Kejadian 13

Abram ap, Lot ap batakdarikce, yuk-yuk bokdarik yupu

1Mesir mutuku nang arye, Abram dobuka, sik mutuku noutamak arye, yakwetebik ati, Mesir mutuku batakuka, tuba tamubuka tonap Negeb mutuku panabuka biyik. Ara, Abram ap, el kil ap, Lot ap, sik bona nirya ap, dobuka biyik. 2Atalak noutamak ara, Abram el weilamuk ning ayala-ayala weik ap, dekna weik ning emas ap, perak ap, weik akunum dololamuka anya arye, bona weik talinanye ulamuk.

3Ura Abram bira, Negeb mutuku bukni, omutuku biyukce, yuk mutuku binuka daunmoka ani, tuba panabukce banmoka ani, aminyan ara, tuba tonap Betel mutuku dana tam, Ai mutuku dana tam, el tenda aik domuk sukumuk tamubuka biyuk. 4Amutuku ara, orketeng tamun deice Allah el si erena ap, arena ap ati, pala keil dobukabukce, keil yangapdeiamuk mutuku anyuk. Amutuku biyukce, Allah el si Yahweh nyabukce, Allah ati morobuk.

5Ura atalak ara, Abram amutuku-amutuku noutam balamuk talak nirya ara, el mi Lot ap balamdik. Abram el weilamuk basam yala-yala weik auamuk touk. Lot babye el domba basam ap, el sapi basam ap, el tenda aik ap, weik taleamuk. 6Neikto touk, balamdik bukni, sik bitinye nirya atonun, aning-aning weik taleamdikce, sik weilamdik ning yala-yala weik ubuka arye, tuku ara, lo mitik ton kum ubukba, ‘Se, yata wiriptinimnye do?’ tenelamdik. Tuku ara, mitik tonun uamuk arye, lo weik kum ubuk. Mitik anun ubuk ati ara, ‘Sik teleb arye neika kum upnamtininye,’ teneprik. 7Tonda, Abram el basam weilamik nang ap, Lot el basam weilamik nang ap arye, pia weik walalamik. Tonda, amutuku noutamak bukni, sik Kanaan yala nang ap, sik Peres yala nang ap, amutuku neika ansinibuka ulamik.

8Sik tuku lo kum mitik anun ubuka anya arye, Abram birye, Lot biti nyabuk. “Amio, na ap, an ap, yu upsiliba, walana ara, bataknaname. Tonda, na basam wein nang ap, an basam wein nang ap, yupu si dalana ara bataktinge. Ura, nunda tonok yala nanguk unyam atia. 9Atikmanamak arye dana-dana tam dipdelyame. Mutuku weik aupmale anya arye, nun yuk-yuk bokdanuka binaname. Nunda, bokdananame. Anda orkwanim tam biminyopura, nara sirik tam binamane. Akumopura, anda asirik tam biminyopura, nara orkwinim tamuk binamane. An kanye arya,” nyabuk.

10Abram birye, nyabukba, Lot birye, amutuku nirya dana-dana tam dipdeyukce, Yordan mekin ap, Yordan lyuak nirya ara, mek weik binamuka anya arye, pia teleb ubukba, eibuk. Amutuku nirya ara, Allah el si Yahweh arye, minop talak kwepdeiamuk mutuku, Eden mutuku atonun, tonda Mesir mutuku noutamak bukni, teleb mutuku si Soar mutuku urasin atonun ubukba, eibukce, kanye deibuk. (Atalak ara Allah arye, Sodom mutuku ap, Gomora mutuku ap, sik wenena ati, uku dopkwetebukce, min kum omuk talak ati nyapne.)

11Lot birye, amutuku nirya dipdeyukce, ‘E, Yordan mekin ap, Yordan lyu mutuku ak nirya ara, pia teleb mutuku,’ tenebuka, bikukce, ‘Narye amutuku uk, dopropnune,’ nyabuka wibuka doprobukce, amutuku tam bana ati, keting yangan tam bisik panabuka biyuk. Bokoldana ati, Abram ap, Lot ap, asukumuk batakdarikce, yuk-yuk birik. 12Abram ara, Kanaan mutuku noutam ulamuk talak ara, Lot bira lyu weik mutuku noutam, weik asik domikak binuka ulamuk. El tenda aik dobukak ara, Sodom mutuku dam dobuk.

13Atalak noutamak ara, sik Sodom mutuku nang ara, sik kanye talima nirya pia malye nanguk ulamik ati, Allah el si Yahweh arye, tenelamuk ning ap, diksukum winilamuk ning nirya ap, talye yaniptabuka, malye-malye weik winilamik. 14Lot ap, Abram ap, akunum batakdarikce, Lot biyukopura, Allah el si Yahweh arye, Abram biti nyabuk. “Abram, an tikmalamak anyuk, dana-dana tam nirya dipdelyame. Iknapye tam ap, ou dabu tam ap, otam keting yangan tam ap, atam keting wekelbalamle tam ap, nirya dipdelyame.

15Anyaka arye, eipmalam mutuku nirya ara, an ap, ance deipminyeba, dadeipdanin banamak nang nirya ap ati, arepnamsine. Arepsiniba, amutuku anggun pia talinamlume. 16Narye meliamsiniba, ance deipminyeba, dadeipdanin banamak nang, an yala nang nirya ara, pia weik upnin banamake. Tukwak mutuku ulye keil wininga atonun, ance deipminyeba, dadeipnamak nang atonun, nukmanto kum, pia weik upnin banamake. Ninye arye, keil wininga nukmanto kum ulamak tonun, an mapu silip ati, ton kum nuknamake.

17An dinmalam mutuku nirya ara, arepnamkin ati, anyaka arye, outam ap, eitam ap, dana-dana tam ap, dipdongobuka banamlyame.” Allah arye, Abram biti nyabuk. 18Ati, Abram birye, el tenda aik domukak, dakuka bobukce, panabuka banmoka ani, Hebron mutuku noutamak bukni, weik yo tikamukak, mutuku si Mamre mutuku binuka ulamuk. Amutuku dam babye, Allah el si Yahweh ati, el si erena ap, el arena ap ati, pala keil dobukura, akeil arye yangapdeibukce, Allah el si Yahweh ati si erebuk.

Currently Selected:

Kejadian 13: EIPA

Highlight

Copy