Kejadian 18

1Ura, yuk talak ara, Abraham arye buru mutuku bukni, ninye si Mamre arye, taleamuk yo si ibuk yo dam tia mapmok talak ara, Allah el si Yahweh arye panabuka tikilyayukba, Abraham arye eibuk. Aning ara winibuk. Tonok sum keting duk-dukan noutamak ara, Abraham el tia aik, cang kain tenda aik bublan dam bunmok buk, ninye winilye eibuk. 2Mangkau kanye bobuka talye bukmokak, anang winilye yanganmekba, eibuk. Eibukce, ‘Si ereipnun’ tenen, tikukukce, sik yanganmek bisik bikbik abuka biyukce, kisok kanupdongobuka bukukce, “Telebe,” nyabuk.

3Nyabukce, ayupu ton nyabuk. “Na ni yapu, anggun kanye telebe teneptum toura, asukumuk dikdik septume. 4Pera mutuku arye yanmalumba, ben dupmasila ati, narye nyapdeipniba, na pil melin nang arye mek kwebuka deibikirye, anggun yan mek liknusiyake. 5Tonda, anggun mikip kilina ati, din ning dabuka arepsiniba, dipmunyopura, tuba tonap telebuk unamalume. Ati, anggun binamalum bisik min kum binapmunye talak ara, asukumuk mitik anun ton neika unamabe,” nyabuka, Abraham arye morobuk. Nyabuka morobukba, sikce, “Telebe, anyapmasilam touk winipsilyame,” nyabik.

6Nyapmikba, Abraham arye bikbik abuka biyukce, el cang kain tenda aik dam tamubuka biyukce, Sarah ati nyabuk. “Akilo, roti dana deiyok ning, tepung pia teleb ning ara, 18 liter dobuka, minopce kentinipnulyame. Nun ninye asik nang ati, roti memebuka dapsilyame,” nyabuk. 7Nyabukopura, el pil melin nang arye, el sapi basam weinmekak bikbik abuka biyukce, sapi basam mi tonok, nong weik ning wibukabukce, anang ati nyabuk. “Anggunda minopce, asapi mi obuka yupmunce, tup dobuka dapnululume,” nyabuk.

8Elce nyapmok touk, sik nirya akunum winibikopura, din ning kintinipmik arye, susu ap, sik dapmek tup ap, din ning el si keju ap, dobukabukce, ninye asik nang winilye nang ati arebuk. Arebukopura, sik dinmek talak ara, Abraham arye, ayo deiyok dam bukuka dinmok. 9Talya bukmokba, anang arye elti, asipdeyik. “An kil dan do?” nyabuka asipdeyikba, “Na tia aik cang kain tenda aik pum bunmale,” nyabuk.

10Nyabukura, awinilye nang noutamak, tonoknye birye nyabuk. “Aketing tamun akunum upliba, awala atonun bukni, orketeng tamun noutam tamubuka yanyopura, an kil Sarah arye, sal mi deipnamkile,” nyabuk.

Ura, anye birye, ayupu nyanmok talak ara, Sarah arye ocang kain tenda aik mining dam bukmokce, ayupu kekebuk. 11Abraham ap, Sarah ap, sik bitinye pia wisi akunum danamdika ati, tonda Sarah ara, kilapu arye mapu tonap kum deipmanto talak, akunum wisi danamuka ati, Sarah arye ayupu kekebukce, el kanye pum tam arye aukutubuk.

12Ara, ‘Nara, pia wisi dase kil ununa ati, ato kilapu ara, mapu ton kum delinyaka anya arye, yata wiribuka arye mi deiptinye do? Tonda, na dopnuknye babye, pia wisinye ati ara, aning ara kum winipmanto,’ tenebukce, akutubuk.

13Akutubukba, Allah el si Yahweh arye, Abraham ati nyabuk. “An kil Sarah ara, yata ati nyabuka akutubmo do?” nyabuka asipdeyuk.

14Asipdeyukce, ayupu ton nyabuk. “Yata deiyok ning do nirya, yata mambul weik ning winiptuba, Allah el si Yahweh arye tenelye touk, bisipturye malye kum uptu do? Aning ara, ikin kum upnutue. Aning ara, kum winipmanto. Arup nyapmakin touk, orketeng tamun noutam, awala atonun tamubuka yanyopura, an kil Sarah arye, sal mi deipnamkile,” nyabuk. 15Nyabukura, Sarah kekebukce, ilil ubukba, “Kume, na kum akutupmanue,” nyabuka pilibuk bukni, anye birye, “Kume, anyapmanilama ara, tilila nyaplame. Dipkoprop akutubmome,” nyabuka wenebuk.

‘Allah arye Sodom mutuku ninye ati, wenebuka oplyak’ tenen, Abraham arye, morobuk yupu

16Aninye winilye ara, sik din ning dinmeka ani, sirya dibikopura, panabikce, ‘Sodom mutuku otam binuyap’ tenen, banmek. Sik bisik banmek talak ara, Abraham ap mitik tonun neika banmek. 17Bisik banmek talak ara, Allah el si Yahweh arye tenebuk. Narye, ‘Winipnamle,’ tenyamse ning ara, yata deiyok ati, ‘Abraham kekeplyak’ tenen, dungnupman do?

18Kume, na mikip arye meliamni bukni, Abraham arye deipliba, dadeipdanin banamak nang yala-yala weik unamake. Elda, sik apu koproba unamle. El mapu silip, el yala nang ara, mikip weik nang unamake. Sik ti melilamnye ani, sik unamak deice arye, yuk mutuku nang mutuku-mutuku nirya, teleb kipdeipnamsine. Ara, Abraham deice aryuka.

19Tonda, ‘Anye birye, el deipnamle mapu nirya ap, sikce deipnamak mapu nirya ap ati, “Allah el si Yahweh arye nyasilye yupu, pia moubuka talipmunce, el yupu uk dobolbanamlulume. Diksukumuk wininamlulume,” nyanamle’ tenen, nara Allah, na si Yahweh arye, Abraham akunum wipdeipse. Abraham arye nyapliba, el tam nang nirya arye aning atonun winibicopura, na Yahweh arye elti, ‘Winipnamkine,’ nyapdeipse yupu nirya dipkoprob winipnamne. Allah el si Yahweh arye Abraham biti tenebukce, ayupu nyabuk.

20Tonda, Allah el si Yahweh arye Abraham biti nyabuk. “Abraham anda, na kekepse ning ara, nyapnukine. Ara, ‘Sik Sodom mutuku nang ap, Gomora mutuku ninye ap, pia malye weik wininyake. Amutuku ninye, sik winilamak ning nirya ara, pia malyeuk wininyake,’ nyalamnikba, kekepse. 21Ayupu nyalamnikba, kekepsa ati, ‘Aning ara, dib do, tilila do?’ tenen, sik dam koulukuka binirye, dipdenamane. Na asing arye eipnyopura, ‘Dipkoprop wininyak,’ tenepnamne.” Allah arye Abraham ati nyabuk.

22Allah el si Yahweh ap, Abraham ap, asukumuk tikuka aunmarik talak ara, sik yuk nang bitinye ara, menekuka banmarikce, Sodom mutuku bisik tuba banmarik. 23Banmarik buk, Abraham arye Allah ati asipdeyuk. “Naie, omutuku unyak ninye noutamak ara, malye wininyak ninye babye, teleb wininyak nang babye, atonunuk wenebuka opnamalam do?

24Na walwal bukni, amutuku noutamak ara, teleb wininyak nang, yupa weik 50 nang ton uptopura, anang mangkau kanye bobuka, teleb wininyak nang ati, ‘Amutuku kum kipdeipnune,’ tenepmalam ning ara, bataktum do? Kum do? 25Se, na nio, sik teleb wininyak nang ap, malye wininyak ninye ap, likina kumce, talye mangkau arye, oltakana ara, kum winipnalam darebe. Yata deiyok ati, teleb ninye ap, malye ninye ap atonunuk winipnamalam do, tenepne. Tukwak mutuku im sirya, mutuku sirya nirya unyak nang ati, Yupu Bokolina Deiyoknye birye, diksukum ning kum winipnamalam do? Na kanye ara, telebuk winipnalame,” nyabuk.

26Abraham arye nyabuka asipdeyukura, Allah el si Yahweh arye tamubuka nyabuk. “Ura, Sodom mutuku unyak nang dipdenirye, talye mangkau kanye bobuka, teleb wininyak ninye 50 upting toura, sik lyena ati amutuku nirya kum, kum kipdeipnamane,” nyabuk. 27Allah arye nyabukba, Abraham arye nyabuk. “Se, na nio, nara tukwak arye kwepdeipnulume, talye uku sice atonun, mambul kumnye unun bukni, ayupu deiyok koubuka, akunum nyapra banmane anya arye, ayupu ton dukdongopbuka nyapnukine.

28Sodom mutuku ninye dipdeminba, teleb winin ninye 45 dem ulamting toura, talye mangkau kibuka opnamalam do? Lima puluh (50) nang nyapmana bukni, pamubarye sukdongoblyopura, adiparyuk obuka sirya daknamalam do?” nyabuka morobukba, Allah arye, “Yo telebe. Teleb winin ninye 45 eipnyopura, amutuku ninye nirya, obuka kum kipdeipnamane, bukni anang ara, bataknamne,” nyabuk.

29Nyabukura, Abraham arye, ‘Tonap mikip arye nyapnun’ tenen, dukdongopbuka nyabuk. “Naie, teleb winin ninye, 40 dem ulamting toura, aning arando?” nyabuka morobukba, Allah arye tamubuka, “Telebe, 40 teleb winin ninye ulamicopura, sik nirya wenebuka kum opnamne,” nyabuk. 30Nyabukopura, Abraham arye, “Se na nio, ‘Yu upkiliba, wenepnamnilam’ tenen, ilil upnil bukni, yupu ton nyapnun do? Dipdeminba, teleb winin ninye, 30 dem unmaceura, bataktum do?” nyabuka morobukba, Allah arye, “Telebe, 30 teleb winin ninye unmaceura, sik nirya wenebuka kum opnamne,” nyabuk.

31Nyabukopura, Abraham arye, “Naie, kanam asa arye akunum nyabuka moropmakune anya arye, aning ton nyapnukine. Sodom mutuku noutamak, 20 teleb winin ninye diamuk unmaceura, anang arando?” nyabukba, Allah arye, “Telebe, 20 teleb ninye eipnyopura, kum opnamane,” nyabuk.

32Nyabukopura, Abraham birye sirya talak ara, nyabuk. “Na nio, ‘Na ti yu upkilaba, derepniminyak’ tenen, na ilil upnil bukni, yupu tonok ton asipnukine. Sodom mutuku noutamak, teleb winin nang, 10 dem ulamiceura, ‘Amutuku nirya kum kipdeipnune,’ tenepmalam ara, bataktum do?” nyabuka morobuk. Nyabuka morobukba, Allah arye, “Telebe, teleb winin ninye eipnyopura, 10 ninye ulamiceura, amutuku nirya wenebuka kum opnamane,” nyabuk.

33Allah el si Yahweh arye, ayupu nyabukopura, ‘Sodom mutuku obinun’ tenen, bisik banmok ati, Abraham biti yupu ton kum nyabuk. Abraham ara, tamubuka, el tia aik cang kain tenda aik domukak tamubuka biyuk.

Currently Selected:

Kejadian 18: EIPA

Highlight

Copy