Kejadian 17

Allah arye Abram el si punubuka, winiryuk sisibuk yupu

1Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame. 2Nara Allah arye anti, nyalin yupu nyapkine. Ara, na mikip deice arye melikinyeba, ance deipminba, dadeipdanin, banamak mapu ara, pia weik unamake. An yala nang ara, mikip weik unamake.” Allah arye, Abram biti nyabuk.

3Nyabukura, Abram kekebukce, ‘Se, na ni Allah ati, si ereipnun’ tenen, tuku deice sakuka mabukce, kisok kanupdongobuk. Winibukopura, Allah arye, ayupu ton dukdongopbuka nyabuk.

4Narye, ‘Winipnamkine,’ nyabuka, nyalin yupu nyapnukin ara, ani. Ara, narye melipkineba, ance deipminyeura, dadeipdanin banamak nang ara, tonok yalauk kume. Ninye ayala-yala pia weik unamake.

5Tonda, narye an si ati, yuk ning nyapdeipkinirye, si punubuka sipnamkine. Minop arye Abram nyalamkik bukni, wini talak arye dipdongobuka oyanamla talak nirya ara, an si ati, ‘Abraham,’ nyanamkiyake. Deiyok ara, ance deipminyeba, dadeipdanin banamak nang ara, yala pia weik unamake ati, winiryuk si, ‘Abraham’ nyapkine. (Ibrani yupu deice ara, Abraham ara, ‘Elce deiamuk mapu arye deiamik yala nang ara, pia weike’ tenen, nyanyake.) 6Narye melipkineba, ance deipminyeura, dadeipdanin banamak nang yala-yala ara, pia weik unamake. Aninye nirya ara, yupa pia weik nukmanto kum, milyar unamake. Tonda, aninye noutamak ara, ninye deiyok nang, Raja nang ton unamake.

7Ayupu nyapdeipmakin yupu ara, an unalam talak ati, kum nyapdeipmakin. Ara, oketeng tamun, oketeng tamun weike, pia doyanamle keting tamun noutamak nirya ara, kum bataknamne. Narye nyalin yupu nyapmakin ning ara, pia yupu ati nyapkine. Narye anti talikiniba, na si pia erenilyam touk, ance deipminyeba, dadeipdanin banamak nang, ayala-yala nirya pia talipniba, sikce na siuk erenamniyake. Sik nirya arye nati, “Nun ni koproba Allah ara, an uka,” nyaniceura, aninye ati, narye pia talinamne. 8Ati, pia dipkoprob nyapkine. “Kanaan mutuku nirya ara, narye arepneba, ance deipminyeba, dadeipdanin banamak nang ara, amutuku pia talinamake. Narye anti, arekinye touk, arepneba sik aminyan talak unamak ninye babye talinamake.” Allah arye, Abram biti nyabuk.

‘Nun ni koproba ara, Allah el tonoka, tenenamniyak’ tenen, lak len ati, mapu den bam bol sekna ati, arebuk yupu

9Allah arye, Abraham biti nyabuk.

Narye wininamkin ning, akunum laka nyapmakin bukni, an wininalam ning laka nyapnukine. Ara an ap, an mapu silip ap, ance deipminyeba, dadeipdanin banamak yala ninye nirya ap, na si erena ati, pia wininamlum ning ara nyapnukine. 10Anggunce pia wininamlum ning ara, ani. Sal nirya ap, sal mapu nirya ap ara, sik den bam bol mouse ning sekenamake. Tonok ning babye kum bataknamake. Winipmunyopura, ara laka kilin ning winipnamsile.

11Ara, yuk nang nirya arye, ‘Kume, Abraham ap, el mapu silip nirya ap, el tam ninye nirya ap ara, sik nirya arye Allah ati, “Wininamabe, ance tenesilyam touk wininamabe,” nyabuka, nyalin yupu akunum nyapdeibike,’ tenebuka kel bikinamsiyake.

12Winipnamlum ning ara, ani. An yala nang arye delinamak sal mapu nirya ara, dadeipmaca ani, pinbarye sum akunum uplyopura, sik den bam bol mouse ning sekenamake. Tonda, an mapu silip kopropuk kume. An pil melin ninye arye delinamak sal mapu ap, atouk wininamake. Tonda, ‘Nun pil dopnamsiyak’ tenen, yuk mutuku nang bukni, yo bok arye dekuka boyamunce, an aik delilyam nang ap, sikce delinamak sal mapu ap, sik den bam bol mouse ning sekenamake.

13Winipmunyopura, sik nong bol deice ara, lak kilina atonun ning winipnamle. Ara, sik babye, yuk mutuku ninye babye, den bam bol mouse ning sekmunye ning eibikirye, ‘E, ara aninye ap, Allah ap, nyalin yupu nyalalamikce, pia talilanyake’ tenen, kel biknamsiake. 14Ura, yatanye do nirya, anggunce “Kume, na den bam bol mouse ning ara, kum seknutume,” nyaplinye bira, na mapu silip noutamak arye bataknamne. Nara, Allah arye nyapdeipsine. Allah arye, Abraham biti nyabuk.

Allah arye, Sarai el si pununa ati, ‘Sarah,’ nyabuka sisibuk yupu

15Allah arye nyabukopura, ayupu ton dukdongopbuka nyabuk. “Abraham, an kil Sarai bira, el si ‘Sarah,’ tuba kum nyanalyame. Wini talak arye, dipdongobuka oyanamle talak nirya, el si ‘Sarah,’ nyanalyame. (Ibrani yupu deice arye, Sarah nyanyaka deiyok ara, weiknye, el kil ati si silamik.) 16Narye Sarah biti, pia melipnirye, teleb updeipniba, Sarah birye an mi deipnamkile. El ti pia teleb kipdeipnamne. Ninye ayala-ayala weik ati, sik nin bitonun unamle. Elce deipliba, dadeipdanin banamak nang arye, ninye deiyok nang, Raja nang ton tiknamake. Na Allah arye nyapkine,” nyabuka, Allah arye Abraham biti nyalin yupu nyapdeibuk.

17Allah arye Abraham biti nyabukba, Abraham birye, ‘Na ni koproba ati si ereipnun’ tenen, amnyok kanupdongobukce, utenebuk. ‘Kume, nara keting tamun yupa weik, 100 tahun nukuka wisi akunum dase ati, yata wiribuka arye, mi deiptinye do? Aning ara, kum winiptinye,’ tenebukce, dib kum tenebuk deice arye, el kanye pum tam arye akutubuk. Tonda, utenebuk. ‘Kume, na dopse kil Sarah ara, keting tamun yupa weik, 90 tahun wisi akunum dayuk anya arye, yata wiribuka akil arye mi deiptu do? Mi kum deiptue’ tenen, dib kum tenebuk. 18Abraham birye utenebukce, duknubuka, Allah ati nyabuk. “Yo na nio, anyapmanilam ning ara, winipnamnile. Na mi Ismael biti, teleb kipnamnilame,” nyabuk.

19Nyabukura, Allah arye tamubuka nyabuk. “Kume, ami ati kum nyapkine. Ance doplum kil Sarah birye, sal mi dipkoprob deipnamkile. Deipkileba, ami el si ara, Isak nyanamlyame. Narye anti, “Winipnamkine, winipnamkine,” nyapmakin yupu, pia nyalin yupu ara, an mi koprop Isak ap, Isak birye deipliba, dadeipdanin binamak nang ati winipnamne. 20An mi Ismael bira, ance moropmanilam touk, ami ati teleb kipdeipnamne. Teleb ubuka melilamnye ani, aminyan el tam nang, pia weik upnin banamake. Ismael birye deipliba, dadeipdanin banamak nang arye, ninye deiyok nang 12 tiknamake.

21Winipnamak bukni, narye nyalin yupu nyapdeipmakin ning ara, ayupu ara, an mi koprop Isak biti nyapmakine. Ara asum, awala aunmanam touk, aketing tamun akunum uplyopura, oketeng tamun tonok ton noutam ara, an ap, an kil Sarah ap, neika maprumunyeura, sal mi tonok deipnamrume.” Allah arye, Abraham biti nyabuk.

22Nyabukopura, Allah arye Abraham dam batakuka yukak bindobuk. 23Ura, asum aryuk, Abraham birye, el mi Ismael ap, el aik unmek nang ap, el mapu noutamak unmek mapu ap, nirya dobukabukce, sik den bol mouse ning sekuk. Ara, Allah arye, ‘Winipnamlyame,’ nyapdeiamuk touk, aninguk winibuk.

24-25Atalak ara, Abraham keting tamun yupa ara, 99 tahun akunum wisi danamuk. Abraham el mi ara, keting tamun yupa ara, 13 tahun arye wisi danamuk. 26Abraham el mi Ismael bira, atonun asum aryuk yuk nang arye dobuka, sik den bam bol mouse ning sekik. 27Aning atonun, Abraham el aik ulamik nang ap, mapu ap, el yala nang ap, sik mapu ap, el pil melin nang ap, sik mapu ap nirya ara, sik den bol mouse ning sekik.

Currently Selected:

Kejadian 17: EIPA

Highlight

Copy