မာကု 11
11
ပည်ပ္လေါည်အံင် လီပ်တန်ုကုင်ယေရုရှလင်
(မဿဲ ၂၁.၁–၁၁; လုကာ ၁၉.၂၈–၄၀; ယောဟန် ၁၂.၁၂–၁၉)
1ဂဲလာ်ႈဒံတ်ပွံတ် တကုင်ယေရုရှလင်၊ အခိင်ဂဲလာ်ႈရောတ်ဒိုည်ႇ တဇိူင်ဆိုရ်တာန်လူန် ကုင်ရူဗက်ဖာဂေဂါရ် ရူဗေသနိ၊ ယေဆု ပ္လေါည်လာ်ႈပွံတ် တဘဲႇဒေဂါရ်အာရ်ကူ ရအာတ်။ 2အ်ုန်ဒါႈဒေတံမ်ငဲ တဂါရ်၊ “လာ်ႈပွံတ် တန်ုရူ ရအာတ်ပါရ်။ ပါရ်က်ုန်လီပ်တန်ုရူဒီန် ပါရ်ဒီယိူဝ်ဒေငိူပ် အဆေမိူဝ်ႈ ကာတိူမ်ဘလီအူတို ဂဲတုအူန်အ်ုန် က်ုရ်တောဒီန်။ ကာႈႎံရ်လီဒီန် တိူဝ်ႈပွံတ်ပါရ်ဒိူည်အေ့။ 3ဘီအူကူကူ က်ုန်ဆ်ုရ်မွံတ်ပါရ်၊ ‘ကောပ်ဆေ ပါရ်ရ်ုရ်ခိူည်အီုဝ်’ ပါရ်ဒီႎီရ်ဒါႈ တအ်ုန်၊ ‘တာဆရာ#၁၁.၃ တာဆရာ၊ က်ုန်ကာမိူဝ်ႈ ကီုရ်ညာ။ ဆ်ုန်ဘိူန်၊ က်ုန်ဟွည်ႇ ယာရ်ဒီႎီရ်တိုန်အ်ုန် က်ုရ်တောအီုဝ် အူဒီန်တောအူဒီန်အေ့။’”
4ကောပ်ခိူည်ဒီန် ဂါရ်လေႈလာ်ႈပွံတ်ဒေ၊ ဘံန်ဂါရ်ယိူဝ်ဒေငိူပ် ဘီတုအူန်လီအူတို တဘာင်ဘိုႈရိူဝ့်ဂါင် ပြောဒေင် ဂါရ်ကာႈပွံတ်ႎံရ်အ်ုန်။ 5အခိင်ဒီန် ဘီပ်ုရ်ဒီ ဒါ့်ဇံင်ငိူပ်က်ုရ်တောဒီန် ဆ်ုရ်မွံတ်ဂါရ်၊ “ဆေပါရ်ကာႈဒေညာ ႎံရ်လီဒီန်အဲႈ။”
6ဂါရ်ႎီရ်ဒါႈပွံတ်တဂဲ ခိူည်ငဲပ်ုန်တံမ်အူန် ယေဆုတဒေ၊ ဘီဂဲဒီန်မိူဝ်ႈ ဒဲႈပွံတ်အခွါင် တဂါရ်။ 7ဘံန်ဂါရ် တီုတ်ဒံရ်လာ်ႈ ပွံတ်ဒေဒိူည် လီဒီန် တယေဆု၊ ဂဲပ္လါရ်ႈပွံတ် ဆဒေါလှိူင်ဒေ တပါင်ကြောင်လီ ဒဲႈပွံတ်ယေဆုဘ။ 8ဘီဘာ့်ဘာ့်ဘိူဝ်ဘိူဝ်ဂဲ ပ္လါရ်ႈဒိုည်ႇဂြူဒေ တပါင်ရဒေင်။ ပ်ုရ်ဒီဂဲ က္လႇဒေဒိူည် ကာႇလှာဟေလှာယူပ် ပ္လါရ်ႈပွံတ် တပါင်ရဒေင်။ 9အီအ်ုန်ဇောမ်လာ်ႈ ရအာတ်၊ ရဘံန်ဂဲဒီန် ပြိုႈဒေဒါႈ၊ “ဟောရှဏ္ဏ၊ ဒဲႈဖြာ ဟိုင်ဒဲႈကျဒဲႈလ တအီအ်ုန်စွလေႈ တဇီုဝ် ကီုရ်ညာဖြာအီုဝ်။” 10“ကူန်အယ် ခူန်ဟောခံမ်ဒါဝိဒ် ဒီရောတ်ဒေတဲ ကပီုန်ကုင်အီုဝ် ဒဲႈယိူဝ်မံင်ဂလာ၊ တအရာပ်မျြံတ်ဇာရ် ဒဲႈပဲန်ဟောရှဏ္ဏ။”
11ယေဆု လီပ်ပွံတ်ရန်ုကုင်ယေရုရှလင် စွလာ်ႈ တကျောင်ဗိမာန်၊ အ်ုန်က်ုရ်ပံန်ဒေငိူပ်ပွံတ် က်ုရ်ႎျံရ်တွံန်တီ။ ဘံန်ရောတ်အခိင်ရမှိူဝ် အ်ုန်လာ်ႈရူမ် ဇောမ်တဘဲႇဒေ ကိူရ်အာရ်ကူဂဲ တရူဗေသနိ။
ယေဆု ကီန်တိူင် တီုင်ပ္လေပ္လေါႇ
(မဿဲ ၂၁.၁၈,၁၉)
12ဆငီရဘံန်၊ ယာမ်ဂဲႎီရ်ႎေင် ဒိုရ်ရူဗေသနိ ယေဆု က်ုန်ဘြာန်ပ်ုန်ဟောမ်။ 13ဘံန်အ်ုန်ယိူဝ်ဒေငိူပ် တီုင်ပ္လေပ္လေါႇအူတီုင်လှာက္လ်ုမ် အိုရ်အရာပ်ဆငါည် အ်ုန်လဲမ်ပ္လေကာယိူဝ်။ ကောည်လိုည် ကောပ်ကာမိူဝ်ႈ အခိင်ဟောမ်ပ္လေ ယိူဝ်ဂိူဝ်လှာအ်ုန်။ 14ယေဆုဒါႈ တတီုင်ပ္လေပ္လေါႇဒီန်၊ “စမံင်အူဒီန်အီုဝ် ယာမ်မောမိူဝ်ႈ မည်ဒဲႈဘီဘိူန်ထဲင် ဒေဟောမ်ပ္လေပ္လေါႇ တတီုင်မီဒီန်။”
တဘဲႇအ်ုန်ဂဲဒီန် ယိူဝ်ဒိုည်ႇဒေဆတီုင် ငဲပ်ုန်ဒါႈအ်ုန်။
ယေဆုလာ်ႈ တကျောင်ဗိမာန်
(မဿဲ ၂၁.၁၂–၁၇; လုကာ ၁၉.၄၅–၄၈; ယောဟန် ၂.၁၃–၂၂)
15အခိင်ဂဲရောတ် တကုင်ယေရုရှလင်၊ ယေဆု လီပ်ပွံတ်ဒေ န်ုကျောင်ဗိမာန်၊ အ်ုန်ရူပ်လေႈဒိုည်ႇပဲတ် ဘီက်ုရ်ဇိူရ်ႈက်ုရ်ယံင်ဂဲ။ ဟွည်ႇဒီန် အ်ုန်ကြူန်ရႎိူဝ်ႈဒိုည်ႇပဲတ် ခုင်ပွည်ဇာက်ုရ်လှာည်ရိူန်ဂဲဂါရ် ခုင်ရမာ့်ဘီယံင်ဆီမ်ကာႇကဲဂဲ။ 16ဆဲႈဒီန်အဆေမိူဝ်ႈဟွည်ႇ အ်ုန်ကာဒဲႈစိအခွါင် ဒေါဒေဒိူည်ကူမ် ႎက်ုရ်ခါမ် တကျောင်ဗိမာန်။ 17ဟွည်ႇဒီန် အ်ုန်ဒါႈဒေဆာင်ဆောန် ဘီဂဲ၊ “တန်ုဘေဲႇကျံမ် တဲမ်အူန် ဖြာဒါႈ၊ ‘ကျောင်ဗိမာန်အီုဝ် ဒီဘ်ုပ်တောႇ ဒဲႈအ်ုန်မိူဝ်ႈဂါင် ဟာရဆုတောင် အတွဘီတွံန်မျို။’ ကောည်လိုည် ပဲဒဲႈပဲတ် ဂါင်အီုဝ်ပဲန် အတွရမောဘီစိုန်ဂဲ။”
18ဘံန်ယဇ်ပုရောဟိတ်ဒါင်ဂဲဂါရ် တာဆရာနံပ်ဘေဲႇကျံမ်ဂဲ ယိူဝ်ဒေဆတီုင်အကျံင်ဒီန်၊ ဂဲလဲမ်ဒေင်လာ့်လာည် ဒဲႈဘိူန်ဒေပျံမ်ယံမ်ယေဆု။ ကောပ်ဖုင်ဘီက်ုရ်စုဂဲ အာမ်ဒိုည်ႇ တငဲပ်ုန်ဆာင်ဆောန်အ်ုန် ဂဲယောဒိုည်ႇဒေ။
19ဘံန်ရောတ်စူန်မှိူဝ်၊ ယေဆုဂါရ် တဘဲႇအ်ုန်ဂဲ လေႈပွံတ်ဒေဒိုရ်ကုင်။
ပဲန်ငါည်ရာင် ဒိုရ်တီုင်ပ္လေပ္လေါႇ
(မဿဲ ၂၁.၂၀–၂၂)
20အခိင်ရႎါရ်ႈဇံဝ်ဇံဝ် ယာမ်ဂဲလာ်ႈ တရဒေင်၊ ဂဲယိူဝ်ဒေငိူပ် တီုင်ပ္လေပ္လေါႇဟောင် အိုရ်တရျံရ်ႈဒေ။ 21ဘံန်ပေတရု နွံရ်ႈလှူႈ ဆေအ်ုန်ပဲန်ဒေဒိူည် အ်ုန်ဒါႈတယေဆု၊ “ငိူပ်မေန်၊ တာဆရာ တီုင်ပ္လေပ္လေါႇ ပ်ုန်ကီန်တိူင်မီအီုဝ် ဟောင်ဟျံတ်ပွံတ်ဒေယာ့်။”
22ယေဆု ႎီရ်ဒါႈတဂဲ၊ “ဒဲႈပဲညှိုမ်ဖြာ။ 23#မ ၁၇.၂၀; ၁ ကော ၁၃.၂အောဂြည်ညှိုႈတပဲ အဆေမိူဝ်ႈဟွည်ႇ ကာယိူဝ် ဖိူမ်ကာဆာင်ခါ တန်ုဖိူမ်ဒေ က်ုန်ဒါႈတဆိူရ်၊ ‘က်ုရ်ခြါည်မီ လာ်ႈဇာ်ႈပွံတ် တန်ုအိုမ်ပါင်လာည်’ က်ုန်ညှိုမ်တငဲပ်ုန်ဒါႈဒေ ဒီပဲန်ပွံတ် ခိူည်ပ်ုန်ဒါႈအ်ုန်ဒီန်။ 24ကောပ်ခိူည်ဒီန် အောဆ်ုန်ဂြည်တပဲ၊ အခိင်ပဲဆုတောင် က်ုန်မှာန်အူနဲအူနဲ ဒဲႈပဲညှိုမ်ဒေ ရံပ်တိူဝ်ႈညှိုႈ ခံင်ပ်ုန်မှာန်ပဲ၊ အ်ုန်ဒီဒဲႈ ဘ်ုရ်မှာန်ပဲဒီန်။ 25#မ ၆.၁၄,၁၅အခိင်ပဲဒါ့်ဇံင်ဆုတောင် က်ုန်ယိူဝ်ပ်ုန်တာင်အပေတ် တပါင်ဘီအူကူ အူနဲအူနဲ ပ္လိုတ်ခွါင်ဒဲႈဒိုည်ႇတအ်ုန်အေ့။ က်ုန်ညာခိူည်ဒီန် ကူန်ပဲဂွည်တပ္လေင် ဒီပ္လိုတ်ခွါင်ဒဲႈ အပေတ်ပ်ုန်လူတ်ပဲအေ့။” 26#၁၁.၂၆ တပံပ်ဘေဲႇ ပ်ုန်တဲမ်ပ်ုရ်ဒီဂဲ လှ်ုပ်အူန်တအခါန်ဒျံတ် ၂၆၊ ပဲက်ုန်ကာပ္လိုတ်ခွါင်ဒဲႈ တဘီဟံရ်၊ ကူန်ပဲဂွည် တန်ုခြိုင်ပ္လေင်ဒီန် ကာပ္လိုတ်ခွါင်ဒဲႈစိ အပေတ်ပ်ုန်လူတ်ပဲ၊ (ငိူပ်မေန် မ ၆.၁၅)။
ပ်ုန်ဆ်ုရ်မွံတ် အကျံင်အခွါင်အာဏာယေဆု
(မဿဲ ၂၁.၂၃–၂၇; လုကာ ၂၀.၁–၈)
27ဟွည်ႇဒီန် ဂဲႎီရ်ရောတ်ဒိုည်ႇ တကုင်ယေရုရှလင်။ ယာမ်ယေဆု လာ်ႈ တန်ုကျောင်ဗိမာန်၊ ယဇ်ပုရောဟိတ်ဒါင်၊ တာဆရာနံပ်ဘေဲႇကျံမ်ဂဲဂါရ် ဘီအဆာႇဒါင်ဝါဒါင်ဂဲ လာ်ႈဇူဒိုည်ႇတအ်ုန်၊ 28ဂဲဆ်ုရ်မွံတ်အ်ုန်၊ “ခိူည်အမူအီုဝ် မီဒါအခွါင်အာဏာ အဆေရ်ုရ်၊ အဆေဒဲႈ အခွါင်တမီ ရ်ုရ်အမူအီုဝ်။”
29ယေဆု ႎီရ်ဒါႈတဂဲ၊ “အောဆ်ုရ်မွံတ်ဘိူဝ်ပဲ အူနဲ၊ ဒဲႈပဲႎီရ်ဂြည်၊ ပဲက်ုန်ဟွည်ႇဂြည် ပ်ုန်ဆ်ုရ်မွံတ်အော အောဒီႎီရ်ဂြည် အခွါင်အာဏာအဆေ အောဒါ။” 30“ဂြည်ဘိူဝ်တအော၊ တရာဗတ္တိဇံ ယောဟန်အီုဝ် ယိူဝ်ႇဒိုရ်တပ္လေင်၊ က်ုန်ကာမိူဝ်ႈ ယိူဝ်ႇဒိုရ်တန်ုဘီဂဲအဲႈ။”
31အခိင်ဒီန် ဂဲဒါ့်က်ုရ်မိုန်တဒေ အူကူတောအူကူ၊ “ခိူည်မော အယ်ကျတဒါႈ၊ အယ်က်ုန်ဒါႈ ‘ယိူဝ်ႇဒိုရ်တဖြာ’ အ်ုန်ဒီဒါႈ တအယ် ‘ဆေညာ ပဲကာညှိုမ်ယောဟန်အဲႈ။’ 32ကောည်လိုည် က်ုန်မိူဝ်ႈအယ်ဒါႈ၊ ‘ယိူဝ်ႇဒိုရ်တဘီ’ ” (ကောပ်ဘီဂဲဒီန် ဒါႈထာင်ဒိုည်ႇ ယောဟန် မိူဝ်ႈပရောဖက်၊ အယ်ဘ်ုပ်ယောဒိုည်ႇ ဂဲတွံန်ကူ။) 33ဘံန်ညာခိူည်ဒီန် ဂဲႎီရ်ဒါႈ တယေဆု၊ “ယဲကာနံပ်စိ။”
ယေဆု ဒါႈတဂဲ၊ “အောမိူဝ်ႈ ကာပဲန်စိ အောဂြည်တပဲ အခွါင်အာဏာအဆေ အောဒါရ်ုရ်အီုဝ်။”
Currently Selected:
မာကု 11: SPBT
Highlight
Share
Copy
Want to have your highlights saved across all your devices? Sign up or sign in
The Word for the World International and The Shwe Palaung Bible Translation Reviewer Committee.
