Luk 21

Ia Jisas e hotua chikai na daki chamu

(Mak 12:41-44)

1E momoro ia Jisas me haera ira na tinoni tatamani tara livu sahea nidira sausau tana kei ni livu golo tana Vale Tabu Leho. 2Me morosi lakamua ia chikai na daki chamu te teha tamani te sau bamua e ruka na tavi ni golo. 3Ma ia Jisas e kori vahai vanira hana duli nira de, “Inau ngavina ku kori vanilohamu na kori tutuni, ia na daki chamu te teha tamani de te sau golo liungia visa kode na tinoni ia. 4Rongona na tinoni nira nia ara sau bamua na charana nidira golo, ma na daki chamu nia te teha tamani e sau kodea na hua te ke mauri ia tatana.”

Ia Jisas e kori lengaa na Vale Tabu Leho ba kara vuti sivoa

(Matiu 24:1-2; Mak 13:1-2)

5Me kesana hana duli ia ara valagu mara koria na Vale Tabu Leho nia te moro talana kolu na makara talana nira tara lohoa ira na Vale Tabu nia tatana, mara nilaua kolu na nidira sausau tara sau vania ia God. Me kori vahai ia Jisas de, 6“Ira kode na omea tamu morosia lohamu tahuna de ia, ba ke laba ke chikai na tahu ngeni ba kamu teha haea ke chikai lelee na makara ke toha visu malengana. Ba kara tavuti ma kara piri rarasa kode i pari.”

Ia Jisas e kori lengaa na tahu sekoseko ba ke mai

(Matiu 24:3-14; Mak 13:3-13)

7Mi ira hana duli ia Jisas ara gesu lakaa, “?Ticha, ke ngisa kara laba na omea vahai nira nia? ?Ma na valajaja hua kami morosi luhia hami kode ke vu ni laba?”

8Ma ia Jisas e kori vahai vanira de, “Kamu kanakana hamu kara ni teha ira na lekasihamu. Rongona na tinoni danga ngeni ba kara ni tuu tana asagu nau, ma kara lekasia visa na tinoni ma kara kori vahai de, ‘!Inau na Mesaea!’ ma ira ngeni ba kara kori vahai laka de, ‘Na tahu e laba noha.’ Mihamu kamu mui na bukera. 9Ma kamu mui na matahu ma na kama tobamiu tina kamu rongosia na vaipiduhi ma na vaisekolihi, rongona na omea nira nia ba kara laba luhi, me teha vata na varavara kokodena tahu ia.”

10Kode me kori vahai vanira laka de, “E chikai na momoru ba ke pidu kolu chikai, mi ira na tinoni taovia leho ba kara vaipiduhi. 11Ba ke kasi leho na vuluhe, me ke laba na tavoro ma na masahi leho visa vera, mi tana parako ba ke laba na valajaja leho me ke moro matahuha.

12“Mi tahuna tara teha vata na omea nira nia na laba, mihamu ba kara tarihamu ma kara rotasihamu. Ngeni ba kara ragahamu ma kamu dia tatadira ira na lehona tana vale lotu ma kara pedehamu ma kara livuhamu tana vale peresini. Ma kara ragahamu dia tatadira ira na king ma na taovia ni momoru rongona tamu bukeu nau. 13Ba, mi tahuna te ke laba tana tahu nia, ia noha na tahu talana vanihamu kamu kori vanira na saurongo talana. 14Talasanga luhia manasamiu ke mui na toba sahata na kori utusimiu tovosi tana tahu vahai nia. 15Rongona inau ba ku sau vanihamu na kori manasa te ke teha chikai na vidadira hamiu hala ke tangomana na pejoa se na liangaa. 16Ira soha na tohamiu ma na tinamiu ma na tasimiu ma na kamamiu, ma na hamiu papi ba kara sau diahamu vanira hamiu hala ma kara matesihamu kesana. 17Me visa na tinoni kode ba kara morosi leleahamu tana rongona tamu bukeu nau. 18Seisuge ke vahai ia, e utu ke chikai pelelee na pulu vungamiu ke sagava. 19Kamu tuu ngachi hamu, ma kamu ni tamania na mamauri sali.”

Ia Jisas e kori lengaa na hua ba ke laba i Jerusalem

(Matiu 24:15-21; Mak 13:14-19)

20Me kori vahai laka ia Jisas de, “Mi tahuna kamu haera ira na malahai tara tuu talihu labaa i Jerusalem, mi tahuna noha nia e varangi ke tuaveo na vera nia. 21Ira na vangana na provins i Jiudia ba kara choho ma kara dato tana vuvungana, mi ira tara toha i Jerusalem ba kara dia choni, mi ira tara toha valego tana lilihina na vera leho nia kara mui laka na visu tana vera leho nia. 22Rongona na tahu nia, na tahu ni rota me ke ni manalia na hua tara marea tana Buka Tabu. 23Ngeni ba ke seko solehana vanira ira na daki tara mahara mi ira na daki tara tamani daledira pepechi. Na vajangi savi leho ba ke sivolia na vera nira de, ma na korena God ba ke mailia ira na tinoni. 24Kesana ba kara mate tana mangana na beniti, mi kesana ba kara chekara tana vera tovosi. Mi ira na Jentael ba kara sahe ma kara dakehojaa na Jerusalem matadu po ke chau vovotana nidira tahu.”

Ia Jisas e kori lengaa nina vivisu maiana

(Matiu 24:29-31; Mak 13:24-27)

25Me kori vahai laka ia Jisas de, “Na valajaja nira ba ke laba lenga tana aso, ma na vula kolu na vetuhu nira. Mi tana pari de, ira na tinoni kode ba kara tugaleta ma kara matahunia na kukutuna ma na tatangina na suasua ni tasi leho. 26Danga na tinoni ba kara kama tobadira ma kara mate kokoma, tara matahunia na omea seko nira ta kara laba tana pari de, rongona ba kara ganigani e visa na omea tana barahata. 27Mi tana tahuna nia, ba kara morosiu nau, na Dalena Tinoni, ba ku laba visu mai tana parako kolu na susuliha ma na marara leho. 28Mi tahuna ta kara tuturiha na laba na omea vahai nira nia, ihamu kamu tuu susuliha, rongona e varangi noha ia God ke maurisihamu.”

Na kori titihila tatana na hai nira

(Matiu 24:32-35; Mak 13:28-31)

29Kode me koria ia chikai na kori titihila me kori vahai de, “Kamu pada dia hamu na hai ni fig ma na hai nira kesana, 30tahuna te tuvu na malosodira mamu hanaa hamu e varangi na tahu ni parapara. 31Me vahai soha nomu nia, tahuna kamu morosia kara laba na omea vahai nira nia. Ma kamu hanaa ba ke varavara ke laba mai nina baravata ia God.

32“Inau u koria na kori tutuni vanihamu, visa na omea nira nia ba kara laba luhi, bukena kara vu mate ira na tinoni tara mamauri tana tahu de. 33Na barahata ma na pari ba kara kode kalavata, ma na nigu valagu nau ba ke toha savaliu.

Ia Jisas e kori lengaa na tahu te ke visu mai

34“Kamu parovata ma kamu mui na toha matena na hahani leho ma na inu ma kamu mui na boe matena na omea nira tana pari de. Me ke tavonga ni taora sahanihamu tana dani tu ku visu mai nau, vahai na bolo te kara tana piti. 35Rongona na dani nia ba ke mailia visa kode na tinoni tana pari matadu de. 36Ma kamu onioni ma kamu nonginongi vania ia God ke sangahamu ma kamu ni choho basiaa visa na omea seko te ke laba, ma kamu tangomana na tuu mamahela tana matagu nau, na Dalena Tinoni.”

37Visa na dani ia Jisas e sasani tana Vale Tabu Leho, me visa na ngulavi me dia ia tana Vungavunga i Olivi, me toha inge tana puti popono nia. 38Me visa na mohomoho marara pasapasa ara dia ira na tinoni tana Vale Tabu Leho na valingea nina sasani ia Jisas.

Currently Selected:

Luk 21: mln

Highlight

Copy