मत्ति 18
18
झाराङखान्तेङ बाराका हासु?
(मर्कुस ९:३३-३७; लुका ९:४६-४८)
1इङको पहर चात्यागेलाइ इसुकोता लोतेङ हिअ्हि, “सादेलको सारभिता झाराङखान्तेङ बाराका हासु हि?”#लुका २२:२४ 2वा एमि आतुङका जामालहेङ काइतेङ एम्बालाइको माझाता जाअ्पाहि 3रो दोअ्हि, “जातिङको, का नेलाइहेङ दोअ्खा, मन फेरिन्हातेङ नेलाइ आतुइका जामालाइभाइपा माजेङसुन्हा पानु हेअ्लाउ सादेलको सारभिता मादुलस्वाना।#मर्कुस १०:१५; लुका १८:१७ 4जाइ इदोइ आतुइका जामालभाइपाङ ताइमिहेङ नोइका बान्हाइखे, इङको सादेलको सारभिता झाराङखान्तेङ बाराका जेनावा। 5जाइ काङको मिङता इसिका जामालहेङ बान्सा बुझायावा, इङको कासेहेङ दोङ बान्सा बुझायावा।
कुकरमता वालापाका काथागेलाइ
(मर्कुस ९:४२-४८; लुका १७:१-२)
6“कालाउ बुङ हासुङ कार्हुता खान्धुर पाका इदोइ म्हुइकालाइता एमिहेङ जाचता वालापालि भोखे पानु वा परमेस्वरसो निङका डाड खान्तेङ ते इङकोको निरघाता बाराका उन्ठुइको जान्ता धेउपितेङ इङकोहेङ वाङखाराका जाहादिता दुबिपालि रेम्का जेनावा। 7धिकार, इदोइ दुनियाको द्याङगेलाइहेङ जाइ बोमिहेङ बुङ जाचता वालापालि भोखे। कालाउ बुङ धिकार, इङको द्याङहेङ जाइसो कुकरम पालि जाच लोखे।
8“नाङको खुर माकोनु खोकोइ नासेहेङ कुकरम पालि लागाइखे पानु इङकोहेङ चेतेङ थाल्गिल। न्हेलोङ खुर खोकोइ रो जिउसुदाङ हेअ्लाउ मासिका मेता थालन्हाकाखान्तेङ ते भुरुङ दुन्ड्या रो नेङगारा जेङतेङ हेअ्लाउ मानासाका ज्यान निङलि दोङ रेम्का ज्यावा।#मत्ति ५:३० 9नाङको मिँ नासेहेङ कुकरम पालि लागाइनु इङकोहेङ ओल्हेपातेङ थालगिल। न्हेलोङ मिँ चुम्तेङ पातेलको मेता थालन्हाका खान्तेङ ते भुरुङ कान्हा जेङतेङ मानासाका ज्यान निङलि नाङको भाअ्सिङ रेम्का ज्याङ।#मत्ति ५:२९
राम्का पान्ठा तुलना
(लुका १५:३-७)
10“होस पातेङ हिसु, नेलाइ इदोइ म्हुइकालाइता एमिहेङ बुङ आनादर मापासु। हाइदोनु का नेलाइहेङ दोअ्खा, एम्बालाइको रेखदेख पाका सादेलचरगेलाइ सादेलता हितेङहिका काङको परमेस्वर आबाको नजर दिनाङ पातेङहिखे।#लुका १९:१० 11[हाइदोनु का द्याङको चान रामकालाइहेङ बान्चेपालि लोका हिघा।]
12“नेलाइ हाइ ठहर पासुखेना? हिदिङ द्याङको एसाइ भेराता एलोङ भेरा खेङन्हातेङ हानेनु, वा एलोङ कम एसाइहेङ घोकाथामेताङ लाअ्धितेङ इङको खेङन्हातेङ हानेका एलोङहेङ भोलि मान्हावा कुनु? 13जातिङको का नेलाइहेङ दोअ्खा, वा इङकोहेङ निङनु, इदोइ खेङन्हातेङ मान्हेका एलोङ कम एसाइखान्तेङ इङको एलोङको भाअ्सिङ वा हेन्जा लेङचावा। 14एसा दोङ सादेलता हिका नेलाइको आबाको इदोइ लाल्सा हि, इदोइ म्हुइकालाइता एमि बुङ मा मुअ्ताको।
कसुर पाका ओनेको तुलना
(लुका १७:३)
15“नाङको ओने नाङको खिलापता कसुर पाका हिनु, हानितेङ नेलाइ न्हेमि खिनिङ हिलाउ वाको दुस तिङपापि। वा नाङको काथा हिङनु, ना ताइको ओनेहेङ मानिपान्हा।#लुका १७:३ 16कालाउ बुङ वा माहिङनु ताइमिदोफा एमि न्हेमिहेङ चुमपुतेङ वासेहेङ गावाइ हाइदोनु धरमकिताबता दोअ्का भाइपा न्हेमि माकोनु सुमिको दासिसो गोताङ काथा पाक्का ज्याको।#नियम १९:१५ 17इङको एम्बालाइको काथा बुङ हिङलि माकिअ्नु, दलहेङ दोअ्। इङको मन्डलिको काथा बुङ हिङलि माकिअ्नु, वासेहेङ कुकरम रो तिरो ल्होपाकाभाइपाङ फोमपातेङ लाअ्गिल्सु।
18“जातिङको, का नेलाइहेङ दोअ्खा, नेलाइ सुमिङता जेदोङ धेउस्वाना, इङको सादेलता धेउन्हावा। कालाउ नेलाइ सुमिङता जेदोङ खाइस्वाना, इङको सादेलता खाइन्हावा।#मत्ति १६:१९; युहन्ना २०:२३ 19आरोङ का नेलाइहेङ दोअ्ताङका, सुमिङता नेलाइता न्हेमि हिदिङ काथाता मिलितेङ र्हेनु, सादेलता हिका काङको परमेस्वर आबा नेलाइहेङ प्यावा। 20हाइपानु जेता न्हेमि माकुनु सुमि काङको मिङता जोमावा, इन्ता का नेलाइको माझाता ह्याङका।”
माफ मापिका कामत्याको तुलना
(लुका १७:४)
21कालाउ पत्रुस इसुकोता लोतेङ दोअ्हि, “प्रभु, काङको ओने काङको खिलापता कसुर पानु हाइ का वासेहेङ हेअ्खे माफ पिलि? हाइ न्हिअ्खे थिकापा?”#लुका १७:३-४
22इसु वासेहेङ दोअ्हि, “का नासेहेङ दोअ्खा, न्हिअ्खे माको, कालाउ बुङ सुमकुरिते गुना न्हिअ्खे थिकापा!#सिरजाइ ४:२४
23“इदोङखातिर सादेलको सारभि एलोङ राजादोफा दाजेलि दोखे, जाइ ताइको कामत्यादोफा हिसाब र्हुलि लाल्सा पाहि। 24जेलाउ वा हिसाब र्हुलि तेङहि, ते हाजार सोनाको टाका रिन र्हुका एमि वाकोता चुमाहि। 25कालाउ बुङ इङको द्याङ तिरिलि मादोलाउ इङकोको गिर्हि इङकोहेङ, इङकोको बेअ्, चान चामिन्दि रो इङकोको गोताङ सामान पिअ्तेङ रिन चुकाइलि हुकुम पिहि।
26“कालाउ इङको कामत्या तिर्हो थोतेङ गिर्हिको खोकोइता सेउपातेङ बिनइ पालि तेङहि, ‘गिर्हि, आधे दिना थिकापा र्हुम्पि, का नाङको गोताङ रिन चुकायाङका।’ 27कालाउ इङको कामत्याको गिर्हि दायातेङ इङकोहेङ लाअ्पिहि रो इङकोको रिन बुङ मिनाहा पापिहि।
28“कालाउ बुङ इङको कामत्या ओल्हेतेङ हानिलाउ ताइमि दोफाङ कामपाका कामत्यागेलाइता एमिहेङ दुसुहि। जाइ इङकोको एसाइ रुपाको टाकाको रिन हिघाहि। वासेहेङ निरघाता चातेङ इङको दोअ्हि, ‘नाङको रिन तिरे।’
29“कालाउ बुङ दोसाङ कामपाका कामत्या तिर्हो थोतेङ इङकोहेङ बिम्ति पाहि, ‘आधे दिनाथिकापा र्हुम्पि, का नाङको गोताङ रिन चुकायाङका।’ 30कालाउ बुङ इङको माकिअ्हि रो रिन मातिरिपाधाउ वासेहेङ थुनाता ह्वाअ्पिहि।
31“वाकोदोफाङ काम पाका भेनेङ कामत्यागेलाइ इदोइ गोताङ तिङतेङ हेन्जाङ पिर पाहि। एम्बालाइ हानितेङ इदोइ गोताङ काथा ताइको गिर्हिहेङ हिम्पापिहि। 32कालाउ गिर्हि इङको कामत्याहेङ ताइमिकोता काइतेङ दोअ्हि, ‘ओइ आसाति कामत्या, ना कादोफा बिम्ति पान्हा रो का नासेहेङ नाङको रिन मिनाहा पापिघा। 33का नासेहेङ दाया पाकाभाइपा ना बुङ नाङकोदोसा काम पाका कामत्याहेङ दाया पालि मागोइधाना?’ 34कालाउ इङकोको गिर्हि चेरताम्पातेङ इङकोहेङ बुङ गोताङ टाका मातिरिपाधाउ थुनाता ह्वाअ्पिहि।”
35“नेलाइ ताइको ओनेहेङ ताइको कोन्धाङसो माफ मापानु, सादेलता हिका काङको आबा बुङ नेलाइदोफा एन्साङ पावा।”
Currently Selected:
मत्ति 18: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
