ: «Блэм сигъэпцӀагъэти, сшхыгъэ».

14Арыти Зиусхьанэу Тхьэм блэм риӀуагъ:

«О пшӀагъэм пае,

хьэкӀэ къуакӀи былыми атемылъэу,

нэлат о птелъ,

ныбашъхьэкӀэ уцохъощт.

КъэбгъэшӀэщтми сапэр пшхыщт.

15Бзылъфыгъэмрэ оррэ зэпыи шъусшӀыщт,

къышъутекӀыщтхэри зэпыищтых:

ащ илӀэуж о пшъхьэ зэгуиутызэ ышӀыщт,

о ащ ылъэдакъэ уецэкъэщт».

16Тхьэм бзылъфыгъэм риӀуагъ:

«Лъэрымыхь узыхъурэм,

гугъоу узыхэтыр згъэбэгъощт,

къин плъэгъузэ, сабыйхэр къэплъфыщтых,

уилӀ ренэу укӀэхъопсыщт,

уилӀ тетыгъо къыпфыриӀэщт»#3:16 Мы къэӀуакӀэм ижъырэ джуртыбзэкӀэ ятӀонэрэ мэхьани иӀ: ежьыри ренэу о къыпфэещт..

17Тхьэм лӀыми риӀуагъ: «Уишъуз уедэӀуи, чъыгым

пытыр о пшхыгъэ, пшхын узфимытэу сӀогъагъэр!

Джы ощ пае нэлатыр чӀым телъ:

къин ухэтэу ащ илэжьыгъэ ущэӀэфэ къэпхьыжьыщт.

18Панэрэ шхъурэ ащ къыпфигъэкӀыщтых,

шъоф фышъхьэхэр гъомлапхъэ пфэхъущт.

19ПкӀантӀэр къыохэу уигъомылэ къэпхьыжьыщт,

чӀыгум щыщи ухъужьыщт,

чӀыгоу укъызхэкӀыгъэм, сыда пӀомэ о усап,

икӀэрыкӀэуи сапэ ухъужьыщт».

20ЦӀыфым – Адам – ишъуз цӀэу Хьао фиусыгъ#3:20 Адам – ижъырэ джуртыбзэкӀэ къикӀырэр: цӀыфыр, цӀыфлъэпкъыр; Хьао – къикӀырэр: щыӀэныгъ., сыда пӀомэ цӀыф пстэуми ар ны афэхъугъ. 21Зиусхьанэу Тхьэм шъомэ щыгъынхэр ахишӀыкӀхи, Адамрэ ащ ишъузрэ ыфэпагъэх. 22Зиусхьанэу Тхьэм къыӀуагъ: «Мары цӀыфым шӀумрэ емрэ зэхишӀыкӀхэу, зэу Тэщ фэдэ хъугъэ; джы щыӀэныгъэр къэзытырэ чъыгым пытыр къыпимычыгъагъот, ар ышхымэ, егъашӀэм щыӀэщт». 23Джаущтэу Зиусхьанэу Тхьэм Ӏэдэн чъыгхатэм цӀыфыр къыдифыгъ – чӀыгоу Тхьэм ар къызхихыгъэр ылэжьынэу. 24Тхьэм цӀыфыр къыдифи, Ӏэдэн чъыгхатэм итыгъэкъокӀыпӀэ лъэныкъо дэжь къэрыубрэ#3:24 Къэрыуб – ошъогу псэушъхьэ тэмабгъу. зызгъэчэрэгъурэ мэшӀо чатэрэ щыӀэныгъэм ичъыг екӀурэ лъагъор къаухъумэнэу Ӏуигъэуцуагъэх.

Currently Selected:

УблапӀэ 3: АдыТГ

Highlight

Copy