1. Mose 7
7
O baro pani vella
1Oun o baro Devel penas ap o Noah: “Dja an ko panyeskro kheer: tou oun tiri tseli familya. I tsele menshendar ap i phoub hal tou kokres lačo oun čačo glan mande. 2Le firhen touha an o panyeskro kheer: Hake firhendar, kay hi gar pale-čiddo#7:2 Pale-čidde firhe hi save, kolendar o Devel penas: Ma rhan len!, le efta morshen pengre djouvyentsa! Oun hake pale-čidde firhendar le yek morshes oun peskri djouvel. 3I čirklendar le ninna efta morshen oun efta djouvyen! Kre kova, te lenn le čave oun merenn gar vin ap i phoub. 4An efta divessa moukau me brishin tele te vell ap i phoub: star-desha divessa oun star-desha rati, yaake te merell ap i phoub o tselo djipen, hoy krom.”
5Oun o Noah kras halauter yaake, har o baro Devel leske penas. 6Oun o Noah his 600 (shob-sheel) bersha phouro, har vas o baro pani pral i phoub.
7Oun o Noah djas an o panyeskro kheer. Khetne leha djan leskre čave, leskri romni oun leskre čavengre romya, te tassenn le gar. 8-9Ninna i firhe van pash o Noah an o panyeskro kheer, hakenestar douy: o morsh oun peskri djouvel: i firhendar, kay gar pale-čiddo hi oun kolendar, kay pale-čiddo hi, ninna i čirklendar oun i tsele tikne firhendar ap i phoub, yaake har o Devel leske penas.
10Oun pal efta divessa vas o baro pani pral i phoub. 11Har o Noah 600 (shob-sheel) bersha phouro his, an o douyto čon an ko bersh, ap o deesh-te-eftato dives vas o pani, hoy an i phoub hi, i zoryah vin. 12Oun dran o bolepen vas baro zorelo brishin ap i phoub: star-desha divessa oun star-desha rati.
13Ap ko dives djas o Noah peskri romyah oun peskre čaventsa, o Sem, o Ham oun o Yafet, oun kolengre romya an o panyeskro kheer. 14Khetne lentsa djan ninna hake firhendar – kolendar, kay divyo hi oun kolendar, kay gar divyo hi, ninna hake tikne firhendar, hoy djan pral i phoub, oun hake čirklendar. 15Yon djan pash o Noah an o panyeskro kheer douy hakenestar, hoy djivella: yek morsh oun peskri djouvel, 16yaake har o Devel leske penas, te krell lo kova. Oun o baro Devel kras o voudar pandlo pal lende.
17Oun o baro pani vas pral i phoub 40 (star-desha) divessa, oun djas pre oun hadas o panyeskro kheer pre oun hidjras les. 18Oun o pani vas boud oun boudeder pral i phoub. Oun o panyeskro kheer rikras pes pral o pani. 19Oun o pani vas yaake baro ap i phoub, kay his i tsele bare berge tel o pani. 20O pani ačas tardo efta metarya pral i berge, yaake kay i tsele berge tel o pani his.
21Oun koy meras halauter ap i phoub, hoy djido his: i čirkle oun i firhe, – kolla, kay divyo hi oun kolla, kay gar divyo hi, ninna i tikne firhe, hoy djan pral i phoub, oun i tsele menshe. 22Halauter meras, hoy ap i phoub djivas.
23Yaake vas o tselo djipen ap i phoub tassedo: i menshe, i firhe, i bare oun i tikne, ninna i čirkle. Halauter vas tassedo. O Noah kokres ačas djido oun kolla, kay djan khetne leha an o panyeskro kheer. 24O pani his tardo ap i phoub 150 (sheel-te-paash-sheel) divessa.
Currently Selected:
1. Mose 7: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
