Yohanni 16
16
O Debleskro Dourho oun leskri boudi
1“Kova halauter penom me ap t'mende, te denn t'mer gar t'maro patsepen ap mande pre. 2Yon krenn t'men pale-čiddo. Oun ko tsiro vella, kay denn yon t'men moulo oun penenn: O Devel kamas kova yaake. 3Yon prindjrenn o dades gar oun man vitar gar. Doleske krenn yon kova. 4Te vell ko tsiro, hounte djinenn t'mer, kay kova yaake vella, har me les t'menge penom. Me penom t'menge kova gar, har homs pash t'mende. Kanna penau t'menge kova. 5Kanna djau me pash koleste, kay bičras man. Oun kek t'mendar poučell mandar: Kay djah tou?
6Kova, hoy t'menge penom, doukell t'men an o dji. 7Patsenn man: Hi mishto t'menge, te djap mange. Te djau me gar, nay vell ko rakepaskro gar pash t'mende, kay vella ap t'mari rig. Me te djau mange, bičrau les pash t'mende. 8Yob te vella, palle krell yob i menshenge i yaka pre pral lengri doosh, pral o Debleskro čačepen oun pral o Debleskri rholi, hoy vella pral kay phoub. 9Lengri doosh hi, kay patsenn le gar ap mande. 10O Debleskro čačepen dikenn le ap kova, kay me djau pash o dadeste, oun t'mer dikenn man bouder gar. 11Kay o Debleskri rholi pral kay phoub vella, dikenn le ap kova, kay i phagi pral o rayeste pral kay phoub vi-rakedo hi. 12Me kamoms t'menge yaake boud te penell. T'mer hayvenn nay kova kanna gar.
13Te vell o Debleskro Dourho, kay o čačepen an leste hi, sikrell lo t'mende o tselo čačepen. Yob rakrell gar dran peste. Hoy yob shounella, kova rakrell yob. Oun hoy vella, penell yob t'menge glan-vi. 14Yob sharell man. Halauter, hoy yob penell t'menge, vell mandar. 15Halauter, hoy o dades hi, hi ninna miro. Doleske nay penau me: Lauter, hoy yob penell t'menge, vell mandar. 16Pal i tikno tsiro dikenn man bouder gar. Oun pale pal i tikno tsiro dikenn man t'mer pale.”
17“Hoy penell lo,” poučan leskre mala yek o vavarestar, “te penell lo ap mende: Pal i tikno tsiro dikenn man bouder gar; oun pale pal i tikno tsiro dikenn man t'mer pale; oun me djau pash o dadeste? 18Hoy hi kova, te penell lo: I tikno tsiro? Mer djinah gar, hoy yob rakrella.”
19O Yezous hayvas lendar, kay kaman le lestar kova te poučell, oun yob penas ap lende: “Kamenn t'mer te djinell, hoy kova hi, kay penom: Pal i tikno tsiro dikenn man bouder gar; oun pale pal i tikno tsiro dikenn man t'mer? 20Čačepah, me penau t'menge: Vell i tsiro, kay t'mer rovenna, oun denn i vasta pral o shero khetne. Oun i menshe, kay gar ap mande patsenna, hi barhtelo. Ninna te rovell t'maro dji ap ko dives, djinenn: T'maro ropen vell t'mendar krik lino, oun t'mer venna barhtelo. 21I djouvel, kay lell i ternepen, kolat hi douka. Te hi ko ternepen koy, bistrell li kol douka. Yaake bari hi lakri barht, kay yoy las i ternepen. 22Kanna rovell t'maro dji. Oun me penau t'menge kanna: Me vau pale pash t'mende. Oun t'mer venn barhtelo. Oun koy barht nay lell t'mendar kek krik. 23Ap ko dives, poučenn t'mer mandar či. Čačepah, me penau t'menge: Te mangenn t'mer miro dadestar čomone an miro lab, kova dell yob t'men. 24Bis kanna mangan t'mer či an miro lab. Mangenn oun yob dell t'men, te vell t'mari barht yaake bari, bareder djal gar!
25Kova penom me t'menge gar an o mouy. O dives vella, kay me rikrau bouder či pale. Palle rakrau t'mentsa miro dadestar yaake, kay hayvenna halauter. 26Ap ko dives mangenn t'mer o dades an miro lab. Me penau gar, kay me mangau miro dades t'menge. 27Miro dad kamell t'men ninna yaake har me kamau t'men. T'mer kamenn man o djiyestar oun patsenna, kay me o Deblestar vom. Doleske kamell t'men miro dad ninna o djiyestar. 28Me vom o dadestar, oun vom ap kay phoub. Oun me moukau pale kay phoub, oun djau pash miro dadeste.”
29Koy penan leskre mala ap leste: “Kanna rakreh tou yaake, kay hayvah kova. Tou rikreh bouder či pale. 30Kanna djinah mer, kay tou halauter djineh. Tou djineh glan-vi, hoy i menshe kamenn toutar te poučell. Doleske patsah mer, kay tou o Deblestar veh.”
31“Kanna patsenn t'mer?” penas o Yezous. 32“Dikenn, ko tsiro vella oun hi koy, kay nashenn t'mer halauter mandar. Hakeno djal pale khere. Oun man moukenn t'mer kokres. Ninna te moukenn man, hom me gar kokres. O dad hi pash mande. 33Kova lauter penom t'menge, te vell t'men i bari barht an o dji pral kova, kay han mire. Kate ap kay phoub hi t'men daar. Ma darenn! Me hom zorleder har halauter ap kay phoub.”
Currently Selected:
Yohanni 16: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
