اعمال 12
12
کلیسیا دے مصائب
1اُنہاں ڈینہاں ءچ ہیرودیس بادشاہ کلیسیا دے کُجھ لوکاں کُوں گرفتار کیتا تاں جو اُنہاں کُوں تکلیف ڈیوے 2تے یُوحنّا دے بِھرا یعقُوب کُوں تلوار نال قتل کیتا۔ 3جِیں ویلے ڈِٹھا جو یہُودیاں کُوں ایہ گالھ پسند آئی تاں بے خمیری روٹی دی عید دے ڈینہاں ءچ پطرس کُوں وی گرفتار کر گِھدا، 4تے اُونکُوں پکڑ تے قید کر ڈِتا تے پہرے کیتے چار چار سپاہیاں دے چار پہریاں ءچ رکھیا، اِیں اِرادے نال جو عید ِ فسح دے بعد اُونکُوں لوکاں دے سامنڑے پیش کرے۔ 5بس پطرس تاں پہرے ءچ ہا پر ساری کلیسیا اُوندے کیتے خُدا کنُوں دل و جان نال دُعا کریندی پئی ہئی۔
پطرس قید خانہ تُوں رہائی پیندے
6جِیں ویلے ہیرودیس اُونکُوں پیشی کیتے گِھن آوݨ آلا ہا تاں اُونہی رات پطرس ڈُو زنجیراں نال بدھیا ہویا، ڈُو سپاہیاں دے اَدھ ءچ سُتا پِیا ہا تے پہرے دار دروازہ اُتے قید خانہ دی نگہبانی کریندے پئے ہَن۔ 7ابڑغُت خُداوند دا ہِک فرشتہ ظاہر تھیّا تے پُوری کوٹھڑی ءچ سوجھلا تھی گِیا۔ اُوں پطرس دی پسلی کُوں ہتھ لا تے اُونکُوں جگایا تے آکھیا جو ”جلدی اُٹھی۔ تے زنجیراں اُوندے ہتھاں ءچوں کُھل پئیاں۔“ 8وَل فرشتے اُونکُوں آکھیا، ”کمر بَدھ تے آپنڑی جُتی پا گِھن۔“ اُوں اِینویں ای کیتا۔ وَل فرشتے اُونکُوں آکھیا، ”آپنڑا چولا پا تے میڈے پِچُھوں تھی پو۔“ 9پطرس نِکل تے اُوندے پِچُھوں تھی پِیا تے اُونکُوں پتہ نہ لگیا جو فرشتہ جیہڑا کُجھ کریندا پئے او سچ ہے بلکہ ایہ سمجھیا جو مَیں کوئی رویا ڈیدھا پِیا ہاں۔ 10بس او پہلے تے ڈُوجھے پہرے ءچوں نِکل تے اُوں لُوہے دے دروازے کولھ پُجے جیہڑا شہر دو ویندا ہے۔ او اُنہاں کیتے آپنڑے آپ ای کُھل گِیا۔ بس او نِکل تے گلی دے اخیر تئیں گئے تے فرشتہ فوراً اُوندے کولُھوں چلیا گِیا۔
11وَل پطرس ہوش ءچ آ تے آکھیا جو ”ہُنڑ میکُوں پکّا یقین تھی گئے جو خُداوند آپنڑے فرشتہ کُوں بھیج تے میکُوں ہیرودیس دے ہتھ کنُوں چُھڑا گِھدے تے یہُودیاں دے اِرادے کُوں ناکام کر ڈِتے۔“
12جِیں ویلے پطرس ایہ جاݨ گِھدا تاں مریم دے گھر گِیا جیہڑی اُوں یُوحنّا دی ماء ہئی جیہڑا مرقس اکھویندے۔ اُتھاں بہُوں سارے لوک جمع تھی تے دُعا کریندے پئے ہَن۔ 13جِیں ویلے اُوں دروازے دی کِھڑکی کھڑکائی تاں رُدی ناں دی ہِک نوکرانڑی ڈیکھنڑ آئی۔ 14او پطرس دی اواز سُنجاݨ تے اِتنا خوش تھئی جو دروازہ کھولے بغیر پِچُھوں بھج پئی تے آکھنڑ لگی جو ”پطرس دروازے اُتے کھڑا ہے۔“ 15اُنہاں اُونکُوں آکھیا، ”تُوں پاگل تھی گئی ہیں،“ پر او یقین نال آدھی ریہی جو ”او پطرس ای ہے۔“ وَل اُنہاں آکھیا جو ”اُوندا فرشتہ #12:15 یعنی اُوندی حفاظت کرݨ آلا فرشتہ جیہڑا اُوندی شکل ءچ آ گِیا ہے۔ ہوسی۔“
16پر پطرس کھڑکیندا ریہا تے جِیں ویلے اُنہاں دروازہ کھولیا تاں اُونکُوں ڈیکھ تے حیران تھی گئے۔ 17اُوں اُنہاں کُوں ہتھ نال اِشارہ کیتا جو چُپ راہوݨ تے اُنہاں کُوں ڈسایا جو خُداوند اُونکُوں کِینویں قید خانہ ءچوں باہر کڈھے۔ وَل آکھیا، ”یعقُوب تے بِھرانواں کُوں اِیں گالھ دی خبر ڈے ڈیوائے“ تے خود کہیں بئی جاہ چلیا گِیا۔
18جِیں ویلے سویل تھئی تاں سپاہی بہُوں گھبرا گئے جو پطرس نال کیا تھئے۔ 19جِیں ویلے ہیرودیس اُونکُوں تلاش کروایا تے اُوندا پتہ نہ چلیا تاں پہرےداراں دی پُچھ گچھ کر تے اُنہاں دے قتل دا حُکم ڈِتا۔
وَل او یہُودیہ کُوں چھوڑ تے قیصریہ ءچ ٹِکیا ریہا۔
ہیرودیس دی وفات
20ہُنڑ ہیرودیس صور تے صیدا دے لوکاں تُوں بہُوں ناخوش ہا۔ بس او لوک کٹھے تھی تے اُوندے کولھ آئے تے محل دے ناظم بلَستُس کُوں آپنڑا حامی بنڑا تے بادشاہ کُوں صُلح دی درخاست کیتی، اِیں واسطے جو اُنہاں دے مُلک کُوں بادشاہ دے مُلک کنُوں رَسد پُجدی ہئی۔
21بس ہیرودیس ہِک ڈینہہ مقرر کر تے آپنڑا شاہی لباس پاتا تے تخت ِ عدالت اُتے بیٹھا تے اُنہاں نال خطاب کرݨ لگا۔ 22پر لوک چیخنڑ پے گئے جو ”ایہ تاں کہیں معبُود دی اواز ہے، اِنسان دی نئیں۔“ 23اُونہئی ویلے خُداوند دے فرشتہ اُونکُوں ماریا، کیوں جو اُوں لوکاں دی تعریف قبول کر تے خُدا کُوں جلال نہ ڈِتا تے اُوندے جِسم ءچ کیڑے پے گئے تے او مر گِیا۔
24پر خُدا دا کلام ترقی کریندا تے ودھدا گِیا۔
25تے برنباس تے ساؤل آپنڑی خدمت پُوری کر تے یُوحنّا کُوں جیہڑا مرقس اکھویندے، نال گِھن تے یروشلیم تُوں واپس آئے۔
Currently Selected:
اعمال 12: SKRV
Highlight
Share
Copy
Want to have your highlights saved across all your devices? Sign up or sign in
Modern Central Saraiki Bible © 2024 Strategic Resource Group
