1. Mose 11
11
O baro kheer an o foro Babel
1An ko tsiro his i tsele menshen yek rakepen. 2Oun yon moukan pengro them oun djan kote, kay o kham pre djala. An o them Shinar hatsan le i bourhlo them oun ačan koy. 3Oun yon penan yek ap o vavareste: “Avenn, las čik, te kras barra dran lende, oun rhačras len, te venn le zoreles.” Oun yon lan čik oun kran barra dran. Oun lan teera#11:3 teera goudron te čivenn le lat mank i barra, te ačenn kol barra khetne.
4Oun yon penan: “Avenn, mer krah menge i foro oun i baro kheer, hoy djal an o bolepen. Yaake sikrah hakeneske, har baro mer ham. Oun mer ačah khetne an ko them.”
5Koy vas o baro Devel tele, te dikell lo ko foro oun ko baro kheer, hoy kol menshe krenn. 6Oun o baro Devel penas: “Dik, yon hi halauter khetne an yek them oun rakrenn yek rakepen. Kanna krenn le kava foro. Hoy krenn le pal kova? Dell či, hoy yon gar hayvenna. Yon krenn lauter, hoy lenge an o shero vella. 7Avenn, djas tele pash lende oun das hakenes i vavar rakepen, yaake, kay yek i vavares bouder gar hayvella.”
8O baro Devel kras yaake, te ačan le koy bouder gar khetne oun hounte djan dran yek them an i vavar pral i tseli phoub. Oun yon moukan tele, te krenn le ko foro. 9Doleske kharell ko foro Babel. Kote kras o baro Devel, kay yek i vavareskro rakepen bouder gar hayvella. Yaake kras yob, te ačan le koy bouder gar khetne oun hounte djan dran yek them an i vavar pral i tseli phoub.
I laba kol menshendar, kay van pal o Sem
10Kova hi ko liil, kay činlo hi i laba kol menshendar, kay van pal o Sem. Har o Sem 100 (sheel) bersha phouro his, vas lestar o Arpaksad boldo. Kova his douy bersha pal o baro pani. 11Koy pal, har o Arpaksad boldo vas, djivas o Sem panč-sheel (500) bersha. Oun lestar van vavar čave oun ča bolde.
12Har o Arpaksad 35 (triyanda-te-panč) bersha phouro his, vas lestar o Shela boldo. 13Koy pal, har o Shela boldo vas, djivas o Arpaksad 403 (star-sheel-te-triin) bersha. Oun lestar van čave oun ča bolde.
14Har o Shela 30 (triyanda) bersha phouro his, vas lestar o Eber boldo. 15Koy pal, har o Eber boldo vas, djivas o Shela 403 (star-sheel-te-triin) bersha. Oun lestar van čave oun ča bolde.
16Har o Eber 34 (triyanda-te-star) bersha phouro his, vas lestar o Peleg boldo. 17Koy pal, har o Peleg boldo vas, djivas o Eber 430 (star-sheel-te-triyanda) bersha. Oun lestar van čave oun ča bolde.
18Har o Peleg 30 (triyanda) bersha phouro his, vas lestar o Regou boldo. 19Koy pal, har o Regou boldo vas, djivas o Peleg 209 (douy-sheel-te-enya) bersha. Oun lestar van čave oun ča bolde.
20Har o Regou 32 (triyanda-te-douy) bersha phouro his, vas lestar o Seroug boldo. 21Koy pal, har o Seroug boldo vas, djivas o Regou 207 (douy-sheel-te-efta) bersha. Oun lestar van čave oun ča bolde.
22Har o Seroug 30 (triyanda) bersha phouro his, vas lestar o Nahor boldo. 23Koy pal, har o Nahor boldo vas, djivas o Seroug 200 (douy-sheel) bersha. Oun lestar van čave oun ča bolde.
24Har o Nahor 29 (biish-te-enya) bersha phouro his, vas lestar o Tera boldo. 25Koy pal, har o Tera boldo vas, djivas o Nahor 119 (sheel-te-deesh-te-enya) bersha. Oun lestar van čave oun ča bolde.
26Har o Tera 70 (efta-deesh) bersha phouro his, vas yob dad. Leskre čave his o Abram, o Nahor, oun o Haran.
I menshe, kay van pal o Tera
27Kova hi ko liil, kay činlo hi i laba kol menshendar, kay van pal o Tera.
O Tera: Leskre čave his o Abram, o Nahor oun o Haran. O Haran las i čavo, o Lot. 28O Haran meras glan peskro dadeste an peskro dadeskro them Kaldea, an o foro Our. 29O Abram romedineras i Saray. Oun o Nahor romedineras i Milka, kolakro dad o Haran his. Koles his kol douy ča, i Milka oun i Yiska. 30I Saray nashte las kek čave.
31Oun o Tera las peskro čaves Abram peha oun o Lot, ko čavo peskro čavestar Haran, oun i Saray, koy romni peskro čavestar Abram. Oun khetne moukan le ko foro Our, hoy an o them Kaldea čiddo hi, te djan le an o them Kanaan. Oun yon van pash o foro Haran oun ačan kote. 32O Tera vas 205 (douy-sheel-te-panč) bersh phouro oun meras an o foro Haran.
Currently Selected:
1. Mose 11: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
