УблапӀэ 15

ЯпшӀыкӀутфэнэрэ шъхьэр

Тхьэм Ибрахьимэ Ӏуагъэ зэрэдишӀыгъэр

1А хъугъэ шӀагъэхэм ауж Зиусхьаным Ибрам зыкъыфигъэлъагъуи, ипсалъэ къылъыӀэсыгъ:

«Умыщын, Ибрам,

Сэ – о сыуимэӀу.

О ӀахьышӀоу къыпӀукӀэщтыр ин дэдэщт».

2Ау Ибрам къыӀуагъ: «ЗэкӀэри зыӀэ илъэу Зиусхьан! Сыда О къысэптыщтым есшӀэщтыр, лъфыгъэнчъэу сылӀэщтмэ? СикӀэн зыӀукӀэжьыщтыр Дамаск щыщэу мы ЕлыӀэзэр ары. 3Мары, О бын къысэптыгъэпышъ, – къыпигъэхъожьыгъ Ибрам, – сиунэӀут ары симылъку къызфэнэжьыщтыр». 4Зиусхьаным игущыӀэ Ибрам къылъыӀэсыгъ: «Хьау, уикӀэн о ащ ӀукӀэщтэп: уикӀэн зыӀукӀэщтыр о ппкъынэ лынэ хэкӀыщт!» 5Зиусхьаным Ибрам щатырым къычӀищи, къыриӀуагъ: «Уашъом дэплъыий, жъуагъохэр къэлъытэх, къыпфэлъытэщтха ахэр? Джащ фэдиз о птекӀыщтхэм япчъагъэ».

6Зиусхьаным къыриӀуагъэр Ибрам ышӀошъ хъугъэ, ащ пае Зиусхьаным ащ зэфагъэ иӀэу ылъытагъ. 7Зиусхьаным ащ къыриӀуагъ: «Сэры Зиусхьанэу Халде хэгъэгум ит къалэу Урэ укъыдэзыщыжьыгъэр мы чӀыгур о уиунаеу къыостыным пае».

8Ибрам ыӀуагъ: «ЗэкӀэри зыӀэ илъэу Зиусхьан! Мы чӀыгур сэсыеу зэрэхъущтыр сыдэущтэу зэзгъэшӀэщта?»

9Зиусхьаным ащ къыриӀуагъ: «Илъэсищ зыныбжь танэ Сэ къысфащ, илъэсищ зыныбжь пчэни, илъэсищ зыныбжь тӀи, тхьэркъо цӀыкӀу лъэпкъэу зырэ тхьэркъо ныбжьыкӀэрэ».

10Ахэр зэкӀэ ащ къыгъотхи, зэфэдитӀоу зэгуиупкӀыгъэх, зы Ӏахьэр адрэм пэӀуилъхьагъ, бзыухэр зэгуиупкӀыгъэхэп. 11УкӀыгъэу щылъмэ къолэбзыу цунтхъакӀохэр къатебыбагъэх, ау Ибрам ахэр Ӏуифыгъэх.

12Тыгъэр къуахьэ зэхъум, Ибрам чъые пытэм хилъэсагъ. Щынэгъошхомрэ шӀункӀымрэ ащ къытеуагъэх. 13ЕтӀанэ Зиусхьаным Ибрам къыриӀуагъ: «О бынэу птекӀыщтхэр ямычӀыгум хымэ зэрэщыхъущтхэр шъыпкъэ дэдэмкӀэ зэгъашӀэ, ахэр ащ щагъэпщылӀыщтых, егъэзыгъэхэу илъэс шъиплӀым къыкӀоцӀ щаӀыгъыщтых. 14Ау Сэ цӀыф лъэпкъэу ахэр зыфэпщылӀыщтхэм хьыкум тесшӀыхьащт; ащ нэужым мылъкушхо яӀэу къикӀыжьыщтых. 15Ори гупсэфыгъо бгъотыгъэу уятэ пӀашъэхэр зыдэщыӀэхэм бгъэзэжьыщт, жъышъхьэ мафэ бгъотыгъэу уагъэтӀылъыжьыщт. 16О птекӀыгъэхэу яплӀэнэрэ лӀэужым ихьащтхэр арых мыщ къэзгъэзэжьыщтхэр, сыда пӀомэ амор цӀыфхэм яхэбзэнчъагъэ ащ нэс икъугъэу хъущтэп»#15:16 Амор цӀыфхэр яхэбзэнчъагъэмэ апае а чӀыгум тесыжьынхэ фимытхэу Тхьэм ыгъэнэфэгъэ уахътэм хъущтых..

17Тыгъэр къуахьи, шӀункӀы къызэхъум, мары, Ӏугъо къызэрыкӀырэ табэмрэ мэшӀотхъуабзэмрэ зэгоупкӀыгъэхэу щылъ псэушъхьэхэм азыфагу дэкӀыгъэх. 18А мафэм Зиусхьаным Ибрам Ӏуагъэ дишӀыгъ: «О бынэу птекӀыщтхэм Сэ мы чӀыгур ясэты, Мысыр псыхъом къыщегъэжьагъэу адрэ псыхъошхоу Ефрат нэс: 19къэн, къэныз, къадмон, 20хьат, периц, рефэ, 21амор, къэнаӀан, гъыргъаш, еус цӀыфхэм ячӀыгу».

Currently Selected:

УблапӀэ 15: АдыТГ

Highlight

Copy