Mateo 13
13
E paramichi katar o simichari
(Mk 4.1-9; Lk 8.4-8)
1Isto gua llive o Jesus likisto katar gua cher ta beslo pasa e mora. 2Ta sar avilo pasa le but sueto likisto ande llimia ta beslo, a sa o sueto saia pe chisai. 3Ondaka o Jesus dia lenge but orbe ande paramiche ta ppenela:
“Iek simichari llelo te ttovel e simiche ande ppuv. 4Ta kana ttovela e simiche, nesave peletar pasa o drom; avile e chiriklia ta jale e simiche. 5Aver simiche peletar maskar e barra, kote kai ni saia but chik; goleke goia simicha barili oma; 6a kana o kkam likisto, ppabarda la ta sukili, soke ni saia la zile. 7Aver simiche peletar maskar e karrne, ta kana e karrne barile tasade la. 8A nesave peletar pe lachi ppuv ta barili ta dia septelie, nesave die stotina, aver sovardes, aver tranda katar iek. 9Ko si le kan te asunel.”
Pala so si e paramiche
(Mk 4.10-12; Lk 8.9-10)
10Ondaka e disipulura avile pasa o Jesus ta puche le:
—¿Soke de orba lenchar ande paramiche?
11O Jesus ppenda lenge: “O Del sikavel tumenge so si gurudino katar e charoina e milosoki a lenge inai chinado. 12Goleke, gole kai si le, ka avel leke dino mai but; ta ka avel le but a gole kai inai le, i so si le ka avel letar ikando.#Mt 25.29; Mk 4.25; Lk 8.18; 19.26. 13Goleke lenchar dau orba ande paramiche, soke dikken a ni dikken, asunen a ni ka asunen ta ni acharen. 14Goleke lenge cherdili e porouka katar o Isaias kana ppenda:
‘E kanenchar ka asunen,
ta e akkenchar ka dikken a niso ni ka acharen.#Is 6.9-10.
15Soke o lio gale foroko cherdilo zuralo,
ta pe kanenchar asunen ppare,
ta ppangle pe akka
te na dikken,
ta ppangle pe kan te na asunen
cherdele te na acharen
te na irinpe mande te sastarau len.’
16“Blagosime tumare akka soke dikken, ta tumare kan soke asunen.#Lk 10.23-24; Ebr 11.13; 1 P 1.10-12. 17Chachimaia ppenau tumenge, kai but poraukura ta i chache manusa mangle te dikken so tumen dikken ta ni dikkle, ta te asunen so tumen asunen ta ni asunde.
O Jesus ppenel so si e paramichi katar o simichari
(Mk 4.13-20; Lk 8.11-15)
18“Asunen akana so mangel te ppenel e paramichi katar o simichari: 19Kana vareko asunel e orba katar e charoina ta ni acharel la, avel o bilacho ta lel so saia ttodo ande leko lio; gaia si e simicha kai pelitar pasa o drom. 20E simicha kai peli maskar e barra si sargo gola llene kai: Asunen e lachi viasta ta len la veselimaia, 21a sar inai len zile, oma muken o drom e Devleko ta kana avel e patnia ta kana mangen te maren len cheres e orba e Devleki, oma peren. 22A e simicha kai peli maskar e karrne si sargo gola llene kai asunen e Devleki orba, a e briga te cheren love ande gava sueto, ta o volipe kai si len po barvalipe kojaven len ta sa gala ezgode tasaven e orba e Devleki, ta ni muken len te den septelie ande lende. 23A e simicha kai peli pe lachi ppuv, si sargo gola llene kai asunen e orba e Devleki ta acharen la ta den septelie; ta den stotina, sovardes, ta tranda pe iek.”
E paramichi katar e bilache patra maskar o lliu
24O Jesus ppenda lenge aver paramichi ta ppenela: “E charoina e Devleki si sargo iek manus kai chudia lachi simicha ande pi umal. 25Ta kana sa e llene sovena avilo leko dusmano ta chudia bilache simiche maskar o lliu ta llelotar, 26ta kana barilo o lliu, i e bilache patra barile; 27ondaka llele e esluge kai o gazda e umaliako ta ppende leke: gazda ¿ni ttodan lachi simicha ande chi umal a katar likiste gala bilache patra? 28Vou ppenda lenge: ‘Iek dusmano cherda gava.’ A e esluge ppende leke: ‘¿Mange te lla te ikana gola patra?’ 29A o gazda ppenda lenge: ‘Iok soke sai avelpe kai kana ka chirden e bilache patra tumen sai chirden i o lliu. 30Mai sukar muken te barion e dui pe iek ttan lligo ni ka avel o vreme te chiden o lliu, ondaka ka ppenau e eslugenge: mai anglal chiden e bilache patra ta ppanden len pe umpe ta ppabaren len; a o lliu chiden le ande mi soba.’ ”
E paramichi katar e simicha mostasaki
(Mk 4.30-32; Lk 13.18-19)
31O Jesus ande aver paramichi ppenda lenge gia: “E charoina e milosoki si sargo e simicha katar e mostasa kai iek manus lia la ta ttoda la ande chik katar pi umal. 32Chachimaia voi si e mai minoni katar sa e simiche; a kana bariol cherdol e mai bari katar o vostano, ta cherdol sargo iek kas, gia baro kai e chiriklia llan ta cheren pe kuibura pe leke krangura.”
E paramichi katar e levadura
(Lk 13.20-21)
33O Jesus ande aver paramichi ppenda lenge gia: “E charoina e Devleki si sargo e levadura kai lia iek diskinia ta ttoda la ande iek umpa arina ta sa goia arina ppukkili.”
Sar sikavel paramichenchar
(Mk 4.33-34)
34Sa gala orbe ppenda o Jesus ande paramiche, a bi e paramichenchar ni dela lenge orba. 35Te sai cherdol so ppendaia o porauko:
“Ka dau orba ande paramiche;
ka ppenau ezgode gurudine
sar kana o Del cherda e sueto.”
E bilache patra
36Ondaka kana o Jesus mukla e llenen ta dia ando cher, avile pasa le leke disipulura ta ppende leke: Sikau amen so ppenel e paramichi katar e patra e bilache. 37O Jesus ppenda lenge: “Gua kai chudel e lachi simicha, si o Chavo e manuseko. 38E umal si o sueto; e lachi simicha si e chave e charoinake, a e bilache patra si e chave e bilacheke. 39O dusmano kai chudia e bilachi simicha si o llavolo; o vreme kana chidelpe o lliu si kana ka avel o son e ppuviako, a e llene kai chiden o lliu si e suechura. 40Goleke, gia sar chidelpe e bilache patra ta ppabardon ande iag, isto gia ka avelpe kana ka avel o son e ppuviako. 41O Chavo e manuseko ka bichalel pe suechonen, ta ka chiden katar pi charoina sa golen kai cheren te peraven averen ta golen kai cheren o bilachipe, 42ta ka chuden len ande furnava iagaki; kote ka avel o roipe ta e bari dar. 43Ondaka e llene chache ka klichin sargo o kkam ande pe Dadeki charoina. Ko si le kan te asunel.
E paramichi katar o barvalipe gurudino
44“Ta i e charoina e milosoki si sargo iek barvalipe gurudino ande iek umal kai iek lleno malavel ta guruvel le pale, ta llal veselimaia ta bichinel sa so si le ta chinel goia umal.
E but sukar klen
45“I e charoina e milosoki si sargo iek lleno kai chinel ta i bichinel lache klea, 46ta kana malavel iek klen but sukar, llal ta bichinel sa so si te sai chinel la.
E paramichi katar e mreza
47“E charoina e milosoki si sargo iek mreza, kai kana chuden la ande mora chidel katar sa e mache. 48Ta kana si pperdi, ikanen la katar e mora pe iek rig, ta ttovenpe besindo ta chiden e mache lache ande kotariche a e bilachen chuden avri. 49Isto gia ka avelpe kana ka avel o son e ppuviako: Ka liken e suechura ta ka ikanen e bilachen katar e lache, 50ta ka chuden e bilachen ande furnava iagaki; kote ka avel o roipe ta e bari dar.”
O barvalipe nevo ta i purano
51O Jesus pucha len:
—¿Tumen acharden gala ezgode?
—Von ppende: Ea, Gazda.
52O Jesus ppenda lenge:
—Goleke suako kovachi e zakonoko llanglo ande charoina e milosoki si sargo iek dad kai si le porodo kai ikanel katar po barvalipe ezgode neve ta i purane.
O Jesus ando Nazaret
(Mk 6.1-6; Lk 4.16-30)
53Kana o Jesus ppenda gala paramiche llelotar kotar. 54Ta avilo kai pi ppuv, ta sikavela ande kkanllira e judionenge kai sea kote. Ta e llene chudinape ta ppenena:
—¿Katar lel gua bizaipe ta cherel gala bare ezgode Devlikane? 55¿Inai gava o chavo katar gua kai cherel ezgode kastune? ¿Ni ikkardol leki dei Maria, ta leke pplal, o Santiago, o Jose, ta i o Simon ta o Judas? 56¿Ta ni si sa leke ppiorra amenchar? ¿Katar ikanel gava sa gala ezgode?
57Ta saurre joliaona cheres lete. A o Jesus ppenda lenge:
—Inai porauko te den le pachiu isto ande piri ppuv ta i ande piro cher.
58Ta kote ni cherda but bare ezgode Devlikane soke von ni pachana.
Currently Selected:
Mateo 13: ROM07
Highlight
Share
Copy
Want to have your highlights saved across all your devices? Sign up or sign in
Nuevo Testamento en Romané © Sociedad Bíblica Chilena, 2007.
