MATTHAI 14

Baptisma Petu Johan Thihnak

(Mar 6.14-29; Luk 9.7-9)

1Cuih tikcu ah Galilee ram uktu Herod in Jesuh thuhla a thei. 2Herod in, “Hi pa hi baptisma petu Johan a nung salmi a si ko. Cu ruangah a si hiti ih mangbangza a tuah thei,” tiah a kut hnuai bawi pawl kha a sim.

3Cuih hlanah Herod in Johan kaih ding thu a pek; cule an kai ih thirhri in an khih hnuah thawng ah an thlak. Ziangah cutiin a tuah tile a naupa Filip ih nupi Herodias ruangah a si. 4Tihnimtu Johan in Herod cu, “Herodias na ṭhit hi a dik lo,” tiah a rak ti ṭheu ruangah, 5Herod in Johan cu thah a duh, asinain Judah mi pawl a ṭih, ziangahtile Johan cu profet a si tiah an ruahmi a si.

6Cule Herod suah ni ah Herodias fanu cu mizapi hmaiah a laam ciamco. Herod cu a lung a kim ngaingai ih a hnenah, 7“I dil mi pohpoh ka lo pe ding tiin ka lo kam a si,” tiah a ti.

8A nu ih ruahnak a pek vekin Herod hnenah, “Hitawk hmun rori ahhin baptistma petu Johan ih lu cu darkheng in i pe aw,” tiah a fanu cun a ti.

9Cutikah Siangpahrang bawipa cu a riah a sia ngaingai. Sikhalsehla a sawmmi pawl hmai rori ih thukamnak a tuah zo ruangah a dil vekih tuah dingah thu a pek. 10Curuangah Johan cu thawng sung rori ahcun a lu a tanter. 11Johan ih lu cu darkheng in an run keng ih Herodias fanu cu an pek; anih in a nu Herodias hnenah a fehpi. 12Cun Johan dungthluntu pawl cu an ra ih a ruak an lak ih an phum; cuih hnuah Jesuh cu an va sim.

Jesuh In Mi Thawngnga Rawl A Dar

(Mar 6.30-44; Luk 9.10-17; Joh 6.1-14)

13Jesuh cu Johan thuhla a theih tikah a suak ih lawng a to ih a ṭhinnak hmun ah amah lawng a feh. Cuih thu cu mipi in an theih tikah an khua cio in an pok ih lei par in an feh ih amah cu an thlun. 14Jesuh cu lawng ihsin a suak ih misenpi kha a hmuh tikah a thinlung cu zaangfahnak in a khat ih cutawkah mina tampi tla a damter.

15Cuih ni zanlam ah a dungthluntu pawl cu a hnenah an ra ih, “Khua a siim thlang, hitawk hi hmun ṭhing a si fawn. Mipi hi kiangkap khua ah fehter awla anmah ih hrangah rawl va lei hai seh,” tiah an ti.

16Jesuh in, “An feh a ṭul lo ding; nanmah in an ei ding rawl ziangtal pe uh,” a ti.

17Annih in, “Hitawkih kan neihmi zate cu sanghlom nga le nga pum hnih lawng an si,” an ti.

18Cutikah Jesuh in, “Ka hnenah rak keng uh,” a ti. 19Misenpi pawl cu hrampi parih to dingah thu a pekta ih saang hlom nga le nga pum hnih cu a lak hnuah van lam hoi in Pathian hnenah lungawi thu a sim. saang cu a phel ih a dungthlun pawl hnenah a pek; a dungthlun pawl in misenpi hnenah an zem sin. 20Mi hmuahhmuah in an ei ih an khopzet. Cuih hnuah an hlahmi kha dungthluntu pawl in an sar ih bawm hleihnih a khat. 21Rawl a eitu pawl cu nunau le nauhak pawl siar cih loin pacang hlir thawng nga tluk an si.

Tidai Parah Jesuh A Feh

(Mar 6.45-52; Joh 6.15-21)

22Cule Jesuh in misenpi pawl cu a tlunter. A dungthluntu pawl cu lawng sungah a luhter ih tili khatlam kapah a fehter hai. 23Misenpi a tlunter hnuah amah lawng thlacam dingah tlang parah a hung kai. Khua a siim thlang naón cutawkah Jesuh cu amah lawng a um. 24Long cu tili parah hlat nawn a thleng zo ih thli a hmaiton in a hraan ruangah tilet in lawng cu suk le so ah a den ciamco.

25Zinglam nazi pathum le paruk karah Jesuh cu tidai parah a feh ih a dungthluntu pawl hnen pan in a ra. 26A dungthluntu pawl in tidai parih a feh rero an hmuh tikah an ṭih ngaingai. “Muthla a si lo maw?” tiah an ti ih thinphang in an raak ciamco.

27Jesuh in hmakhatte ah, “ṭih hlah uh! Keimah ka si! Zianghman phan ding a um lo,” tiah a ti.

28Cule Piter in, “Bawipa, nangmah na si ngaingai ahcun na hnenah tidai parin i fehter ve aw,” tiah a ti.

29Jesuh in, “Ra aw he,” tiah a ti. Curuangah Piter cu lawng sung ihsin a suak ih tidai par in Jesuh hnenah cun a feh. 30Asinain thli na pi ih a hran kha a hmuh tikah a ṭih ih ti sungah cun a pil deuhdeuh. Cutikah, “Bawipa, i run aw!” tiah a au.

31Hmakhatteah Jesuh in a hei dawh ih a hei kaih ngah hnuah, “Na zumnak a va mal so! Ziangah so na zum lo lawmmam?” tiah a ti.

32An pahnih cun lawng sungah an lut ih thli cu a dai. 33Cule dungthluntu pawl in lawng sungah Jesuh cu an biak ih, “Nang cu Pathian Fapa ngaingai na si,” tiah an ti.

Gennesaret Ah Mi A Damter

(Mar 6.53-56)

34Tili cu an tan ih Gennesaret peng an va thleng. 35Cutawk minung pawl khal in Jesuh cu an rak thei thiam. Curuangah kiangkapih a ummi mina hmuahhmuah an ko ih Jesuh hnenah an ratpi. 36A dam lomi pawl in a puanzim tetal tham thei dingin an dil ih a puanzim a thamtu hmuahhmuah cu an dam thluh.

Currently Selected:

MATTHAI 14: FCL

Highlight

Copy