JEREMIAH 4
4
Sualsir Dingih Kawhnak
1 Bawipa in, “Maw Israel mi pawl, kir sal nan duh ahcun ka hnenah ra kir sal uh. Ka ningsin zetmi milem biaknak cu nan hlon ih ka hmaiah rintlak le hngetkhoh ih nan um ahcun, 2ka hmin sal in siatserhnak nan tuah tikah thudik le dingthluk lairelnak le dingfelnak thawn nan tuah a si ahcun nan hrangah a ṭhami a si ko ding. Cuticun miphun hmuahhmuah in an parih thlawsuah pe dingah in dil ding ih in thangṭhat ding a si,” a ti.
3 Bawipa in Judah mi le Jerusalem khua mi hnenah, “Nan leileh hrih lomi cu let thlang uh, nan thlaici cu hling lakah vorh hlah uh. 4Maw Judah mi le Jerusalem mi pawl, nan Bawipa keimah thawn nan tuahmi thukamnak cu kimternak in ka hmaiah serhtanmi si uh; cuticun ka hrangah thianghlim zetin hlan-aw uh. Cutiih nan tuah lo asile thil nan tuahsual ruangah nan parah ka thinhengnak cu meisa bangin a alh ding ih a hmit theitu zohman an um lo ding,” tiah a ti.
Judah Hrang Raldonak A Thleng Ding
5Hi ramsung khuazakip ah
tawtawrawt tum uh,
Ringzet le fiangzetin tum uh.
Judah mi le Jerusalem mi pawl cu
ralhruang ih kulhmi khawpi
sungih tlan dingin sim uh.
6Zion fehnak lamzin hmuh uh;
Himnak hmunah tlan uh;
Muangcang hlah uh!
Bawipa in harsatnak
a thlenter ding;
Saklam ihsin a nasazetmi siatralnak
a thleng ding.
7A relhnak ihsin kiosa a rat vekin,
Ram tampi siatsuahtu a tho zo;
Judah siatsuah dingin a ra lai rero.
Judah khua pawl cu khawrop ah
an cang ṭheh ding ih,
zohman a sungah an um lo ding.
8Curuangah buri hnipuan hruk uhla,
ṭap-ai in rak ciamco uh;
Ziangahtile Bawipa ih
thinhengnak cu Judah par ihsin
a kiang hrih lo a si.
9Cule Bawipa in, “Cuih ni ahcun siangpahrang le a kut thuai bawi pawl ih ralṭhatnak a cem ding. Puithiam pawl an khawruah a har ding ih profet pawl khal mangbangin an um ding,” a ti.
10Cutikah kei in, “Maw Cungnungbik Bawipa, Jerusalem mi pawl hi nasazetin na bum hai a sihi! Daihnak a um ding, tiah na sim naón ralnam cu an hngawng thawn a dai-aw thlang a si,” tiah ka ti.
11Jerusalem mi pawl lamah nelrawn ih tlangram ihsin thlipi nasazetin a hrang ding ti simfiang ding can a thleng zo a si. Cuih thli cu meisa vekih a sami thlipi a si ding. Fanghii a seemtu thlizil nem a si lo ding. 12Bawipa ih thupek in a ra hrangmi thli cu cuhnak ih a cak deuhmi thli a si ding. Cuih thli cu a minung pawl parih thu ṭhennak a si dingih thu a petu cu Bawipa amah a si ding.
Judah Ram Ral In An Kulh
13Zohhnik uh, ral pawl khawdur bangin an ra. An rangleng pawl cu phusiing thli hnakin an cak deuh ih an rang pawl cu muvanlai hnakin an zamrang deuh. Kan lamzin a pit! Kan cem a si!
14Maw Jerusalem, thilsual na tuahmi pawl cu na thinlung ihsin kholhfai ṭheh awla cutiin runnak na ngah ding. Ziangtik tiangso thilsual cu na thinlung in na ngaihtuah hrih ding?
15Dan khua le Efraim tlangpar ram ihsin thuthang sia thantu dingah tirhmi an ra thleng. 16Ral pawl ram hlapi ihsin an ra ding tiah miphun pawl le Jerusalem ralrinnak pe dingah an ra a si. Ral pawl in Judah khua pawl cu an auh ding ih, 17mi in an lo an kil vekin Jerusalem khawpi cu an kulh ṭheh ding. Ziangahtile a minung pawl in Bawipa an dodal in ral an tho a si. Bawipa in a sim zo.
18Maw Judah, na nunzia le na thil tuahmi in hi thil poimawh cu na parah na thlengter. Na sualnak in hi tuarnak cu a suahter. Feipi bangin na thinlung a lo sun zo a si.
Jeremiah A Riah A Sia
19A va na ve! A nat ka tuar thei lo!
Ka thinlung a na!
Ka thin a tur dukdo!
Daite in ka um theilo. Tawtawrawt
tum thawm ka thei!
Raldonak au thawm ka thei.
20Siatralnak pakhat hnu pakhat
an thlun aw;
Ram pumpi cu hnawmpen ah a cang;
Rinlopi in kan puanthlam pawl
cu siat ṭheh an si.
An puanzar pawl cu an thlek
ṭheh a si.
21Ziangtik tiangso raldo awknak
thawng hi ka theih ding ih,
Tawtawrawt tum thawm cu
ka theih hrih ding?
22 Bawipa in, “Ka minung pawl
hi an aa a si;
Keimah in thei nawn lo,
Nauhak aa vek an bang;
Theihthiamnak zianghman an nei lo.
Thilsual tuah cu an thiamzet,
Asinain thil ṭha cu an tuah suak
dah lo,” a ti.
Jeremiah In Siatralnak A Hmu Cia
23Leilung ka zoh ih ṭiosanmi
ramṭhing le hnawmpen a si.
Van ka hun zoh ih tleunak
zianghman a um lo.
24Tlangsaangpi ka zoh ih an hnin
aw durdo;
Tlang fate pawl an seep-aw rero.
25Milai zohman an um nawn lo;
Vate pawl khal an zamhlo ṭheh zo.
26Ram ṭhazet cu nelrawn ah
a cang zo.
An khawpi pawl cu hnawmpen ah
an cang ṭheh zo.
Bawipa ih thinhengnak ruangah.
27 Bawipa in, “Leilung pumpi cu ramṭhingah a cang ding, asinain ka siatter ṭheh lo ding,” a ti.
28Leilung cu mithi a ngai ding;
Van tla khi a thim ṭheh ding.
Bawipa in a sim zo ih
a thinlung a thleng nawn lo ding.
A thu a ruat cat zo ih,
dungah a siip nawn lo ding.
29Rang ralkap le conkiang ralkap
pawl ih thawmvang an theih tikah
zokhal an tlan ṭheh ding.
Mihrek cu tupi sungah an relh ding,
Midang cu lungkhaamah an van ding.
Khua hmuahhmuah in a ṭhing ṭheh
ding ih milai zohman an um
sal nawn lo ding.
30Maw Jerusalem, na cem riai a si!
Ziangah so hnipuan sen in
na thuam awk ciamco?
Ziangah so nan sui le nan ngun
hlawnthil nan suah ih
nan thuam awk hi?
Ziangah so nan mit tla mawinak sii
nan hnih?
A lakah nan mawi-awter men a si!
A lo ngaitu na tlangval pawl in
an lo hnong zo ih,
thah an lo tum sawn a si.
31Nunau nau neih tikih ai thawm
bangtuk ka thei;
Fatir nau neih ih ṭah-ai
thawm vek a si.
Cumi cu Jerusalem in a thaw a thawh
thei lo ih ai thawm a si.
A kut a hun thlir ih,
“Kei cu ka cem zo e,
Keimah thah dingah an ra zo,”
tiih a ainak thawm a si.
Currently Selected:
JEREMIAH 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
