Marko 2
2
O Yezous krell i banges sasto
1Pal i tikno tsiro djas o Yezous pale an o foro Kapernaum. Oun boud shounan, kay yob an o kheer his. 2Koy van yaake boud menshe an o kheer oun glan o voudar khetne, te nay djas bouder kek an o kheer dren. Oun o Yezous penas lenge o Debleskro lab.
3Koy anan le yekes ap o čiben, kay nay nashell gar. Star morsha hidjran les. 4Kolla anan les nashte gar pash o Yezouseste, yaake boud menshe his troul leste. Koy djan yon ap o kheer pral pre, lan barra vin, oun moukan ko čiben o nassleha glan o Yezouseste tele.
5Har o Yezous lengro patsepen dikas, penas lo ap koleste, kay nay nashell gar: “Miro čavo, me lau tiri doosh#2:5 doosh faute, péché toutar.”
6Koy his ninna biboldengre čačepangre beshdo. Kolla penan an pengre djia: 7“Har nay penell yob kova? Yob krell pes har o Devel! O Devel kokres nay lell i doosh i menshendar!”
8O Yezous hayvas, hoy an lengro shero trouyel djas oun penas ap lende: “Hoske djal kova an t'maro shero trouyel? 9Hi kova phareder, te penap ap leste: Me lau tiri doosh toutar, har te penap: Ste pre, le tiro čiben oun dja khere? 10Me kamau, te djinenn t'mer: O Menshengro Čaves hi i zoor ap kay phoub, te nay lell lo i doosh i menshendar krik.” Palle penas lo ap koleste, kay nasselo hi: 11“Ste pre, le tiro čiben oun dja khere!”
12Oun yob stas pre, las peskro čiben oun djas vin. Oun lauter dikan les, oun kran bare yaka. Yon sharan o Debles, oun penan: “An maro tselo djipen dikam savo koova gar.”
O Yezous oun i pale-čidde
13O Yezous djas pale vin pash o baro pani. Oun boud menshe van pash leste. Oun yob sikras len o Debleskro drom. 14Oun har yob yaake kote djas, dikas lo i morshes, kova kharas Levi. Leskro dad hi o Alfeo. O Levi his pash ko kheer beshdo, kay las yob love i Remaryenge dren. Penell o Yezous ap leste: “Am, dja mantsa!” Oun yob stas pre, oun djas leha.
15Oun o Yezous djas an leskro kheer oun beshas pes tele. Oun boud menshe djan leha. Boud his kolendar, kay lenn i biboldendar love i Remaryenge dren,#2:15 I bibolde his ap ko tsiro rhoyedo ap kol Remaryengre lourdende, kay van dran o foro Rom, oun kay lan lengro them dren. Yon hounte playsran kol Remaryenge kol themeskre love. Kol bibolde, kay i biboldendar kol love i Remaryenge dren lan, his pale-čiddo pash i tsele biboldende. oun kolendar, kay čilačo koova kran oun doleske pale-čiddo his. Oun yon beshan pen tele o Yezouseha oun leskre malentsa, te rhan le. 16Mank i Farisarya his save, kay čačepangre hi. Har yon dikan, kay yob kolentsa rhal, penan le ap leskre malende: “Hoske rhal yob kolentsa, kay lenn i biboldendar love i Remaryenge dren, oun kol vavarentsa, kay hi ninna pale-čiddo?”
17Har o Yezous kova shounas, penas yob ap lende: “Kolla, kay sasto hi, djan gar pash o dramaskro. Kolla, kay nasselo hi, djan pash leste. Me vom gar, te dap kolen pash mande gole, kay ap o čačo drom hi. Na-a! Me vom, te dap kolen pash mande gole, kay djan ap o čilačo drom.”
O Yezous krell halauter neves
18His i dives, kay rhan o Yohanneskre mala oun i Farisarya či, te mangenn le o Debles an. Koy van morsha pash o Yezouseste, oun penan ap leste: “Kolla, kay shounenn ap o Yohanneste, ninna kolla, kay shounenn ap i Farisarya, rhan i tsiro či, te mangenn le o Debles an. Hoske krenn tire mala kova gar?”
19Penell o Yezous ap lende: “Yaake rah, har o biyabeskro ap i biyab hi, rhan oun piyenn leskre mala, kay leha ap i biyab hi. 20Ko tsiro vella, kay o biyabeskro lendar krik lino vella. Ap ko tsiro rhan le oun piyenn le či, te mangenn le o Debles an.
21Kek sivell i nevo kotar than#2:21 than stoffdo ap i phouro ripen. Pash o thopen vell o nevo kotar tikneder oun tserdell pes pale tele, oun o phouro ripen djal boudeder paash. 22Oun kek čorell nevi mool an i phoure molyakre gone. I nevi mool krell i phoure molyakre gone paash. Oun koy mool nashell vin, oun kol molyakre gone djan paash. I nevi mool vell čoredo an neve molyakre gone!”
O Yezous hi o ray pral o Debleskro dives
23Ap yek Debleskro dives djas o Yezous ap i kotar them, kay djob baro vas. Oun leskre mala lan o djob an i vasta, te rhan le. 24Oun kol Farisarya penan ap leste: “Hoske krenn tire mala ap o Debleskro dives savo koova, hoy hi gar pal maro čačepen?”
25Penas lo ap lende: “Hoy kras o baro ray David peskre malentsa, har yon bokan? Djinenn t'mer gar, hoy an o Debleskro lab činlo hi?
26An ko tsiro, kay o Abyatar o baro rashay his, djas o David an o Debleskro kheer oun rhas o Debleskre mare, hoy kote čiddo his. Pal i biboldengro čačepen his kol mare i rashayenge kokres koy. O David rhas len, oun das ninna kolen, kay pash leste his.” #2:26 dik: 1. Samuel 21:7
27Oun o Yezous penas ap lende: “O Debleskro dives hi i menshenge koy. O mensho vas gar kerdo, te hi lo o Debleskro diveske koy. 28Yaake hom me, o Mensheskro Čavo, ninna o ray pral o Debleskro dives.”
Currently Selected:
Marko 2: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
