УблапӀэ 12

ЯпшӀыкӀутӀонэрэ шъхьэр

Тхьэр Ибрам къызэреджагъэр

1Зиусхьаным Ибрам къыриӀуагъ: «О уихэгъэгу икӀи, уиӀахьылхэри, уятэ иуни къэбгынэхи, Сэ чӀыгоу къыозгъэлъэгъурэм кӀо.

2Сэ о лъэпкъышхо къыптезгъэкӀыщт,

сынэшӀу къыпщысфэщт,

пцӀэ инэу хэсӀэтыкӀыщт,

Тхьэм ынэшӀу ащифэныр къызбгъодэкӀыщтыр оры.

3О зынэшӀу къыпщыфэхэрэм Сэ СынэшӀу ащысфэщт!

Нэлат къыозыххэрэм Сэ нэлат ясхыщт!

ЧӀыгум тет лъэпкъ пстэуми СынэшӀу ащысфэщт о уихьатыркӀэ».

4Зиусхьаным къызэрэриӀуагъэу Ибрам кӀуагъэ; ащ игъусэу Лотэ кӀуагъэ. Ибрам Хъаран зекӀыжьым, илъэс тӀокӀищырэ пшӀыкӀутфырэ ыныбжьыгъ. 5Ибрам ишъузэу Сарай зыригъэгъусагъ, ышы ыкъоу Лоти, ежьхэм зэкӀэ мылъкоу зэрагъэуӀугъэри, зэкӀэ цӀыфэу Хъаран щыряӀагъэри КъэнаӀан зыдырищэжьагъэх. КъэнаӀан чӀыгум ихьэхи,

6Щэхэм къалэ пэблагъэу щыӀэ Морэ щыт чъыгаем къэсыгъэх. А лъэхъаным а чӀыгум къэнаӀан цӀыфхэр щыпсэущтыгъэх. 7Ащ Зиусхьаныр Ибрам къыщыфэлъагъуи, къыриӀуагъ: «О птекӀыщт цӀыфхэм мы чӀыгур ястыщт!» Къыфэлъэгъогъэ Зиусхьаным пае Ибрам къурмэншӀыпӀэ а чӀыпӀэм щишӀыгъ.

8Ащ икӀи, ар къушъхьэлъэ хэкоу Бэтэл ылъэныкъокӀэ щыӀэм ежьагъ; къохьапӀэмкӀэ щыӀэ Бэтэлрэ къокӀыпӀэмкӀэ щыӀэ Ӏай къалэрэ азыфагу ищэтыр щигъэуцугъ. Зиусхьаным ащ къурмэншӀыпӀэ щыфигъэуцугъ, Тхьэм Зиусхьан фиуси, ыгъэлъапӀэзэ, елъэӀоу ригъэжьагъ. 9ЕтӀанэ Ибрам къыблэ лъэныкъом щыӀэ шъоф нэкӀым кӀонэу ежьагъ.

Ибрам Мысырым зэрэщыӀагъэр

10А чӀыгум гъаблэ къыщежьагъ, къежьагъэр гъэблэшхоти, Ибрам Мысырым щыхымэу псэупӀэ щылъыхъун фаеу хъугъэ. 11Мысырым ар пэблагъэ зэхъум, ишъузэу Сарай риӀуагъ: «Узэрэдахэр сэ сэшӀэ. 12Мысыр хъулъфыгъэмэ узалъэгъукӀэ, узэрэсишъузыр къагурыӀонышъ, сэ саукӀыщт, о псэоу укъагъэнэщт. 13Сэ о усшэу яӀуи, о уихьатыркӀэ сэ дэгъоу къыспэгъокӀынхэшъ, о сищыӀэныгъэ къэбгъэнэжьыщт».

14Ары зэрэхъугъэри, Ибрам Мысырым къызэсым, Сарай зэрэдэхэ дэдэр мысыр цӀыфхэм алъэгъугъ. 15Фирхьауным ицӀыф Ӏэшъхьэтетхэм ар залъэгъум, фирхьауным ащ идэхагъэ фыщытхъухэу рагъажьи, Сарай фирхьауным иунэ хапӀэ ащагъ.

16Сарай ихьатыркӀэ Ибрам дэгъоу къыпэгъокӀыгъэх: ащ иӀэ хъугъэх мэл пчэнхэри, былым пӀашъэхэри, щыдхэри, унэӀут хъулъфыгъэхэри, бзылъфыгъэхэри, щыдыбзхэри, махъшэхэри.

17Ау Ибрам ишъузэу Сарай фирхьауным зэриштагъэм пае, фирхьауными ащ зэкӀэ иунэ хапӀэ щыпсэурэ цӀыфхэми Зиусхьаным уз Ӏаехэр къафигъэкӀуагъэх. 18Арыти, фирхьауныр Ибрам къеджи, къыриӀуагъ: «Сыда о къысэпшӀагъэр? Ар уишъузэу зэрэщытыр сыда къызкӀысэмыӀуагъэр? 19Сыд пае ар о пшыпхъоу пӀуагъа? Сэ ар сшӀошъ хъуи, ар шъузкӀэ сштагъэ! Уишъуз штэжьи, ӀукӀыжь!» 20Фирхьауным унашъо афишӀыгъ Ибрами, ишъузи, зэкӀэ мылъкоу иӀэри кӀыгъухэу, къырагъэкӀынхэу.

Currently Selected:

УблапӀэ 12: АдыТГ

Highlight

Copy